1 Naɨakɨla mahikʉ mʉtandatʉ, Yesʉ wɨkaahola kɨmpelo Petelo nʉ Yakobo nʉ mʉlʉna ʉ Yohana Mʉbadisi, ɨkakʉɨla ɨkanankɨla mʉlʉgʉ nʉ lʉlɨpʉ. 2 Kʉng'wanso Yesʉ wɨkakaɨlɨka ikelʉ lakwe ntongeelaao, ʉsʉ wakwe ʉkamɨlɨgɨnta anga ʉmɨlɨgɨntu nʉwa lyoa nɨmatʉgalo akwe ikelya anga nzelya. 3 Papo paapo ɨkigela Mʉsa nʉ Elɨa, ɨkakitambʉlya nʉ Yesʉ. 4 Itɨgwa ʉ Petelo naɨ waona itɨ wɨkamʉɨla ʉ Yesʉ, "Isekʉlʉ ingɨ iza ʉsese kikiɨ papa! Anga ikʉloe kʉzenga itala itaatʉ. Kɨng'wɨ kako, king'wɨ kang'wa Mʉsa ikiʉya kangwa Elɨa."

5 Petelo naɨwakɨlɨ ʉkʉtambʉla itɨ, ilʉnde lyelʉ lɨkaaimba, akija lʉli kʉpʉma milʉnde nɨlanso, lʉkalʉnga, "Ʉyʉ yʉyʉ Ng'wana wane mʉlowa, nɨndoeeigwe nʉng'wenso, mʉtegeelyi ng'wenso."

6 Amanyisigwa akwe naɨija lʉli nʉlanso, ɨkogopa ɨkagwa pihɨɨ ʉʉndala. 7 Yesʉ wɨkaahanga, wɨka atonya, wɨkaaɨla, "Imɨki, leki kogopi!" 8 Naɨagoza, shanga akaona antʉ nɨangɨɨza, ingɨ ʉ Yesʉ du.

9 Itɨ gwa, naɨ akʉhʉlʉmʉka mʉlʉgʉlʉ, Yesʉ wɨka ahʉgʉlya, "Mʉleke kʉmʉila mʉntʉ wɨhi makani aya nɨmʉmaine kʉpikɨɨla Ng'wana nʉwa Mʉntʉ nʉwɨkiyʉka."

10 Sʉnga amanyisigwa akwe ɨkamʉkolya, "Nɨkɨ amanyisi amalagɨɨlyo ang'wa Musa ɨlʉnga kɨna Elia ʉtakɨwe waze hanza?"

11 Yesʉ wɨkaasʉkɨɨlya, "Ɨtai, Elia ʉzile hanza kʉnoneelya makani ɨhi. 12 Ingɨ kʉmʉɨla, Elia wazile antʉ shanga ɨkamʉmanya, ingɨ ɨkamʉtendeela anga nɨatakile. Ingɨ Ng'wana nʉwa Mʉntʉ akʉmʉtendeela anga mʉatakɨe."

13 Papo gwa amanyisigwa akwe ɨkalɨnga kɨna aɨʉkʉmʉtambʉla Yohana Mʉbadisi.

14 Naɨ aʉpikɨɨla milʉndo nʉwa antʉ, mʉntʉ ʉng'wɨ wɨkamʉhanga Yesʉ, wɨkatʉgama pamɨgʉlʉ, 15 wɨkalʉnga, "Isekʉlʉ mʉaisɨɨlye ʉng'waane kʉnsoko wɨgwa nkolo, hangi wagaa nangaluu, nkʉa yɨdʉ wɨgwɨla mʉmoto ang'wɨ mʉmazɨ. 16 Aɨnʉmʉletile kʉ amanyisigwa ako ɨkaleng'wa kʉmʉkomya."

17 Yesʉ wɨkaaɨla, "Ʉnyenye wileli nɨmɨagila ʉhʉɨɨli, nɨmɨtenda magazo! Kʉikiɨ nʉnyenye kʉpikɨɨla nalɨ? Kʉmʉgimɨɨlya kʉpikɨɨla nalɨ? Mʉleti mʉhʉmba nʉwanso apaitɨ!" 18 Yesʉ wɨkamʉkenela hɨng'wɨ, wɨkapuma, papo paapo mʉhʉmba nʉwanso wɨkakomya.

19 Sʉnga amanyisigwa ɨkamʉhanga Yesʉ waze wing'wene, ɨkamʉkolya, "Kʉnɨkɨ ʉsese kaleng'wa kʉmʉpʉmya hɨng'wɨ nʉwanso?"

20 Yesʉ wɨkaasʉkɨɨlya, "Kʉnsoko ʉhʉɨɨli wanyu ʉniino. Taɨ kʉmʉtambʉɨla, anga mʉtule mʉkete ʉhʉɨɨli ʉniino anga kaseke ka haladali, mʉhʉmile kʉlʉɨla ʉlʉgʉlʉ ʉlʉ. ‘Hega apa itɨ ʉlongole apoitɨ,’ nʉ lwenso lʉkʉ longola. Kʉtili kɨntʉ kɨhi nɨkɨkʉmʉlema. 21 Hɨng'wɨ anga ʉyʉ shanga ʉhʉmile kʉpʉmaʉʉ, ingɨ kʉlompa nʉ kʉgwalya kʉlya."

22 Lʉhikʉ lʉng'wɨ amanyisigwa naɨakolɨ palʉng'wɨ kʉ Galilaya, Yesʉ wɨkaaɨla, "Ng'wana nʉwa Mʉntʉ ʉkʉambwa nʉkʉtalwa kʉantʉ, 23 antʉ nɨanso akʉmʉbʉlaga, lʉhikʉ nʉla kataatʉ ingɨ ʉkiʉkigwa."

Amanyisigwa akwe ingɨ ɨkahʉsha ʉbi.

24 Naɨapɨka kʉ Kapelinaʉmu ahangʉlya kodi anyʉmba ang'wi Itunda ɨkamʉhanga ʉ Petelo, ɨkamʉkolya, "Itɨɨ, mʉmanyisi wanyʉ wɨpumyane kodi na Nyʉmba ang'wi Itunda?"*

25 Petelo wɨkasʉkɨɨlya, "Ee wɨpumya."

Itɨ gwa, Petelo naɨ wingɨla mʉnyʉmba, Yesʉ wɨkamʉkaya ʉ Petelo wɨkamʉkolya, "Ʉewe Simoni, ʉine ʉlɨ? Atemi amihɨɨ ɨhangʉlya kodi kʉpuma kʉantʉ nɨaʉlɨ? kʉpuma kʉalola ihɨɨ ang'wi anyakʉlɨ?"

26 Petelo wɨkasʉkɨɨlya, "Kʉpuma kʉanyakʉlɨ."

Yesʉ wɨkamʉɨla. "Kʉlʉlo akola ihɨɨ alekilwe. 27 Ingɨ kʉleke kʉatasha, hola ɨndoano longola mʉlʉzɨ wende ʉtege mʉlʉzɨ, nsamaki ang'wandyo kʉambigwa, mamahʉle mʉlomo ʉkʉhanga mpɨa. Hole mpɨa nanso ʉpumye kodi ane nɨyɨ nako."