1 Aɨasaga mahikʉ abɨɨlɨ kʉpikɨɨla lʉhikʉ nʉla pasaka, nɨmɨkate nɨshanga ɨgahɨigwe. Apolyi nɨakʉlʉ nɨamanyisi amalagɨɨlyo aɨ akʉduma ihala nɨla kipihɨɨlya amʉambe nʉkʉmʉbʉlaga ʉ Yesʉi. 2 Akalʉnga, "Kʉleke kʉmʉamba matungo niloelya nɨla pasaka, kʉnsoko antʉ ahumile kʉʉgaɨla."

3 Yesʉ naɨ ʉmolɨ kʉ Betanɨa, mʉnyʉmba ang’wa Simoni naɨ mʉnyambili. Naɨ ʉkʉlya mʉsʉngʉ ʉng’wɨ akaza nɨkɨhongolo kɨkete makʉta akʉnyunkɨɨla iza ansaɨlo dʉ, akakunʉkʉla ɨkɨhongolo nɨkanso akadubunkɨlya makʉta nanso mitwe lang’wa Yesʉ. 4 Antʉ ang’wɨ naɨakolɨ pang’wanso akatakɨnkana, akitambʉlya, "Nɨkɨ kʉlimɨlya nakanda makʉta aya nakʉnyunkɨɨla? 5 Aza ahumile kʉgʉligwa kʉ nsaɨlo nɨnkʉlʉ, mpia niyanso apegwe aʉla.? Sʉnga akamʉkenela mʉsʉngʉ nʉwanso!"

6 Ingɨ Yesʉ akaaɨla, "Mʉleki, nɨkɨ mʉkʉmʉnyoma? Ʉntendee ikani ɨlɨ iza. 7 Aʉla mɨpalʉng’wɨ mahikʉ ɨhi, mʉhumile kʉaaɨɨlya anga nɨmʉloewe. Ingɨ ʉnene shanga ɨzekolɨ nʉnyenye mahikʉ ɨhi. 8 Nʉwanso witʉmile anga nʉhumile, waʉdubunkɨɨlya ʉmʉɨlɨ wane makʉta akʉnyunkɨɨla kʉ ʉnoneelya kʉɨkwa. 9 Kʉmʉɨla ɨtai, mʉʉnkumbigʉlʉ wɨhi mʉyɨkʉtanantigwa Nkani Nza, ikani ɨlɨ nɨlitʉmilwe lɨkʉtambʉlwa kʉmʉkɨmbʉka nʉwanso."

10 Sʉnga Yʉda mʉnya kʉ Isikalioti, ʉng’wɨ mʉamanyisigwa nikʉmi naabɨɨlɨ, aɨwendile kʉmʉsuɨpa ʉ Yesʉi kʉ apolyi nɨakʉlʉ 11 Apolyi nɨakʉlʉ naɨatambʉɨlwa nkani nɨanso, akalowa, akamʉɨla akʉmʉpa mpia. Ʉʉgwa, Yʉda akatula duma lyoma nɨla kʉmʉsuɨpa Yesʉ.

12 Lʉhikʉ nʉla ng’wandyo nʉla iloeelya nɨla mɨkate nɨshanga ɨgahɨɨye, matungo nʉng’waa nkolo nʉɨsɨnzwa, amanyisigwa akwe akamʉkolya, "Itɨɨ, ʉloilwe kʉkʉnoneelelye pɨ lʉdya nʉla Pasaka?"

13 Yesʉ akalagɨlya amanyisigwa akwe abɨɨlɨ akaaɨla, "Longoli kʉkɨsalɨ nɨkikʉlʉ, kʉng’wanso mʉkʉtankana nʉmitunja ʉng’wɨ ʉkenkile ntʉnda amazi. Mʉtyati, 14 kʉpikɨɨla nyʉmba nʉʉkingɨla, mende mʉmʉkolye ʉmʉkola nyumba, Mʉmanyisi ʉkʉkolya. ‘Inɨndo ane ɨkolɨ pɨ nɨkʉlɨla ɨ pasaka nɨamanyisigwa ane?’ 15 Nʉyo ʉkʉmʉlagɨɨla nɨndo nkʉlʉ a migʉlya nɨnoneeigwe nʉkʉpambɨlwa, mʉkʉnoneelya mʉmo."

16 Amanyisigwa akalongola kʉkɨsalɨ nɨkɨkʉlʉ, akahanga maintʉ ɨhi anga ʉ Yesʉi naɨʉatambʉɨe, akanoneelya lʉndya nʉla pasaka.

