उत्पत्ति 26

इसहाक उन गरार दा ईरोद

1 आ द्‍याश दा अकाल बीत्‍त. हिंग अच अकाल अब्राहम उन समय दा भी बिद्दीत अदिक इसहाक गरार दा पलिश्तीगोळ राजा अबीमेलेक उन हाती होदुन. 2 यहोवा इसहाक उक दर्शन कोटकु अंदुन, "मिस्त्र द्‍याश इक होगबाळ; लेकीन आ द्‍याश दा ईर, येल ना हेळाईन. 3 येनारा समय साटी ई द्‍याश दा ईर, अदिक ना नीन सांगुळ ईराईन अदिक नीनी आशीष कोळाईन. ना ईद द्‍याश नीनी अदिक नीन वंश इक कोळाईन अदिक नीन आप्‍प अब्राहम से माळ्‍द तान वादा अक पुरा माळाईन,✝26:3 उत्पत्ति 22:16-18 4 ना नीन वंश इक आकाश इन तारागन इन घाई माळाईन; अदिक ना नीन वंश इक ईद सप्‍पा द्‍याश कोळाईन, अदिक पृथ्‍वी इन सप्‍पा जातीगोळ नीन वंश इन कारण तानीक धन्‍य मानसीत. 5 यतिकी अब्राहम नान केळदुन, अदिक जो ना आऊक सौप्‍सदिन अदरी अदिक नान आग्‍यागोळ, विधिगोळ अदिक व्यवस्था अन पालन माळदुन."

6 इदुरसाटी इसहाक गरार नगर दा ईतोदुन. 7 याग आ जागा नोर लॉकुर आऊन हिंग्‍स उन बारा दा केळदुर, आग आव अंदुन, "आक नान आकतींग हुळ," यतिकी आव ईद अनोर से अंजोन, "आक नान हिंग्‍स हुळ." आव सोचोन, "ई जागा दाकळोर लॉकुर रिबका अन कारण शायद नानी कोंद बुट्‍टार, यतिकी आक सुंदर आर."✝26:7 उत्पत्ति 12–13; 20:2 8 याग आऊक अल ईरतेला हापाळ दिनगोळ आदव, आग ऊंद दिन पलिश्तीगोळ राजा अबीमेलेक खिळकी दा टु येन नोळदुन कि इसहाक तान हिंग्‍स रिबका अन सांगुळ प्यार माळेत्‍यान. 9 आग अबीमेलेक इसहाक उक कारसुसकु अंदुन, "आक रा सही दा नीन हिंग्‍स हुळ; बाक नी आकी यती तान आकतींग अंद?"

इसहाक उत्‍तर कोट्‍टुन, "ना सोचीदिन, कि हिंग आगबाळुल कि आकिन कारण नान सायोद आगुल."

10 अबीमेलेक अंदुन, "नी नाम से ईद येन माळ्‍द? हिंग रा प्रजा दा टु यावारा नीन हिंग्‍स उन सांगुळ सही दा कुकर्म माळ सकतान, अदिक नी नामी पाप दा फसुसाईद." 11 इदुरसाटी अबीमेलेक तान पुरा प्रजा अक आग्‍या कोट्‍टुन, "जो यावारा आ मंळसा अक या आ आर्त इक मुट्‍यान, आव सही दा कोंदसुसकु आदान."

12 इसहाक आ द्‍याश दा खेती माळदुन अदिक आऊक अदा वर्षी सौ गुणा फसल सिक्‍त, यतिकी यहोवा आऊक आशीष कोट्‍टुन. 13 आव धनवान आगेदुन; आऊन धन वाळुसतेला ईत्‍त अदिक आव हापाळ धनवान आगेदुन. 14 आऊन हाती ईस मर्र-म्यांडा, जनावर अदिक सेवक आगेदुर कि पलिश्तीगोळ आऊन से होतली कुरतुर. 15 इदुरसाटी आ सप्‍पा भायगोळी, जो आऊन आप्‍प अब्राहम उन सेवकगोळ आऊन आप्‍प उन समय अगळीदुर, पलिश्तीगोळ मुण्‍ण देल मुचकु बंद माळ बुट्‍टुर. 16 आग अबीमेलेक इसहाक से अंदुन, "नी नाम हाती टु दुर होटोग, यतिकी नी नाम से हापाळ येक्‍कुल धनवान आगेग्‍या."

17 इदुरसाटी इसहाक अल टु होटोदुन अदिक गरार घाटी दा ड्‍यारा नीदरूस्‍कु अल ईरली कुरतुन. 18 इसहाक आ भायगोळी मात अगळुसदुन, जो आऊन आप्‍प उन समय दा अगुळकु आगीदव, अदिक अवरी पलिश्तीगोळ अब्राहम उन सोत्‍तुर बाद्‍दा मुच्‍च कोंडीदुर, अदिक आव आ भायगोळ्‍द अवा हेसुर ईटदुन जो आऊन आप्‍प ईटीदुन.

