1 Yesu na bemitsa bewe niabanahika hofi na mulungu we Yerusalemu, kwa munda wa mitsi ye Betifake ne Betaniya, hofi na kitwa kye Miseituni. Yesu nianalika babiri mwa bemitsa bewe. 2 Nianabwirabo mbu: «Muende mwa mutsi wali ira buxondotsi kwimwe. Mwa mango mukahika iyo, mukaxunga ku kyana kya punda kiabikire, na mundu woshewoshe atatsakambira kukyo. Munaabulakyo neletakyo hano. 3 Hakeba mundu yababutsa mbu: ‹Mwamekola mutyo kubwishi bwaki?› Ni mwamubwira mbu Ninakuwetu alaire kukyo. Akafulukyakyo hano inyuma hake.»

4 Niabanaenda, niabanaxunga kwa kyana kya punda ni kiabikire hambua, hofi na lukyo lwa nyumba kwa musike wa muhengere. Babere bali yobaabulakyo, 5 abandu bobabaa aho, niabanabutsabo mbu: «Kiki kyomukola? Mwameabula akyana kya punda iki kubwishi bwaki?» 6 Niabanaxubyitsabo ngakuno ko Yesu shabwirabo, na bandu abo niabanalikabo mbu baende.

7 Niabanaletera Yesu akyana kya punda neshesha asangimba sabo kukyo, ne Yesu nianaikala kukyo. 8 Bandu bangi niabanashesha asangimba sabo mwa nchira, na bandi niabanashesha ndabi sobachaa mwa maxwa. 9 Abandu bobabaa baxondolere Yesu, na bobabaa bamukulikire, niabanatangira ilaka mu mulenge mule mbu:

«Hosana, asingyibwe!

Aashanirwe uyu yawicha mwetsina ra Ninakuwetu!

10 Buashanirwe abwami bobuwicha,

bo bwami bwa tata Ndauti!

Hosana Nina mu mbingu asingyibwe!»

11 Yesu nianahika i Yerusalemu neya mwa hekalu. Abere ameotola ilola kwa bindu byoshe kwa minda yoshe, nianaenda i Betaniya kuuma na bemitsa bewe ikumi na babiri, kubwishi lwabaa ni luhara luoloolo.

12 Bwabere bwakya, bali yobatenga i Betaniya, Yesu nianakukutsa. 13 Nianaxunga muti wa tini hale ni aliko bisani bingi. Nianaya isisiritsa ngakuno angaxungako bipfuma. Wetuwe abere ahika hofi nao, ataxungako kindu, biri bite abisani bishaho, kubwishi kyabaa kite kianiro kya bipfuma. 14 Niyo Yesu atukanga amuti uyo mbu: «Ihuluka tsene na ku biro byoshe hatakiba yakendelya kipfuma kya kwiwe.» Abemitsa bewe niabanaumpfa abinwa byaneenaa.

15 Inyuma kwaho, niabanahika i Yerusalemu. Yesu abere aingira mwa hekalu, nianatangira ihentsa abachurutsi mwa hekalu. Nianakunulanga amesa ma bobabaa abahingya asafaranga na bipfumbi bya bachurutsi ba makuku. 16 Nianahangira abandu itsuka mwa mbua ya hekalu na mitsio yabo.Jésu chasse les marchants dans le temple.

17 Nianaiyisabo mbu: «Kiandikirwe mwa Maandiko Makomire mbu anyumba yani yendelukwa nyumba ya mahemo kwa nganda soshe. Wetuwe imwe mwameirayo lukunda lwa banyai banakoraniramo.»

18 Boshebakungu na beyisa ba Muomba babere baumpfa amwatsi uyo, niabanaxonda kobangaita Yesu. Wetuwe bamuubaha, kubwishi amubuanano woshe wa bandu ni abashishalira ameyiso mewe.

19 Lwabere lwahara luoloolo, Yesu na bemitsa bewe niabanatenga mwa mutsi umo.

20 Mwelutumbi, bali yobatsuka, niabanaxunga amuti wa tini uyo awoshe ni ameuma ihikira kwa milya yao. 21 Petero nianaubuka abinwa byobyatsukaa lubere, nianabwira Yesu mbu: «Mwiyisa, sindera ku amuti wa tini wo watukangaa ameuma!»

22 Yesu nianabwira abemitsa bewe mbu: «Munereimirira Ongo. 23 Mwa kuli anibabwira ku amundu angabwira akitwa iki mbu kitenge aha kiiume mwa nyancha. Na iri aneena abinwa ibyo butsira mitikotiko mwa mwete uwe, wetuwe ali aimirire kwa kinwa ikyo kikakolwa, mwa kuli ni kikanakolwa. 24 Kubwishi bwekyo, anibabwira ku mwa mango amuhema kubwishi bwa kindu kirebe, ni mwaba na bwimire ku mwameotola iangirirakyo, na mwa nchira umo ni mukahabwakyo. 25 Na mwa mango mwabatuka muli yo mwahema, mukeubuka ku muli na kinwa na undi mundu, ni mwamushashira, kwebula mbu Tata yali mu mbingu, akoche ibashashira nemwe asantsambi senyu. 26 Wetuwe mutashashire abandi bandu, ne Tata yanaba mu mbingu naye ni atibashashire nemwe asantsambi senyu.» 27 Yesu na bemitsa bewe niabanahika kandi i Yerusalemu. Yesu abere ali yatamba mwa hekalu, boshebakungu, na beisa ba Muomba kuuma na bemanitsi ba bandu, niabanamuhikira. 28 Niabanamubutsa mbu: «Aukola abindu ibi mu maalaki? Nende yakuhaa amaala ama?» 29 Yesu nianaxubitsabo mbu: «Nikababutsa kinwa kiumaho. Mukenixubitsa, nani ni nikababwira nga mu maalaki mo nerekolamo abinwa ibi. 30 Yohana ahabwaa amaala ma rerubika itenga ira mwande? Matengaa ira mwa Ongo neri matengaa ku bandu? Munixubitse!»

31 Niabanabutsabutsanya mbu: «Tukexubya kwa maala mewe matengaa ira mwa Ongo, ni akatubutsa mbu: ‹Mutamwimiriraa kubwishi bwaki?› 32 Na kandi tutangabula mbu matengaa ku bandu.» Baubahaa amubuanano wa bandu kubwishi aboshe babaa baimirire ku Yohana mutahwa wa kuli. 33 Niabanaxubyitsa Yesu mbu: «Tutechi.» Ne Yesu nianabwirabo mbu: «Anabe nani nitibabwire nga mu mahe maala mo nikolamo abinwa ibi.»