1 Yesʉ wɨkalongoleka kʉaɨla kɨna, "Ʉʉtemi wa kigʉlʉ, wɨpyani nʉ mʉntʉ nʉlɨmile mʉgʉnda, watemele mɨzabibʉ, naɨ wiandɨɨe kʉana antʉ alongole kutyɨtya mʉ mʉgʉnda nʉwanso. 2 Ɨkigombya nɨenso kɨna ʉkʉalɨpa ɨkɨnyamʉlɨmo kaʉtyɨti nɨka lʉhikʉ lʉng'wɨ, naɨ igombasɨɨlya wɨkaatwala kʉmʉlɨmo nʉwanso. 3 Wɨkapuma hangɨ matʉngo a saa tatʉ kɨdaʉdaʉ, wɨkaaona antʉ nɨaʉya ɨmɨkile insʉng'wa pigalagalo agilanga mʉlɨmo. 4 Wɨkaaɨla, ‘Longoli nʉnyenye mende tyɨtya kʉ mʉgʉnda wane nʉwa mɨzabibʉ, nʉ nene kʉmʉpa ɨkɨnyamʉlɨmo kanyʉ anga mʉitakɨwe.’ 5 Kʉlʉlo antʉ nɨanso ɨkalongola. ‘Ʉmʉkola mʉgʉnda nʉwanso wɨkapuma hangɨ itungo nɨla saa mʉtandatʉ nitʉngo nɨla saa kenda, wɨkatendaʉʉ. 6 Nɨ saa kʉmi na moja mpɨndɨ wɨkapuma hangɨ, wɨkaahanga nɨ aʉya imɨkile agilanga mɨlɨmo. Wɨkaakolya, ‘Nɨkɨ mimɨkila ng'ʉng'wɨ pii, mɨagilanga mʉlɨmone? 7 Antu nɨanso ɨkamʉsʉkɨɨlya, ‘Kimɨkile kʉnsoko kʉtilɨ anga mʉntʉ nʉkʉpee ʉmʉlɨmo wakitʉma,’ nʉyo wɨkaaɨla, ‘Nʉnyenye longoli mitʉme mʉlɨmo mʉ mʉgʉnda wane nʉwa mɨzabibʉ.’

8 "Lyoa naɨ lɨkʉhaɨɨla, mʉkola mʉgʉnda nʉanso wɨkamʉɨla ʉmʉamba mpɨa wakwe, ‘Itange ɨitʉma mʉlimo aze ʉape ɨkɨnyamʉlɨmo kao, wandye awa naza asɨkɨɨye kʉɨkwa mʉmʉlɨmo, ʉmaɨɨlye nawa naza atongee kʉɨkwa mʉmʉlɨmo. 9 Itɨgwa, ɨkaza awa naɨkilwe ɨmpɨndɨ matʉngo a saa kʉmi na moja wɨkapegwa ilɨpo la lʉhikʉ lʉng'wɨ. 10 Itɨgwa ɨkapika awa naɨandilye kɨdaʉdaʉ, nɨanso aɨasɨgile akongeeligwa kʉkila ɨaʉya, ingɨ mʉntʉ wɨhi wɨkapegwa ilɨpo la lʉhikʉ lʉng'wɨ. 11 Naɨahola ilɨpo lao, shanga ɨkalowa ɨkamʉɨla mʉkola mʉgʉnda shanga ʉkʉtendee anga iza. 12 Ɨkazelʉnga, ‘Antʉ awa naza asɨkɨɨye itʉmile mʉlɨmo itungo la saa ing'wɨ, nɨkɨ waapa anga ʉsese nɨkʉgimilye kituma mʉlɨmo ng'ʉng'wɨ pi?’

13 Papo gwa, "Mʉkola mʉgʉnda wɨkamʉsʉkɨɨlya ʉng'wɨao, ‘Mʉhʉmba mɨane, shanga nʉkʉkapile anga kɨntʉ! Itɨɨ, shanga aza kigombilye anga ilɨpo la lʉhikʉ lʉng'wɨ? 14 Hola ilɨpo lako, ʉlongole. Nene ndoilwe kʉmʉpa ʉyʉ nʉsɨkɨɨye anga ʉewe. 15 Itɨɨ, ngiigwene kitʉmɨla ɨnsao ane anga mʉndoewe? Itɨɨ, waona wɨlune kʉnsoko ʉnene nɨmʉkende?"’

