1 Sʉnga Yesʉ wɨkanankɨla mibɨnɨ, wɨkatambʉka lʉzɨ wɨkapɨka mʉkɨsalɨ ka Nazaleti naɨ wishiɨ. 2 Sʉnga antʉ ɨkamʉletela mʉntʉ ʉng'wɨ ʉmʉɨlɨ wakwe aɨ ʉkule igandi amʉlalɨkilye mʉʉlɨlɨ, Yesʉ naɨ waona ʉʉhʉɨɨli wa antʉ nɨanso, wɨkamuɨla mʉlwae nʉwanso, "Ng'waane komya nkolo! Walekelwa mɨlandʉ ako"

3 Amanyisi amalagɨɨlyo ang'wa Musa nɨang'wɨ ɨkandya kʉsɨgɨɨla kɨna, "Mʉntʉ ʉyʉ ʉkʉmʉbehʉla Itunda"

4 Yesʉ akalɨnga ɨmasɨgoao, wɨkaaɨla, ‘‘Kʉnɨkɨ mʉkʉsɨga niibɨ itɨ mʉnkolo yanyu? 5 Itɨ, nɨlɨʉiɨ nipepele, kʉlʉnga walekelwa ne mɨlandʉ? Ang'wɨ kʉlʉnga, ‘Ʉka ʉgenda? 6 Itɨgwa, mʉlɨngɨ kɨna Ʉng'wana wang'wa Adamʉ ʉkete ʉʉhʉmi nʉa kʉlekela antʉ ɨmɨlandʉ. Papo paapo wɨkamuɨla ʉmʉlwae ʉyo naɨ ʉkule igandi, "Ʉka kenka nʉʉlɨlɨ wako, longola kito.

7 Mʉntʉ nʉanso wɨkaʉka, wɨkalongola kito lakwe. 8 Antʉ ɨhi pamilʉndo nʉanso naɨ aona nanso, ɨkagʉlʉala; ɨkamʉkʉlya Itunda naɨ ʉapee ɨantʉ ʉʉhʉmi anga ʉwʉ.

9 Yesʉ naɨ wahega pang'wanso, wɨkamʉona mʉntʉ ʉng'wɨ lina lakwe Matayo, wɨkiɨ mʉnyʉmba akʉhangɨlya kodi. Yesʉ wɨkamʉɨla "Ntyate."

Nʉyo wɨkaʉka wɨkamʉtyata.

10 Yesʉ naɨ wɨkiɨ mʉnyʉmba ang'wa Mathayo walye ndya, kolwa, ahangʉlya kodi nɨanyamilandʉ idʉ ɨkapembya ɨkikiɨ palʉng'wɨ nʉ Yesʉ nɨa manyisigwa akwe alɨzanie ndya. 11 Apalisayo naɨaona nanso, ɨkaakolya amanyɨsigwa ang'wa Yesʉ, "Kʉnɨkɨ ʉ Yesʉ ʉkʉlɨzania nɨanya mɨlandʉ nɨahangʉlya kodi?"

12 Yesʉ wɨkija, wɨkaaɨla, "Antʉ nɨshanga alwae shanga ɨmʉduma mʉkilɨki, awa nɨalwae wawo ɨmʉduma. 13 Ʉʉgwa, longoli mimanyise ndogoelyo a nkani izi mʉlɨnge, ‘Ndoilwe kɨaisa, hangɨ shanga ipolyo. ‘Kʉnsoko shanga aɨ nzeitanga antʉ nɨagila milandʉ, ingɨ kʉ anyamilandʉ.

14 Sʉnga amanyisigwa ang'wa Yohana Mʉbadisi ɨkamendeela Yesʉ nʉkʉmʉkolya, "Ʉsese nɨ Apalisayo kɨgwalya kʉlya nkʉa yidʉ, nɨkɨ amanyisigwa ako shanga akʉgwalya lʉkʉlʉ kʉlya?

15 Yesʉ wɨkaasʉkɨɨlya, "Itɨɨ, antʉ nɨanilwe mʉwɨnga akʉhʉsha nʉkʉgwalya kʉlya mʉtɨzɨɨla nʉkolɨ palʉng'wɨ nɨenso? A, a! Shanga ʉʉ! Ingɨ itʉngo anga lipike mʉtɨzɨɨla ʉkʉhegigwa mʉng'wao papo akʉhʉsha nʉ kʉgwalya kʉlya.

16 Antʉ shanga ibadɨkɨla ikilaka nikɨpya mitaho. Kʉnsoko ikilaka nɨkanso kɨkʉtamʉla itaho nɨlanso napo naza yitamʉkile yɨkongeeleka. 17 Hangi antʉ shanga ɨkɨtɨla dibaɨ nɨ mpya mʉmɨpʉko nɨnonigwe kʉ ndɨlɨ a nkolo nɨkʉlʉpae. Anga akɨtɨle, dibaɨ ikʉtumbʉla mɨpʉko nanso nʉkʉhunʉka. Hangɨ mɨpuko nanso ɨkʉgazɨka. Ingɨ antʉ ɨkɨtɨla dibaɨ nɨmpya mʉmɨpuko nɨmɨmpya, dibai nɨ mɨpuko nanso yɨkishiɨ uza.

