1 Itʉngo nɨlanso amanyisigwa akwe ɨkamʉhanga ʉ Yesʉ, ɨkamʉkolya, "Nyenyʉ nʉmʉkʉlʉ mbele mʉʉtemi nʉwa kigʉlʉ?" 2 Yesʉ wɨkamʉhola mʉng'enya ʉng'wɨ, wɨkamimɨsha pakatɨ, 3 sʉnga wɨkaaɨla, kʉmʉɨla tai, anga mʉhite kʉkaɨlɨka mʉtʉle anga mʉng'enya, shanga mʉkingɨla mʉ ʉtemi nʉwa kigʉlʉ 4 Kʉlʉlo mʉntʉ nʉkininompya anga mʉng'enya, yʉyo mʉkʉlʉ mʉʉtemi nʉwa kigʉlʉ. 5 Mʉntʉ wɨhi nʉkʉmʉsingɨɨlya mʉang'enya anga ʉyʉ kʉlina lane, ʉkʉtula ʉnsɨngɨɨye nene.

6 "Mʉntʉ wɨhi nʉkʉmʉsasha ʉng'wɨao mʉang'enya nɨaniino mʉawa nɨanihʉɨɨe, ibahʉ kʉng'wakwe anga watungɨɨligwe lwala mʉnkingo wagʉmilwe mʉlʉzi pailʉndu. 7 Akaga antʉ amihɨɨ nɨɨsasha antʉ nɨamʉhʉɨɨe ʉ Kilisito atende mɨlandʉ. Masasho nɨmɨsasha mʉntʉ watede mɨlandʉ, Ingɨ ʉkaga mʉntʉ nʉanso nʉkʉtʉla ɨsasho nɨla mʉntʉ kʉtenda mɨlandʉ. 8 "Anga itʉle mʉkono ang'wɨ mʉgʉlʉ ʉkʉʉsasha ʉtende mɨlandʉ, ʉteme ʉgʉme kʉli nʉewe. Ingɨ bahʉ kingɨla mʉʉpanga ɨze wɨmʉgila mʉkono ʉng'wɨ ang'wɨ mʉgʉlʉ ʉng'wɨ, kʉkila kʉgʉmɨlwa mʉmoto nɨshanga wɨlima mahikʉ ɨhi nɨmagila mpelo ɨze ʉkete mɨkono ɨbɨɨlɨ ang'wɨ mɨgʉlʉ ɨbɨɨlɨ. 9 Nɨliho lako anga ɨze lɨkʉʉsasha ʉtende mɨlandʉ, lɨkompole ʉlɨgʉme kʉlɨ nʉewe. Ingɨ bahu kingɨla kʉʉpanga nihongo, kʉkɨla kʉgʉmɨlwa mʉmoto nɨshanga wɨlima mahikʉ ɨhi nɨmagila mpelo ɨzeʉkete miho abɨɨlɨ.

10 "Hʉgʉki! Mʉleke kʉmʉmela ʉng'wɨao mʉaniino awa, kʉnsoko kʉmʉila Mitʉmi nʉwa kigʉlʉ nʉang'wi Itunda nʉwa ang'enya awa matʉngo ɨhi ɨza akolɨ palʉng'wɨ nʉ Tata wane nʉwa kigʉlʉ. 11 Kʉnsoko Ng'wana nʉwa Mʉntʉ aɨʉzile aguna awo nɨishiɨ anga alimɨe. 12 Mʉine ʉlɨ? Mʉntʉ angaɨze ʉkete nkolo igana lɨng'wɨ, anga wɨlimilye nkolo ɨng'wɨ, wɨtenda ʉlɨ? Wɨileka mʉlʉgʉlʉ nkolo izi nɨ tisini na tisa, wɨkenda mɨpenza ɨyo nɨng'wɨ nɨlimɨe. 13 Anga wamɨlije, kʉmʉɨla tai wɨmɨlowa nanso kʉkɨla izi yɨhi nimakʉmi kenda na kenda nɨshanga ilimɨe. 14 Nɨitɨga ʉ Tata wanyʉ ga nʉakigʉlʉ, shanga ʉloilwe ʉng'wɨ mʉang'enya awa nɨaniino walimɨle.

15 "Mʉnyandʉgʉ wako anga wakʉgazɨɨlye, mʉhange ʉmʉɨle igazo lakwe ize mɨabɨɨlɨ dʉ. Anga wakije ʉkʉtula wamʉlija ʉmʉnyandʉgʉ wako. 16 Mʉnyandʉgʉ nʉanso anga wahite kʉija, mitangɨlye mʉntʉ ʉng'wɨ ang'wɨ antʉ abɨɨlɨ amʉtegeelye, ingɨ kʉkɨɨla ntambʉ aantʉ abɨɨlɨ ang'wɨ ataatʉ, makani nɨmigazɨɨye ahume kʉhungwa, anga ʉandɨkwa nʉandɨkilwe. 17 Anga wahite kʉija nɨanso, pisha kɨanza la ahʉɨɨli. Anga wahita kʉlɨtegeelya ianza nɨla ahʉɨɨli, mʉalye anga antʉ nɨshanga amʉmanyile Itunda nɨ ahangʉlya kodi.

