मात्त राज्यगोळी हासिल माळोद आद
1 यहोशू बाट्ट अदिक हापाळ ऊमर ईनव आगेगीदुन; अदिक यहोवा आऊन से अंदुन, "नी बाट्ट अदिक हापाळ ऊमर ईनव आगेग्या, अदिक हापाळ द्याश ईतोग्याव, जो इस्त्राएल इन अधिकार दा ईगासताका बरलीकाव. 2 ईव द्याश ईतोग्याव, मतलब पलिश्ती इन सप्पा प्रांन्त, अदिक सप्पा गशूरी द्याश 3 मिस्त्र अन मुंद शीहोर गांगा टु हुडुकु उत्तर इन दी एक्रोन इन सीमा ताका जो कनानीगोळ्द भाग आळुकु आगतद; अदिक पलिश्ती इन अईदु सरदार, मतलब गाजा, अश्दोद, अश्कलोन, गत, अदिक एक्रोन इन लॉकुर, अदिक दक्षिणी अदिक अव्वी जाती भी, 4 बाक अपेक नगर अदिक एमोरियो अन सीमा ताका कनानीगोळ्द सप्पा द्याश अदिक सीदोनीगोळ्द मारा हेसुर इन द्याश. 5 बाक गबालिगोळ्द द्याश, अदिक सुर्योदय इन दी हेर्मोन पहाळी अन ल्यालमा अन बालगाद नगर टु हुडुकु हमात इन घाटी ताका सप्पा लबानोन द्याश, 6 बाक लबानोन टु हुडुकु मिस्त्रपोतमैम ताका सीदोनीगोळ्द पहाळी द्याश इन निवासी. ईंदरी ना इस्त्राएलगोळ्द मुंदु टु तेगु बुळाईन; ईट आगुल कि नी नान आग्या अन अनुसार आंदुर अधिकार इस्त्राएलगोळी वाट्स कोम. 7 इदुरसाटी नी ईग ई द्याश इक ऊंम्बत गोत्रगोळ अदिक मनश्शे अन आरधा गोत्र अक आंदुर भाग आगोर साटी वाट्सकोम."
यरदन इन पूर्व भाग इन बटवाळा
8 13:8 गिनती 32:33; व्यवस्थाविवरण 3:12 रूबेनिगोळ अदिक गादीगोळ इक रा अद भाग सीकेगीत. यदरी मूसा आंदरी यरदन इन पूर्व इन दी कोटीदुन, यतिकी यहोवा अन दास मूसा आंदरी कोटीदुन. 9 मतलब अर्नोन हेसुर इन घाटी इन किनारा अन अरोएर टु हुडुकु, अदिक अदा घाटी इन बीच नगर इक बिटकु दीबोन ताका मेदबा अन हातीगोळोद सप्पा चौरस द्याश; 10 अदिक अम्मोनिगोळ्द सीमा ताका हेशबोन दा ईरावाळेर एमोरियो अन राजा सीहोन उन सप्पा नगर; 11 अदिक गिलाद द्याश, अदिक गशूरीगोळ अदिक माकिवासिगोळ्द सीमा अदिक सप्पा हेर्मोन पर्वत, अदिक सल्का नगर ताका सप्पा बाशान प्रदेश, 12 बाक अश्तारोत अदिक एद्रेई नगर दा बरावाळेर आ ओग इन सप्पा राज्य जो रपाई जाती दा टु आबना ऊळदोगीदुन; यतिकी ईंदरी मूसा कोंदकु आंदुर प्रजा अक आ द्याश टु तेगु बुटीदुन. 13 लेकीन इस्त्राएलीगोळ गशूरीगोळ अदिक माकिगोळ इक आंदुर द्याश दा टु तेगदीदील; इदुरसाटी हशूरी अदिक माकी जाती इस्त्राएलीगोळ बीच दा ईंद ताका ईरतार. 14 13:14 व्यवस्थाविवरण 18:1अदिक लेवी इन वंशगोळी आव येनु भाग कोटीदील; यतिकी इस्त्राएल उन परमेश्वर यहोवा अन वचन इन अनुसार आऊंदा येर्सद होमबली13:14 होमबली इन मतलब हवन आंदुर साटी भाग ठहरूस्याद.
