1 Ʉwʉ wʉwʉ ng’wandyo nʉwa Nkani Nza niyang’wa Yesʉ Kilisito, Ng’wana wang’wi Itunda. 2 Yandɨɨye anga niyandɨkilwe mʉmbugulu a mʉmanga wang’wi Itunda nʉitangwa Isaya,

"Itunda akalʉnga, ‘Kʉlagɨɨlya mitʉmi wane atongele akʉnoneelelye ʉkɨɨlo nʉwako.’

3 Lʉli la mʉntʉ nʉkitʉnta mʉwɨɨ, ‘Mʉnoneleelyi Isekʉlʉ *ʉkɨɨlo wakwe, mihambe kʉmʉsɨngɨɨlya Isekʉlʉ nʉpembilye."’

4 Itigwa mitʉmi nʉwanso aɨ Yohana Mʉbadisi akapembelya mʉwɨɨ wazetanantya, kɨna antʉ ile itʉnʉ nʉkʉbadisigwa Itunda waalekele ɨmɨlandʉ ao. 5 Antʉ ɨdʉ kʉpuma nkɨka nɨya Yʉdea nɨanya kʉ Yelusalemu, akatula mʉhanga ʉ Yohana pamongo nʉwa Yolodani akamʉtegeelye, akatulila itʉnʉ nɨla mɨlandʉ ao nʉkʉbadisigwa.

6 Yohana aɨwiɨndile itugalo naɨ lɨtumilwe namauli akikalɨ nɨkitangwa ngamɨa, nʉmʉkɨlɨno kakwe akakomisɨlya mʉsipi wandɨlɨ. Nindya yakwe aɨ nkʉmbɨ nʉ ʉkɨ nʉwa mihaka. 7 Mʉʉtananti wakwe aɨ ʉlongolekile kʉlʉnga, "Anga nkɨle ʉnene ʉkolɨ nʉntyatɨle mʉnyangulu kʉkɨla ʉnene. Ʉnene nɨmʉgila lʉkumo nʉla kʉtolya mɨkoha a makwasa akwe. 8 Ʉnene kʉmʉbadisa namazɨ, ingɨ nʉwanso ʉkʉmʉbadisa kʉ Ng’waʉ Ng’welʉ."

9 Mahɨkʉ nanso Yesʉ akapuma kʉ Nazaleti, mʉkɨsalɨ ka Galilaya, akapika kʉng’wa Yohana akabadisigwa mʉmongo nʉwa Yolodani. 10 Yesʉ naɨ wapuma ʉdu mʉmazɨ, akaona igʉlʉ lɨkalugʉlwa, nʉ Ng’waʉ akamʉsimɨɨla anga nkʉlʉ nɨsima. 11 Akija lʉli lang’wi Itunda kʉpuma kigʉlʉ lʉkʉlʉnga, "Ʉewe wɨng’waane nɨnʉkʉloilwe, naloeeligwa nʉewe." 12 Itungo lɨlo lɨɨlo Ng’waʉ akamʉtonga ʉ Yesʉi kʉlongola mʉwɨɨ. 13 Akishiɨ mahikʉ makʉmi annɨ akazegeng’wa nʉ Shetani. Kʉng’wanso aɨikalanɨa niikalɨ, itʉmi akigʉlʉ nɨang’wa Itunda ɨkamʉaɨɨlya.

14 Naɨ akɨla mahikʉ idʉ Yohana akatungwa mukadulumu. Naɨ watungwa, Yesʉ akalongola kʉ Galilaya akatanantya Nkani Nza nɨyang’wi Itunda. 15 Wazelunga, "Matungo apika nang’wi Itunda kʉtema. Mʉtakɨwe mile itʉnʉ nʉkʉleka mɨlandʉ anyu hangɨ mʉhʉɨɨle Nkani Nza." 16 Lʉhikʉ lʉng’wɨ Yesʉ aɨʉkɨɨe mʉmpelo alʉzɨ nʉlʉkʉlʉ nʉla Galilaya, akaaona abua nsamaki abɨɨlɨ. Simioni nʉ mʉniino wakwe ʉ Andelea azebua nsamaki kʉ nyabu. 17 Yesʉ akaatambʉɨla, "Ntyati, ʉnene kʉmʉmanyisa mʉtule aleta antʉ kʉg’waane anga naɨ mɨbua insamaki." 18 Ʉʉgwa itungo ʉdu akaleka inyabu yao, akamʉtyata. 19 Naʉlongoe patongela ʉdu, akaaona Yakobo nʉ Yohana ahʉmba ang’wa Zebedayo. Nɨenso aɨakolɨ mibɨnɨ lao azenoneelya nyabu. 20 Yesʉ akaitanga amʉtyate, nɨenso akamʉleka ʉ Zebedayo tata ao mibɨnɨ palʉng’wɨ nɨitʉma mɨlɨmo, akamʉtyata ʉ Yesʉi.

21 Sʉnga Yesʉ nɨamanyinsigwa akwe akalongola kʉ Kapelanaumu, naɨlapika ʉlʉhikʉ nʉla kʉsupya Ayahudi Yesʉ akingɨla mʉnyʉmba akʉtankanɨla Ayahudi akandya kʉmanyisa. 22 Antʉ ɨdʉ akakʉɨlwa ʉmanyisi wakwe, kʉnsoko aɨ ʉkʉmanyisa anga mʉntʉ nʉkete ʉhumi, shanga anga amanyisi amalagɨɨlyo ang’wa Musa nɨa Kɨyahudi nɨɨmanyisa.

