1 Yesʉ naɨ ʉkʉpuma panyʉmba ang’wi Itunda ʉng’wɨ mʉamanyisigwa akwe akamʉɨla, "Mʉmanyisi, kʉɨlwa ɨmagwe aya nɨnyʉmba izi niyinonee!"

2 Yesʉ akamʉsʉkɨɨlya, "Ʉewe ʉkʉɨwe ɨmagwe nɨnyʉmba izi niizengilwe iza ikʉlʉ? Ingɨ magwe ɨhi nazengilwe shanga akʉsaga aze agelenkanigwe, ɨhi akʉkumʉlwa"

3 Yesʉ naɨ wikiɨ migʉlya mʉlʉgʉlʉ la Mizeituni naɨ wikengee nɨ Nyʉmba ang’wi Itunda, Petelo nʉ Yakobo nʉ Yohana nʉ Andelea aze ing’wene akamʉkolya ʉ Yesʉi, 4 "Kʉɨle makani aya akʉpumɨla nalɨ? Kɨlɨngasɨɨlyo kakwe ntʉni nɨkɨkʉlɨngasa kɨna makani aya ahumbeela kʉtulɨka?"

5 Yesʉ akandya kʉatambʉɨla, "Hʉgʉki mʉleke kʉkongwa nʉ mʉntʉ. 6 Kʉnsoko antʉ ɨdʉ akʉpembya azetʉmɨla lina lane, ɨhi azekongela antʉ kɨna ‘ɨenso aɨna a Masia!’ Antʉ awa akʉalimɨlya antʉ ɨdʉ. 7 Anga mije nkani niya ʉlʉgʉ ni ng’ung’u la ʉlʉgʉ, mʉleke kʉkʉɨlwa. Makani nanso akʉpumɨla, ingɨ ɨmpelo ɨkɨlɨ kʉpikɨɨla. 8 Antʉ ihɨɨ ɨng’wɨ akikʉa nɨ antʉ ihɨɨ ngɨɨza, antʉ a ʉtemi ʉng’wɨ akikʉa nɨantʉ a ʉtemi ʉngɨɨza ingɨ nkɨka yɨhi yɨkʉtula nɨmɨtentemo nɨ nzala ɨkʉpumɨla. Makani nanso ɨhanga ʉwai nʉwa mʉsʉngʉ nʉkʉhiya kitungʉɨla.

9 "Ʉnyenye hʉgʉki. Kʉnsoko antʉ akʉmʉtwala mʉ maanza, mʉnyʉmba nɨa kʉtankanɨlya Ayahudi. Mʉng’wanso mʉkʉmʉkʉwa. Mʉkʉtwalwa kʉakʉlʉ nʉ kʉ atemi kʉnsoko ane, ingɨ mʉtanantye Nkani Nza kʉng’wao. 10 Nkani Nza itakɨwe itanantigwe hanza kʉ antʉ amahɨɨ ɨhi. 11 Nɨanso akʉmʉamba nʉkʉmʉtwala mʉmaanza, mʉleke kʉsɨga aya nakʉtambʉla. Itungo nɨlanso anga lɨpike tambʉli yɨhi nɨmʉkʉpegwa, kʉnsoko shanga nyenye mʉkʉligitya ingɨ Ng’waʉ Ng’welʉ. 12 Pang’wanso mʉluna ʉkʉmʉpumya ʉmʉluna wakwe wabʉlagwe. Ihe ʉkʉmʉpumya ʉng’wana wakwe wabʉlagwe, ana nɨenso akʉakʉa nʉkʉabʉlaga ɨaleli ao. 13 Antʉ ɨhi akʉmʉhʉkɨlwa kʉnsoko mʉntyatile nene. Ingɨ nʉkiʉmɨɨlya kʉpikɨɨla ɨmpelo nʉwanso ʉkʉgʉnɨka.

