1 Yesu nianatenga iyo, ninaya mwa kyango kye Yuteya neshabukira kwa undi mwishirya wa lwichi lwe Yorotani. Mibuanano mingi ya bandu ikoranira mwa mbere siwe. Naye nianatangira iiyisabo nga kwabaa atula aira.

2 Bafarisayo bauma niabanamuhikira kwemuereka. niabanamubutsa mbu: «Mbeni aMuomba wetu ahere mundu yo rubu lwehentsa mukatsi uwe?» 3 Yesu nianaxubya mbu: «Musa abateekaate?» 4 Niabanamuxubitsa mbu: «Musa ahaa amundu yo rubu lweandika maruba mesiya mukatsi uwe, nenyuma waho, ni amuhentsa.» 5 Yesu nianabwirabo mbu: «Musa abaandikiraa areteeko iro kubwishi bwa butsibu bwa myete yenyu. 6 Wetuwe ihuluka he Ongo abumbiraa abindu byoshe, nianabumba mulume na mukatsi. 7 Kubwishi bwekyo, amulume endesiya ishe ne nina nebumbana ne mukatsi uwe, 8 na babiri abo ni baba mubiri muuma. Batyo abo ni batakiri babiri kandi, wetuwe ni bameba mubiri muuma. 9 Kubatyo, amundu ni atilikalikanye kyo Ongo abumbanyaa hauma.»

10 Babere bahara mwa nyumba, abemitsa ba Yesu niabanamubutsa kandi kuluenda akinwa ikyo. 11 Yesu nianabwirabo mbu: «Kintsi mundu yakenderehentsa mukatsi uwe nehikya undi, ni asingira nekolera amukatsi muxondotsi yo ntsambi. 12 Anabe na kintsi mukatsi yasiya mulume uwe nehikibwa na undi mulume, ni asingira.»

13 Bandu bauma niabanaletera Yesu yo bana mbu nge ahira kubo asaminwe, wetuwe abemitsa bewe niabanakemera abandu abo. 14 Yesu abere axunga atyo, nianatsibuka kutsibu ni yabwira abemitsa bewe mbu: «Munerelika abana balere berewicha yo niri, muterehangirabo, kubwishi aBwami bwa Ongo bwa bandu bali ngakuno aba. 15 Mwa kuli anibabwira imwe, ku mundu woshewoshe yataangirira aBwami bwa Ongo nga mwana mulere, atangakocha iingira mubo kiro na hake.»

16 Inyuma kwaho, nianakokera abana, nianahira kubo asaminwe, neashanirabo.

17 Yesu abere ahara mwa nchira, mundu muuma nianamuhikira chuba, nianashinga amapfi mwa mbere siwe nemubwira mbu: «Mwiyisa mubuya, niire nite kwebula mbu nikoche ilya kwa mwandu wa buingo bwa biro byoshe?» 18 Yesu nianamubutsa mbu: «Kubwishi bwaki auniluka mubuya? Hatali mundu mubuya ali ate Ongo yewene. 19 Wichi areteeko rolibwire mbu: ‹Utahira ukeita, uterekola bulashalasha, utahira ukeiba, utahira ukeshambikira mundu kinwa, utahira uketinga, utahira ukefundwa ipfa ixo ne nyoko bo xoni.›*» 20 Amundu uyo nianamuxubyitsa mbu: «Mwiyisa, amateeko moshe ayo, ninakola nga ko ma bwire ihuluka abwana bwani.»

21 Yesu nianamusindera mu ntsiyi, nianamubwira mbu: «Uhushire kindu kiuma kyokilirene ikola: ‹Enda uutse abindu byoshe byo uli nabyo, na safaranga seukabonekya unahato abachene, nawe ukaba na mbikyo mu mbingu. Inyuma kwaho, wiche unikulikire!›» 22 Wetuwe amutabana uyo abere ahulikya abinwa ibyo, nianatsitsikana, abaneiendera mu bwoncho, kubwishi abaa muxoki kutsibu.

23 Yesu nianasindera kwa minda yoshe, nianabwira abemitsa bewe mbu: «Mwa kuli, litsibuhire kwa baxoki kweingira mwa Bwami bwa Ongo.»

24 Abemitsa niabanashishala kutsibu kweumpfa abinwa ibyo. Wetuwe Yesu nianabwirabo kandi mbu: «Mwe bana bani, litsibu kwa baxoki kweingira mwa Bwami bwa Ongo! 25 Lianguhire kutsibu kwa ngamiya kwetsuka mwa kisha kya nandi, irengya amuxoki kweingira mwa Bwami bwa Ongo.»

26 Abemitsa babere baumpfa abinwa ibyo niabanaongerera ishishala kutsibu, baba nebutsabutsanya bonabene ku bonabene mbu: «Indeno yangakocha iufulwa?» 27 Yesu nianasinderabo nebwirabo mbu: «Kwa mundu kitangakocheka, wetuwe ku Ongo lute lutyo, kubwishi abinwa byoshe binakocheka ku Ongo.»

