Êxodo 4

मूसा अन अदभुत सामर्थ्‍य हासिल माळोद

1 आग मूसा उत्‍तर कोट्‍टुन, "आंदुर नान विश्वास माळतीदील अदिक नांद केळतीदील, बल्‍की अंदार, ‘यहोवा नीनी दर्शन कोटीदील.’" 2 यहोवा आऊन से अंदुन, "नीन कय दा अद येन हुन?" आव अंदुन, "कोल." 3 आव अंदुन, "अदरी भुमी मा हाक्‍कबुळ." याग आव अदरी भुमी मा हाकदुन आग अद हाव बनसेत, अदिक मूसा अदुर मुंदु टु ओळदुन. 4 आग यहोवा मूसा से अंदुन, "कय वाळुसकु अदुर पुछी हुडु कोम, याग आव कय वाळुसकु अदरी हुळदुन आग अद आऊन कय दा मात्‍त कोल बनसेत. कि आ लॉकुर विश्‍वास माळुल कि नीम पुर्वजगोळ परमेश्वर मतलब अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा नीनी दर्शन कोटान." 5 ताकी आ लॉकुर विश्वास माळुल कि "नीम पुर्वजगोळ परमेश्वर मतलब अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा नीनी दर्शन कोटान."

6 बाक यहोवा आऊन से ईद भी अंदुन, "तान कय याद्‍दा मा ईटकु झाक्‍स." इदुरसाटी आव तान कय याद्‍दा मा ईटकु झाक्‍स बुट्‍टुन; बाक याग अदरी तेगदुन आग येन नोळदुन कि आऊन कय कोढ़ इन कारण बरफ इन घाई बिळीद आगेग्‍याद. 7 आग आव अंदुन, "तान कय याद्‍दा मा मात्‍त ईटकु झाक्‍स." आव तान कय याद्‍दा मा ईटकु मात्‍त झाक्‍सदुन; अदिक याग आव अदरी याद्‍दा मा टु तेगदुन रा येन नोळतान कि आऊन पुरा मय पयला अन्द घाई आगेत. 8 आग यहोवा अंदुन, "अगर आंदुर नीन मात इन विश्वास माळतीदील, अदिक पयला चिन्‍ह अक मान्‍सतीदील, रा दुसरा चिन्ह अन विश्‍वास माळ्‍यार. 9 अदिक अगर आंदुर ई येढ्‍ढु चिन्हगोळ्द विश्वास माळतीदील अदिक नीन मातगोळी केळालुर, आग नी नील गांगा टु थ्‍वाळासा नीर हुडुकु वंळगींद जमीन मा हाक्‍क बुळेत; अदिक जो नीर नी गांगा दा टु तेगद्‍या अद वंळगींद जमीन मा रक्‍ता बनसेदीत."

10 मूसा यहोवा से अंदुन, "हे नान प्रभु, ना माताळदुर दा निपुण हैलेच, न पयला ईरीन, अदिक न यागी टु नी तान दास उन से मात हेळली हद; ना रा मार्रा अदिक ल्‍यालग्‍या अन तोतळा मंळसा आईन." 11 यहोवा आऊन से अंदुन, "मंळसा अन बाय याव माळ्‍यान? अदिक मंळसा अक मुक्‍का, या बयरा, या नोळावाळा, या कुढ्‍ढ, ना यहोवा अक बिटकु मात्‍त याव माळतान? 12 ईग होग, ना नीन दण्ण इन सांगुळ ईतकु जो नानी अनोद ईत्‍तीत अद नीनी कल्‍सतोगाईन." 13 आव अंदुन, "हे नान प्रभु, कृपया यावारा दुसरा अक कळु कोम." 14 आग यहोवा अन गुस्सा मूसा मा भळकुस्‍त अदिक आव अंदुन, "येन नीन वार्ट लेवीय वंश इन हारून आल्‍लच? नानी निश्‍चय आद कि आव माताळदुर दा निपुण आन, अदिक आव नीन से मुलाकात इक होटकु बरतान; अदिक नीनी नोळकु मन दा खुश आदान. 15 नी आऊन से मात्त माळेत, अदिक आऊक हेळेत, कि येन माळोद आद, ना आऊक अदिक नीन इक माताळली मदत माळाईन अदिक नीम इक येन माळोद आद, ‘कलसाईन.’ 16 हारून नीन दी टु लॉकुर से मातगोळ माळतेला ईत्‍तान; आव नीन साटी बाय इन दण्ण अदिक नी आऊन साटी परमेश्वर उन घाई ठहरूस्‍या. 17 अदिक नी ई कोल इक कय दा हुडुकु ओय, अदिक ईदुर देल अच चिन्हगोळी तोर्सेत."

