1 Yesʉ naɨ wakondya kʉapa malago amanyisigwa akwe ikʉmi na abɨɨlɨ, wɨkahega pang'wanso, wɨkalongola kʉmanyisa nʉ kʉtanantya mʉisalɨ nɨyakʉ Galilaya.

2 Yohana Mʉbadisi aɨ watungilwe migeleza wɨkija makani naɨ witʉma Kilisito. Itɨgwa, wɨkaalagɨɨlya amanyisigwa akwe amʉhange ʉ Yesʉ, 3 ende amʉkolye "Itɨɨ, yʉ wewe nʉpembilye ne, ang'wɨ kʉmʉloeele mʉngɨza?"

4 Yesʉ wɨkaasʉkɨɨlya, "Longoli mʉmʉɨle ʉ Yohana Mʉbadisi makani ɨhi nɨmigulye nʉkiloeela. 5 Apokʉ akʉona nɨ akɨtele akʉgenda nɨ anyambili akeligwa nɨ agʉlʉ akija nɨ akʉle akiʉkigwa nɨ ahimbɨ akʉtanantiligwa Nkani ni Nza. 6 Ʉkembetilwe mʉntʉ wɨhi nɨ shanga ʉmbɨpɨwe ʉnene."

7 Itɨgwa amanyisigwa ang'wa Yohana Mʉbadisi naɨ alongola, Yesʉ wɨkandya kʉʉtambʉɨla mɨlʉndo wa antʉ mpola yang'wa Yohana Mʉbadisi kɨna, "Mʉwɨɨ aɨ mendile goza ntʉni? Iti gwa aɨ mʉtakile kihenga mapwa nɨmalɨpu nakʉhingisigwa nʉ ng'wega ne? 8 Itɨgwa, aɨminzʉ goza ntʉni? Aɨ minzʉ goza mʉntʉ nʉtʉgae matʉgalo nɨ maza ne? Antʉ nɨɨtʉgala matʉgalo nɨmaza ikiɨ mʉnyʉmba ya kɨtemi. 9 Ingɨ, aɨ mendile goza ntʉni? Mʉmanga ne? Ee, kʉlʉ kʉʉlʉ ʉkɨlɨnkɨɨe mʉmanga. 10 "Ʉyʉ yʉyʉ Yohana Mʉbadisi nʉganʉwe ni Itunda mʉ ʉandɨkwa nʉa Nkani Nza kɨna,

‘Kolwa, ʉnene kʉmʉlagɨɨlya mitʉmi wane nʉ wa kigʉlʉ wakʉtongeele, nʉʉkʉnoneelelya ʉkɨɨlo wako.’

11 Kʉmʉɨla ɨtai, mʉʉtugwa nʉa antʉ, wakɨlɨ kigela nʉ mʉkʉlʉ kʉkɨla Yohana Mʉbadisi. Nɨitɨ ga, ʉyʉ nʉ mʉniino mʉ Ʉtemi nʉa kigʉlʉ, nʉanso mʉkʉlʉ kʉkɨla ʉ Yohana Mʉbadisi. 12 Kandɨɨlya matʉngo ang'wa Yohana Mʉbadisi nɨ sambʉ nʉyʉ, ʉtemi nʉwa kigʉlʉ wɨdagwa kʉngulu, nɨ anyangʉlʉ wawo ɨgema kʉʉhola ʉtule wao. 13 Ʉmanyisi wɨhi nʉwa Amanga nɨ malagɨɨlyo ang'wa Musa aɨ ɨpumya mɨloto aʉtemi wang'wi Itunda kʉpikɨɨla itungo lang'wa Yohana Mʉbadisi Mʉbadɨsi. 14 Anga ɨze mʉhʉmile kʉgomba, ingɨ ʉ Yohana Mʉbadisi yʉyo Elia mʉmanga naɨ ʉmʉtambʉwe kɨna aɨ ʉzɨɨza. 15 Nʉkete akʉtwɨ akija nʉ wije.