16 Sʉnga Yesʉ wɨkalʉnga itɨ, "Ʉʉgwa, nɨatongee akʉsɨkɨɨlya, nawa nɨakʉsɨkɨɨlya akʉtongela."

17 Yesʉ naɨʉlongoe kʉ Yelʉsalemu, aɨʉhoile kɨmpelo atule ɨenso amanyisigwa akwe awa nikʉmi na abɨɨlɨ wɨkaaɨla, 18 "Tegeelyi katɨ," "Kʉlongoe kʉ Yelʉsalemu, kʉng'wanso Ng'wana nʉwa Mʉntʉ winzʉambwa nʉ kʉmʉtala Apolyi nɨakʉlʉ nɨ amanyisi amalago ang'wa Musa, nawo akʉlamʉla wabʉlagwe. 19 Nɨ Apolyi nɨakʉlʉ akʉmʉtala mʉantʉ nɨ shanga ayahudi, akʉmʉng'eng'a, nʉ kʉmʉkʉa nkotya sʉnga kʉmʉbʉlaga aze amʉkonontee mʉmʉsalaba, ingɨ ʉlʉhikʉ lakataatʉ ʉkiʉkigwa."

20 Sʉnga, mʉsʉngʉ wang'wa Zebedayo palʉng'wɨ nɨana akwe ɨkamʉhanga ʉ Yesʉ, wɨkatʉgama pa mɨgʉlʉ ang'wa Yesʉ wɨkalompa kɨntʉ.

21 Yesʉ wɨkamʉkolya, "Ʉloilwe ntʉni?" Mʉsʉngʉ nʉanso wɨkasʉkɨɨlya, "Sintambʉɨle ɨtai kɨna kʉʉtemi wako ɨana ane awa nɨabɨɨlɨ aziikiɨ ʉng'wɨ ipande lako nɨlakigoha nʉ mʉya ipande lako nɨla kɨsʉngʉ."

22 Yesʉ wɨkasʉkɨɨlya, "Ʉnyenye shanga mʉlɨngile mʉkʉlompa ntʉni. Itɨɨ, mʉhʉmilene kʉng'wela kɨkombe ka lwago anga nɨnɨkang'wela ʉnene?"

Ɨkamʉsʉkɨɨlya, "Ee kʉʉng'wela."

23 Yesʉ wɨkaaɨla, "Tai mʉhʉmile kʉng'wela kɨkombe ka lwago anga nɨnɨkang'wela ʉnene, ingɨ ʉlʉ nʉlakikiɨ ipande lakigoha ang'wɨ nɨlakɨkɨma shanga mʉlɨmo wane, ɨkani nɨlanso akʉpegwa nɨakondilye kʉɨkɨligwa nʉ Tata Wane."

24 Amanyisigwa aʉya awa nikʉmi naɨ ija itɨ, ɨkaatakɨɨla a Yakobo nʉ Yohana Mʉbadisi.

25 Kʉitɨ Yesʉ wɨkaitanga ɨhi palʉng'wɨ, wɨkaaɨla, "Mʉlɨngile kɨna atemi aantʉ nɨshanga Ayahudi ɨatema antʉao kʉʉhumi, atemi nɨanso ɨitʉmya antʉ mɨlɨmo kʉngulu. 26 Ingɨ kʉng'wanyʉ ileke kʉtʉla itɨ, mʉntʉ ʉyʉ nʉloilwe kʉtʉla mʉkʉlʉ kʉaʉya ʉtakɨwe kʉatʉmɨkɨla aʉya ɨhi, 27 nʉ mʉntʉ ʉyʉ nʉloilwe kʉtʉla mʉtongeeli wanyu ʉtakiwe watule mʉnyamɨlɨmo wanyu, 28 anga ʉʉgwa, Ng'wana nʉwa Mʉntʉ shanga aɨʉzetʉmɨkɨlwa, ingɨ aɨʉzetʉmɨkɨla nʉ kʉpʉmya ʉpanga wakwe wahume kʉakomola antʉ ɨdʉ."

29 Itungo Yesʉ nɨ amanyisigwa akwe naɨʉkʉhega mʉkɨsalɨ ka Yeliko, iʉmbɨ laantʉ lɨkamʉtyata. 30 Aɨakoli apokʉ abɨɨlɨ ikiɨ mʉmpelo anzɨla, naɨija kɨna Yesʉ ʉkɨile, ɨkitʉnta ɨzelʉnga, "Isekʉlʉ, Ng'wana wang'wa Daudi, kʉaisɨɨlye!"

31 Iʉmbɨ laantʉ nɨanso lɨkaakenela ɨapokʉ nɨanso akilage. Ingɨ apokʉ nɨanso ɨkalongoleka kitʉnta azelʉnga, "Isekʉlʉ, Ng'wana wang'wa Daudi, ʉkʉaisɨɨlye!"

32 Yesʉ wɨkimɨka, wɨkaɨtanga wɨkaakolya, "Mʉloilwe nʉmʉtendeele ntʉni?"

33 Apokʉ nɨanso ɨkamʉsʉkɨɨlya, "Isekʉlʉ kʉʉloilwe kʉone."

34 Kʉlʉlo, Yesʉ wɨkaaisɨɨlya, wɨkaatonya mihoao, itʉngo lɨlo ɨkatula ona, nawo ɨkamʉtyata.