1 Yesʉ naɨwakondya kʉtambʉla nkani yɨhi, wɨkaaɨla amanyisigwa akwe, 2 "Mʉlɨngile kɨna asiga mahikʉ abɨɨlɨ itule iloeelye nɨla pasaka, Ng'waa Mʉntʉ nʉyo ʉkʉkononteelwa mʉ mʉsalaba."

3 Itungo nɨlanso Apolyi nɨakʉlʉ nɨatongeeli aayahudi ɨkaɨka ianza mizʉmba lang'wa Kayapwa, mʉpolya nʉ mʉkʉlʉ. 4 Ɨkisɨja akʉmʉamba ʉli ʉ Yesʉ kisuɨ amʉbʉlage. 5 Ingɨ ɨkigombasɨɨlya ɨkani ɨlɨ lɨleke kitung'wa mʉ mahikʉ iloeelya nɨla pasaka, antʉ aleke kʉleta minyomo.

6 Yesʉ naʉmolɨ kʉ Betania, mʉnyʉmba ang'wa Simoni, naɨ mʉnyambili, 7 mʉsʉngʉ ʉng'wɨ nsʉpa a nɨnonigwe nigwe nɨlitangwa alabasita ɨkete makʉta aɨgʉlwɨ nʉwa mpɨa yɨdʉ, wɨkamʉdumbʉnkɨlya imakʉta nanso mitwe. 8 Amanyisigwa akwe naɨaona iti ɨkataka, ɨkalʉnga, "Ʉpʉngʉ wantʉni ʉwʉ? 9 Makʉta aya azahʉmile kʉgʉligwa mpia yidʉ, apegwe ahimbɨ impɨa niyanso."

10 Yesʉ wɨkalinga mʉakʉsɨga, wɨkaaɨla, "Niki mʉkʉmʉnyoma ʉmʉsʉngʉ ʉyʉ? Nʉanso wɨtʉmile ɨkani niziza. 11 Ahimbɨ ɨzamine mahikʉ ɨhi, ilagwa ʉnene shangakikiɨ nʉnyenye mahikʉ nɨhi. 12 Mʉsʉngʉ ʉyʉ ʉndʉbʉnkɨɨye ɨmakʉta ʉkʉnoneelya mʉɨlɨ wane kʉnsoko kʉikwa kʉng'waane. 13 Kʉmʉtambʉila taɨ, ga yɨhi mʉʉnkʉmbigʉlʉ Nkani Nziza ikʉtanantigwa, iti nʉtendile ʉmʉsʉngʉ ʉyʉ ikʉtambʉlwa kʉmʉkimbʉka ng'wenso."

14 Sʉnga, Yʉda Isikaliote ʉng'wɨao mʉamanyisigwa awo nikʉmi naabɨɨlɨ, wɨkalongola kʉapolya nɨakʉlʉ, 15 wɨkaaɨla, "Mʉkʉmpa ntʉni anga nʉmʉletele ʉ Yesʉ?" Ɨkamʉpa makʉmi ataatʉ a mpia. 16 kʉpuma itʉngo lɨlo ʉ Yʉda wɨkatʉladumɨɨla lyoma nɨlakʉaletela ʉ Yesʉ.

17 Lʉhikʉ nʉla ng'wandyo nʉliloeelya nɨla mɨkate nɨshanga ɨgahɨigwe, amanyisigwa akwe ɨkamʉhanga ʉ Yesʉ ɨkamʉkolya, "Ʉloilwe kʉkʉnonelelye pɨ indya niyiloeelya nɨla pasaka?"

18 Yesʉ wɨkaasʉkɨɨlya, "Longoli kʉkɨsalɨ kʉmʉntʉ ʉng'wɨ, mʉmʉile: ‘Mʉmanyisi ʉlʉngile, itʉngo lane lapika; nɨkʉlɨla ɨpasaka palʉng'wɨ nɨamanyisigwa ane kʉng'wako.’"

19 Amanyisigwa ɨkatenda ʉʉ anaga ʉ Yesʉ naʉalagiiye, ɨkanoneelya indya niyiloeelya nɨla pasaka.

20 Naɨyatula mpindi, Yesʉ palʉng'wɨ nɨamanyisigwa akwe ikumi abɨɨlɨ ɨkikiɨ ahume kʉlya indya. 21 Naɨakʉlya, Yesʉ wɨkalʉnga, "Kʉmʉtambila taɨ, ʉng'wɨanyʉ ʉkʉmpɨlʉka.

