यहोशू 8

आई नगर मा कब्जा अदिक विनाश

1 आग यहोवा यहोशू से अंदुन, "अंजबाळ, अदिक नीन मन कच्चा आगबाळुल; नेळु कटकु सप्पा योध्दागोळी सांगुळ हुडु, अदिक आई नगर मा चळाई माळ; केळ, ना आई नगर इन राजा अक आऊन प्रजा अदिक आऊन नगर अदिक जागा अन सांगुळ नीन वश दा माळ कोंडीन. 2 अदिक ह्यांग नी यरीहो नगर अदिक अदुर राजा से माळ्द हांग अच आई नगर अदिक अदुर राजा अन सांगुळ भी माळेत; सिर्फ नीव जनावरगोळ सांगुळ आऊन लुट रा तान साटी ताकोम सक्या; इदुरसाटी आ नगर इन हींद तान मंळसागोळी घात दा हचबुळी."

3 अत: यहोशू सप्पा योध्दागोळ सांगुळ आई नगर मा चळाई माळोद तैयारी माळदुन; अदिक यहोशू तीस हजार मंळसागोळी जो शूरवीर ईरोर नीवळुसकु ईळ्लकी का आग्या कोटकु कळुदुन. 4 अदिक आंदरी ईद आग्या कोट्टुन, "केळी, नीव आ नगर इन हिंद इन दी घात हचकु कुर्तकु ईरेतीर; नगर टु हापाळ दुर होगबाळेतीर, अदिक सप्पा लॉकुर तैयार ईरेतीर; 5 अदिक ना तान सप्पा साथीगोळ सांगुळ आ नगर इन हाती होगाईन, अदिक याग आंदुर पयले अन घाई नाम सामना माळोर साटी होट्टार, आग नाव आंदुर मुंदु टु ओळेव; 6 आग आंदुर ईद सोचकु, कि आंदुर पयले अन घाई नाम मुंदु टु ओळेत्यार, नाम्द पीछा माळ्यार; ई प्रकार नाव आंदुर मुंदु टु ओळकु आंदरी नगर टु दुर तेगुकु वोतेव; 7 आग नीव तान होचकोमकु जागा मा टु बरेतीर अदिक नगर मा अधिकार माळ कोमेतीर, नीम परमेश्वर यहोवा नीमी जिकसोद ताकत कोट्टान. 8 नीमी अदा माळ पायजे जो यहोवा अनतान, नान मा नजर ईटी, ना नीमी आक्रमण इन आदेश कोळाईन. नीव याग नगर मा अधिकार माळीर आग अदरी होताक कोमेतीर." 9 आग यहोशू आ सैनिकगोळी आंदुर्द होचकोमोद जागा मा कळु बुट्टुन अदिक हादी कायली कुरतुन, आंदुर बेतेल अदिक आई नगर इन बीच ऊंद जागा मा होदुर, ईद जागा आई नगर इन पश्चिम दा ईरोद. यहोशू तान लॉकुर सांगुळ ईळ्लक तीम अल्या ईत्तुन. 10 यहोशू व्हातर्या येद्दुन, अदिक लॉकुर गिनती माळकु इस्त्राएली स्याणागोळ सांगुळ लॉकुर मुंद मुंद आई नगर इन दी होदुन. 11 अदिक आऊन सांगुळोर सप्पा योध्दा येरेदुर, अदिक आई नगर इन हाती पोहचुस्कु आऊन मुंद उत्तर इन दी ड्यारा हाक्क बुट्टुर, अदिक आंदुर अदिक आई नगर इन बीच ऊंद घाटी ईरोद. 12 आग आव लगभग अईद हजार मंळसा नीवळुसकु बेतेल अदिक आई नगर इन बीच दाकळोद इन पश्चिम इन दी आंदरी घात दा कुरसुस बुट्टुन. 