1 Ʉnene Paʉlo mʉtʉʉng'wa wang'wa Yesʉ Kilisito kʉʉlowa wang'wi Itunda, kɨpalʉng'wɨ nʉmʉnyandʉgʉ witʉ Timoteo.

Kʉʉmʉandɨkɨla ʉnyenye milʉndo nʉwa antʉ nɨamʉhʉɨɨe ʉ Kilisito nɨmʉkolɨ kʉ Kolinto, nɨantʉ ɨhi nɨang'wi Itunda mʉisalɨ yɨhi nɨya kʉ Akaya.

2 Kʉʉmʉlompa Itunda Tata witʉ nɨ Isekʉlʉ witʉ Yesʉ Kilisito wamʉkembete nʉ kʉmʉpa matiliga mɨhi.

3 Wakʉligwe Itunda Tata wang'wi Isekʉlʉ witʉ Yesʉ Kilisito, Tata nʉkete kɨaisa hangɨ Itunda nʉwɨkʉaɨɨlya mʉlwago lɨhi. 4 Ng'wenso wɨkʉaɨɨlya ʉsese mʉlwago litʉ lɨhi, nʉsese kʉhume kʉaɨɨlya nɨangɨɨza mʉlwago kʉ ʉaɨɨlya wʉwo wʉʉwo nɨkɨsɨngɨɨlya kʉpuma kʉng'wi Itunda. 5 Anga nɨkʉlongolekile kagigwa kʉnsoko akʉmʉhʉɨɨla ʉ Kilisito, itɨʉ Itunda ʉlongolekile kʉʉaɨɨlya kʉkɨɨla Kilisito. 6 Ʉsese anga kagigwe, ingɨ kʉnsoko aʉaɨɨlya nʉ ʉgunɨki wanyu. Anga ɨze kʉʉaɨɨligwa, ingɨ kʉnsoko akʉmʉaɨɨlya mʉgimye mʉlwago lʉlo nʉlɨkaja ʉsese. 7 Hangɨ isʉmbɨɨlyo nɨkukete kʉng'wanyu ingɨ ikʉlʉ, kʉnsoko kʉlɨngile kɨna anga magigwe anga sese, ʉʉgwa Itunda ʉkʉmʉkomya nkolo anga ʉsese.

8 Anyandʉgʉ itʉ, kʉʉhiya mʉmanye ʉlwago naɨ kʉlʉpantɨkile ʉko kʉ kɨsalɨ ka Asia, lwago nʉlanso aɨlʉkʉlemilye kɨkaʉlya ɨnsʉla akʉlongoleka kɨshiɨ. 9 Kʉlʉ kʉʉlʉ aɨkʉsɨgile kaina anga antʉ nɨapɨsɨɨigwe kʉbʉlagwa. Ingɨ kʉmanyisigwa kʉleka kisania ʉsese, kʉmʉsanie Itunda nʉwɨiʉsha antʉ nɨakulee. 10 Itunda naɨʉkʉgunile mʉlwago nʉla nsha, hangɨ nʉlongolekile kʉʉguna, ʉsese kʉsʉmbɨɨye kɨna ʉkʉʉguna hangɨ. 11 Nʉnyenye mʉkʉaɨɨlye ʉsese kʉmʉlompa Itunda, wahume kija malompi anyu nʉkʉ ʉkembeta ʉsese, papo antʉ ɨdʉ akʉmʉlʉmba Itunda kʉnsoko itʉ.

12 Ʉsese kʉiketela kɨntʉ kɨng'wɨ du, kʉsɨgile kɨna kɨshiɨ mʉ ʉnkʉmbigʉlʉ nʉ kʉng'wanyu, kʉ ʉhʉɨɨli nʉ ʉgoloku naɨkʉpewe ni Itunda, shanga aɨkʉtendile nanso kʉ mahala a kɨʉntʉ ingɨ kʉ ʉkende wang'wi Itunda. 13 Kʉʉmʉandɨkɨla ʉnyenye makani nɨmʉhumile kʉmasoma nʉ kʉmalɨnga, nsɨgɨɨe kɨna mʉkʉlɨnga nʉnda, 14 kʉnsoko kʉpikɨɨla ino makʉlɨnga ɨniino. Kʉlɨngile kɨna mʉlʉhikʉ nʉla kʉtulya Isekʉlʉ witʉ Yesʉ mʉzɨɨzi isanɨlya sese, anga ʉsese nɨkʉisania kʉnsoko anyu.

15 Nsʉmbɨɨye kʉmʉgendela ʉnyenye mʉhume kʉkembetwa hangɨ. 16 Mʉ mʉhɨnzo nɨnongoe kʉ kɨsalɨ ka Makedonia nomee kʉkɨɨla kʉng'wanyu napa nɨkʉtulya, mʉnzaɨɨlye impamba niya mʉhɨnzo wane nɨnongoe kʉ kɨsalɨ ka Ʉyahudi. 17 Itɨɨ, naɨnomee ikani ɨlɨ azanɨhanga mʉntʉ nʉwa mampɨlʉ ne? Itɨɨ mʉsɨgɨɨe kɨna kitʉma makani ane kʉmasɨgo akɨʉntʉ kɨna "nahita" hangɨ "nagomba" papo paapo? 18 Itunda wɨtambʉla ɨtai du, ʉnene anga nʉnge "nahita" ang'wɨ anga nʉnge "nagomba" ingɨ yituleʉ. 19 Kʉnsoko Yesʉ Kilisito Ng'wana wang'wi Itunda aɨkʉmutanantilye kʉng'wanyu, ʉnene nʉ Siliwamo nʉ Timoteo, shanga antʉ a "kʉhita" nʉ "kʉgomba" ingɨ nʉwanso mahikʉ ɨhi aɨwɨlʉnga "nagomba." 20 Kʉnsoko maintʉ ɨhi Itunda nʉlʉngile ʉkitʉma apikɨɨla kʉkɨɨla Yesʉ Kilisito. Kʉnsoko akwe kɨlʉnga "Nagomba" kʉnsoko akʉmʉkʉlya Itunda. 21 Itɨ gwa Itunda ng'wenso wɨkʉkomelya nkolo ʉsese palʉng'wi nʉ nyenye kʉkamɨnkane nʉ Kilisito, nʉkʉhoile ingɨ Itunda ng'wenso, 22 ng'wenso ʉkʉɨkɨe lʉkao kʉtule kɨ antʉ akwe, aɨʉkʉpee Ng'wahʉ Ng'welʉ mʉnkolo yitʉ itule kɨkamɨnkɨɨli ka makani ɨhi naɨ ʉtambʉe kɨna ʉkʉʉpa.

23 Itunda ng'wenso ʉlɨngile kɨna kʉtambula ɨtai, ʉmɨlɨngile ɨnkolo ane. Ʉnene shanga aɨnzile kʉ kɨsalɨ ka Kolinto kʉmʉaisɨɨlya. 24 Shanga kʉloilwe kʉmʉsinja mʉ ʉhʉɨɨli wanyu, ʉsese kʉlɨngile kɨna ʉnyenye mʉkomilye nkolo mʉ ʉhʉɨɨli, ingɨ kʉitʉma mʉlɨmo palʉng'wɨ nʉnyenye mʉhume kiloa.