1 Lʉhikʉ lʉng'wɨ Apalisayo nɨ Asadukayo ang'wɨ ɨkamʉhanga ʉ Yesʉ ɨkamʉgema, waalagile mɨʉkʉɨlwa kʉpembelya kigʉlʉ. 2 Yesʉ ingɨ wɨkaasʉkɨɨlya, "Anga itʉle mpɨndɨ, kʉnsoko kilunde ikaʉku, mɨlʉnga mʉdaʉ ukela ʉza. 3 Nɨ kɨdaʉdaʉ, milʉnga lelo ize ng'wega ʉkʉlʉ, kʉnsoko malunde agiɨɨye. Itɨ gwa, ʉnyenye mitendisaa mɨaza, mʉlingɨle kʉgoza lelo kigʉlʉ iyʉlɨ, ingɨ shanga mʉlingɨle kʉtemanʉla matʉngo ampelo? 4 Wileli nʉ ʉbɨɨ nʉʉgila ʉhʉɨɨli! Kɨloilwe mɨʉkʉɨlwa, ingɨ shanga akʉpegwa anga mɨʉkʉɨlwa wɨhi, ingɨ ɨkondile mɨʉkʉɨlwa ang'wa Yona."

Itɨ gwa, wɨkaaleka, wɨkalongola.

5 Amanyisigwa akwe naɨ aputa ʉlʉzi kenda itʉmbɨ nɨla kabɨɨlɨ, ɨkalɨnga kɨna shanga ahoile mɨkate. 6 Yesʉ wɨkaatambʉɨla, "Gozi kɨsa, hʉgʉki nɨ amila Aapalisayo nɨ Asadukayo."

7 Papo amanyisigwa ɨkatulitambʉlya, "Ʉkʉlʉnga ɨti kʉnsoko shanga kʉhoile mɨkate."

8 Yesʉ wɨkalɨnga nɨakikʉngʉma, wɨkaaɨla, "Ʉhʉɨɨli wanyu ʉniino! Mʉkikʉngʉma nɨkɨ mɨagila mɨkate? 9 Itɨɨ, mʉkɨlɨ du kʉlinga? Itɨɨ shanga mʉkɨmbʉkile apo naɨ mbeganilye mɨkate ɨtaano nɨkalɨsa antʉ elupu itaano? Itɨɨ aɨmizʉiye nkapʉ inga niya ʉsigo? 10 Angwɨ, mɨkate mʉpʉngatɨ naɨndɨsilye antʉ elupu innɨ, itɨɨ aɨmʉkahoee nkapu inga niya ʉsigo. 11 Yatʉlaʉli mahita kʉlɨnga kɨna shanga aɨnʉmʉtambʉie kʉnsoko amɨkate? Itungo ɨli hʉgʉki nɨ amila Aapalisayo nɨ Asadukayo."

12 Papo gwa amanyisigwa akwe ɨkalɨnga ɨa kɨna shanga igaɨ niya mɨkate, ingɨ ahʉgʉke nʉʉmanyisi nʉa Apalisayo nɨ Asadukayo.

13 Yesʉ naɨ wapɨka nkɨka niya kʉ Kaisalea nɨ Pilipi, wɨkaakolya amanyisigwa akwe, "Itɨɨ, antʉ ɨntambʉla ʉnene nɨ nyenyu?"

14 Amanyisigwa ɨkamʉsʉkɨɨlya, "Antʉ ang'wɨ ilʉnga kɨna wɨ Yohana Mʉbadisi nɨang'wɨ ilʉnga wɨ Elɨa nɨangwɨ ilʉnga wɨ Yelemia nɨang'wɨ ʉng'wɨ nʉwa amanga."