17 Naɨyatula mpɨndɨ, Yesʉ palʉng’wɨ nɨ amanyisigwa akwe ikʉmi na abɨɨlɨ akapika mʉ nyumba nanso. 18 Naɨ akʉlya, Yesʉ akalʉnga, "Kʉmʉɨla ɨtai, ʉng’wɨ mʉng’wanyu ʉkʉlɨzania nʉnene, ʉkʉnsuɨpa."

19 Papo gwa amanyisigwa akwe akatula nʉkɨa, akatula mʉkolya ʉng’wɨ ʉng’wɨ, "Itɨɨ, nene kʉʉsuɨpa?"

20 Yesʉ akaaɨla, "Ingɨ ʉng’wɨ wanyu nɨ mikʉmi na abɨɨlɨ, nʉkʉlɨɨlya ntonge palʉng’wɨ nʉnene, nʉwanso yʉyo mʉsuɨpi. 21 Tai ʉnene Ng’waa Mʉntʉ kʉsha anga Nkani Nza nɨyandɨkilwe, ingɨ, ʉkaga mʉntʉ ʉyʉ nʉkʉnsuɨpa ʉnene Ng’waa Mʉntʉ! Bahu mʉntʉ nʉwanso aɨwaleke nʉkʉtugwa."

22 Naɨ akʉlya, Yesʉ akahola mʉkate, akalompa, akaʉega akaapa amanyisigwa akwe akalʉnga, "Holi mʉlye, ʉwʉ ingɨ mʉɨlɨ wane."

23 Hangɨ akahola kɨkombe ka dibai, akamʉlompa Itunda, akaapa, ɨhi akang’wela kɨkombe nɨkanso. 24 Akaaɨla, "Iyi ingɨ sakami ane nɨkʉkamɨnkɨɨlya ilago lang’wi Itunda nɨ antʉ, sakami nɨkʉhunʉka kʉnsoko antʉ ɨdʉ. 25 Kʉmʉɨla ɨtai, shanga kʉng’wa hangɨ ɨdibai kʉpikɨɨla lʉhikʉ ʉlo nɨ nɨkamɨng’wa nɨ mapya mʉʉtemi wang’wi Itunda."

26 Sʉnga akɨmba lyɨmbo nɨla kʉmʉkʉlya Itunda. Naɨ amala kɨmba akahega akalongola mʉlʉgʉlʉ nʉla Mizeituni.

27 Naɨ akolɨ mʉnzɨla Yesʉ akaatambʉɨla amanyisigwa akwe, "Ʉnyenye mɨhi mʉkʉmanka nʉkʉndeka, anga niyandɨkilwe mʉ nkani ninza niyang’wi Itunda, Itunda aɨʉtambʉe.

‘Kʉmʉkʉa mʉdɨmi nkolo yɨkʉsambaɨla.’

28 Ingɨ anga niʉke kʉmʉtongeela kʉ Galilaya."

29 Itɨ gwa ʉ Petelo akamʉɨla, "Anga ɨze antʉ ɨhi awa akʉmanka nʉkʉʉleka, kwee ʉnene shanga kʉʉleka.

30 Yesʉ akamʉɨla, "Kʉɨla ɨtai, ʉtikʉ ʉwʉ nʉwa lelo, nsambalʉme nʉwakɨlɨ kʉkʉnkʉla nkʉa kabɨɨlɨ, ʉkʉtula wa nihita kataatʉ."

31 Ingɨ Petelo akakomangɨɨla, anga itule kʉsha nʉewe, shanga kʉʉleka."

Amanyisigwa ɨhi akalʉnga ʉʉ.

32 Ʉʉgwa, akapika nkɨka nitangwa Getisemane, Yesʉ akaaɨla amanyisigwa akwe, "Ikii papa leki ʉnene nende mʉlompa Itunda." 33 Sʉnga akaahola ʉ Petelo nʉ Yakobo nʉ Yohana akalongolania kʉlɨ iniino, akandya kʉaalɨɨka mʉnkolo nʉkaga ikʉlʉ. 34 Akaaɨla, "Kʉaalɨka ikʉlʉ mʉnkolo ɨhiya kʉsha. Ikii hapa leki kʉhung’wi ʉtʉlo."

35 Yesʉ akalongola kʉntongeela iniino, akigʉma akagwa ʉundaala, akalompa kɨna, ‘Anga ize ihumikile, ndeke kʉkɨɨla itungo ɨlɨ nɨla lwago.’ 36 Akalompa, "Tata wane, kʉng’wako ɨhi ahumɨkile. Ʉnihegelye kɨkombe ɨkɨ nɨka lwago, ingɨ ileke kʉtula anga nɨndoilwe ʉnene, itule anga nʉloilwe ʉewe."

