1 Yesʉ wɨkaɨtanga amanyisigwa akwe ikʉmi na abɨɨlɨ, wɨkaapa ʉhʉmi nʉ wa kʉapumɨlya antu ahɨng'wɨ nʉ kʉakomya ndwala nɨ malwae ɨhi. 2 Aya yaya mina a amanyisigwa akwe naɨ ʉitangile itʉmi, nʉwa ng'wandyo Simoni nʉwitangwa Petelo nʉ Andelea mʉluna wang'wa Petelo, Yakobo nʉ Yohana Mʉbadisi mʉluna wakwe ana ang'wa Zebedayo, 3 Pilipo nʉ Batilimayo nʉ Tomaso nʉ Matayo naɨ mʉhangʉlya kodi; nʉ Yakobo ng'wana wang'wa Alipayo nʉ Tadayo, 4 nʉ Simoni nʉɨmɨkʉɨla ihɨ akwe nʉ Yʉda Isɨkaliote, ʉyʉ yʉyo naɨ ʉmʉsuɨpile ʉ Yesʉ.

5 Naɨ waahola itʉmi awa ni ikʉmi na abɨɨlɨ Yesʉ wɨkaalagɨɨlya itɨ, "Mʉleke kenda kʉantʉ nɨshanga Ayahʉdi, ang'wɨ mʉleke kingɨla mʉisalɨ niya Asamalɨa. 6 Longoli kʉ Asilaeli, awa ɨhanga anga nkolo niilimɨe. 7 Longoli mʉtanantye, ‘Ʉtemi nʉa kigʉlʉ wahʉmbeela.’ 8 Mʉakomye alwae, mʉiʉshe nɨakule nɨanyambili mʉakomye nawaitɨ nɨ ingɨiwe nɨ ahing'wɨ mʉapumɨlye. Mʉpewe ʉhʉmi ʉwʉ nakanda, mʉzeleka kʉhɨa kʉlɨpwa. 9 Mʉmɨpuko anyu leki kʉholi zahabʉ ang'wɨ mpɨa ang'wɨ magwe a peza. 10 Leki kikenkeelyi mbogoshi ang'wɨ matʉgalo akʉkaɨla, ang'wɨ ilatʉ ang'wɨ mʉlanga, kʉnsoko mitʉmi wɨhi wɨpantɨka kinyamʉlɨmo kakwe.

11 "Anga mingɨle mʉkɨsalɨ ni kɨkʉlʉ ang'wɨ kɨsalɨ nɨ kɨniino, dʉmi mʉntʉ nʉmʉkende wamʉsɨngɨɨlye, mikiɨ papo kʉpikɨɨla nɨmʉkʉhega pang'wanso. 12 Anga mingɨle mʉnyʉmba nanso, alamʉshi muzelʉnga, matiliga atule kʉng'waanyu. 13 Akola nyʉmba nanso anga amʉsɨngɨɨlye, matiliga anyu akʉtula palʉng'wɨ nɨenso. Ingɨ anga itule akola nyʉmba nanso shanga akʉmʉsɨngɨɨlya, matiliga akʉmʉsʉkɨla. 14 Mʉntʉ wɨhi nɨshanga ʉkʉmʉsɨngɨɨlya, nɨmʉkʉpuma mʉ kɨsalɨ nɨkanso, pyagʉli ʉlʉnkʉndɨ nʉlamɨgʉlʉ anyu, itule kɨlɨngasɨɨlyo kɨna amʉhita. 15 Kʉmʉila ɨtai, antʉ nɨa ɨitɨ lʉhikʉ nʉlaʉlamʉlwa Itunda ʉkʉpɨsɨɨligwa kʉkɨla antʉ a kʉ Sodoma nɨ Gomola

16 Yesʉ wɨkalʉnga, "Itungo ɨlɨ, ʉnene kʉmʉtʉma mʉantʉ nɨabi mʉtʉle mɨapolo anga inkolo niikolɨ pambʉgi. Mʉtʉle mɨahʉgʉ anga inzoka, hangi mʉzemɨapolo anga nkʉnda. 17 Hʉgʉki nɨantʉ, kʉnsoko akʉmikʉngʉmya nʉ kʉmʉtwala mʉ maanza nʉ kʉmʉkʉa mʉnyʉmba niyakʉtankanɨla Ayahʉdi. 18 Mʉkʉtwalwa kʉntongeela atemi kʉnsoko ane, mʉhume kʉatanantilya Nkani ni Nza enso nɨ ntongeela antʉ nɨshanga Ayahudi. 19 Itɨ gwa, anga amʉtwale mʉ maanza, mʉleke kʉsɨgɨɨla nʉla kʉsʉkɨɨlya, itʉngo lɨlo mʉkʉpegwa lʉkani nʉla kʉsʉkɨɨlya. 20 Kʉnsoko shanga nyenye nimʉkʉtambʉla, ingɨ Ng'wahʉ Ng'welʉ nɨ Tata wanyu nʉkoli mʉkolo yanyʉ yʉyo ʉkʉtambʉla.

21 Mʉntʉ ʉkʉmʉsuɨpa mʉluna wakwe wabʉlagwe, ihe ʉkʉmʉsuɨpa ʉng'wana wakwe wabʉlagwe, nɨ ana akʉasuɨpa aleli ao ahume kʉbʉlagwa. 22 Antʉ akʉmʉhʉkilwa ʉnyenye kʉnsoko alina lane. Ingɨ gwa ʉyʉ nʉkʉgimya kʉpikɨɨla mpelo, Itunda ʉkʉmʉponia. 23 Ingɨ anga magigwe nɨantʉ mʉkɨsalɨ king'wɨ, longoli mʉkɨsalɨ kɨngɨza. Kʉmʉɨla ɨtai shanga mʉkʉmala kʉigendeela isalɨ nɨya Aisilaeli ʉnene Yesʉ nɨze nkɨlɨ kʉtulya.