13 अदिक याग लॉकुर नगर इन उत्तर इन सप्पा सेना अक अदिक आऊन पश्चिम इन दी घात दा कुर्तकु ईरोर आंदरी भी ठिकाणा मा माळ कोंडुन, आग यहोशू अदा दिशी ईळ्लकी घाटी इन बीच होदुन. 14 याग आई नगर इन राजा ईद नोळदुन, आग आंदुर फुर्ती माळकु व्हातर्या येद्दुर, अदिक राजा तान सप्पा प्रजा अक हुडुकु इस्त्राएलीगोळ मुंद आंदुर लळुसली तेगुकु ठहरूस्द जागा मा जो अराबा अन मुंद आद पोहचुसदुन; अदिक आव ईला जानसोन कि नगर इन हिंद लॉकुर घात हचकु कुर्तकु आर. 15 आग यहोशु अदिक सप्पा इस्त्राएलीगोळ पीछा माळोर साटी कारू कारूकु कार्सकु आदुर; अदिक आंदुर यहोशू अन पीछा माळतेला नगर टु दुर होटोदुर. 16 आग नगर इन सप्पा लॉकुर इस्त्राएलीगोळ्द पीछा माळोर साटी कारूकु आदुर; अदिक आंदुर यहोशू उन पीछा माळतेला नगर टु दुर होट्ट बुट्टुर. 17 अदिक ना आई नगर दा अदिक ना बेतेल दा याऊ मंळसा ईतीदील, जो इस्त्राएल इन पीछा माळोर साटी ईला होगीदान; अदिक आंदुर नगर इक खुला बिटकु इस्त्राएलीगोळ्द पीछा माळदुर. 18 आग यहोवा यहोशू से अंदुन, "तान कय इन बर्छा आई नगर इन दी वाळुस; यतिकी ना अदरी नीन कय दा कोट्ट बुळाईन." अदिक यहोशू तान कय इन बर्छा अक नगर इन दी वाळुसदुन. 19 आऊन कय वाळुसतेला अच जो लॉकुर घात दा कुर्तकु ईरोर आंदुर झटपट तान जागा मा टु येद्दुर, अदिक वोळकु नगर दा प्रवेश माळदुर अदिक अदरी ताकोम कोंडुर; अदिक झटपट अल बेक्‍की हच बुट्टुर. 20 याग आई नगर इन लॉकुर हिंद तिर्गकु नोळदुर, रा येन नोळदुर, कि नगर इन धुंगा आकाश इन दी येळेत्याद; अदिक आंदरी ना ईत्त वोळोद शक्ति ईत्त, अदिक ना रा आत्त, अदिक जो लॉकुर आळी इन दी वोळोर आंदुर तिर्गकु तान खेदाळसा वाळेर मा बिद्दुर. 21 याग यहोशू अदिक सप्पा इस्त्राएलगोळ नोळदुर कि घातीगोळ नगर इक ताकोम कोंडुर, अदिक अदुर धुंगा येळेत्याद, आग वापस बंदकु आई नगर इन मंळसागोळी कोनली कुरतुर. 22 आग आ सैनिक जो होचकोमकु ईरोर, युध्द दा मदत साटी नगर टु व्हार्या बंदुर. आई नगर इन सैनिक इन येढ्ढु दी इस्त्राएल ईनोर सैनिक ईरोर, आई नगर ईनोर सैनिक जाल दा फसुसीगिदुर. इस्त्राएल आंदरी पराजीत माळदुर. आंदुर आगासताका लळुसतेला ईत्तुर यागासताका आई इन ऊंद भी मंळसा जित्ता ईला ईरोन, आंदुर दा टु याऊ वोळ सकिदील. 23 लेकीन आई अन राजा जित्ता बिटकु आदुन. यहोशू उन सैनिक आऊक आऊन हाती तंदुर.

