उत्पत्ति 42

यूसुफ उन वार्टुर्द मिस्र दा अनाज कोम्मोर साटी बरोद

1 याग याकूब केळदुन कि मिस्त्र द्याश दा अन्‍न आद, आग आव तान चिकोर से अंदुन, "नीव आबुर दाबुर बाय यती नोळेतीर." 2 बाक आव अंदुन, "ना केळीन कि मिस्त्र दा अन्न आद; इदुरसाटी नीव लॉकुर अल होगकु नाम साटी अन्न कोंडकु तरी, यदुर देल ना सायतीदील, बल्‍की जीत्ता ईत्तेव."✝42:2 प्रेरितगोळ 7:12 3 अत: यूसुफ उन हत्त वार्टुर अन्न कोमोर साटी मिस्त्र अक होदुर. 4 लेकीन यूसुफ उन वार्ट बिन्यामीन उक याकूब ईद सोचकु वार्टुर सांगुळ कळीदील कि यागलु हिंग आग बाळुल कि आऊन मा यातोदु मुश्किल बंदकु बिळुल.

5 ई प्रकार जो लॉकुर अन्न कोमली बंदुर आंदुर सांगुळ इस्त्राएल उन पारगोळ भी बंदुर; यतिकी कनान द्याश दा भी भारी अकाल ईरोद. 6 यूसुफ रा मिस्त्र द्याश इन प्रधानमंत्री ईरोन, अदिक आ द्याश इन सप्पा लॉकुरव कय दा आवा अन्न मारतोगोन; इदुरसाटी याग यूसुफ उन वार्ट बंदुर आग जमीन मा बाय इन भार देल बांगकु आऊक नमस्कार माळदुर. 7 आंदरी नोळकु यूसुफ अरू रा कोंडुन, लेकीन आंदुर मुंद भोला आगकु कठोरता अन सांगुळ आंदुर से केळदुन, "नीव येल टु बंदीर?"

आंदुर अंदुर, "नाव रा कनान द्याश टु अन्न कोमोर साटी बंदेव."

8 यूसुफ तान वार्टुरी अरू कोंडुन, लेकीन आंदुर आऊक अरतीदील. 9 आग यूसुफ तान आ कांसागोळी याद माळकु जो आव आंदुर बारा दा नोळीदुन, आंदुर से अनली कुरतुन, "नीव भेदीगोळ हुईर; ई द्याश इन हालत नोळली बंदीर."✝42:9 उत्पत्ति 37:5-9

10 आंदुर आऊन से अंदुर, "ईला, ईला, हे प्रभु, नीन दास तीना वस्तु कोमोर साटी बंदार. 11 नाव सप्पा ऊंद अच आप्प उन चिकोर हुयेव, नाव सच्चा मंळसागोळ आयेव; नीन दासगोळ हूएव भेदीगोळ ईला."

12 आव आंदुर अंदुन, "ईला ईला, नीव ई द्याश इन हालत नोळोर साटी अच बंदीर."

13 आंदुर अंदुर, "नाव नीनोर दास हन्नेळ वार्टुर आयेव, अदिक कनान वासी ऊंद अच मंळसा नोर चिकोर हुयेव, अदिक श्याण्णेव ई समय नाम आप्प उन हाती आन, अदिक ऊंद वार्ट सोतोदुन."

14 आग यूसुफ आंदुर से अंदुन, "ना नीम से अन कोंडीन कि नीव भेदीगोळ हुईर; 15 अत: ई रीति देल नीव परखुसकु आदीर, फिरौन उन जीवन इन कसम, यागासताका नीम श्याण्णेव वार्ट ईल बरालुन आगासताका नीव ईल टु होळ सकालीर. 16 इदुरसाटी तान दा टु ऊंद मंळसा अक कळी कि आव नीम वार्ट उक तरूल, अदिक नीव लॉकुर नाम्द देखरेख दा ईत्तीर; ई प्रकार नीम मातगोळी परखुसकु आदीत कि नीम दा सच्चाई आद का हैलेच. अगर सच्चा ठहरूसतीदील आग रा फिरौन उन जीवन इन कसम नीव सही दा भेदीगोळ सम्सकु आदीर." 17 आग आव आंदरी मुर दिन ताका बंदी माळकु ईटदुन.

18 तीसरा दिशी यूसुफ आंदुर से अंदुन, "ऊंद क्याल्सा माळी आग जीत्ता ईत्तीर; यतिकी ना परमेश्वर उन भय मान्सतीन; 19 अगर नीव सीधा मंळसा हुईर, रा नीम सप्पा वार्टुर दा टु ऊंद मंळसा ई बंदीगृह दा बंदी ईरूल; अदिक नीव तान मान्नावाळेर्द हसु मिटुसोद साटी अनाज वई, 20 अदिक तान श्याण वार्ट उक नान हाती तरी; ई प्रकार नीम मातगोळ सच्चा ठहरूसेव, अदिक नीव कोंदसुसकु आगतीदील."

आग आंदुर हांग अच माळदुर. 21 आंदुर आपस दा अंदुर, "बिलकुल नाव तान वार्ट उन बारा दा दोषी आयेव, यतिकी याग आव नाम से गिळगिळास्कु विनती माळदुन, आग भी नाव ईद नोळकु कि आऊन जीवन ह्यांग संकट दा आद, आऊंद केळीदील; ईदा कारण नाव भी ईग ईद संकट दा बिदकु आयेव."