28 Petero nianamubwira mbu: «Talola kwitwe twasiyire abyoshe nekukulikira.» 29 Yesu nianaxubya mbu: «Mwa kuli anibabwira kwamundu ni angaba akesiya anyumba yiwe, ne muala wabo, ne mwali wabo, ne ishe, ne nina, na bana bewe, neri na maxwa mewe kubwishi bwa ingye na kubwishi bwa Mwatsi Mubuya, 30 akahembwa ngendo iana mo kianiro kino. Akahembwa nyumba, na baala babo, na bali babo, ne nina, na bana , na maxwa hauma na minubo. Na mwa kianiro kyokihika akahembwa abuingo bwa biro byoshe. 31 Wetuwe bangi mwa babere, bendeba batsindu, na bangi mwa batsindu bendeba babere.»

32 Babere bahara baurukira i Yerusalemu, Yesu nianaxondolera abemitsa bewe, nabo niabanatsimbwa na buba. Abandu bobamukulikiraa, nabo batsimbwa na buba. Yesu nianatsimba kandi abemitsa bewe ikumi na babiri, nianatangira isimola nabo kuluenda abinwa byobyendemuhikira. 33 Nianabwirabo mbu: «Twauruka i Yerusalemu neyo, Muala wa Mundu akahirwa mwa minwe sa boshebakungu na beyisa ba Muomba. Nabo bakamuchira lubancha mbu aitwe nehirwa mwa minwe sa bandu ba sindi nganda. 34 Bakamushekenyula, nemuchirako mate, bakamukubita ngonyi nemwita. Wetuwe mwa lwire lwa kashatu inyuma ya repfa liwe, akapfuka.»

35 Inyuma kwaho, baala babiri ba Sebetayo, Yakobo ne Yohana niabanahikira Yesu mbu: «Mwiyisa, atuxonda mbu utukolere kinwa kyotukakuhema.» 36 Yesu nianabutsabo mbu: «Amuxonda mbu nibakolereki?» 37 Niabanamuxubyitsa mbu: «Mwa mango wendeba mwa ngulu yawe, unendetuha rubu lweikala hauma nawe, muuma kwa munda wawe wa malyo na undi kwa munda wawe wa malembe.» 38 Wetuwe Yesu nianaxubyitsabo mbu: «Mutechi akindu kyomuhema. Mungakocha ixoma akiriko kya minubo kyonikendexoma? Neri mungakocha irubikwa mwa burubike bwa lupfu bonikarubikwamo?» 39 Niabanamuxubyitsa mbu: «Twangakocha.» Yesu nianabwirabo kandi mbu: «Mwa kuli mukaxoma kwa kiriko kyonikendexomako, nerubikwa nga konikenderubikwa. 40 Wetuwe areikatsa amundu kwa munda wani wa malyo, neri wa malembe uyo ate mulimo wani. Ongo yenawene yakendeikatsa abandu mwa maali makoleraabo.»

41 Abandi bemitsa ikumi babere baumpfa abinwa ibyo, niabanayongerwa Yakobo ne Yohana. 42 Yesu nianabirangira aboshe nebwirabo mbu: «Mwichi ku bobaxungwa nga bemanitsi ba bobate Bayahuti, banaimanirabo mu nyiki na bakulukulu babo banaikalira kubo. 43 Wetuwe lutabaa lutyo mwa kati kenyu. Yakendexonda iba mukulukulu mwa kati kenyu, ni alirene iba mupfuku wenyu. 44 Na yaxonda iba mubere, ni alirene iba mupfuku wa boshe. 45 Kubwishi anabe ne Muala wa Mundu atawichaa ikolerwa, wetuwe ikola netula abuingo buwe kwebula mbu atongotse bandu bangi.»

46 Yesu na bemitsa bewe, niabanahika i Yeriko. Ne Yesu abere ali yatenga iyo, kuuma na bemitsa bewe na mubuanano munene wa bandu, mundu muuma kihumahumi yabaa alukwa mbu ye Baritolomayo muala wa Timayo, abaa ni aikere kwa musike wa nchira ni ahemahema. 47 Abere aumpfa mbu Yesu we Nasareti yatsuka mwa nchira iyo, nianabula mbu: «Yesu Muala wa Ndauti, nipfire bwoncho!» 48 Bandu bangi niabanamukemera mbu atsire, wetuwe nianaxuba ilaka mbu: «Yesu Muala wa Ndauti, unipfire bwoncho!» 49 Yesu nianatindira nebula mbu: «Mumubirangire.» Niabanabiragirakyo nemubwirakyo mbu: «Simika! Batuka, akubirangira.»

50 Baritolomayo nianalekera arekoti liwe, nianaixukya chuba newicha ho Yesu ali. 51 Yesu nianamubutsa mbu: «Auxonda mbu nikukolereki?» Akihumahumi niakinamuxubyitsa mbu: «Mwiyisa, anixonda mbu nilole.» 52 Yesu nianamubwira mbu: «Iendere, abwimire bwawe bwamekulamya.» Mo kashangi umoho, nianabanelola. Nianakulikira Yesu.