अब्राहम उन लूत उक बीळसोद
1 शिनार उन राजा अम्रापेल, अदिक एल्लासार उन राजा अर्योक, अदिक एलाम उन राजा कदोर्लाओमेर, अदिक गोयीस उन राजा तिदाल उन दिनगोळ दा हिंग आत, 2 कि आंदुर सदोम उन राजा बेरा, अदिक गमोरा अन राजा बिर्शा, अदिक अदमा अन राजा शिनाब, अदिक सबोयीम उन राजा शमेबेर, अदिक बेला जो सोअर भी कहलुसतान, ई राजागोळ्द विरूद्ध युद्ध माळदुन. 3 इंदुर अईदु मुंदुर सिद्दीम हेसुर इन तराई दा, जो खारा समुद्र अन हात्ती आद, एकता माळदुर. 4 हन्नेळ वर्ष ताका रा इंदुर कदोर्लाओमेर उन हात्ती ईतकु स्यावा माळदुर; लेकीन तेरहवा वर्ष दा आऊन खिलाप विद्रोह माळदुर. 5 चौहदावा वर्ष दा कदोर्लाओमेर अदिक आऊन संगी राजा बंदुर, अदिक अशतरोत्कनम दा रपाईयो अक, अदिक हाम दा जूजियोगोळ इक, अदिक शाबेकिर्यातैम दा एमियोगोळ इक, 6 अदिक सेईर हेसुर इन पहाळी मा होरी अक बडुत बडुत आ एल्पारान ताका जो आळी इन हात्ती आद, पोहचुसेदुर. 7 अल आंदुर वापस आगकु एन्मिशपात इक बंदुर, जो कादेश भी कहलुसतद, अदिक अमालेकियों अन पुरा द्याश इक अदिक आ एमोरीगोळी भी जीक्स कोंडुर, जो हससोन्तामार दा ईरतोगोर.
8 आग सदोम, गमोरा, अदमा, सबोयीम, अदिक बेला, जो सोअर भी कहलुसतान; इंदुरव राजा होट्टुर अदिक सिद्दीम हेसुर इन तराई दा, आंदुर सांगुळ युद्ध इन साटी पाँती कटदुर: 9 मतलब एलाम उन राजा कदोर्लाओमेर, गोयीम उन राजा तिदाल, शिनार उन राजा अम्रापेल, अदिक एल्लासार उन राजा अर्योक, ई नाकु मुंदुर्द खिलाप आ अईदु मुंदुर पाँती कटदुर. 10 सिद्दीम हेसुर इन तराई दा येल दलदला मुण्ण इन खॉदरा अच खॉदरा ईरव; सदोम अदिक गमोरा अन राजा ओळ्त ओळ्त अऊर दा बिदोदुर, अदिक जो ऊळदोदुर आंदुर पहाळी मा वोळेदुर. 11 आग आंदुर सदोम अदिक गमोरा अन सप्पा धन अदिक भोजन वस्तुगोळ इक लूट पाट माळकु वोळेदुर. 12 अदिक अब्राहम उन पुतणा लूत, जो सदोम दा ईरतोगोन, आऊक भी आंदुर धन इन सांगुळ ओत कोंडुर.
13 आग ऊंद मंळसा जो ओळकु ऊळदोगीदुन आव होगकु इब्री अब्राहम उक समाचार कोट्टुन; अब्राहम रा एमोरी मम्रे, जो एश्कोल अदिक आनेर उन वार्ट ईरोन, आऊन बांज मार्रगोळ बीच दा ईरतोगोन; अदिक ई लॉकुर अब्राहम उन सांगुळ वादा कटकु ईरोर. 14 ईद केळकु कि आऊन पुतणा बंदी माळकु आग्यान, अब्राहम तान मुर सौ अठराह कल्द मंळसा, युद्ध कौशल दा निपुण दासगोळी हुडुकु जो आऊन कुटुम्ब दा पैदा आगीदुर, अस्त्र-शस्त्र धारण माळकु दान ताका आंदुर्द पीछा माळदुन; 15 अदिक तान दासगोळ्द अलग अलग दल कटकु ईळ्ल्क इक आंदुर मा चळाई माळकु आंदरी कोंद बुट्टुर अदिक होबा ताका, जो दमिश्क इन उत्तर इन दी आद, आंदुर्द पीछा माळदुन. 16 अदिक आव सप्पा धन इक, अदिक तान पुतणा लूत अदिक आऊन धन इक, अदिक आर्तेर इक, अदिक सप्पा बंदीगोळी वापस तंदुन.
मलिकिसिदक राजा
17 याग आव कदोर्लाओमेर अदिक आऊन साथी राजागोळी हारूसकु वापस बरोन, रा सदोम इन राजा, शाबे इन घाटी जो राजा अन घाटी अनकु आगतद, आऊन से भेंट माळली बंदुन. 18 आग शालेम इन राजा मलिकिसिदक, रोट्टी अदिक अंगुर इन रास्सा तंदुन. आव परमप्रधान परमेश्वर उन याजक ईरोन. 19 आग आव आऊक ईद आशीर्वाद कोट्टुन "स्वर्ग अदिक पृथ्वी इक माळावाळा परमप्रधान परमेश्वर उन दी टु अब्राहम धन्य आगुल; 20 परमप्रधान परमेश्वर भी धन्य आन, याव नीन दुश्मनगोळी नीन वश दा माळ कोंडुन. बाक अब्राहम आऊक सप्पा वस्तुगोळ्द हतवा अंश कोट्टुन."
21 आग सदोम इन राजा अब्राहम से अंदुन, "लॉकुरी रा नानी कोळ अदिक धन संपत्ती तान साटी ईट बुळ."
22 अब्राहम सदोम इन राजा से अंदुन, "ना स्वर्ग अदिक पृथ्वी इन परमप्रधान परमेश्वर यहोवा अन कसम ताकोंडीन, 23 आऊन ना ईद किर्या तिनतीन, कि जो येनारा नींद आद अदुर दा टु ना रा ऊंद सूत, अदिक ना जुता अन बंध, अदिक न येनारा वस्तु ताकोमाईन कि नी हिंग अन बाळुल कि अब्राहम नांद अच कारण धनी आग्यान. 24 लेकीन जो येनारा ई हारोदोर तीन कोंडार अदिक आंदुर्द भाग, जो नान सांगुळ होगीदुर मतलब आनेर, एश्कोल, अदिक मम्रे, ना वापस माळतीदील, आंदुर रा तान तान हिस्सा ईट कोमुल."