1 aBafarisayo na baandiki bauma ba Muomba bo batengaa i Yerusalemu, niabanabuanana mwa mbere sa Yesu. 2 Niabanaxunga ku bauma mwa bemitsa ba Yesu ni abalya bilyo mu minwe sihalire, rebula mbu ilya butsira ikaraba kwa minwe kwekulikira adungo yabo. 3 Lwabaa lutyo, kubwishi aBafarisayo na Bayahuti boshe ni banakulikira andungo ya boshekulitsa, yoihangire ilya butsira ikaraba kushe kwa minwe. 4 Na kandi, mwa mango batenga mweuliro, batangalya butsira ikaraba. Na kalengyo abakulikira na sindi ndungo nyingi, ngakuno arexua abiriko, na bibindi, na sanyungu sosikolirwe mu miringa, na sangyingo*.

5 Tsene, aBafarisayo na beisa ba Muomba niabanabutsa Yesu mbu: «Kubwishi bwaki abemitsa bawe, ibo batabakulikira andungo ya botatakulitsa? Kubwishi abalya bilyo mu minwe sihalire!» 6 Yesu nianaxubyitsabo mbu: «Isaya airaa kushe ali yakola abutahwa, mwa mango aandikaa abinwa ibi, kuluenda mwa boshetulimi tubiri imwe ku Ongo aneena mbu:

‹Abandu aba bananipfa xoni kwa mitutu yabo ho,

wetuwe amyete yabo ni iri hale nani.›»

7 Areniimanikira ronimuimanikira ra busha,

kubwishi ameyiso mobaiyisa abandu,

mateeko ma kolirwe na bandu*.

8 Nianabwirabo kandi mbu: «Muneresiika amateeko ma Ongo, ni mwatsimba kwa ndungo sa bandu.» 9 Mwichi kushe itinda amateeko ma Ongo kwebula mbu mutsimbe kwa ndungo senyu! 10 Kubwishi Musa aneenaa mbu: «Unerepfa ixo ne nyoko bo xoni*, na yakakamba ishe neri nina, ni alirene iitwa.»* 11 Wetuwe imwe munerebula mbu amundu akeba na kindu kyeasikya ishe neri nina, akemubwira mbu akindu ikyo Korobane, rebula mbu kyametulwa Ongo kweba mutulo akomire, 12 ni mwamuha rubu mbu ataasikyaa ababuti bewe. 13 Komuneresuntsuura mutyo aKinwa kya Ongo kubwishi bwa ndungo yenyu yamuneresiirana. Amukola bindi binwa bingi biri ngebyo.

14 Yesu nianaxuba ibirangira amubuanano wa bandu nianabwirabo mbu: «Mwe boshe munihulikye, mube neumpfa kushe abinwa ibi. 15 Hatali kindu kyokinaingira mwa mundu kiri akitenga ira mbua, kyokingakocha imuhatsa. Wetuwe akindu kyokitenga mwa mundu, kyokinamuhatsa. 16 Amundu yali na matwi mehulikya, ahulikye.»

17 Mwa mango Yesu asiyaa amubuanano neingira mwa nyumba, abemitsa bewe niabanamubutsa kwa mushinga uyo abwire. 18 Naye nianaxubyitsabo mbu: «Munabe nemwe mutatsamwanaumpfa neki? Mutanechi ku kintsi kindu kyokiingira mwa mundu kiri akitenga ira mbua kitangakocha imuhatsa? 19 Kubwishi akindu ikyo kitakiingira mwa mwete uwe, wetuwe akiingiraho mwa bula nenyuma waho ni kyahuluka neya mwa bwiya.» Yesu abere aneenatyo, abwerekyaa kwa bilyo byoshe bikomire kwelibwa.

20 Yesu niananeena kandi mbu: «Akindu kyokitenga mwa kati ka mundu kyokinamuhatsa. 21 Kubwishi mwa kati ka mundu, mwa mwete uwe mo munatenga amianikire mibi yo inaleta: abulashalasha, na bwitsi, na bwiti, 22 na lusingi, na kalabwa kabi, na buiniini, na bitingo, na micho mibi, na lui, na lukambo, na kingami, na butiritiri. 23 Abubi bwoshe ubo abutenga mwa kati ka mundu, nabo bobunamuhatsa.»

24 Niyo Yesu atenga aho, neya mwa kyango kyo kiri hofi na mulungu we Tiro. Iyo, nianaingira mu nyumba mu bubixo, abaa ataxonda mbu bamenye kwali umo. Wetuwe litakocheka mbu aibishe. 25 Mukatsi muuma, mwali ni aundirwe na bixwatsi, nianaumpfa amwatsi wa Yesu. Nianahika neyiuma mwa bishando bya Yesu. 26 Amukatsi uyo atabaa muyahuti, abaa mu Kiriki, mwicha mwa kyango kye Suriya. Nianahema Yesu mbu ahentse akixwatsi ikyo kitenge mu mwali. 27 Wetuwe Yesu nianamuxubyitsa mbu: «Siya kasa abana ba nyumba batangebauuta, kubwishi litalirene kwetsimba abilyo bya bana nekabulabyo asambwa.»

28 Amukatsi uyo nianamuxubyitsa mbu: «Ninakuwetu, auneena kuli. Wetuwe sinabe na sambwa sinalya bya bana baneretoyangya kwa mesa.»

29 Yesu nianamubwira mbu: «Kubwishi bwa muxubyo uyo, uhara ungafuluka hamwawe, akixwatsi kyametenga mu mwali wawe.»

30 Amukatsi uyo abere ahika mwamwe, nianashingana mwali ni aonchire kwa ngyingo, na kixwatsi ikyo ni kyamemutengamo.

31 Inyuma kwaho Yesu nianatenga mwa kyango kyo kiri hofi ne Tiro, nianatsuka i Sitona na hakatikati ka kyango kye Ndekapoli*, abanehika kwa ngetsi ye Ngalilaya. 32 Niabanamuletera mundu yabaa mutwitwi kandi ni mutepfutepfu. Bobaletaa amundu uyo niabanaitondoola ku Yesu mbu amulamye kwemuhirako asaminwe siwe. 33 Yesu nianaisiika naye hale na mubuanano, nianamuhira amyolota mwa matwi, nianachira mate, nemupfulako kwa lulimi mwa mate mewe yenawene. 34 Inyuma kwaho Yesu nianalalamira mu mbingu, nianahumula nebwira amundu uyo mbu: «Efata», rebula mbu: «Tsibukala!» 35 Mu kashalimo, amatwi mewe niamanatsibukala, na lulimi luwe nalo luiyobola, nianatangira ineena kushe. 36 Yesu nianateekabo mbu batabwiraa mundu woshewoshe amwatsi wa kinwa iki. Wetuwe kwahangiraabo mbu batapfuliraao mundu woshewoshe, kwa mwatsi anayaa ngulu neshanchana mwa bandu. 37 Abandu niabanashishala kutsibu mbu: «Abinwa byakola bikwirire kutsibu. Atuma na batwitwi baumpfa, na batepfutepfu ni baneena kushe.»