24 "Mʉmanyisigwa shanga wɨmʉkilya ʉ mʉmanyisi wakwe, nʉ mʉtugwa shanga wɨmʉkɨlya mʉgolɨ wakwe. 25 Ikondile mʉmanyisigwa watule anga mʉmanyisi wakwe, nʉ mʉtugwa watule anga mʉkʉlʉ wakwe. Anga ɨtʉle antʉ akʉmitanga mʉkola nyʉmba Beelizebʉli! Itɨɨ, antʉ aʉya mʉnyʉmba nanso shanga akitangwa mina nɨ mabɨ nangalune?

26 Yesʉ akalongoleka kʉaɨla, "Itɨ gwa, mʉleke kʉogopa antʉ nɨanso. Kʉnsoko ɨpiha maintʉ nɨakitʉma mahikʉ apembilye makani ɨhi napihilwe aze umbʉʉlwa, ni kɨntʉ kɨhi nɨkaʉnkunku kɨzɨɨza kumʉka. 27 Lʉkani nɨnʉmʉtambʉɨe kɨnkunku, ʉnyenye tambʉli mʉmagalagalo, nkani nɨkʉmʉpwepwela, ʉnyenye tanantyi mʉʉgalagalo. 28 Leki kʉogopi ɨantʉ nɨahumille kʉʉbʉlaga mʉɨlɨ nʉwako, ingɨ shanga ahʉmile kʉbʉlaga nkolo a mʉntʉ. Bahʉ kʉmogopa ʉyʉ nʉhʉmile kʉlimansɨɨlya mʉili nɨ nkolo kʉʉlʉngʉ mʉ moto nɨ shanga wɨlima. 29 Itɨɨ, nsense ibɨɨlɨɨ yɨgʉligwa senti ɨng'wɨ. Ingɨ kʉtilɨ nɨyɨ nɨng'wɨ nɨlimɨla ʉ Tata wanyʉ shanga waze ʉmɨine. 30 Ingɨ ʉnyenye, ʉaiye nɨ nsingi nɨya mʉmatwe anyʉ. 31 Kʉlʉlo leki kogopi, kʉnsoko ʉnyenye mʉkete nsaɨlo kʉng'wi Itunda kʉkɨla nsense ni yɨdʉ.

32 "Mʉntʉ wɨhi nʉkʉngomba nʉ kʉntanantya mʉmilʉndo kɨna nʉanso wane, nʉnene ga nzɨza mʉgomba pantongeela ang'wa Tata wane nʉwa kigʉlʉ. 33 Ingɨ mʉntʉ wɨhi nʉkʉnihita ntongeela a antʉ kɨna ʉnene singa nɨakwe, nʉ nene nzɨɨza mʉhita pantongeela ang'wa Tata wane nʉwa kigʉlʉ.

34 Yesʉ wɨkalʉnga hangɨ, "Leki kʉsɨgi kɨna ndetile matiliga mihɨɨ. Ingɨ shanga ndetile anga matiliga, ndetile wilei. 35 Kʉnsoko ndetile ʉkinyɨli kung'wi ihe nʉ ng'wana, kʉ mʉnanso nʉ nyinya, nʉ kʉ mʉkʉmʉlima nʉ mʉkwɨngwa wakwe. 36 Nɨ alʉgʉ a mʉntʉ ingɨ awa nɨa mʉnyʉmba akwe

37 "Mʉntʉ wɨhi nʉmʉloilwe ihe ang'wɨ nyinya kʉkila nʉndoilwe ʉnene, nʉanso shanga ʉtakiwe kʉtula wane. Nʉmʉloilwe mʉhʉmba wakwe ang'wɨ mʉnanso wakwe kʉkila kʉndowa ʉnene, shanga ʉtakiwe kʉtula mʉmanyisigwa wane. 38 Mʉntʉ wɨhi nɨ shanga ʉkʉkenka mʉsalaba wakwe nʉ kʉntyata, shanga ʉkʉhʉma kʉtʉla mʉmanyisigwa wane. 39 Mʉntʉ wɨhi nʉloilwe kʉmiponia nkolo akwe kʉnsoko ane ʉkʉmilimɨlya, ingɨ mʉntʉ wɨhi nʉʉkʉlimɨlya nkolo akwe nsoko ane ʉkʉmɨponia.

40 Sʉnga wɨkalongoleka kʉatambʉɨla "Mʉntʉ wɨhi nʉkʉmʉsɨngɨɨlya ʉnyenye mʉmato lao, ʉkʉtula wansɨngɨɨlya ʉnene, nʉyo nʉkʉnsɨngɨɨlya ʉnene, ʉkʉtula wamʉsɨngɨɨlya ʉyo naɨ ʉndagɨɨye ʉnene. 41 Mʉntʉ ʉyʉ nʉkʉmʉsɨngɨɨlya mʉmanga kʉnsoko ingɨ mʉmanga, ʉkʉpegwa kipegwa ka mʉmanga. Nʉʉkʉmʉsingɨɨlya mʉntʉ nʉ mʉkende kʉnsoko ingɨ mʉntʉ mʉkende, ʉkʉpegwa kipegwa ka mʉntʉ nʉ mʉkende. 42 Kʉmʉɨla ɨtai, mʉntʉ wɨhi nʉʉkʉmʉpa mazɨ wang'we mʉkikombe kʉnsoko akʉtula mitʉmi wane mʉniino, Itunda ʉkʉmʉpeza kɨpegwa kakwe."