18 Yesʉ naɨ ʉkʉtambʉla nanso, wɨkapɨka mʉtongeeli ʉng'wɨ nʉwa Ayahʉdi, wikatugama nʉkʉmʉɨla, "Mʉnanso wane washaa ino. Itʉnʉ kwɨni wende ʉmʉlompeele ʉkʉpangatala."

19 Yesʉ wɨkalongola palʉng'wɨ nɨamanyisigwa akwe, ɨkamʉtyata mʉntʉ nʉwanso.

20 Naɨ alongoe, mʉsʉngʉ ʉng'wɨ naɨ wɨpʉma sakami matʉngo a myaka ikʉmi na ɨbiili, wɨkamʉlondola Yesʉ, wɨkamʉtonya kʉmpelo itugalo lakwe. 21 Aɨ ʉtendile itɨ kʉnsoko aɨ ʉsigɨɨe mʉnkolo akwe kɨna, "Anga ntonye ʉdu itugalo lakwe, kʉkomya."

22 Ʉgwa, Yesʉ wɨkapɨlʉka wɨkamʉona, wɨkamʉila, "Mʉnanso, komya nkolo! kʉhʉɨɨla kʉng'wako wakʉkomya." Itungo lɨlo mʉsʉngʉ nʉwanso wɨkakomya.

23 Sʉnga Yesʉ wɨkingɨla mʉnyʉmba amʉtongeeli nʉwanso. Hangi naɨ waaona akʉa pɨlɨmbɨ niya sʉka nɨ antʉ ɨdʉ akʉhongeelya, 24 wɨkaaɨla, "Hegi apa! Mʉnanso ʉyʉ shanga ʉkʉle, ʉlae ʉdu," Ingɨ antʉ nɨanso ɨkamʉheka. 25 Ʉʉgwa, milʉndo wa antʉ nɨanso naɨ wahegigwa, Yesʉ wɨkingɨla kʉmʉlwae, wɨkamʉamba mʉkono mʉnanso nʉwanso wɨkimɨka. 26 Nkani niyanso yɨkakʉmʉka ga yɨhi mihɨɨ nanso.

27 Yesʉ naɨ ʉhegile pang'wanso, nʉkʉlongola, apokʉ abɨɨlɨ ɨkamʉtyata ɨzitʉnta nʉkʉminena izelʉnga, "Uewe Ng'wana wang'wa Daudi kʉonele kɨnyaʉwai.

28 Yesʉ naɨ wingɨla mʉnyʉmba, apokʉ nɨanso nɨabɨɨlɨ ɨkamʉhanga, nʉng'wenso wɨkaakolya, "Mʉhʉiie kɨna nɨhʉmile kʉmʉkomya? Nienso ɨkamʉsʉkilya, "Ee, Isekʉlʉ kʉhʉiie"

29 Papogwa Yesʉ wɨkaatonya mʉmiho ao, wɨkaaɨla, "Itule anga nɨmʉhʉɨɨe" 30 Miho ao ɨkapɨtya lʉkʉlʉ. Yesʉ wɨkaagilya nʉkʉaɨla, "Mʉleke kʉmʉila mʉntʉ wɨhi ɨkani ɨlɨ"

31 Ingɨ nɨanso ɨkalongola, ɨkakʉmʉsha lʉkumo langwa Yesʉ mʉ mahɨɨ ɨhi.

32 Antʉ naɨ alongola kʉmatolao, antʉ angɨza ɨkamʉletela Yesʉ mʉntʉ nɨ kɨmumɨ kʉnsoko aɨ ʉkete hɨng'wɨ. 33 Yesʉ naɨ wamʉheja hɨng'wɨ nʉwanso, kɨmumɨ nʉwanso wɨkandya kʉligitya. Antʉ ɨkakʉɨlwa nʉkʉlʉnga, "Ikani anga ɨlɨ ɨza lɨkɨlɨ kigela mʉnʉ mʉ Isilaeli.

34 Ingɨ Apalisayo ɨkatula lʉnga, "Mʉntʉ ʉyʉ ʉkʉpʉmya ahɨng'wɨ kʉngulu nɨya mʉkʉlʉ nʉa ahɨng'wɨ."

35 Yesʉ aɨ ʉgendee mʉisali niikʉlʉ nɨzi niiniino, akazemanyisa mʉnyʉmba nɨya kʉtankanɨla Ayahudi nʉkʉtanantya Nkani ni Nza niya ʉtemi nʉwa kigʉlʉ, nʉkʉakomya ndwala yɨhi nʉʉlema wɨhi. 36 Ʉʉgwa Yesʉ, naɨ wamaona maʉmbi nɨ maʉmbi a antʉ, wɨka aaisɨɨlya kʉnsoko aɨ anementala anga nkolo ningila mʉdɨmi. 37 Pang'wanso Yesʉ wɨkaaɨla amanyisigwa akwe, "Maintʉ akʉogolwa ɨdʉ, ingɨ aogoli akeehʉ. 38 Ʉʉgwa mʉlompi Isekʉlʉ Itunda wamʉɨle mʉkola mʉgʉnda wanɨɨle aogoli akwe"