1 आग अब्राहम मात्त ऊंद आर्त से मदा माळदुन यार्द हेसुर कतूरा ईरोद. 2 आकिन से जिम्रान, योक्षान, मदना, मिद्यान, यिशबाक, अदिक शूह पैदा आदुर. 3 योक्षान देल शबा अदिक ददान पैदा आदुर; अदिक ददान उन वंश दा अश्‍शूरी, लतूशी, अदिक लुम्‍मी लॉकुर आदुर. 4 मिद्यान उन पार एपा, एपेर, हनोक, अबीदा, अदिक एल्‍दा आदुर, ईंदुर सप्‍पा कतूरा अन चिकोर आदुर.

5 इसहाक उक रा अब्राहम तान सप्‍पा येनारा कोट्‍टुन. 6 लेकीन तान रखैल उन चिकोरी, थ्‍वाळा थ्‍वाळा कोटकु तान जीत्‍ता जीवन दा तान पार इसहाक उन हात्‍ती टु पूर्व दिशा दा कळु कोंडुन.

7 अब्राहम उन पुरा ऊमर ऊंद सौ पचहत्तर वर्ष इन आत. 8 अब्राहम उन दीर्घायु आगा कारण मतलब पुरा हाळाबाट अवस्‍था दा जीव बीटोत; अदिक आव तान लॉकुर दा होगकु सीकेदुन. 9 आऊन पार इसहाक अदिक इश्‍माएल, हित्ती सोहर उन पार एप्रोन इन मम्रे अन्द पूर्व दिशा अन्द जागा दा, जो मकपेला अन गुफा ईरोद, अल आऊक मुण्‍ण कोट्‍टुर; 10 मतलब जो जागा अब्राहम हित्‍तीगोळ हाती टु कोंडीदुन; अल्‍या अब्राहम, अदिक आऊन हिंग्‍स सारा, येढ्‍ढु मुंदरी मुण्‍ण कोटकु आत.✝25:10 उत्पत्ति 23:16 11 अब्राहम उन सोत्‍तुर बाद्‍दा, परमेश्वर आऊन पार इसहाक उक आशीष कोट्‍टुन, जो आ समय लहैरोई हेसुर इन भाँय इन हात्ती ईरतोगोन.

12 अब्राहम उन पार इश्‍माएल जो सारा अन मिस्त्री दासी हाजिरा देल पैदा आगीदुन, आऊन ईद वंशावली आद. 13 इश्‍माएल उन चिकोर्द हेसुर अदिक वंशावली ईद हुन: मतलब इश्‍माएल उन धोळ पार नबायोत, बाक केदार, अदबएल, मिबसाम, 14 मिश्‍मा, दूमा, मस्सा, 15 हदद, तेमा, यतूर, नापीश, अदिक केदमा. 16 इश्‍माएल उन चिकोर ईंदुरा आदुर, अदिक ईंदुरवा हेसुर इन अनुसार ईंदुर ऊरानव, अदिक छावनीगोळ हेसुर भी बीद्‍दव; अदिक ईंदुर अच हन्‍नेळ मुंदुर तान तान कुल इन प्रधान आदुर. 17 इश्‍माएल उन पुरा ऊमर ऊंद सौ सैंतीस वर्ष इन आत; आग आव सोतोदुन, अदिक तान सोतकु पुर्वजगोळ दा होगकु सीकेदुन. 18 अदिक आऊन वंश हवीला से शूर ताका, जो मिस्त्र द्याश इन पूर्व अश्शूर इन हादी मा आद, बसुसेदुर; अदिक आदुर्द भाग आदुर्द सप्‍पा वार्टुर न्याड्या दा बिदकु आद.