22 Amanyisigwa akwe ɨkaalɨka mʉnkolo, ɨkatulakolya, ʉng'wɨ ʉng'wɨ, "Isekʉlʉ! Itɨ, nenene?"

23 Yesʉ wɨkaasʉkɨɨlya, "Ʉyʉ nʉkʉlɨɨlya ɨntonge mibakuli palʉng'wɨ nʉnene, yʉyo ʉkʉnsuɨpa. 24 Ɨtai, Ng'waa Mʉntʉ ʉkʉsha anga ʉandɨkwa wang'wi Itunda nʉʉandikilwe, ingɨ ʉkɨa wakwe mʉntʉ ʉyʉ nʉkʉmʉsuɨpa ʉ Ng'waa Mʉntʉ! Aibahʉ mʉntʉ nʉanso aɨwaleke kʉtʉgwa."

25 Yʉda ʉyʉ nʉmʉsuɨpi, wɨkamʉkolya, "Mʉmanyisi, itɨ nenene?" Yesʉ wɨkamʉsʉkɨɨlya, "Ʉlʉngʉle wewe."

26 Naɨakʉlya, Yesʉ wɨkahola mʉkate, wɨkamʉsongelya Itunda, wɨkaega, wɨkaapa ɨamanyisigwa akwe wɨkaaɨla, "Holi mʉlye; ʉwʉ wʉwʉ mʉɨlɨ wane."

27 Sʉnga wɨkahola kikombe nɨka dibai, wɨkamʉsongelya Itunda, wɨkaapa amanyisigwa akwe, wɨkalʉnga, "Ng'weli mɨhi ɨkɨkombe ɨkɨ; 28 kʉnsoko ɨyɨ ingɨ sakami ane nɨkʉkamɨnkɨɨlya kɨna ilago ingɨ tai, sakami nɨkʉhʉnʉka kʉnsoko aantʉ ɨdʉ ahume kʉhegeligwa mɨlandʉ. 29 Kʉmʉɨla, shanga kʉng'wa hangi ɨdibai a mʉzabibʉ kʉpikɨɨla lʉhikʉ ʉlo ninzeng'wa nimpya palʉng'wɨ nʉnyenye kʉʉtemi nʉang'wa Tata ane."

30 Naɨ akondya kimba lyimbo, ɨkahega, ɨkalongola mʉlʉgʉlʉ nʉla Mɨzeɨtʉni.

31 Sʉnga Yesʉ wɨkaaɨla, "Ʉtikʉ nʉa lelo, ʉnyenye mɨhi mʉkʉmanka nʉkʉndeka, kʉnsoko yandɨkilwe. ‘Kʉmʉkʉa ʉmʉdimi, ninkolo nɨyidale yʉkʉsapatɨla.’ 32 Ingɨ anga niʉka, kʉmʉtongeela kʉ kɨsalɨ ka Galilaya."

33 Petelo wɨkamuɨla ʉ Yesʉ, "Ata ɨhi akʉleke, ʉnene shanga kʉʉleka."

34 Yesʉ wɨkamʉɨla "Kʉʉtambʉila ɨtai, nsambaligʉgʉ ize ɨkɨlɨ kʉkʉnkʉla ʉkʉnihita nkʉa itaatʉ."

35 Petelo wɨkamʉɨla ata anga ɨzeisingilye kʉsha, kʉsha palʉng'wɨ nʉewe, ɨtai shanga kʉʉhita,

"Nɨamanyisigwa ɨaʉya ɨkalʉnga ʉʉ ɨhi.

36 Sʉnga Yesʉ wɨkalongolaniya palʉng'wɨ nɨamanyisigwa akwe mʉkibʉʉlya ka Getisemae, nʉyo wɨkaaɨla, "Ikii papa ʉnene nongole pa ntongeela nendelompa." 37 Wɨkamʉhola Petelo nɨana ang'wa Zebedayo abɨɨlɨ, wɨkandya kʉona ʉwaɨ nʉ kaga mʉnkolo. 38 Papo wɨkaaɨla, "Nkete ʉwaɨ ʉkʉlʉ mʉnkolo ane. Leki kʉlali ikii mʉlompe palʉng'wɨ nʉ nene."

39 Itɨ gwa, wɨkalongola pantongeela iniino, wɨkagwa ʉʉndala, wɨkalompa. "Tata, anga ɨze ihʉmikile, ʉlwago ʉlʉ, lʉnihʉge; ingɨ ileke kʉtʉla anga nene ndoilwe, ingɨ anga nʉewe ʉloilwe."

40 Sʉnga wɨkaasʉkila amanyisigwa, wɨkahanga alala. Wɨkamʉila ʉ Petelo, "Itɨ gwa itʉile kɨna mʉlemilwe kʉleka tʉlo ga nisaa ning'wɨne? 41 Hʉgʉki nʉ kʉlompa mʉleke kʉkʉlala mʉhʉme kʉleka kingɨla mʉʉgeng'wa. Nkolo ɨloilwe kʉtenda natakiwe ingɨ ʉmʉɨlɨ ʉgila anga ngʉlʉ."