37 Sʉnga akatulya kʉamanyisigwa ao nɨatatʉ, akaahanga ahung’waa tʉlo, akamʉkolya ʉ Simoni nʉitangwa Petelo, "Simoni itii, walala tʉlone? Shanga ʉhumile kʉleka kʉlala tʉlo saa ɨng’wɨ?" 38 Sʉnga akaaɨla, "Leki kʉhung’wi tʉlo hangɨ mʉlompe ingɨ mʉleke kʉgeng’wa kitʉma ʉbɨ. Ʉnyenye mʉloilwe kʉgeng’wa, mɨɨlɨ anyu mɨgila anga ngulu."

39 Yesʉ akalongola hangi kʉmʉlompa Itunda, akasʉkɨɨla malompi yayo yaayo nang’wandyo. 40 Sʉnga akatulya hangɨ akahanga alala tʉlo mʉlito. Akaleng’wa kʉmʉsʉkɨɨlya.

41 Naɨ ʉahangile nkʉa akataatʉ akaaɨla, "Mʉkɨlɨ mʉlae nʉkʉsupya? Itungo ɨlɨ yakonda! Ʉki itungo lapika! Ʉnene Ng’waa Mʉntʉ kʉambwa nʉ kʉkagɨɨlwa kʉ anyamɨlandʉ. 42 Imɨki, kwɨndi, mʉntʉ ʉyo nʉkʉnsuɨpa wahumbeela."

43 Yesʉ naɨ wakɨlɨ ʉkʉligitya, akapika Yʉda ʉng’wɨ mʉ amanyisigwa ikʉmi na abɨɨlɨ akapika. akapika palʉng’wɨ niʉmbɨ nɨla antʉ naɨakete yɨgɨ ni idunkuli. Antʉ nɨanso aɨ alagɨɨgwe niʉmbɨ nɨla apolyi nɨakʉlʉ nɨamanyisi amalagɨɨlyo ang’wa Musa nɨanyampala. 44 Ʉʉgwa Yʉda mʉsuɨpi aɨ ʉang’enyee kɨna, "Ʉyo nɨkʉmʉlʉngɨla ize yʉyo mʉambi, mʉambi mʉmʉtwale ɨze mʉmʉkendegee."

45 Ʉʉgwa Yʉda naɨ ʉpikile, akamʉloela ʉ Yesʉi, akamʉlamʉsha, "Mʉmanyisi!" Akamʉlʉngɨla. 46 Itɨ gwa, antʉ nɨanso akamʉamba ʉ Yesʉi akamʉtunga. 47 Ʉng’wɨ wao awa naɨimɨkile palʉng’wɨ nʉ Yesʉi, akahopoola nyalahanda akwe, akamʉtemelya kʉtwɨ mʉtʉʉng’wa nʉwa mʉpolyi nʉmʉkʉlʉ. 48 Yesʉ akaaɨla, "Itɨɨ, mʉpembilye ni yɨgɨ kʉmamba ʉnene anga nɨ mii? 49 Mahikʉ ɨhi aɨ nɨmanyisa panyʉmba ang’wi Itunda, shanga aɨ mɨmamba. Ingɨ aya ɨhi atulɨkile ingɨ Ʉandɨkwa nʉ Ʉza ʉkondanɨle."

50 Papo paapo amanyisigwa akwe ɨhi akamʉleka, akamanka.

51 Aɨ ʉkolɨ mʉhumba ʉng’wɨ aɨ wikumbile minkʉmbɨ aɨ ʉmʉlondoe Yesʉ. Nʉng’wenso akahiya kʉmuamba. 52 Mʉhumba nʉwanso akaapʉlʉpʉtya, akatigana, akaalekela minkʉmbɨ, akamanka kimpʉnyu.

53 Itɨ gwa, akamʉtwala ʉ Yesʉi mʉ nyʉmba a Mʉpolyi nʉ mʉkʉlʉ papo gwa apolyi niakʉlʉ nɨanyampala nɨamanyisi amalagɨɨlyo ang’wa Musa akamikaɨla ianza. 54 Petelo akamʉlondoola ʉ Yesʉi, akingɨla mitando la mʉpolyi nʉ mʉkʉlʉ, akikiɨ palʉng’wɨ nɨalili akaze ota moto. 55 Apolyi nɨakʉlʉ nɨianza lɨhi akaduma ʉkʉɨɨli nʉwa kʉmʉsemela ʉ Yesʉi amʉbʉlage, ingɨ shanga akapata. 56 Antʉ ɨdʉ aɨ akʉɨɨe ʉtele kʉng’wa Yesʉ, ingɨ ʉkʉɨli wao shanga ʉkimpyana.