19 इसहाक उन सेवकगोळी घाटी दा अगळा वती अल ऊंद सय नीर इन झरना सीक्‍त. 20 ईदुर मा गरार इन चरवाहागोळ इसहाक उन चरवाहागोळ सांगुळ झगळा माळदुर अदिक अंदुर, "ईद नीर नाम्‍द हुन!" इदुरसाटी इसहाक आ भाय इन हेसुर ऐसेक ईटदुन, यतिकी आंदुर आऊन से झगळा माळदुर.

21 आग आंदुर दुसरा भाय अगुळदुर, लेकीन आंदुर अदुर मा भी झगळा माळदुर; इदुरसाटी इसहाक आ भाय इन हेसुर सितनाह*26:21 दुश्मनी अन भाय ईटदुन. 22 आग आव अल टु होटोदुन अदिक ऊंद अदिक भाय अगुळदुर, अदिक ईदुर मा याऊ झगळा माळीदिल. इसहाक ईद अनकु आ भाय इन हेसुर रहोबोत*26:22 चौळा जागा ईटदुन, "ईग यहोवा नामी हापाळ नीर कोटान, अदिक नाव ई द्‍याश दा उन्‍नती माळेव."

23 अल टु इसहाक बेर्शेबा अक होदुन. 24 अदा ईळ्लकी यहोवा आऊक दर्शन कोटकु अंदुन, "ना नीम आप्‍प अब्राहम उन परमेश्वर हुईन. अंजबाळ, यतिकी नान नीन सांगुळ आईन; ना नीनी तान सेवक अब्राहम उन कारण आशीष कोळाईन अदिक नीन वंश इक वाळुसाईन." 25 आग इसहाक अल ऊंद वेदी माळदुन अदिक यहोवा अन आराधना माळदुन. अल आव तान ड्‍यारा नीदरूसदुन अदिक अल आऊन सेवकगोळ ऊंद भाय अगुळदुर.

इसहाक अदिक अबीमेलेक उन न्याड्या समझौता

26 आग अबीमेलेक तान सलाहकार अहुज्‍जत, अदिक तान सेनापती पीकोल उक सांगुळ हुडुकु, गरार नगर टु आऊन हाती होदुन.✝26:26 उत्पत्ति 21:22 27 इसहाक आंदुर से अंदुन, "नीव नान से दुश्मनी माळकु तान हाती टु तेगु बुटीदिर, ईग नान हाती यती बंदीर?"

28 आंदुर अंदुर, "नाव साफ-साफ नोळदेव कि यहोवा नीन सांगुळ आन; इदुरसाटी नाव अंदेव, ‘नीन अदिक नाम बीच दा कसम इन वादा ईर पायजे.’ इदुरसाटी नाव नीन से ऊंद वादा माळोद चाहसतेव. 29 कि ह्‍यांग नाव नीनी मुठीदिल, बल्‍की नीन सांगुळ सिर्फ भलाई माळेव, अदिक नीनी कुशल क्षेम देल सार माळदुन, अदुर अनुसार नी भी नाम से यातोदु बुराई माळतीदील. अदिक नी प्रभु उन आशीष सिक्त मंळसा हुय." 30 आग इसहाक आंदुर साटी ऊंद भोज इन आयोजन माळदुन, अदिक आंदुर तिंदुर अदिक कुळदुर. 31 दुसरा दिशी एकदम व्हातर्‍या येदकु आबुर दाबुर सांगुळ कसम ताकोंडुर. आग इसहाक आंदुर सार माळदुन, अदिक आंदुर शांती देल आ जागा टु होटोदुर.

32 आ दिशी इसहाक उन सेवकगोळ बंदकु आऊक आ अगुळकु भाय इन बारा दा हेळदुन, यदरी आंदुर अगळीदुर, आंदुर अंदीदुर, "नामी नीर सिकेग्‍याद!" 33 इसहाक आ भाय इन हेसुर शिबा*26:33 किर्‍या ईटदुन, अदिक ईंद ताका आ नगर इन हेसुर बेर्शेबा*26:33 कसम इन भाय आद.

एसाव इन विदेशी हिंग्स उर

34 याग एसाव चालीस वर्ष इन आदुन, आग आव हित्ती बेरी अन पोर यहूदीत, अदिक हित्‍ती एलोन उन पोर बासमत इक हिंग्‍स माळदुन; 35 अदिक ई आर्तेर इन कारण इसहाक अदिक रिबका अन मन इक दुख आत.