42 Wɨkalongola hangi nkʉa akabɨɨlɨ kʉlompa: "Tata nʉwane, ang'wɨ shanga ʉkʉnihegelya ʉlwago kʉkiila kʉngiza mpaka lʉkiile kʉng'wane, nagomba tenda anga nʉloilwe." 43 Wɨkaasʉkila hangi, wɨkahanga alae, kʉnsoko aɨalemigwa tʉlo.

44 Itɨ gwa, wɨkaaleka, wɨkasʉka hangi kʉmalompi nkʉa akataatʉ wɨkalompa malompi yayoyayo. 45 Sʉnga wɨkasʉka ɨamanyisigwa nɨanso, wɨkaaɨla, "iti, mʉkili mʉlae nʉkʉsʉpyane? Gozi itʉngo lapɨka, Ng'waa Mʉntʉ ʉkʉambwa nɨanyamilandʉ. 46 Ʉki; kwendi. Gozi! Ʉyʉ nʉkʉnsuɨpa wapika."

47 Ʉgwa, Yesʉ naɨwakili ʉkʉatambʉila, itʉngo lilo Yʉda ʉng'wɨ nʉwa amanyisigwa ikʉmi na abɨɨlɨ wɨkapika. Yʉda wikaze witongeeye niantʉ idʉ. Ikazeine nɨantʉ idʉ nɨapʉmya mapolya nɨakʉlʉ nɨanyampala aantʉ. 48 Ʉyʉ naʉtakile kʉmʉsuɨpa ʉ Yesʉ, aɨwakondya kʉatambʉila ɨkɨlɨngasiilyo kakʉalagiila: Ʉyʉ nɨkamʉlamʉsha ɨze nʉmʉungatɨe, mʉmʉambe yʉyo."

49 Itɨ gwa, ʉ Yʉda wɨkamʉhʉmbeela ʉ Yesʉ, "wɨkamʉlamʉsha, "Ʉwe mʉmanyisi, mɨlamʉ!" Sʉnga wɨkamʉungatɨla.

50 Yesʉ wɨkamʉɨla "Ʉwe mʉhʉmbamɨane, itʉme ɨkani nʉzɨɨe.

"Papo antʉ nɨanso ɨkamʉhumbeela ʉ Yesʉ, ɨkamʉamba, ɨkamʉtʉnga. 51 Ʉng'wɨao naɨ ɨpalʉng'wɨ nʉ Yesʉ wɨkatala mʉkono, wɨhopola ɨpanga akwe, wɨkamʉtema kʉtwɨ, ʉng'wɨao mʉitʉmi mʉpolyi nʉmʉkʉlʉ. 52 Papo Yesʉ wɨkamʉɨla "Sʉkɨɨlya ɨpanga ako mʉnyalahanda, kʉnsoko ʉyʉ nʉwɨbʉlaga na panga, ʉzɨɨzabʉlagwa na panga. 53 Itɨɨ, shanga mʉlingɨle kɨna nihʉmile kʉmʉlompa ʉ Tata ane wanzaɨɨlye nʉo ʉhumile milʉndo imilʉndo ambita ikʉmi naabɨɨlɨ naɨtʉmi akigʉlʉ nɨang'wi Itunda? 54 Ʉandikwa wang'wi Itunda akʉtimila ʉligwa naliiye kɨna ʉʉ yandikilwe itʉlike?"

55 Itʉngo lɨlo lɨɨlo Yesʉ wɨkaaɨla ɨantʉ nɨanso naɨaze mʉamba nʉkʉmʉtunga, "Itii, mʉzemamba anga nimii? Mʉkete nipanga niidunkuli, aɨnɨmanyisa Mʉnyʉmba ang'wi Itunda mahikʉ ɨhi, shanga aɨmimamba! 56 Ingɨ aya ɨti ɨhi apumɨe kʉtimilya nkani yaamanga naɨatambʉe."

Sʉnga amanyisigwa akwe ɨhi ɨkamanka, ɨkamʉleka.