रूबेन इन वंश उक कोळ्द भाग
15 मूसा जमीन इन भाग रूबेन उन कुल इन परिवारगोळी आंदुर्द निज भाग इन रूप दा वाट्स कोंडीदुन, 16 मतलब अर्नोन हेसुर इन घाटी इन किनारा अन अरोएर नगर टु हुडुकु अदिक अदा घाटी इन बीच इन नगर इक बिटकु मेदबा अन हाती इन सप्पा चौरस द्याश; 17 बाक चौरस द्याश दाकळोद हेशबोन अदिक अदुर सप्पा ऊर; बाक दीबोन, बामोतबाल, बेतबाल्मोन, 18 यहसा, कदेमोत, मेपात, 19 किर्यातैम, सिबमा, अदिक तराई दाकळोव पहाळी मा बसुस्द सेरेथश्शहर, 20 बेतपोर, पिसगा अन ढलान अदिक बेत्यशीमोत, 21 मतलब चौरस द्याश दा कुर्तकु हेशबोन दा कुरावाळेर एमोरियो अन आ राजा सीहोन इन राज्य अन सप्पा नगर यदरी मूसा कोंद बुटीदुन. मूसा एवी, रेकेम, सूर, हूर, अदिक रेबा हेसुर इन मिद्यान इन प्रधानगोळ इक भी कोंद बुटीदुन जो सीहोन उन ठहरूसकु शासक अदिक अदा द्याश इन निवासी ईरोर. 22 अदिक इस्त्राएलीगोळ आंदुर अदिक आंदरी कोनावाळेर सांगुळ बोर उन पार भविष्य हेळावाळा बिलाम उक भी तलवार देल कोंद बुट्टुर. 23 अदिक रूबेनिगोळ्द सीमा यरदन गांगा अन किनारा ठहरूस्त, रूबेनिगोळ्द भाग आंदुर कुलगोळ अनुसार नगरगोळ अदिक ऊरगोळ्द सांगुळ ईल्या ठहरूस्त.
गाद इन कुलगोळी कोळ्द हिस्सा
24 बाक मूसा गाद इन गोत्र वाळेर इक भी कुलगोळ अनुसार आंदुर खुद इन भाग माळकु वाट्स बुट्टुन. 25 आग ईद ठहरूस्त, मतलब याजेर अदिक गिलाद इन सप्पा नगर, अदिक रब्बा नगर इन मुंदळोद अरोएर नगर ताका अम्मोनिगोळ्द आरधा द्याश, 26 अदिक हेशबोन टु रामत-मिस्पे अदिक बतोनीम ताका, अदिक महनैम टु दबीर इन सीमा ताका, 27 अदिक घाटी दा बेतहारम, बेतनिम्रा, सुक्कोत, अदिक सापोन, अदिक हेशबोन इन राजा सीहोन इन राज्य अन मीकदव भाग, अदिक किन्नेरेत हेसुर इन क्यार्रा अन क्वाना ताका, यरदन इन पूर्व इन दी अद द्याश यदुर सीमा यरदन गांगा आद. 28 गादी लॉकुर्द भाग आंदुर कुलगोळ अनुसार नगरगोळ अदिक ऊरगोळ सांगुळ ईदा ठहरूस्त.
पूर्व दिशा अन मनश्शे अन्द आर्धा गोत्रगोळी कोळ्द भाग
29 बाक मूसा मनश्शे अन आरधा गोत्र वाळेर इक भी आंदुर खुद इन भाग माळकु कोट्टुर; अद मनश्शेगोळ्द आरधा गोत्र अन खुद इन भाग आंदुर कुलगोळ अनुसार ठहरूस्त. 30 अद ईद हुन, मतलब महनैम टु हुडुकु बाशान उन राजा ओग उन राजा अन सप्पा द्याश, अदिक बाशान दा बसुस्द आईर उन साठ बस्तीगोळ, 31 अदिक गिलाद इन आरधा भाग, अदिक अश्तारोत, अदिक एद्रेई, जो बाशान दा ओग इन राज्य अन नगर ईरव, ईव मनश्शे अन पार माकीर उन वंश इन मतलब माकीर उन आरधा वंश इन खुद इन भाग कुलगोळ अनुसार ठहरूसदव.
32 जो भाग मूसा मोआब इन मैदान दा यरीहो अन हाती इन यरदन इन पूर्व इन दी वाट्स बुट्टुन अव ईवा हु. 33 13:33 गिनती 18:20; व्यवस्थाविवरण 18:2लेकीन लेवी गोत्र अक मूसा येनु भाग कोटीदील; इस्त्राएल उन परमेश्वर यहोवा अच तान वचन इन अनुसार आंदुर भाग ठहरूसदुन.