1 Ʉnyenye aɨmɨhanga makule kʉnsoko a magazo nɨ mɨlandʉ anyu. 2 Pakalɨ aɨmishiɨ mʉzetyata ntendo nimbɨ niya ʉnkumbigʉlʉ ʉwʉ, mʉzemitʉmɨla mʉkʉlʉ nʉwa ahɨng’wɨ nɨɨza mʉtemi wilunde, nkolo ɨyo nitʉma mʉlɨmo mʉantʉ nɨagila lwijo kʉng’wi Itunda. 3 Nʉsese pakalɨ aɨkɨhanga ɨenso, aɨkishiɨ kʉzekʉtyatile kɨlakulaku kitʉ nika ntendo niya mɨlandʉ nʉkitʉma makani ayo naɨloeelya mɨɨlɨ nɨ mahala itʉ. Kʉpʉma ng’wandyo nʉsese ga kʉtugɨwe mʉ mɨlandʉ, aɨkʉtakɨwe kʉpɨsɨɨligwe ni Itunda.

4 Ingɨ Itunda waʉkende dʉ nɨkɨaisa kɨkʉlʉ. Aɨʉkʉloilwe ʉsese kʉ ʉlowa nʉʉgila mpyani, 5 itɨ gwa palʉng’wɨ nɨkɨna aɨkakule kʉnsoko amɨlandʉ itʉ, wɨkakʉtenda kʉtule kɨapanga palʉng’wɨ nʉ Kilisito. Kʉʉkende wang’wi Itunda ʉnyenye magunilwe. 6 Kʉkamɨnkana nʉ Kilisito Yesʉ, Itunda aɨʉkiʉkilye palʉng’wɨ nʉng’wenso, kende tema palʉng’wɨ nʉ Yesʉ ʉko kigʉlʉ. 7 Itɨ gwa aɨʉloilwe kʉlagɨɨla ʉkʉlʉ nʉwa ʉkende wakwe kʉ antʉ amatungo napembilye naɨʉkʉkendepile kʉ ʉkende kʉ ʉkamɨnkani witʉ nʉ Kilisito. 8 Kʉnsoko mʉgunilwe kʉ ʉkende wakwe kʉkɨɨla kʉmʉhʉɨɨla ʉ Kilisito. Ikani ɨlɨ shanga lipumɨɨe mʉngulu yanyu, ingɨ kɨpegwa kʉpuma kʉng’wi Itunda. 9 Leki kikʉlyi kʉnsoko shanga aɨmʉgunilwe kʉpuma mʉntendo yanyu. 10 Ʉsese kʉʉmbilwe ʉpya ni Itunda kʉkɨɨla kʉkamɨnkana nʉ Kilisito Yesʉ kʉhume kitʉma makani nɨmaza mʉlikalo litʉ nʉkʉnoneeleye.

11 Itɨ gwa kɨmbʉki naɨmɨlɨ pakalɨ ʉnyenye antʉ nɨshanga mɨ Ayahudi nɨɨmitanga "Shanga atawe kiganda" ingɨ nɨanso iɨla antʉ "Nɨatawe kiganda" kʉnsoko a kɨntʉ nɨatendile mʉmɨɨlɨao. 12 Kɨmbʉki kɨna pakalɨ shanga aɨmʉmʉlɨngile ʉ Kilisito, aɨmʉkomilwe nɨ Aisɨlaeli, mɨkatula mɨageni nɨagila lyoma kʉsɨngɨɨlya malago ɨhi ayo Itunda naɨʉtambʉe kʉ antʉ akwe kɨna ʉkitʉma. Aɨmɨagila isʉmbɨɨlyo hangɨ shanga aɨmʉmʉlɨngile Itunda mʉnʉ mihɨɨ. 13 Pang’wandyo ʉnyenye aɨmɨkʉlɨ ni Itunda, ingɨ itungo ɨlɨ makamɨkana nʉ Kilisito Yesʉ, maina mɨpakupɨ kʉkɨɨla sakami ang’wa Kilisito naɨhunʉkile pa mʉsalaba. 14 Ingɨ ʉ Kilisito ng’wenso ʉkʉletee matiliga kʉasasha Ayahudi nɨ antʉ nɨ shanga Ayahudi kʉtule ndʉgʉ ɨng’wɨ. Kʉʉpumya mʉɨli wakwe ng’wenso wɨkaheja wilei naɨʉkʉkomile anga ipʉpa. 15 Kilisito aɨʉhegilye malagɨɨlyo ang’wa Musa palʉng’wɨ nɨmiko akwe, wɨkasasha madale abɨlɨ atule ɨpalʉng’wɨ nahangigwe nʉ Kilisito, kʉtenda itɨ wɨkaleta matiliga kʉng’witʉ. 16 Kilisito wɨkaheja wilei kʉ Ayahudi nɨ antʉ nɨshanga Ayahudi, nʉ kʉasasha atule ndʉgʉ ɨng’wɨ, kʉkɨɨla kʉsha kʉng’wakwe mʉmʉsalaba, sʉnga wɨkasasha ndʉgʉ yɨhii niibɨɨlɨ yigombye ni Itunda. 17 Kilisito aɨʉzile wɨkatanantya Nkani Nza niya matiliga kʉng’wanyu ʉnyenye nɨshanga mɨ Ayahudi, nɨ antʉ nɨ shanga aɨmʉmʉlɨngile Itunda, mikaaletela hangɨ Nkani Nza nɨ matiliga kʉ Ayahudi nɨamʉlɨngile Itunda. 18 Itigwa, kʉkɨɨla Kilisito, ʉsese kɨhi nɨ kɨ Ayahudi nʉ nyenye nɨshanga mɨ Ayahudi kʉhumile kʉgombeka kʉng’wa Tata kʉ Ng’wahʉ Ng’welʉ.

19 Itɨ gwa, ɨtungo ɨlɨ ʉnyenye nɨ shanga mɨ Ayahudi shanga mɨageni hangɨ akɨlanzɨla, ingɨ mɨakolihɨɨ palʉng’wɨ nɨ antʉ ang’wi Itunda, kʉlʉlo mɨantʉ amito lang’wi Itunda. 20 Ʉnyenye nɨ mɨahʉɨɨli mʉzengɨlwe migʉlya amʉkuɨla nʉwa itʉmi nɨ amanga, nʉ Kilisito Yesʉ ingɨ ng’wenso wɨhanga igwe nikʉlʉ nɨlɨambɨɨe ɨnyʉmba. 21 Nyʉmba ɨhi ɨhongenkanigwe mʉng’wa Kilisito, lɨhongekee kʉtula Nyʉmba angwi Itunda kʉnsoko ang’wi Isekʉlʉ. 22 Kʉkamɨnkana nʉ Kilisito ʉnyenye mɨhi mʉhongekeewe palʉng’wɨ nɨantʉ nɨshanga Ayahudi mishiɨ ni Itunda kʉkɨɨla Ng’wahʉ Ng’welʉ.