1 Ɨyɨ ɨkʉtula nkʉa akataatʉ ʉnene kɨza kʉng'wanyu, Wandɨkwa wang'wi Itunda wandɨkilwe kɨna, "Ʉsemelwa wɨhi ʉkʉlamʉlwa kʉ ʉkʉɨɨli nʉwa antʉ abɨɨlɨ ang'wɨ ataatʉ." 2 Nakondilye kʉmʉɨla, naɨkine nʉnyenye nkʉa akabɨɨlɨ, nitungo ɨlɨ ninkolɨ kʉlɨ kʉmʉɨla hangɨ. Anga nɨze shanga kʉaaisɨɨlya antʉ ɨhi nɨatendile ʉbɨɨ nʉkʉhita kila itʉnʉ nɨantʉ nɨangɨza. 3 Mʉloilwe kʉkamɨnkɨɨligwa kɨna ʉ Kilisito ʉkʉtambʉla mʉng'wane. Kilisito shanga mʉgila anga ngulu, ingɨ ng'wenso ʉkete ngulu niyʉtʉma mɨlɨmo mʉng'wanyu. 4 Palʉng'wɨ nɨ kɨna ʉ Kilisito aɨʉkomilwe mʉmʉsalaba kʉnsoko aʉgila ngulu, ingɨ itungo ɨlɨ mʉpanga kʉ ʉhumi wang'wi Itunda. Nʉsese ga mʉʉlya ngulu witʉ kʉkamɨnkanile nʉ Kilisito, ingɨ kɨapanga kʉ ʉhumi wang'wi Itunda kʉnsoko anyu.

5 Ikolenkeelyi ʉnyenye mʉhume kʉlɨnga kɨna tai mʉhʉɨɨe. Mikolye ʉnyeye. Itɨɨ, shanga mʉlɨngile ne kɨna ʉ Kilisito Yesʉ ʉmolɨ mʉng'wanyu? Ang'wɨ shangaʉ, ʉnyenye maleng'wa kʉtula anga nʉloilwe nʉwanso. 6 Ingɨ nihʉɨɨe kɨna ʉnyenye mʉkʉlɨnga kɨna ʉsese shanga kʉleming'we nigeng'wa nɨlanso. 7 Kʉʉmʉlompa Itunda mʉleke kitʉma ʉbɨɨ wɨhi, shanga nsoko kigele anga antʉ nɨakondilye kʉhuma, ingɨ nɨkʉkee apaitɨ shanga antʉ alɨnge kɨna kalɨlemya igengwa mʉmʉlɨmo ʉwo naɨkitʉmanilye nʉnyenye. Ʉsese nɨkʉkɨloilwe ingɨ ʉnyenye mitʉme makani nɨmaza, palʉng'wɨ nɨ kɨna ʉsese kʉigeleka kɨna kaleming'wa nigeng'wa nɨlanso. 8 Kʉʉleng'wa kitʉma kɨntʉ kɨhi nsuta nɨtai, ʉhumi nɨkukete ingɨ kʉlongoleka mʉtai 9 Kʉloilwe kʉona ʉnyenye mʉkʉine ʉsese kɨagila anga ngulu, ingɨ ʉnyenye mʉkete ngulu, kʉlʉlo kʉmʉlompa Itunda ʉnyenye mʉkondanɨɨle mʉʉhʉɨɨli wanyu. 10 Itɨ gwa, balʉa ɨyɨ kʉandɨkɨla kʉlɨ, ingɨ anga mpike kʉng'wanyu ndeke kʉtula nɨmʉtaki kʉkɨɨla ʉhumi ʉwo naɨmpewe ni Isekʉlʉ. Isekʉlʉ ʉmpee ʉhumi nʉwa kʉmʉzenga shanga kʉmʉgazanja.

11 Itungo ɨlɨ, ayandʉgʉ ane, kʉmʉlaga! Mʉkondanɨɨle mʉʉhʉɨɨli nʉ kʉtyata inkani yane, mʉsange nʉʉlowa, mɨshiɨ nɨmatiliga, Itunda nʉwa ʉlowa watule palʉng'wɨ nʉnyenye.

12 Mʉzilamʉsha kʉʉlowa wang'wa Kilisito.

Antʉ ɨhi nɨang'wi Itunda amʉlamʉkilye.

13 Kʉmʉlompeela mʉtule nʉʉkende wang'wa Kilisito, 14 nʉʉlowa wang'wi Itunda nʉ mʉhangʉ nʉwa Ng'wahʉ Ng'welʉ, yitule palʉng'wɨ nʉnyene mɨhi.