19 अब्राहम उन पार इसहाक उन वंशावली ईद हुन; अब्राहम से इसहाक पैदा आदुन; 20 अदिक इसहाक चालीस वर्ष इनव आगकु रिबका अक, जो पद्‍दनराम इन वासी, अरामी बतूएल इन पोर, अदिक अरामी वंशीय लाबान इन आकतींग ईरोर, मदा माळदुन. 21 इसहाक उन हिंग्‍स रा बाँझ ईरोर इदुरसाटी आव तान हिंग्‍स उन दी टु यहोवा से विनती माळदुन; अदिक आऊन विनती केळदुन, ई प्रकार आऊन हिंग्‍स रिबका गर्भवती ईत्‍तुर. 22 चिकोर आकिन गर्भ दा आबुर दाबुर इक धक्‍का कोळतेला ईरतोगोर. आग रिबका अंदुर, "ईद येन आगेत्‍याद नान सांगुळ?" अदिक आक यहोवा से केळली होदुर.

23 यहोवा आकिन से अंदुन,

"नीन गर्भ दा येढ्‍ढ जातीगोळ आव,

आंदुर दा टु येढ्‍ढ समूह अन लॉकुर होटकु अलग आदार;

ऊंद समूह अन लॉकुर दुसरा से येक्‍कुल ताकतवर आदार,

अदिक धोड्‍डेव श्‍याण्णेव उन स्यावा माळ्‍यान."✝25:23 रोमियों 9:12

24 याग आकिन दुख इन समय बत्‍त, रा आकिन गर्भ दा जुळवा चिकोर ईरोर. 25 जो पयला पार आदुन आव क्याचांद ईरोन, अदिक आऊन पुरा शरीर चुट्‍टगोळ देल तुमकु ईरोद; ईद कारण आऊन हेसुर एसाव ईटकु आत. 26 ईदुर बाद्‍दा आऊन वार्ट उन जनम आत, जो तान कय देल तान वार्ट एसाव उन काल हुडुकु ईरोन; आग आऊन हेसुर याकूब*25:26 अळंगा हाकावाळा या कपट देल दुसरा अक सरकुसावाळा ईटकु आत. याग रिबका आऊक जनम कोट्‍टुर आग इसहाक साठ वर्ष इन ईरोन.

27 बाक आ चिकोर धोड्‍डेर आगली कुरतुर अदिक एसाव रा वनवासी आगकु चालाक शिकार आळावाळा आगेदुन, लेकीन याकूब सीधा मंळसा ईरोन, अदिक ड्‍यारागोळ दा ईरतोगोन. 28 एसाव इसहाक उन प्यारा ईरोन यतिकी इसहाक उक मांस हापाळ वळ्‍लीद हततोगोद, लेकीन याकूब रिबका अन प्यारा ईरोन.

29 ऊंद घन याग याकूब कम बेक्‍की दा येनारा बेईसोन, आग एसाव आळी टु बंदुन अदिक आव हापाळ हस्‍तकु ईरोन. 30 आव याकूब से अंदुन, "नानी हापाळ हसू हत्‍याद; नी जो बेईसीत्‍या, जल्‍दी माळकु अदुर दा टु नानी येनारा तीनली कोळ." ईदा कारण आद कि आऊक एदोम भी अनकु आग्‍याद.

31 लेकीन याकूब आऊन से अंदुन, "पयले नी तान धोळ आगोद अधिकार नानी कोळ."

32 एसाव अंदुन, "नोळ, हसु देल नान जीव होळेत्‍याद; धोळ आगोद अधिकार देल नानी येन फायदा आद?"

33 लेकीन याकूब अंदुन, "रा पयले नी नान से कसम ताकोम."

आग एसाव कसम तीनकु तान धोळ आगोद अधिकार याकूब उन कय दा मार कोंडुन.✝25:33 इब्रानिगोळ 12:16 34 आग याकूब एसाव उक येनारा रोट्‍टी अदिक बेईस्‍द मसूर इन ताग्गा कोट्‍टुन. एसाव तिंदुन कुळदुन, अदिक येदकु होटोदुन. ई प्रकार एसाव तान धोळ आगोद अधिकार इक तुच्‍छ सम्‍सदुन.