1 Naɨ akɨla mahikʉ ɨdʉ, Yohana Mʉbadisi wɨkalongola wɨkatula tanantya ki jangwa nɨla kʉ Ʉyahudi, wazelʉnga, 2 "Pɨlʉki mʉleke mɨlandʉ anyu mʉmʉsʉkɨle Itunda, kʉnsoko Itunda ingɨ wihambile kʉatongeela antʉ akwe." 3 Yohana Mʉbadisi yʉyʉ naɨʉtambʉwe nʉ Isaya mʉmanga wang'wi Itunda kɨna,

"mʉntʉ ʉkitanga kʉpʉmɨɨla mijangwa,

‘Noneelyi nzɨla yang'wi Itunda,

gooli ʉkɨɨlo wakwe."

4 Yohana Mʉbadisi aɨ ʉtugae itugalo naɨlɨtumilwe kʉlʉnzʉ nila ngamɨa mʉ kɨlɨno aɨ wɨtʉngile mʉsipi nʉa ndɨlɨ, ndya yakwe aɨ nkʉmbi nʉ ʉkɨ. 5 Antʉ ɨkamendela Yohana Mʉbadisi kʉpʉma ku Yelʉsalemu nʉ Ʉyahudi wɨhi nɨ mahɨɨ ɨhi amʉmpelo mpelo a ʉmongo nʉa Yolodani, 6 Ɨkaleka mɨlandʉ ikamʉsʉkɨla Itunda, nʉ Yohana Mʉbadisi wɨkaabadisa mʉmongo nʉanso nʉa Yolodani.

7 Ingɨ Yohana Mʉbadisi naɨ waaona iʉmbi ikʉlʉ nɨla Apalisayo nɨ Asadukayo akʉmʉzɨɨla wahume kʉabadisa, wɨkaakolya, "Ʉnyenye wileli nʉ wanzoka, nyenyʉ nʉʉmʉhʉgʉye mʉhege nʉkʉʉtiga ʉtaki wang'wi Itunda nʉʉpembilye? 8 Itɨgwa itʉmɨ ntendo nɨnza nɨyakʉlɨngasɨɨlya kɨna maleka mɨlandʉ anyu. 9 Leki kʉsɨgi kɨna tata itʉ ʉsese ingɨ Ibilahimu, kʉnsoko Itunda ʉhumile kʉmʉpeza Ibilahimu ana kʉpuma mʉ magwe aya. 10 Ingɨ manyi kɨna ihengo laɨkwa pa mɨli a mʉtɨ, mʉtɨ wɨhi nɨ shanga wɨpeza nkali nɨ nza ʉkʉteng'wa ʉgʉmilwe mʉmoto. 11 Ʉnene kʉmʉbadisa na mazɨ kʉlɨngasɨɨlya kɨna maleka ntendo yanyu ni mbɨ. Ʉyʉ nɨ nɨmʉtongee wakɨlɨ ʉpembilye ʉkete ʉhumi nʉʉkʉlʉ kʉkila ʉnene, shanga nɨhʉmile kʉtolya mɨkoha a makwasa akwe, nʉanso ʉkʉmʉbadisa na Ng'wahʉ Ng'welʉ nʉ moto. 12 Mʉmikono akwe ʉkenkile kɨsela nɨka kʉpetela ilo, ʉkʉʉgɨɨlya kɨʉga ʉkʉpʉla ilo wakwe nʉkʉɨka misalanka, ʉkʉsonsa ipʉko kʉ moto nɨ shanga wɨlima."

13 Ʉʉgwa matʉngo nanso Yesʉ aiʉpumɨɨe kʉ Galilaya akapɨka pa mongo nʉwa Yolodani wabadisigwe nʉ Yohana Mʉbadisi. 14 Ingɨ Yohana Mʉbadisi wɨkahɨa kʉmʉgilya, wɨkamʉɨla, "Ʉewe ʉpembilye ʉbadɨsigwe nʉnene, Ʉnene ntakɨwe mbadisigwe nʉ ewe?"

15 Yesʉ wɨkasʉkɨɨlya wɨkamʉɨla, "Gomba ʉdu itungo ɨlɨ, kʉnsoko ʉʉ kʉtakɨwe kʉkondanɨɨlya tai ɨhi Itunda nʉloilwe kitʉme." Ʉʉgwa Yohana Mʉbadisi wɨkamʉbadisa.

16 Papo paapo Yesʉ naɨ wakondya kʉbadisigwa, akapʉma mʉ mazɨ, pʉmpʉlʉgʉ akaona igʉlʉ lalugʉka nʉ Ng'wahʉ ng'welʉ kʉmpyani a nkʉnda akasima nʉkutɨga miega lakwe. 17 Sʉnga lʉli kʉpumɨɨla kilunde lʉkalʉnga, "Ʉyʉ yʉyʉ Ng'wana mʉlowa wane, nɨndoeɨɨgwe nʉng'wenso."