1 Naɨakɨla lʉhikʉ nʉla kʉsupya, daʉ maniambwa mʉlʉhikʉ nʉla ng'wandyo nʉla wiki, Maliamu mʉnya kʉ Magidala nʉ Maliamʉ mʉya, ɨkalongola kʉgoza kɨbɨɨla. 2 Pʉmpʉlʉgʉ wɨkigela mʉtentemo ʉkʉlʉ wihɨɨ; kʉnsoko malaɨka wang'wi Isekʉlʉ aɨʉkʉsima kʉpʉma kigʉlʉ nʉ kʉlɨpingɨlitya igwe naɨlɨkiɨwe pakɨbɨɨla nʉ kʉlɨɨka kʉmpelo, wɨkɨkaɨla. 3 Ikelʉ lang'wa malaɨka ʉyu aɨlɨkʉmɨlɨgɨnta anga lʉpito, matʉgalo akwe aɨmelʉ pee. 4 Asʉnji a kɨbɨɨla ɨkatʉlakagata kʉwoa ʉkʉlʉ, ɨkagagantala anga antʉ nɨakʉle.

5 Malaɨka nʉwanso wɨkaaɨla asʉngʉ nɨanso, "Ʉnyenye leki kogopi! Ningɨle kɨna mʉkʉmʉduma Yesʉ naza amʉkomile mʉmʉsalaba. 6 Wɨkʉtilɨ apaitɨ, kʉnsoko wiʉka anga naza ʉlɨɨye. Pembyi mʉgoze paza amʉlalɨkilye. 7 Itɨ gwa, kayi longoli mʉatambʉile ɨamanyisigwa akwe kɨna, ‘wɨʉka nitungo ɨlɨ watongela kʉ Galilaya, kʉko mʉkʉmʉona. Aligwa ʉnene, nakondya kʉmʉila."

8 Asʉngʉ nɨanso ɨkatʉla nʉ woa kʉnʉ akete ʉlowa ʉkʉlʉ, ɨkapepaala ɨkamanka kenda kʉatambʉila amanyisigwa ang'wa Yesʉ impola izi.

9 Pʉmpʉlʉgʉ, mʉnzɨla ɨkatankana nʉ Yesʉ, nʉyo wɨkaaɨla, "Kʉmʉlamʉsha." Asʉngʉ awa ɨkamʉhʉmbeela, ɨkatʉgama pamɨgʉlʉ ang'wa Yesʉ, ɨkaamba migʉlʉ akwe. 10 Sʉnga ʉ Yesʉ wɨkaaɨla, "Leki kogopi! Longoli mʉaɨle ɨanyandʉgʉ ane alongole kʉ Galilaya, kʉko akʉmona."

11 Asʉngʉ nɨanso naɨ alongoe, asʉnja kɨbɨɨla nɨangwɨ ɨkalogola mʉkɨsalɨ kʉtwala mpola kʉ atongeeli aapolyi makani ɨhi napʉmie. 12 Itɨ gwa, atongeeli a apolyi ɨkatankana nɨatongeeli a ayahudi, naɨakondya kisɨja. ɨkaapa mpɨa yidʉ ɨasʉnja kɨbɨɨla 13 aze apema, "Ʉnyenye mʉtakɨwe kʉlʉnga itɨɨ. ‘Ʉtikʉ ʉsese naza kʉlae, amanyisigwa akwe aza amɨa.’ 14 Hangɨ anga mʉtongeeli nʉwa Alumɨ nʉwitangwa Pilato wije ʉlʉkani ʉlʉ, sese kʉʉmʉkʉɨɨla, ʉnyenye mʉleke kʉtula nigazo lɨhi.

15 Kʉlʉlo asʉnji awa nɨakɨbɨɨla ɨkaɨhola impia nianso, ɨkatenda anga naɨ amanyisigwe. Mpola izi yenee Mʉayahudi nʉsambʉ nʉyʉ.

16 Amanyisigwa awo nikʉmi na ʉng'wɨ ɨkalongola kʉ Galilaya mʉ lʉgʉlʉ ʉlo anga naɨalagɨigwe nʉ Yesʉ. 17 Naɨamʉonaʉ Yesʉ ɨkamʉkʉlya, palʉng'wɨ nʉkʉtʉla nɨang'wɨ shanga aɨahʉɨɨe. 18 Yesʉ wɨkaahʉmbeela, wɨkaaɨla, "Mpewe nene ʉhʉmi wɨhi nʉwa kʉtema kigʉlʉ nʉ mihɨɨ. 19 Kʉnsoko ɨyɨ, longoli mʉʉnkumbigʉlʉ, mende mʉatende antʉ amahɨɨ ɨhi atʉle amanyisigwa ane. Mʉze abadisa kʉ lina lang'wa Tata nʉ Ng'wana nʉ Ng'wahʉ Ng'welʉ. 20 Amanyisi kʉamba makani ɨhi ninʉmʉpee. Ʉnene nɨpalʉng'wɨ nʉ nyenye mahikʉ ɨhi, sʉnga ɨmpelo amatʉngo."