57 Sʉnga antʉ nɨang’wɨ akimɨka hangɨ, azetambʉla ʉkʉɨɨli nʉwa ʉtele azelʉnga, 58 "Aɨ kʉmigulye mʉntʉ ʉyʉ wazelʉnga, ‘Kʉmɨkumʉla Nyumba ɨyɨ nang’wi Itunda naɨzengilwe nɨantʉ, hangɨ kʉ mahikʉ ataatʉ kʉmɨzenga ngɨɨza nɨshanga ɨkʉzengwa nɨantʉ."’ 59 Ingɨ nɨitɨ ga ʉkʉɨɨli wao shanga ʉkimpyana.

60 Itɨ gwa, mʉpolyi nʉmʉkʉlʉ akimɨka pakatɨ ao, akamʉkolya ʉ Yesʉi, "Itɨɨ, shanga ʉkʉsʉkɨlya anga lʉkanine? Itɨɨ shanga wigulye antʉ awa ɨhi akʉpumya ʉkʉɨɨli nʉwa kʉʉsemela ʉewe"

61 Yesʉ akakilaga ihɨtwɨɨ, shanga akaligitya lʉkani lɨhi. Mʉpolyi nʉ mʉkʉlʉ akamʉkolya hangɨ, "Itɨɨ, ʉewe wɨ Kilisito, Ng’wana wang’wi Itunda nʉkembetilwe?"

62 Yesʉ akasʉkɨɨlya, "Ee, yʉ nene. Mʉkʉmona hangɨ, ʉnene Ng’waa Mʉntʉ nikiɨ ipande nɨla ʉkʉlʉ nɨ lang’wi Isekʉlʉ Mʉnya Ngulu, mpembilye nɨmalunde a kigʉlʉ."

63 Papo paapo mʉpolyo nʉ mʉkʉlʉ akatamʉla mʉjʉlʉngʉ wakwe nikuo, akalʉnga, "Kʉʉpenza ʉkʉɨɨli kɨɨ hangɨ? 64 Ʉnyenye mijaa nʉkʉmʉmbehʉla Itunda! Mʉkʉona ʉlɨ ʉnyenye?"

Ianza lɨhi lɨkalamʉla kɨna ʉtakɨwe kʉbʉlagwa.

65 Itɨ gwa, antʉ ang’wɨ akatula mʉtyɨla matɨ ʉ Yesʉi, akamʉtunga mʉkako mʉ miho, akamʉkʉa nʉkʉmʉkolya, "Kʉtele nyenyu nʉkʉkʉile! "Sʉnga nɨamboi akamʉkʉa makopi."

66 Petelo naɨ wakɨlɨ ʉkolɨ mitando, wakɨza mitʉmi ʉng’wɨ nʉwa kɨsʉngʉ nʉwa mʉpolyi nʉ mʉkʉlʉ . 67 Naɨ wamʉona ʉ Petelo ʉkota moto, akamʉgondoola, akamʉɨla, "Nʉewe ga aza mɨpalʉng’wɨ nʉ Yesʉi Mʉnya kʉ Nazaleti."

68 Ingɨ ʉ Petelo akahita, "Shanga nʉmʉmanyile hangɨ shanga nɨngile nʉʉkʉkɨligitya." Sʉnga ʉ Petelo akahega akapʉma kʉnzi itando. Papo paapo nsambalume ɨkakʉnkʉla.

69 Mitʉmi nʉwanso naɨʉmʉine hangɨ ʉ Petelo nkɨka nanso, akatula atambʉɨla ɨantʉ naɨ ɨmikile pang’wanso, "Mʉntʉ ʉyʉ ingɨ wɨpalʉng’wɨ nɨenso." 70 Ingɨ Petelo akahita hangɨ.

Itungo iniino, antʉ naɨɨmikile pang’wanso akamʉhanga, akamʉɨla ʉ Petelo, "Kʉlʉ kʉʉlʉ ʉewe mɨpalʉng’wɨ, kʉnsoko ʉewe wɨ mʉnya kʉ Galilaya."

71 Ingɨ ʉ Petelo akatula lapa nʉkizuma wazelʉnga, "Ʉnene shanga nʉmʉlingile ʉmʉntʉ ʉyʉ nɨmʉkʉligitya inkani yakwe."

72 Papo paapo nsambalume ɨkakʉnkʉla nkʉa a kabɨɨlɨ. Itɨ gwa, Petelo akakɨmbuka ʉ Yesʉi naɨʉmʉɨɨe. Nsambalume nɨze ɨkɨlɨ kʉkʉnkʉla nkʉa aka bɨɨlɨ, ʉkʉnihita nkʉa itaatʉ. "Petelo akatula lɨla.