16 "Itɨgwa, nɨimpyanie nɨ ntʉni antʉ amahikʉ aya? Wimpyani nɨahʉmba nɨikiɨ mʉʉgalagalo, azikolya iumbɨ lɨng'wɨ niumbɨ lʉlya. 17 ‘Kʉkʉile impɨlɨmbɨ ʉnyenye shanga maina. Kɨmbile ɨmɨmbo asʉka, ʉnyenye shanga malɨla!’ 18 Kʉnsoko Yohana Mʉbadisi aɨʉzile, akazegwalya kʉlya hangi shanga aɨ ʉng'wee idibaɨ, ɨkalʉga. ‘Ʉyʉ ʉkete ahɨng'wɨ.’ 19 Ng'wana nʉwa Mʉntʉ, wɨkɨza wazelya nʉ kʉng'wa, nɨanso ɨkalʉnga. ‘Mʉgozi ʉyʉ mʉlakʉ hangɨ mʉgala ntʉli, ɨkɨhʉmba shʉya nɨahangʉlya kodi nɨ anyamilandʉ!’ Nɨiti ga, mahala ang'wi Itunda a tai igeela kʉ ntendo yakwe nʉwitʉma."

20 Sʉnga Yesʉ wɨkandya kʉizuma isalɨ niyanso naɨ witʉmile miʉkʉɨlwa dʉ antʉ nɨanso shanga ɨkagomba kila itʉnʉ nʉ kʉleka ʉbɨ wao. 21 "Akaga anya kʉ Kolazini! Nɨ anya kʉ Betisaɨda akaga! Kʉnsoko mɨʉkʉɨlwa naɨtendekile kʉng'wanyʉ anga aɨtendeke kʉ kisalɨ ka Tilo nʉkʉ Sidoni, antʉ akʉng'wanso aɨazetugama ilɨngɨke kɨnaila itʉnʉ alekelwa mɨlandʉ. 22 Nɨitɨ ga kʉmʉɨla, lʉhikʉ nʉlampelo ʉnyenye mʉkʉpɨsɨɨligwa ikʉlʉ kʉkɨla antʉ a kisali ka Tilo nɨ Sidoni. 23 Nʉnyenye anya kʉ Kapalinaumu, Itɨɨ, mʉkikʉlya nʉ kigʉlʉ ne? Ʉkʉsimigwa kihɨɨ a antʉ nɨakulee! Kʉnsoko mɨʉkʉɨlwa naɨtedekile kʉng'wanso anga aɨ ɨtendeke kʉ Sodoma antʉ ihɨɨ nanso ize akɨlɨ akolɨ nitungo ɨlɨ. 24 Ingɨ kʉmʉila, lʉhikʉ nɨla ʉpɨsɨɨligwa wanyʉ mʉkʉpɨsɨligwa ikʉlʉ kʉkila antʉ akʉ Sodoma"

25 Itʉngo lɨlo Yesʉ wɨkalʉnga, "Ʉwewe Tata, nakʉsongeelya Isekʉlʉ nʉ wigʉlʉ ni hɨɨ, kʉnsoko nɨasomile nawanɨakete mahala ʉapihɨe makani aya, wɨkaakunʉkʉɨla antʉ nɨɨhanga ang'enya. 26 Ee Tata, ʉʉ aɨikʉloeeye yɨpumɨle.

27 "Tata ane ʉmpee iintʉ yɨhi, kʉtile nʉmʉlɨngile Ng'wana, ingɨ Tata, hangɨ kʉtile nʉmʉlɨngile ʉ Tata, ingɨ ʉ Ng'wana, nʉ mʉntʉ wɨhi Ng'wana ʉmʉloilwe wamʉlagɨɨle,

28 "Pembyi kʉng'wane, ʉnyenye mɨhi nɨmagigwa nʉkʉbunwa nɨ mɨlandʉ, nʉnene kʉmʉsupɨɨlya. 29 Ngombi ʉnene nʉkʉnintʉmɨla, mimanyise kʉngwane kʉnsoko ʉnene nɨ shanga nɨmʉtaki hangɨ shanga nilolya, nʉ nyenye mʉkʉsupya. 30 Kʉnsoko ʉmanyisi wane nɨnɨkʉmʉmanyisa lʉtotu, nʉ mʉligo wane ʉpepele"