1 Itɨ gwa, Itunda kʉ kɨaisa kakwe, wakʉpeza ʉsese mʉlɨmo ʉwʉ kʉlʉlo shanga kʉʉkatapa. 2 Ingɨ kahitile lʉkʉlʉ makani ɨhi namɨnyala naya nawipiho. Hangɨ shanga kɨmʉkongela mʉntʉ, ang'wɨ kʉhanja nʉ ʉteele mʉlʉkanɨ lang'wi Itunda, ingɨ kʉʉtambʉla ɨtai kʉtilɨ ipiho antʉ alɨnge kɨna ʉsese kɨantʉ atai pang'wi Itunda. 3 Ndogoelyo, anga ɨze Nkani Nza nɨkʉʉtanantya yipihilwe, ingɨ yipihilwe kʉ antʉ nɨshanga amʉhʉɨɨe Itunda. 4 Antʉ nɨanso shanga ahʉɨɨe kʉnsoko ʉ Shetani mʉkʉlʉ nʉwa ʉnkʉmbigʉlʉ ʉwʉ waapʉngʉtaye mahalaao aleng'we kʉona nzelya niya Nkani Nza nikʉlyo lang'wa Kilisito, nɨɨza mpyani ang'wi Itunda. 5 Ndogoelyo shanga kʉitanantya anga sese, ingɨ kʉʉmʉtanantya Yesʉ Kilisito kɨna Isekʉlʉ, ʉsese kɨ itʉmi anyu kʉnsoko akwe. 6 Kʉnsoko Itunda aɨʉtambʉe, "Nzelya nelye mʉkiti," yʉyo nʉwelya mʉnkolo yitʉ, nʉkʉʉpa nzelya niya ʉlɨngi nʉwa ʉkʉlʉ wakwe nʉwelya mʉ ʉsʉ wang'wa Kilisito.

7 Itɨ gwa, ʉsese nɨkʉkete kɨʉto ɨki nɨkɨpuma kʉng'wi Itunda kɨmpyani ni yʉngʉ niibadʉka, yilɨngɨke kɨna ngulu ɨyɨ nɨnkʉlʉ ɨpumɨɨe kʉng'wakwe, shanga kʉng'witʉ. 8 Kɨkɨɨla mʉlwago, ingɨ shanga kɨlekwa kʉaɨɨligwa ni Itunda, kikankania ingɨ shanga kɨkatapa, 9 kagigwa, ingɨ shanga kɨlekwa ni Itunda, palʉng'wɨ nʉkʉtagwa pihɨ, shanga kʉlimansɨɨe. 10 Matungo ɨhi antʉ ɨkenda hiya kʉʉbʉlaga anga naɨamʉtendee ʉ Yesʉ, ndogoelyo ʉpanga wang'wa Yesʉ wigeeleke mʉ mɨɨlɨ itʉ. 11 Kʉnsoko ʉsese nɨkɨapanga, matungo nɨkʉishiɨ kʉkolɨ mʉʉlʉgʉ wansha kʉnsoko ang'wa Yesʉ, ingɨ ʉpanga wang'wa Yesʉ wigeeleke mʉmɨɨlɨ itʉ nɨkuza. 12 Matungo ɨhi kagigwa pakupɨ ɨnsha, kʉlʉlo ʉnyenye mɨlija ʉpanga.

13 Wandɨkwa wang'wi Itunda wandɨkilwe kɨna, "Aɨnʉmʉhʉɨɨe Itunda, papo nɨkatambʉla." Nʉ sese ga kʉkete nkolo yɨyo yɨɨyo nakʉhʉɨɨla, kʉlʉlo kʉʉtambʉla kʉnsoko kʉhʉɨɨe. 14 Kʉlɨngile kɨna Itunda naɨʉmiʉshilye Isekʉlʉ Yesʉ, ʉkʉiʉsha nʉsese ga anga naɨʉmiʉshilye ʉ Yesʉ, ʉsese nʉ nyenye kʉʉɨkwa pantongeela akwe. 15 Makani aya ɨhi ingɨ kʉnsoko ansaɨlo anyu, ingɨ antʉ amʉlʉmbe Itunda kʉ ʉkende wakwe nʉwɨapikɨɨla antʉ ɨdʉ nangalu, kʉkɨɨla itɨ Itunda walongoleke kʉkʉligwa.

16 Kʉlʉlo shanga kɨkatapa, palʉng'wɨ kɨna mɨɨlɨ itʉ ɨlongolekile kʉkatala nʉ kʉnyampala, ingɨ nkolo yitʉ yitendwa ʉpya mahikʉ ɨhi. 17 Lwago nɨkʉʉkɨɨla ingɨ lʉniino, hangɨ kitungo ʉdu, ingɨ lɨkʉpeza ikʉlyo nʉlʉkɨile lwago lɨhi, ikʉlyo nigila anga mpelo. 18 Kʉlʉlo shanga kʉsanilye anga maintʉ nɨkʉmaine, ingɨ kʉsanilye maintʉ nɨshanga kʉmaine. Kʉnsoko maintʉ nɨkʉmaine ɨkɨlaa, ingɨ maintʉ nishanga kʉmaine yayo akalɨ na kalɨ.