57 Itɨ gwa, antʉ nɨanso naɨamʉambile Yesʉ ɨkamʉtwala Mʉnyʉmba mʉpolyi nʉ mʉkʉlʉ nʉwitangwa Kayapwa, kʉaɨlingɨie ɨamanyisi amalago nɨanyampala. 58 Petelo wɨkamʉtyatɨɨla kakʉlɨ wɨkingɨila mitando nɨla nyʉmba nanso wɨkikiɨ palʉng'wɨ nɨalili wahʉme kiloeela imakani akʉtʉla ʉli. 59 Itɨ gwa, akʉlʉ nɨamapolya nɨanza lɨhi ɨkadʉma akʉiili nɨaʉteele ahʉme kʉmʉbʉlaga ʉ Yesʉ, 60 ingɨ shanga ɨkalija ʉkʉiili wɨhi, palʉng'wɨ nɨ kɨna antʉ aɨapumilye ʉkʉiili wɨdʉ nʉaʉteele. Sʉnga ɨkaza akʉɨɨli abɨɨlɨ, 61 ɨkalʉnga, "Mʉntʉ ʉyʉ aɨʉlʉngile. Nihʉmile kʉmikumʉla Nyʉmba ang'wi Itunda nʉkʉmizenga kʉnsikʉ itaatʉ.’"

62 Sʉnga Mʉpolyi nʉmʉkʉlʉ wɨkimɨka, wɨkamʉkolya, ʉe Yesʉ, itɨɨ shanga ʉkʉasʉkɨɨlya anga kɨntʉne? Antʉ awa alʉngilile ʉli kʉhʉsʉ nʉewe? 63 Yesʉ ingɨ wɨkakilaja ɨhitwɨ. Mʉpolyi nʉmʉkʉlʉ wɨkamʉɨla "Lapa kʉlina lang'wa Itunda nʉmʉkʉlʉ. kʉtambʉile ang'wɨ ʉewe wewe wɨ Kilisito, Ng'wana wang'wi Itunda!"

64 Yesʉ wɨkamʉɨla "wewe ʉlʉngile! Ingɨ kʉmʉtambʉila, kʉpʉma itʉngo lili mʉkʉmʉona Ʉng'waa Mʉntʉ wɨkiɨ nkɨka akigoha nʉang'wɨ Isekʉlʉ Mʉkola ʉhumi, wazesima nɨmalunde akigʉlʉ."

65 Papo paapo mʉpolyi nʉ mʉkʉlʉ wɨkatamʉla matugalo akwe, wɨkalʉnga, "Wamʉtʉkɨla Itunda! kʉʉhiya ʉkʉɨɨli nʉʉlɨ? itungo ɨlɨ mijaa ɨkɨtʉki kakwe. 66 Ʉnyenye mʉsɨgile ʉli?

Nɨanso ɨkamʉsʉkɨɨlya, "Ʉyʉ inonee wabʉlagwe.

67 Sʉnga ɨkamʉtyila mati mʉʉsʉ, ɨkamʉkʉa makopi. Nɨang'wɨ ɨkazealongelekile kʉmʉkʉa makopi, 68 ɨkamʉila, ʉewe kilisito kʉlotoele nyenyʉ nʉkʉkʉile!"

69 Petelo aɨwɨkiɨ kʉnzi mitando. Mitʉmi ʉng'wɨ nʉakisʉngʉ wɨkamʉhanga, wɨkamʉkolya, "Ʉewe azamine nʉ Yesʉ nʉwakʉ Galilaya."

70 Petelo wɨkahita ntongeela aantʉ ɨhi wɨkalʉnga, shanga nɨkɨine ɨkɨ nʉkʉkɨtambʉla. 71 Petelo wɨkahega pang'wanso wɨkalongola pamʉmpita, mitʉmi mʉngɨɨza nʉwa kisʉngʉ wɨkamʉona, wɨkaaɨla antʉ naɨakolɨ pang'wanso, "Mʉntʉ ʉyʉ azaine nʉ Yesʉ Mʉnazaleti.

72 Petelo wɨkahita hangɨ wazelapa, "Shanga nʉmʉmanyile ʉmʉntʉ ʉyʉ."

73 Itungo lɨlo antʉ naɨimɨkile pang'wanso ɨkamʉhanga ʉ Petelo, ɨkamʉila, "Itaɨ, ʉewe mɨpalʉng'wɨ nʉ mʉntʉ ʉyʉ, kʉnsoko intambʉ ako mimpyani."

74 Sʉnga Petelo wɨkandya kizʉma nʉkʉlapa wazelʉnga, "Mʉntʉ ʉyʉ ʉnene shanga nʉmʉmanyile!

Nsambaligʉgʉ ɨkakʉnkʉla itʉngo lilo. 75 Petelo wɨkakɨmbʉka inkani naɨʉtambʉiwe nʉ Yesʉ: "Kina nsambaligʉgʉ ɨzeɨkɨlɨ kʉkʉnkʉla ʉkʉnɨhita nkʉa taatʉ, "Papo wɨkapʉma kʉnzi, wɨkatʉlalɨla nʉkilɨɨla.