1 Naɨ lakɨla lʉhikʉ nʉla kʉsupya, Maliamu nʉwa kʉ Magidala nʉ Solome nʉ Malia nyinya wang’wa Yakobo akagʉla makʉta akʉnyunkɨɨla akalongola aʉpʉgʉhɨle ʉ mʉimba wang’wa Yesʉ. 2 Itɨ gwa, lʉhikʉ nʉla Jumapɨlɨ, daʉ maniambwa, lyoa lɨkaze lɨkɨlɨ kʉtoloka, akapika pakɨbɨɨla. 3 Naɨ akolɨ mʉnzɨla akikolya, "Nyenyu nʉʉkʉʉpingilitɨlya igwe pa mʉlango nʉwa kɨbɨɨla?" 4 Naɨ ahumbeela kʉpika akagoza, akaona igwe lapingilitigwa kʉlɨ nʉ mʉlango nʉwa kɨbɨɨla. 5 Naɨ ingɨla mʉkɨbɨɨla, akamʉona mʉhʉmba ʉng’wɨ ʉtugae matugalo melʉ, wikiɨ ipande nɨla kɨgoha nɨla kɨbɨɨla, akakʉɨlwa ikʉlʉ.

6 Ingɨ mʉhʉmba nʉwanso akaaɨla, "Leki kʉkʉɨlwi. Mʉkʉmʉduma Yesʉ nʉwa kʉ Nazaleti naɨ ʉkononteewe mʉ mʉsalaba. Gozi naza amʉɨkile, waiʉka, wɨmʉtilɨ apa. 7 Longoli mʉmʉɨle ʉ Petelo nɨamanyisigwa aʉya kɨna Yesʉ wamʉtongeela kʉ Galilaya, kʉng’wanso mʉkʉmʉona anga ng’wenso naɨʉmʉtambʉɨe."

8 Itɨ gwa asʉngʉ nɨanso, akatula kagata kʉwoa nʉkʉkʉɨlwa, akahega pakɨbɨɨla aze amankile mɨlugu. Shanga aɨ aligitilye kɨntʉ kɨhi kʉmʉntʉ, kʉnsoko aɨ ogopile.

9 Lʉhikʉ nʉla Jumapɨlɨ, daʉ maniambwa, Yesʉ naɨ wiʉkile akamigeela hanza Maliamu nʉwa kʉ Magidala, naɨ ʉmʉhegeye ahɨng’wɨ nɨabɨ mʉpungatɨ.* 10 Maliamu nʉwa kʉ Magidala akalongola, akaapikɨlya impola awa naɨ ɨpalʉng’wɨ nʉ Yesʉi, matungo nanso aɨ akʉhongeelya nʉ kʉlɨla. 11 Ingɨ naɨ ija kɨna ʉ Yesʉi waina mʉpanga hangɨ, nɨ kɨna ʉ Maliamu nʉwa kʉ Magidala ʉmʉine, shanga akahʉɨɨla.

12 Panyambele ʉ Yesʉi akaigeela amanyisigwa abɨɨlɨ. Amanyisigwa awa aɨ alongoe kʉmʉgʉnda, aze wikelʉ ingɨɨza. 13 Amanyisigwa awa nɨabɨɨlɨ naɨ amʉlɨnga, akatulya akaaganʉɨla anyisigwa aʉya. Nɨitɨ ga shanga akahʉɨɨla.

14 Panyambele ʉ Yesʉi akaigeela amanyisigwa ikʉmi na ʉng’wɨ naɨ akʉlya. Yesʉ akaakenela kʉnsoko a lʉgoha lao, kʉnsoko shanga aɨahʉɨɨe awo naɨ aatambʉie kɨna amʉona waiʉka. 15 Itɨ gwa, akaatambʉɨla, "Longoli mʉ ʉnkumbigʉlʉ wɨhi mende mʉtanantye Nkani Nza kʉ iʉʉmbwa yɨhi. 16 Mʉntʉ wɨhi nʉkʉhʉɨɨla nʉkʉbadisigwa ʉkʉgunɨka. Mʉntʉ wɨhi nɨshanga ʉkʉhʉɨla ʉkʉpisɨligwa. 17 Niilɨngasɨɨlyo izi yɨkʉtula nawo nɨahʉɨɨe. Akʉtʉmɨla ʉhumi nʉwa lina lane kʉpumya ahɨng’wɨ hangɨ akʉtambʉla ntambʉ mpya. 18 Akʉamba nzoka ang’wɨ akʉng’wa kɨntʉ kɨhi nɨkakʉbʉlaga, shanga kɨkʉalemaalya. Akʉaɨkɨɨlya alwae mɨkono, nɨenso akʉkomya."

19 Itɨ gwa, Isekʉlʉ Yesʉ naɨ waligitya nɨenso, akaluma walongole kilunde, akikiɨ ipande nɨla ʉhumi nɨlang’wi Itunda. 20 Sunga amanyisigwa akalongola akaatanantɨlya antʉ Nkani Nza nkɨka yɨhi. Isekʉlʉ Yesʉ aɨ ʉkʉkamɨnkɨɨlya ʉkolɨ palʉng’wi nɨenso kʉ ilɨngasɨɨlyo naɨ yityatile nʉ lʉkani.