23 Mʉnyʉmba akʉtankanɨla Ayahudi aɨ ʉkolɨ mʉntʉ ʉkete hɨng’wɨ, akakʉta akalʉnga, 24 "Kilee ntʉni nʉewe, Yesʉ mʉnya kʉ Nazaleti? Itɨɨ, ʉzekʉlɨmansilyane? Nɨngile kɨna ʉewe wɨ Kinyene nʉkomilwe nʉpembeeye kʉng’wi Itunda."

25 Yesʉ akamʉpatya ʉhɨng’wɨ nʉwanso, "Kilaga, puma mʉleke ʉ mʉntʉ ʉyʉ."

26 Ʉʉgwa, hɨng’wɨ nʉwanso akamʉhingɨsa ʉ mʉntʉ nʉwanso, akalɨla kʉlʉli nʉlʉkʉlʉ, akapuma. 27 Antʉ ɨhi akakʉɨlwa, akikolya, "Makani kɨ aya? Itɨɨ, ʉmanyisigwa ʉpyane ʉwʉ? Mʉntʉ ʉyʉ ʉkete ʉhumi wakʉlagɨɨlya ahɨng’wɨ, nɨenso akʉmijaa!"

28 Nkani yang’wa Yesʉ yɨkakumʉka nkɨka yɨhi niya Galilaya.

29 Yesʉ nɨ amanyisigwa akwe azeamolɨ ɨa Simioni nʉ Andelea nʉ Yakobo nʉ Yohana akapuma mʉnyʉmba akʉtankanɨla Ayahudi, akatongolomoka akalongola kito nɨlaa Simoni nʉ Andelea. 30 Mkwɨngwa wang’wa Simoni nʉwa kɨsʉngʉ aɨ mʉlwae, ʉlae mʉʉlɨlɨ, nɨenso akamʉtambʉɨla ʉ Yesʉi ʉlwae nʉwa mʉkwingwa wang’wa Simoni. 31 Yesʉ akamʉhanga mʉsʉngʉ nʉwanso, akamʉamba kʉmʉkono, akamʉʉsha. Akakomya ʉlwae nʉwanso, akandya kʉitʉmɨla.

32 Naɨ yapika mpɨndɨ, naɨ lakɨla ʉlʉhikʉ nʉla kʉsʉpya, antʉ akamʉletela ʉ Yesʉi alwae ɨhi nɨantʉ nɨingɨɨwe nɨa hɨng’wɨ. 33 Antʉ ɨdʉ mʉkɨsalɨ nɨkanso akilinga kʉnzi pamʉmpita. 34 Nʉng’wenso ʉ Yesʉi akaakomya antʉ ɨdʉ naɨakete ndwala yɨsa, akaapumya ahɨng’wɨ ɨdʉ mʉmɨɨlɨ aalwae, ingɨ akaagilya ɨahɨng’wɨ aleke kʉligitya kɨntʉ kɨhi kʉnsoko amʉlɨngile kɨna nʉwanso nyenyu.

35 Mʉdaʉ manɨambwa, Yesʉ akapuma, akalongola kʉlompa nkɨka naɨkʉtilɨ anga antʉ. 36 Simoni nɨaʉya akalongola kʉmʉduma, 37 naɨ amʉona akamʉɨla, "Antʉ ɨdʉ akʉʉduma."

38 Ingɨ ʉ Yesʉi akaaɨla, "Kwɨni mʉisalɨ ingɨza nia pakupɨ nʉkʉng’wanso ga nende ntanantye Nkani Nza, kʉnsoko wʉwo mʉlɨmo nzɨɨe."

39 Sʉnga akenda nkɨka yɨhi ʉko kʉ Galilaya akatanantya mʉnyʉmba nia kʉtankanɨlya Ayahudi nʉkʉazunza ahɨng’wɨ.

40 Mʉntʉ ʉng’wɨ nɨ mʉnyambili akamʉhanga ʉ Yesʉi, akatungama, akamʉlompa, "Anga ʉlowe ʉhumile kʉnelya!"

41 Yesʉ akamʉonela kɨnyaʉwai, akagoola ʉmʉkono wakwe, akamʉgutya nʉkʉmʉɨla, "Ndoilwe, ele!" 42 Ʉʉgwa itungo lɨlo lɨɨlo ɨmbili ɨkahega mʉ mʉntʉ nʉwanso, akeligwa, akagombeka kung’wi Itunda. 43 Sʉnga ʉ Yesʉi akakaya kʉmʉɨla hega longola, hangɨ akamʉɨla, 44 "Goza ʉleke kʉmʉɨla mʉntʉ wɨhi ikani ɨlɨ, ingɨ longola wiambye kʉ mʉpolyi, nʉkʉpumya ipolyo kʉnsoko akeligwa kʉng’wako anga naɨʉlagɨɨye ʉ Musa kʉakamɨnkɨɨlya kɨna weligwa."

45 Sʉnga ʉ mʉntʉ nʉwanso akatula kʉkumʉsha inkani niyanso nkɨka yɨhi nʉkʉtambʉla makani ɨdʉ, Yesʉ akatulipihɨɨlya kingɨla mʉkɨsalɨ, akikiɨ kʉnzɨ, kɨmpelo. Nɨitɨga, antʉ ɨdʉ akamʉtyata kʉpuma nkɨka yɨhi.