15 Yesʉ wɨkaakolya, "Haɨ ʉnyenye mɨlʉnga ʉnene nɨ nyenyʉ?"

16 Simoni Petelo wɨkasʉkɨɨlya, "Ʉewe ingɨ wɨ Kilisito Mʉguni, Ng'wana wang'wi Itunda nɨ mʉpanga."

17 Yesʉ wɨkamʉɨla "Ʉkembetilwe ʉewe Simoni ng'wana wang'wa Yona, kʉnsoko kʉtilɨ ng'waa mʉntʉ wɨhi nʉkʉkunʉkʉɨe ʉewe ɨkani ɨlɨ, ingɨ Tata wane nʉkolɨ kigʉlʉ. 18 Nʉ nene kʉʉila. Ʉewe wɨ Petelo,* igwe nikʉlʉ, migwe ili kulizenga idale la ahʉɨɨli ane. Ngulu yang'wa Shetani shanga yʉkʉʉhuma. 19 Kʉʉpa malʉgʉɨlo na ʉtemi nʉa kigʉlʉ, kɨhi nʉkʉkilugʉɨla mʉnʉ mihɨɨ, kɨkʉtula kalugʉɨlwa nʉ kigʉlʉ, kɨhi nʉkʉkɨlugaɨla mʉnʉ mihɨɨ, kɨkʉlugʉɨlwa nʉkigʉlʉ."

20 Sʉnga wɨka ahʉgʉlya amanyisigwa akwe kɨna aleke kʉmʉila mʉntʉ wɨhi kɨna nʉanso yʉyo Kilisito.

21 Kʉpʉma itungo lɨlo Yesʉ wɨkatʉla atambʉɨla kɨhenga amanyisigwa akwe kɨna ʉtakɨwe walongole kʉ Yelʉsalemu, kʉng'wanso ʉkagigwa ikʉlʉ nakʉsakigwa nɨ anyampala, nɨ apolyi nɨ akʉlʉ nɨamanyisi amalagɨɨlyo ang'wa Musa. Kɨna, ʉkʉbʉlagwa nʉlʉhikʉ lakataatʉ ʉkiʉkigwa.

22 Ingɨ ʉ Petelo naɨ wɨja itɨ, wɨkamʉpʉmya kimpelo wɨkatula mʉkenela. "Itunda nʉa kɨɨlɨlye kʉlɨ, Isekʉlʉ wane ɨkani ɨlɨ shanga lɨkʉʉpantɨka!"

23 Ingɨ Yesʉ wɨkamʉpɨlʉkɨla, wɨkamʉɨla Petelo, "Hega pa ntongeela ane, Shetani! Ʉewe wɨkɨnkwaatya kʉng'wane. Masigo ako shanga ang'wi Itunda, ingɨ akɨʉntʉ!"

24 Sʉnga ʉ Yesʉ wɨkaaɨla amanyisigwa akwe kɨna, "Mʉntʉ wɨhi nʉloilwe kʉntyata, ʉtakɨwe wiime ʉng'wenso, wagombe ʉlwago nʉ kʉaalɨka, papo wantyate. 25 Kʉnsoko, mʉntʉ nʉloilwe kʉgʉna ʉlɨkalo lakwe ʉkʉlʉlimɨlya, ingɨ mʉntʉ nʉkʉlʉlimilya ʉlɨkalo lakwe kʉnsoko ane ʉkʉlʉlija. 26 Itɨɨ, ʉmʉntʉ ʉkʉlija nsaɨlo kɨɨ anga wapate ʉgolɨ wɨhi nʉa mʉ ʉnkʉmbigʉlʉ kʉnʉ waze walimɨlye ʉpanga wakwe? Ang'wɨ, mʉntʉ ʉkʉpʉmya ntʉni wagune ʉlɨkalo lakwe? 27 Kʉnsoko, Ng'wana nʉwa Mʉntʉ ʉzɨɨza kikʉlyo lang'wa Tata wakwe palʉng'wɨ nɨa Itʉmi akigʉlʉ nɨang'wi Itunda, pang'wanso papo nʉɨka mʉlɨpa mʉntʉ wɨhi anga mʉntendo yakwe. 28 Kʉmʉɨla ɨtaɨ, akolɨ antʉ ang'wɨ papa nɨshanga akʉsha aze akɨlɨ kʉmʉona Ng'wana nʉwa Mʉntʉ ʉzile mʉ ʉtemi wakwe."