14 "Anga maona, ‘Kɨntʉ nɨkɨkʉmʉbipɨla Itunda kɨmolɨ munyʉmba akwe, papo gwa antʉ nɨamolɨ kʉ Yʉdea amankɨɨle mʉ malʉgʉlʉ. Mʉntʉ nʉkʉsoma nʉwalɨnge ɨndogoelyo akwe. 15 Nʉkolɨ kʉnzi a nyʉmba akwe nʉwaleke kingɨla mʉnyʉmba kʉhola maintʉ. 16 Nʉkolɨ kʉmʉgʉnda nʉwaleke kʉtulya kito kʉhola itugalo lakwe. 17 Akaga asʉngʉ nɨalito nawa nɨakonsha mʉlʉhikʉ nʉlanso! 18 Mʉlompi Itunda makani nanso aleke kʉpumɨla mʉmalila. 19 Yʉkʉtula lwago nʉlʉkɨlɨ kigela kandɨɨlya Itunda nʉwatundɨe ʉnkumbigʉlʉ kʉpikɨɨla ɨlelo, shanga lʉziigela hangɨ. 20 Isekʉlʉ anga aɨ waleke kʉkepya ɨmahikʉ nanso aɨ kʉtilɨ anga mʉntʉ naɨ ʉzegunɨka. Ingɨ kʉnsoko ahʉɨɨli akwe naɨ ʉahoile Isekʉlʉ ʉzɨɨzakepya mahikʉ nanso.

21 "Mʉmahikʉ nanso mʉntʉ anga wamʉɨle, ‘Goza, Kilisito ʉmolɨ apa,’ ang’wɨ ‘ʉkolɨ apo,’ mʉleke kʉhʉɨɨla. 22 Kʉnsoko wɨkiambya anyakɨdagʉ aʉtele nɨantʉ nɨitee ‘Ʉnene nɨ Kilisito!’ Ɨkitʉma ɨlɨngasɨɨlyo nɨmaʉkʉɨlwa, kʉnsoko anga iyʉke akʉalimangɨɨlya ɨahʉɨɨli ang’wi Itunda. 23 Ingɨ ʉnyenye hʉgʉki. Ʉnene namʉtambʉɨla makani ɨhi nwɨkiambya.

24 Mʉmahikʉ nanso, lwago nʉlanso anga lahila, lyoa lɨkʉtula kiti nʉ ng’weli shanga ʉkelya. 25 Nzota yʉkʉgwa kʉpuma migʉlya, nɨ maintʉ maʉya na kilunde akʉhingisigwa. 26 Papo gwa antʉ akʉmona ʉnene Ng’waa Mʉntʉ mpembilye nɨ malunde kʉngulu yɨdʉ nʉ ʉkʉlʉ. 27 Sʉnga kʉalagɨɨlya amalaɨka anɨɨle ɨahʉɨɨli akwe nkɨka yɨhi mʉʉnkumbigʉlʉ, kʉpuma mpelo ihɨɨ kʉpikɨɨla mpelo igʉlʉ.

28 Imanyisi ikani ɨlɨ kʉ mpyani a mʉkʉyʉ. Matʉtʉ akwe anga andye kʉtegeta, mʉlɨngile kɨna matungo a hongola ahumbeela. 29 Nʉnyenye ga anga maona makani aya ɨhi nɨnʉmʉtambʉɨe ainiigela, mʉlɨnge kɨna ʉnene Ng’waa Mʉntʉ naakapembya. 30 Kʉmʉtambʉɨla ɨkʉlʉ kʉʉlʉ antʉ awileli ʉwʉ shanga akʉtagɨka ɨhi makani aya ɨhi aze akɨlɨ kigela. 31 Igʉlʉ ni ihɨɨ yʉkʉkɨla, ingɨ nkani yane shanga yʉkʉkɨla.

32 "Ingɨ, kʉtilɨ anga mʉntʉ nʉlɨngile lʉhikʉ nʉlanso ang’wɨ saa nanso kʉtilɨ, amalaɨka ang’wɨ ʉnene Ng’wana wang’wi Itunda, ingɨ ʉ Tata du nʉlɨngile. 33 Ingɨ hʉgʉki ihambi kɨsa, kʉnsoko shanga mʉlɨngile matungo ampelo akʉtula nalɨ. 34 Yʉkʉtula anga mʉntʉ nʉhegile kitolakwe wende ʉmʉhinzo waalekele ʉhumi atʉʉng’wa a mitolakwe kɨla mʉntʉ nʉ mʉlɨmo wakwe, akamʉɨla mʉsʉnja mʉmpita waleke kʉhung’wa tʉlo. 35 Leki kʉhung’wi tʉlo kʉnsoko shanga mʉlɨngile mʉkola nyʉmba ʉzile nalɨ, mpɨndɨ ang’wɨ ʉtikʉ wigɨngʉ ang’wɨ maniambwa ang’wɨ kɨdaʉdaʉ. 36 Leki kʉhung’wi tʉlo kʉnsoko anga wamʉpumpugɨɨlye mʉleke kʉhangwa mʉlae. 37 Ikɨ nɨkʉmʉɨla ʉnyenye, ingɨ kʉaɨla antʉ ɨhi, leki kʉhung’wi tʉlo!"