उत्पत्ति 13

अब्राहम अदिक लूत उन अलग आगोद वर्णन

1 आग अब्राहम तान हिंग्‍स अदिक तान सप्‍पा संपत्ती हुडुकु, लूत उक भी सांगुळ हुडुकु, मिस्त्र अक बिटकु कनान इन दक्षिण द्‍याश दा बंदुन. 2 अब्राहम मर्र-म्यांडागोळ, वस्‍ता-गोसी, अदिक व्‍हान्‍ना बेळ्ली इन हापाळ धनी ईरोन. 3 बाक आव दक्षिण द्‍याश टु नळुकु बेतेल इन हात्‍ती अदा जागा मा पोहचुसदुन, येल आव पयले तान ड्‍यारा नीदरूसीदुन, जो बेतेल अदिक ऐ इन बीच दा आद. 4 ईद जागा आ वेदी इन हुन, यदरी आव पयले माळीदुन; अदिक अल अब्राहम मात यहोवा से प्रार्थना माळदुन.

5 लूत उन हात्‍ती भी, जो अब्राहम उन सांगुळ नळोन, मर्र-म्यांडागोळ, वस्‍ता-गोसीगोळ, अदिक ड्‍यारा ईरव. 6 इदुरसाटी आ द्‍याश दा आ दिनगोळ साटी येक्‍कुल जागा ईला ईरोद कि आंदुर सांगुळल्‍या ईरूल: यतिकी आंदुर हात्‍ती हापाळ धन ईरोद इदुरसाटी आंदुर सांगुळल्‍या ईर सकीदील. 7 अब्राहम अदिक लूत उन मर्र-माट्‍ट, अदिक वस्‍ता-गोसी नोर चरवाहागोळ दा झगळा आत. आ समय दा कनानी अदिक परिज्जी लॉकुर आ द्‍याश दा ईरतोगोर.

8 आग अब्राहम लूत से अनली कुरतुन, "नान अदिक नीन बीच, अदिक नान अदिक नीन चरवाहागोळ बीच दा झगळा आग बाळुल; यतिकी नाव लॉकुर वार्ट-बंधु आयेव. 9 इदुरसाटी नी नान से अलग आगेग, येन नीन मुंद पुरा द्‍याश हैलेच? अगर नी ऊजवा कय दी होद्‍या, रा ना डाक्‍या कय दी होगाईन; अगर नी डाक्‍या कय दी होद्‍या, रा ना ऊजवा कय दी होगाईन."

10 आग लूत कण्‍ण नेगुकु, यरदन गांगा अन हात्‍ती गोळोद सप्‍पा तराई नोळदुन कि अद सप्‍पा सिंचकु आद. यागासताका यहोवा सदोम अदिक गमोरा अक नाश ईला माळीदुन, आगासताका सोअर इन हादी ताका अद तराई यहोवा अन बगीचा, अदिक मिस्त्र द्‍याश इन घाई ऊपजाऊ ईरोद. 11 इदुरसाटी लूत तान साटी यरदन इन सप्‍पा तराई नीवळुस्‍कु पूर्व दी होटोदुन, अदिक आंदुर आबुर-दाबुर से अलग आगेदुर. 12 अब्राहम कनान द्‍याश दा ईत्‍तुन, लेकीन लूत आ तराई इन नगरगोळ दा ईरली कुरतुन; अदिक तान ड्‍यारा सदोम इन हात्‍ती नीदरूसदुन. 13 सदोम इन लॉकुर यहोवा अन लेखा दा हापाळ बुरा अदिक पापी ईरोर.

अब्राहम उन हेब्रोन उक होगोद

14 याग लूत अब्राहम से अलग आगेदुन आग अदुर बाद्‍दा यहोवा अब्राहम से अंदुन, "कण्‍ण नेगुकु या जागा मा नी आय अल टु उत्‍तर-दक्षिण, पूर्व-पश्‍चिम, नाकु दी नोळ. 15 यतिकी याट जमीन नीनी कांळ्सतद, आ सप्‍पा जागा ना नीनी अदिक नीन वंश इक युग युग इन साटी कोळाईन. 16 अदिक ना नीन वंश इक पृथ्‍वी इन धुळा अन किनकागोळ घाई माळाईन, ईल ताका कि जो यावारा पृथ्‍वी इन धुळा अन किनकागोळी आळु सक्‍यान आवा नीन वंश भी आळु सक्‍यान. 17 येळ, ई द्‍याश इन लंबाई अदिक चौळाई दा नळु वयाळ, यतिकी ना अदरी नीनी का कोळाईन." 18 ईदुर बाद्‍दा अब्राहम तान ड्‍यारा बिचकु, मम्रे अन बांज मार्रगोळ बीच जो हेब्रोन दा ईरव, होगकु ईरली कुरतुन; अदिक अल भी आव यहोवा अन्द ऊंद वेदी माळदुन.