22 रूबेन आऊन से अंदुन, "येन ना नीम से अंदिदीन कि पार उन अपराधी आगबाळी? लेकीन नीव केळीदील. नोळी, ईग आऊन रक्ता अन बदला ताकोमकु आदीत."✝42:22 उत्पत्ति 37:21-22 23 यूसुफ तान वार्टुर से मात माळोर साटी ऊंद दुसरा भाषा देल क्याल्सा ताकोमोन. इदुरसाटी वार्टुर ईला जानसोर कि यूसुफ आंदुर भाषा जान्सतान. लेकीन आंदुर जो अनतोगोर अदरी यूसुफ केळोन अदिक समसोन. 24 आंदुर मातगोळ से यूसुफ हापाळ दुखी आदुन. इदुरसाटी यूसुफ आंदुर से अलग हटसेदुन अदिक वर्लली कुरतुन. थ्वाळासा समय दा यूसुफ आंदुर हाती बंदुन. आव वार्टुर दा टु शिमोन उक हुळदुन अदिक आऊक बंदी माळदुन याग कि अन्य वार्टुर नोळतेला ईत्तुर.

यूसुफ उन वार्टुर्द कनान वापस होगोद

25 आग यूसुफ आग्या कोट्टुन, कि आंदुरव बॉरागोळी अन्न देल तुमी अदिक ऊंद ऊंद मंळसा बॉरा दा आंदुर पैस्यागोळी भी ईट बुळी, बाक आंदरी हादी इन साटी भोजन वस्तु कोळी. आंदुर सांगुळ हिंग अच माळकु आत. 26 आग आंदुर तान अनाज इन बॉरागोळ इक तान गधागोळ मा लादस्कु अल टु होदुर. 27 आंदुर सप्पा वार्टुर ईळ्‍ल्‍क इक थाम्सदुर अदिक गधा अक चारा कोळोर साटी वार्टुर दा टु ऊंद येनारा अन्न इन साटी तान बॉरा तेरदुन अदिक आव धन तान बॉरा दा नोळदुन. 28 आव तान वार्टुर से अंदुन, "नोळी, जो किमत ना अन्‍न साटी कोटीदीन, अद ईल आद. यावारा नान बॉरा दा ईद धन वापस माळ कोंडान. आंदुर सप्पा वार्टुर हापाळ अंजेदुर. आंदुर आपस दा मातगोळ हेळदुर, परमेश्वर नाम लॉकुर सांगुळ येन माळेत्यान?"

29 आंदुर वार्टुर कनान द्याश दा तान आप्प याकूब उन हाती होदुर. आंदुर जो येनारा आगीत तान आप्प उक हेळदुर. 30 आंदुर अंदुर, "जो मंळसा आ द्याश इन स्वामी आन, आव नाम से कठोरता देल मात हेळदुन, अदिक नामी द्याश इन भेदीगोळ अंदुन. 31 आग नाव आऊन से अंदेव, ‘नाव सीधा लॉकुर आयेव, भेदीगोळ ईला. 32 नाव हन्नेळ वार्टुर ऊंद अच आप्प उन चिकोर हुयेव, ऊंद रा सोत्तुन, लेकीन श्याण्णेव ई समय कनान द्याश दा नाम आप्प उन हात्ती आन.’ 33 आग आ मंळसा जो आ द्याश इन स्वामी आन, नाम से अंदुन, ‘ईदुर देल मालुम आगेदीत कि नीव सीधा मंळसागोळ आईर; नीव ताम दा टु ऊंद इक नान हाती बिटकु तान मान्या वाळेर्द हसु मीटसोर साटी येनारा अनाज वई. 34 अदिक तान श्याण वार्ट उक नान हाती तरी. आग नानी विश्वास आगेदीत कि नीव भेदीगोळ आलच, सीधा लॉकुर आईर. बाक ना नीम वार्ट उक नीम लॉकुर कोट बुळाईन, अदिक नीव ई द्याश इन सांगुळ लेन देन माळ सकीर.’"

35 आग सप्पा वार्टुर तान बॉरागोळ दा टु अन्न तेगोर साटी होदुर अदिक हर ऊंद वार्ट तान धन इन चिला तान अन्न अन बॉरा दा नोळदुन. वार्टुर अदिक आप्प धन इक नोळदुर अदिक आंदुर हापाळ अंजेदुर. 36 आग आंदुरव आप्प याकूब आंदुर से अंदुन, "नीव लॉकुर नानी बिना औलाद इन माळ कोंडीर, नोळी, यूसुफ ईतीदील, अदिक शिमोन भी बंदिदील, अदिक ईग नीव बिन्यामीन उक भी ओयोद चाहासतीर. ईव सप्पा परेशानीगोळ नान मा बंदाव."

37 रूबेन तान वार्ट से अंदुन, "अगर ना आऊक नीन हाती तरतीदील, रा नान येढ्ढु पारगोळ इक कोंद बुळेत; नी आऊक नान कय दा कोट्टबुळ, ना आऊक नीन हाती मात पोहचुस बुळाईन."

38 आव अंदुन, "नान पार नीन सांगुळ होगतीदील; यतिकी आऊन वार्ट सोतोग्यान, अदिक ईग आव आबना आन : इदुरसाटी याता हादी देल नी होद्या, अल अगर आऊन मा यातोदारा विपत्ती बंदीत, आग रा ना नीम कारण ई हाळाबाट्ट इन समय दा दुख इन सांगुळ अधोलोक दा होटोगाईन."