18 Yesʉ akalongoleka kʉtambʉla, "Kʉmʉila ɨtai, kɨhi nɨmʉkʉkɨgilya mihɨɨ nʉ kigʉlʉ kɨkʉgilingwa, nikɨ nɨmʉkʉkɨgombya mihɨɨ nʉ kigʉlʉ kɨkʉgombigwa.

19 Kʉmʉɨla hangi, antʉ abɨɨlɨ mʉng'wanyʉ anga igombye mihɨɨ mɨkani lɨhi nɨakʉlompa, Tata wane nʉa kigʉlʉ ʉkʉatendeela ɨkani nɨlanso. 20 Kʉnsoko pɨhi nɨakʉtankana antʉ abɨɨlɨ ang'wɨ ataatʉ kʉlina lane, ʉnene nkolɨ palʉng'wɨ nɨenso."

21 Sʉnga Petelo wɨkamʉhanga ʉ Yesʉ, wɨkamʉkolya, "Isekʉlʉ, Itɨɨ, mʉnyandʉgʉ wane anga waze ʉlongolekile kʉngazɨɨlya, nʉmʉlekele nkʉa inga? Nkʉa mʉpʉngati ne?"

22 Yesʉ wɨkamʉsʉkɨɨlya, "Shanga kʉlʉnga nkʉa mʉpʉngati ʉdu, ingɨ ga ni nkʉa sabini na saba. 23 Kʉlʉlo ʉtemi wakigʉlʉ ʉhumile kimpyanigwa itɨ, mʉtemi ʉng'wɨ naɨ ʉtakile kʉalya nsao kʉ itʉmi akwe. 24 Naɨ wandya kʉalya, wɨkaletelwa mʉntʉ naɨʉdaɨgwe ideni la shilingɨ milioni yɨdʉ. 25 Mʉntʉ nʉanso aɨmʉgila kɨlɨpo kɨhi, kʉitɨ mʉtemi wakwe wɨkalamʉla wagʉligwe, ng'wenso nʉ mʉkima wakwe, nɨana akwe nɨ maɨntʉ ɨhi naɨ ʉkete, walɨpwe ideni lakwe. 26 Intɨ gwa mitʉmi nʉanso, wɨkatʉgama pantongeela amʉtemi wɨkamʉlompa wazelʉnga, ‘Itʉnʉ mbaisɨɨlye ʉnene kʉʉlipa yɨhi nʉndaɨye’. 27 Mʉtemi nʉwanso wɨkamʉaisɨɨlya, wɨkamʉlekela ideni lɨhi wɨkamʉleka walongole.

28 Ingɨ mitʉmi ʉyʉ naɨwapuma, nʉanso wɨkalongola, wɨkamʉhanga mʉntʉ ʉng'wɨ naɨ itʉmania akaze ʉmʉdaɨye shilingɨ nkeehʉ. Wɨkamʉamba, wɨkamʉgoga, wazemʉila, ‘Ndɨpe ideni lane.’ 29 Mitʉmi mʉya wɨkatʉgama, wɨkamʉlompa, ‘Itʉnʉ mbaisɨɨlye ʉnene kʉʉlipa yɨhi nʉndaɨye’. 30 Ingɨ nʉanso wɨkahita kʉmʉaisɨɨlya, wɨkamʉtwala mʉkadʉlʉmʉ kʉʉzɨɨzamala kʉmʉlɨpa ideni. 31 Itɨ gwa, itʉmɨ nɨitʉmania naɨ aona ɨkani ɨlɨ nʉtendile ɨkabɨpɨlwa nanguluu, ɨkamʉhanga ʉmʉtemi wao ɨkamʉtambʉila makani ɨhi natendekile. 32 Papo mʉtemi ʉyʉ wɨkamitanga ʉmitʉmi nʉanso, wɨkamʉɨla ‘Ʉewe wɨ mitʉmi nʉ mʉbi ikɨlo! Aɨ ʉnompile, nʉnene nɨkakʉlekela ideni lako lɨhi naɨnʉkʉdaɨye. 33 Itɨɨ, shanga aza ʉtakɨwene, nʉewe ʉmʉaisɨɨlye ʉmitʉmi mɨako anga naza nʉkʉaisɨɨye?’ 34 Papo gwa, mʉtemi nʉanso wɨkabɨpɨlwa, wɨkamʉtwala mʉkadulumu wahume kagigwa, kʉpikɨɨla kʉʉzɨza lɨpa ideni lɨhi naɨʉdaigwe."

35 Yesʉ wɨkamaɨɨlya wɨkalʉnga, Tata wane nʉwa kigʉlʉ ʉkʉmʉtendeela anga mʉleke kʉalekela antʉ nɨamʉgazɨɨye.