उत्पत्ति 48

याकूब उन एप्रैम अदिक मनश्शे अक आशीर्वाद कोळोद

1 ई मातगोळ बाद्दा यावारा यूसुफ से अंदुन, "केळ, नीन आप्प बिमार आन." आग आव मनश्शे अदिक एप्रैम हेसुर नोर तान येढ्ढु चिकोरी सांगुळ हुडुकु आऊन हाती होदुन. 2 यावारा याकूब उक हेळ बुट्टुन, "नीन पार यूसुफ नीन हाती बरेत्यान," आग इस्त्राएल तान तान इक संभाळसकु व्हर्स मा कुरतोदुन. 3 अदिक याकूब यूसुफ से अंदुन, "सर्व सर्वशक्तिमान परमेश्वर कनान द्याश इन लूज नगर इन हाती नानी दर्शन कोटकु आशीष कोट्टुन,✝48:3 उत्पत्ति 13:14 4 अदिक अंदुन, ‘केळ, ना नीनी फलवन्त माळकु वाळुसाईन, अदिक नीनी राज्य राज्य अन मंडली इन मूल मंळसा माळाईन, यदुर देल कि अद सदा ताका आंदुर्द तान खुद इन जमीन आगकु ईरूल.’ 5 अदिक ईग नीन येढ्ढु पारगोळ, जो मिस्त्र दा नान बरोर से पयले पैदा आग्यार, आंदुर नानोर अच ठहरूस्यार; मतलब या रीति देल रूबेन अदिक शिमोन नानोर आर, अदा रीती देल एप्रैम अदिक मनश्शे भी नानोर ठहरूस्यार. 6 अदिक आंदुर बाद्दा नीनोर जो सन्तान पैदा आदार, आंदुर नीनोर रा ठहरूस्यार; लेकीन बटवारा अन समय आंदुर तान वार्टुर अच वंश दा आळकु आदार. 7 याग ना पद्दान टु बर तोगीन, आग एप्राता पोहचुसोर थ्वाळासा पयले राहेल कनान द्याश दा, हादी मा, नान मुंद सोतोदुर; अदिक ना आकी अल्या, मतलब एप्राता जो बैतलहम भी कहलुसतद, अदा हादी मा मुण्ण कोट्टीन."✝48:7 उत्पत्ति 35:16-19

8 आग इस्त्राएल यूसुफ उन पारगोळी नोळदुन, आव केळदुन, "ई पारगोळ यार उर?"

9 यूसुफ तान आप्प से अंदुन, "ईंदुर नानोर पारगोळ उर. ईंदुर आ पारगोळ उर यारी परमेश्वर नानी कोटान."

इस्त्राएल अंदुन, "तान पारगोळी नान हाती तर. ना आंदरी आशीर्वाद कोळाईन." 10 इस्त्राएल बाट्ट ईरोन अदिक आऊन कण्णगोळ वळ्लेव ईला ईरव, इदुरसाटी यूसुफ तान पारगोळी तान आप्प उन हाती वोतुन, याकूब पारगोळी चुम्सदुन अदिक याद्दी चीपकुसदुन. 11 आग इस्त्राएल यूसुफ से अंदुन, "ना यागलु ईला सोचीदिन कि ना नीम्द बाय बाक यागलु नोळाईन, लेकीन नोळी, परमेश्वर नीनी अदिक नीन पारगोळी भी नानी तोर्सदुन." 12 आग यूसुफ पारगोळी याकूब उन क्वारा दा टु हुळदुन अदिक आंदुर आऊन आप्प उन मुंद प्रणाम माळोर साटी बांगदुर.

13 यूसुफ एप्रैम उक तान उजवा दी माळदुन अदिक मनश्शे अक तान डाक्या दी, ई प्रकार एप्रैम इस्त्राएल उन उजवा दी ईरोन अदिक मनश्शे याकूब उन डाक्या दी ईरोन. 14 लेकीन इस्त्राएल तान कय इन दिशा बदलुसकु तान उजवा कय श्याण पार एप्रैम उन ताल्ला मा ईटदुन अदिक आग डाक्या कय इक याकूब उन धोड्डेव पार मनश्शे अन ताल्ला मा ईटदुन, यतिकी मनश्शे अन जनम पयले आगीत. 15 अदिक याकूब यूसुफ उक आशीर्वाद कोट्टुन अदिक अंदुन,

"नान पुर्वज अब्राहम अदिक इसहाक नाम परमेश्वर उन उपासना माळदुन

अदिक आवा परमेश्वर नान जीवन इक संभाळसावाळा बन्सदुन.

16 अदिक आवा दूत नानी सप्पा कष्टगोळ देल उळ्सदुन, अदिक नान प्रार्थना आद कि ई पारगोळी आव आशीर्वाद कोळुल,

ईग ई पारगोळी नान हेसुर सिक्‍कीत, आंदरी नाम पुर्वज अब्राहम अदिक इसहाक उन हेसुर सिक्‍कीत, ना प्रार्थना माळतीन कि

आंदुर ई धरती मा धोड्डेव परिवार अदिक राष्ट्र आदार."

17 यूसुफ नोळदुन कि आऊन आप्प एप्रैम उन ताल्ला मा उजवा कय ईट्यान, आव यूसुफ उन खुश माळ सकीदील, यूसुफ तान आप्प उन कय हुळदुन, आव आऊन कय एप्रैम उन ताल्ला मा टु सरकुसकु मनश्शे अन ताल्ला मा ईटोद चाहासोन. 18 अदिक यूसुफ तान आप्प से अंदुन, "हे आप्पा, हिंग ईला; यतिकी धोळ पार ईवा हुन; तान उजवा कय ईऊन ताल्ला मा ईट्ट."

19 लेकीन आऊन आप्प अंदुन, "पारा, ना जान्सतीन, मनश्शे अन जनम पयले आग्याद अदिक आव महान आदान, आव हापाळ सा लॉकुरव आप्प भी आदान, लेकीन श्याण्णेव वार्ट धोड्डेव वार्ट उन से धोड्डेव आदान अदिक श्याण्णेव वार्ट उन परिवार हापाळ धोळ्द आदीत."

20 ई प्रकार इस्त्राएल आ दिशी आंदरी आशीर्वाद कोट्टुन, आव अंदुन, "इस्राएल इन लॉकुर नीन हेसुर आशीर्वाद कोळोर साटी प्रयोग माळ्यार, नीम कारण कृपा हासील माळ्यार, लॉकुर प्रार्थना माळ्यार, परमेश्वर नीमी एप्रैम अदिक मनश्शे घाई माळुल." ई प्रकार याकूब एप्रैम उक मनश्शे से धोड्डेव माळदुन.

21 आग इस्त्राएल यूसुफ से अंदुन, "नोळी नान सायोद समय हाती होट्ट बंदाद. लेकीन परमेश्वर नीम सांगुळ ईग भी ईत्तान, आव नीमी नीम पुर्वजगोळ द्याश ताका वापस वोतान. 22 ना नीमी हिंग येनारा कोटीन जो नीम वार्टुरी कोटीदील. ना नीमी अद पहाळी कोळतीन यदरी ना एमोरी लॉकुर से जीकसीदिन, आ पहाळी साटी ना तान तलवार अदिक तान बाण देल युध्द माळीदिन अदिक नान जीत आगीत."