24 युध्द इन समय, इस्त्राएल इन सेना आई नगर इन सैनिकगोळी मैदानगोळ दा अदिक मरूभूमी दा ढकलुसदुर अदिक ई प्रकार इस्त्राएल इन सेना आई नगर टु सप्पा सैनिकगोळी कोन्नोद क्याल्सा मैदानगोळ दा अदिक मरूभूमी दा पुरा माळदुर. आग इस्त्राएल नोर सप्पा सैनिक आई इक बंदुर. आग आंदुर आ लॉकुरी जो नगर दा जीत्ता ईरोर तलवार देल कोंद बुट्टुर. 25 आ दिशी आई नगर इन सप्पा लॉकुर सोत्तुर, अल हन्नेळ हजार आर्तेर अदिक मंळसागोळ ईरोर. 26 यतिकी यागासताका यहोशू आई नगर इन सप्पा निवासीगोळ्द सत्यानाश माळ कोंडीदिल आगासताका तान कय, यदुर देल बर्छा वाळुसीदुन, बाक जेळदीदील. 27 यहोवा अन आ आग्या अन अनुसार जो आव यहोशू उक कोटीदुन इस्त्राएलीगोळ जनावर अदिक नगर इन लुट तान माळ कोंडुन. 28 आग यहोशू आई नगर इक होताकसुस दुन अदिक अदरी सदा साटी खंडर माळ कोंडुन: अद ईंद ताका भर भंगाळ आद. 29 अदिक आई नगर इन राजा अक आव द्यावगा ताका मार्र मा लटकुसकु ईटदुन; अदिक सूर्य मुळ्क्त मुळ्क्त यहोशू उन आग्या देल आऊन लाश मार्र मा टु ईळ्सकु नगर इन फाटक इन मुंद भीटकु आत, अदिक आऊन मा कल्लगोळ्द धोळ्द ढेर हाक्कु आत, जो ईंद ताका माळकु आद.

एबाल पहाळी मा व्यवस्था अन्द पाठ

30 ✝ 8:30 व्यवस्थाविवरण 27:2-8 आग यहोशू इस्त्राएल उन परमेश्वर यहोवा अन साटी एबाल पहाळी मा ऊंद वेदी माळसुसदुन, 31 ✝8:31 निर्गमन 20:25ह्यांग यहोवा अन दास मूसा इस्त्राएलगोळी आग्या कोटीदुन, अदिक ह्यांग मूसा अन व्यवस्था अन किताब दा लिख्सकु आद, आव हींग कल्लगोळ्द ऊंद वेदी माळदुन यदुर मा यातोदु प्रकार इन औजार नळ्सकु आगीदील. अदिक अदुर मा आंदुर यहोवा अन साटी होमबली अदिक मेलबली येर्सदुर. 32 अदा जागा मा यहोशू इस्त्राएलीगोळ मुंद आ कल्लगोळ म्याकुच मूसा अन व्यवस्था, जो आव लिखसीदुन, अदुर्द नकल माळसुसदुन. 33 अदिक आंदुर, येन देशी येन परदेशी, इस्त्राएल इन सप्पा लॉकुर पवित्र संदुक इन नाकु दी नीदुरकु ईरोर. आंदुर आ लेवीवंशी याजकगोळ मुंद नीदुरकु ईरोर, जो यहोवा अन वादा अन पवित्र सन्दुक इक हुडुकु नळोर. इस्त्राएली अदिक गैर इस्त्राएली सप्पा लॉकुर अल नीदुरकु ईरोर अदिक अन्य आरधा लॉकुर गरिज्जीम पर्वत इन मुंद नीदुरकु ईरोर. यहोवा अन सेवक मूसा आंदुर से हिंग माळली अंदीदिन. मूसा आंदुर से हिंग माळोरसाटी ई आशीर्वाद इन साटी अंदीदुन. 34 आग यहोशू व्यवस्था अन सप्पा वचनगोळी वाचुसदुन. यहोशू आशीर्वाद अदिक अभिशाप वाचुसदुन. आव सप्‍पा येनारा आ तरीका देल वाचुसदुन, याता तरीका देल अद व्यवस्था अन किताब दा लिख्सकु ईरोद. 35 ✝8:35 व्यवस्थाविवरण 11:29; 27:11-14इस्त्राएल इन सप्‍पा लॉकुर अल जमा ईरोर, सप्‍पा आर्तेर, चिकोर अदिक इस्त्राएल इन लॉकुर सांगुळ ईरावाळेर सप्पा विदेशी अल जमा ईरोर अदिक यहोशू मूसा अन द्वारा कोटकु आग्‍याव हर ऊंद आदेश उक वाचुसदुन.