यहोशू 18

मिक्द जागा अन बटवारा

1 बाक इस्त्राएलगोळ्द सप्पा मंडली शीलो नगर दा जमा आगकु अल मिलाप इन तम्बु *18:1 मिलाप इन तम्बु परमेश्वर उन उपस्थिती इन जागाअक नीदरूसदुर; यतिकी द्याश आंदुर वश दा होट्ट बंदीत. 2 अदिक इस्त्राएलीगोळ येळ कुल इन लॉकुर ईग भी हिंग ईरोर यारी अधिकार दा हिस्सा सिकली ईरोद. 3 आग यहोशू इस्त्राएलगोळ से अंदुन, "जो द्याश नीम पूर्वजगोळ परमेश्वर नीमी कोटान, अदरी तान अधिकार दा माळली नीव यागासताका ढिलाई माळतेला ईत्तीर? 4 ईग हर कुल दा टु मुर मंळसा ठहरूसबुळी, अदिक ना आंदरी इदुरसाटी कळाईन कि आंदुर होगकु द्याश दा वयाळ सकुल, अदिक तान तान कुल इन भाग इन प्रयोजन इन अनुसार अदुर हाल लिख्स लिख्सकु नान हाती वापस बंदार. 5 अदिक आंदुर द्याश इन येळ भाग लिख्सदुर, यहूदी रा दक्षिण दी तान भाग दा, अदिक यूसुफ उन घराना अन लॉकुर उत्तर इन दी तान भाग दा ईरूल. 6 अदिक नीव द्याश इन येळ भाग इन जानकारी लिख्सकु नान हाती तरी; अदिक ना ईल नीम साटी तान परमेश्वर यहोवा अन मुंद चिट्टी हाकाईन. 7 अदिक लेवीगोळ्द नीम बीच दा यातोदु भाग ईरतीदील, यतिकी यहोवा अन कोळ्द याजकपद आंदुर भाग आद; अदिक गाद, रूबेन, अदिक मनश्शे अन आरधा गोत्र अन लॉकुर यरदन इन पूर्व दी यहोवा अन दास मूसा अन कोटकु आत तान तान भाग हासिल माळ कोंडार." 8 आग आ मंळसागोळ यदकु नळुली कुरतुर; अदिक जो आ द्याश इन हाल लिखसोर साटी नळदुर आंदरी यहोशू ईद आग्या कोट्टुन, "होगकु द्याश दा वयाळी, अदिक अदुर हाल लिख्सकु नान हाती वापस बरी; अदिक ना ईल शीलो दा यहोवा अन मुंद नीम साटी चिट्टी हाकाईन." 9 आग आ मंळसा होदुर, अदिक आ नगर द्याश दा वयाळदुर, अदिक आऊन नगर इन येळ भाग माळकु अऊर्द हाल किताब दा लिख्सकु शीलो अन छावनी दा यहोशू अन हाती बंदुर. 10 आग यहोशू शीलो दा यहोवा अन मुंद आंदुर साटी चिट्टीगोळ हाकदुन; अदिक अल्या यहोशू इस्त्राएलगोळी आंदुर भागगोळ अनुसार द्याश वाट्स बुट्टुन.

बिन्यामीन इन कुल इक कोळ्द हिस्सा

11 बिन्यामीनगोळ कुल इन चिट्टी आंदुर कुलगोळ अनुसार होळ्त, अदिक आंदुर्द भाग यहूदा अदिक यूसुफियो अन बीच दा बीत्त. 12 अदिक आंदुर उत्तरी सीमा यरदन टु चालु आत, अदिक यरीहो अन उत्तर इन दी टु यरतेला पश्चिम इन दी पहाळी द्याश दा आगकु बेतावेन इन आळी दा होळ्त; 13 अल टु अद लूज इक होळ्त जो बेतेल भी कहलुसतद, अदिक लूज इन दक्षिणी इन दी टु आगतेला ल्यालमागोळ्द बेथोरोन इन दक्षिणी इन दी पहाळी इन हाती आग हतेला अत्रोतदार इक ईळुत. 14 बाक पश्चिमी सीमा तिर्गकु बेथोरोन इन मुंद अदिक अदुर दक्षिणी इन दीकळोद पहाळी टु आगतेला किर्यतबाल हेसुर इन यहूदा अन ऊंद नगर मा होळ्त जो किर्यत्यारीम भी अनकु आगतद; पश्चिम इन सीमा ईदा ठहरूस्त. 15 बाक दक्षिण इन दिकळोद सीमा पश्चिम टु चालु आगकु किर्यत्यारीम इन सिरे टु होटकु नेप्तोह इन झरना मा पोहचुस्त; 16 अदिक आ पहाळी इन सिरे मा ईळुत, जो हिन्नोन उन पार उन तराई इन मुंद अदिक रपाईम हेसुर तराई इन उत्तर दी आद; अल टु हिन्नोम इन तराई दा, मतलब यबूसी इन दक्षिणी इन दी आगकु एनरोगेल झरना मा ईळुत; 17 अल टु उत्तर दी तिर्गकु एनशेमेश इक होटकु आ गलीलोत इन दी होत, जो अदुम्मीम इन चळाई इन मुंद आद, बाक अल टु ईद रूबेन उन पार बोहन उन कल्ल ताका ईळुत; 18 अल टु अद उत्तर इन दी होगकु अराबा अन मुंद इन पहाळी इन दी आगतेला यरदन गांगा अन घाटी दा ईळुत; 19 अल टु सीमा बेथोग्ला अन उत्तर दी होगकु खारा समुद्र अन उत्तर दीकळोद घाटी मा यरदन इन उगम स्थान मा होळ्त; दक्षिण इन सीमा ईदा ठहरूस्त. 20 अदिक पूर्व दिकळोद सीमा यरदन अच ठहरूस्त. बिन्यामीनगोळ भाग, नाकु दिकळोद सीमागोळ सांगुळ, आंदुर कुलगोळ अनुसार, ईदा ठहरूस्त.

21 बिन्यामीनगोळ गोत्र अक आंदुर कुलगोळ अनुसार ईव नगर सिकदव, मतलब यरीहो, बेथोग्ला, एमेक्कसीस, 22 बेतराबा, समारैम, बेतेल, 23 अब्बीम, पारा, ओप्रा, 24 कपरम्मोनी, ओप्रनी अदिक गेबा; ईव हन्नेळ नगर अदिक ईंदुरव ऊर सीकदव. 25 बाक गिबोन, रामा, बेरोत, 26 मिस्पे, कपीरा, मोसा, 27 रेकेम, यिर्पेल, तरला, 28 सेला, एलेप, यबूसी जो यरूशलेम भी कहलुसतान, गिबत अदिक किर्यत; ईव चौदहा नगर अदिक ईऊरव ऊर सीकदव. बिन्यामीनिगोळ भाग आंदुर कुलगोळ अनुसार ईवा ठहरूदव.