मूसा अन मिस्त्र द्‍याश वापस बरोद

18 आग मूसा तान मॉव यित्रो अन हात्‍ती वापस बंदुन अदिक आऊन से अंदुन, "नानी सार माळ कि ना मिस्त्र दा ईरावाळेर तान वार्टुर हात्‍ती होगकु नोळाईन कि आंदुर ईगासताका जीत्‍ता आर या ईला." यित्रो अंदुन, "कुशल देल होग." 19 ✝4:19 प्रेरितगोळ 7:34; मत्ती 2:20अदिक यहोवा मिद्यान द्‍याश दा मूसा से अंदुन, "मिस्त्र अक वापस होटोग; यतिकी जो मंळसागोळ नीन जीव इन प्यासा ईरोर आंदुर सप्‍पा सोतोग्यार." 20 आग मूसा तान हिंग्‍स अदिक चिकोरी गदा मा येर्सकु मिस्त्र द्‍याश दी परमेश्वर उन आ कोल इक कय दा हुडुकु वापस होदुन.

21 आग यहोवा मूसा से अंदुन, "याग नी मिस्त्र दा पोहचुस्‍या रा ध्‍यान ईटेत कि जो चमत्कार ना नीन वश दा माळीन आ सप्‍पा अक फिरौन उक तोर्सेत; लेकीन ना आऊन मन इक कठोर माळाईन, अदिक आव नान प्रजा अक होगगोळतीदील. 22 ✝4:22 व्यवस्थाविवरण 1:31; यिर्मयाह 31:9अदिक नी फिरौन से अनेत, ‘यहोवा ईद अनतान, कि इस्त्राएल नान धोळ पार हुन, 23 ✝4:23 निर्गमन 12:29अदिक ना जो नीन से अंद कोंडीन नान पार उक होगगोळ कि आव नान स्यावा माळ्‍यान; अदिक नी ईगासताका आऊक होग गोटीदील, ई कारण ना ईग नीन धोळ पार उक घात माळाईन.’"

24 ✝ 4:24 उत्पत्ति 17:14; 32:25 आग हींग आत कि हादी मा ईरोद जागा दा यहोवा मूसा से मुलाकात माळकु आऊक कोंद बुळोद चाहासदुन. 25 आग सिप्पोरा ऊंद तेज चकमक कल्‍ल हुडुकु तान पार उन खतना माळ बुट्टुर, अदिक मूसा अन कालगोळ मा ईद अंदकु भीट बुट्‍टुर, "निश्‍चय नी नान साटी रक्‍ता वाहुसावाळा नान गांड्‍ड हुय." 26 आग यहोवा आऊक बिट बुट्‍टुन. आ समय खतना अन कारण आक माताळदुर, "नी रक्‍ता वाहुसावाळा गांड्‍ड हुय."

27 आग यहोवा हारून से अंदुन, "मूसा से मुलाकात माळली आळी दा होग." आव होदुन अदिक परमेश्वर उन पर्वत मा आऊन से सिकदुन अदिक आऊन पवित्र चुम्‍बन ताकोंडुन. 28 आग मूसा हारून उक ईद हेळसुसदुन कि यहोवा येन येन मातगोळ हेळकु आऊक कळ्‍यान, अदिक याता याता चिन्ह तोरसोद आग्‍या आऊक कोटान. 29 आग मूसा अदिक हारून होगकु इस्त्राएलीगोळ्‍द सप्‍पा पुर्वजगोळी जमा माळदुर. 30 अदिक यास मातगोळ यहोवा मूसा से अंदीदुन अद सप्‍पा हारून आंदरी केळ्‍सदुन, अदिक लॉकुर कण्णगोळ मुंद अव चिन्ह भी तोर्सदुर. 31 ✝4:31 निर्गमन 14:31; यूहन्ना 2:11अदिक लॉकुर आंदुर विश्वास माळदुर; अदिक ईद केळकु कि यहोवा इस्त्राएलीगोळ्‍द सुधी ताकोंडान अदिक आंदुर दुखगोळ मा दृष्‍टी माळ्‍यान, आंदुर म्यांडा बांग्‍सकु दण्‍डवत माळदुर.