1 Ʉnene kikʉlya, palʉng'wɨ nɨkɨna shanga yɨnonee. Ingɨ itungo ɨlɨ kʉtambʉla kʉkɨɨla mʉloto nʉ ʉkunʉkulwa nɨmpewe ni Isekʉlʉ. 2 Nʉmʉmanyile mʉntʉ ʉng'wɨ nɨmʉhʉɨɨli, myaka ikʉmi na inɨɨ nɨkɨile aɨʉkenkilwe nʉkʉtalwa kigʉlʉ kʉng'wi Itunda. Shanga nɨngile kɨna aɨʉkolɨ kɨmʉɨlɨne ang'wɨ kɨnkolo, ingɨ Itunda ng'wenso ʉlɨngile. 3 Kʉsʉkɨɨla kʉtambʉla, nɨngile kɨna mʉntʉ nʉwanso aɨʉkenkilwe nʉkʉtalwa kigʉlʉ kʉng'wi Itunda. Ingɨ shanga nɨngile ʉkolɨ kʉng'wanso kɨmʉɨlɨne ang'wɨ kɨnkolo, ingɨ Itunda ng'wenso ʉlɨngile. 4 Kʉng'wanso wɨkija makani nɨshanga ahumile kʉganʉlwa, kʉtilɨ mʉntʉ nʉgombigwe ni Itunda kʉtambʉla. 5 Itɨ gwa, kiketela mʉntʉ nʉwɨhanga nʉwanso, ingɨ shanga kikʉlya ʉnene, ingɨ kikʉlya kʉʉgila ngulu wane. 6 Anga azandowe kikʉlya shanga aza nzetambʉla anga mʉntʉ nɨmʉpʉngʉ, kʉnsoko azanzetambʉla tai ntile. Itungo shanga kʉlongoleka kikʉlya, kʉnsoko shanga ndoilwe mʉntʉ wansɨgɨɨle kɨna nɨmʉza kʉkɨla nʉkʉmona kitʉma ang'wɨ kija nɨkʉtambʉla.

7 Ingɨ ʉ Paʉlo wɨkalʉnga, kʉnsoko makani aya nɨmakʉlʉ naɨndotigwe aleke kʉnsasha nɨkete nangalu, aɨmbaaigwe mʉmʉɨlɨ anga lija lɨnihomile, mʉntʉ wang'wa shetani nʉwɨnaja ndeke kiketa kʉkɨlɨnkɨɨla. 8 Nkʉa itaatʉ aɨnʉminenile Isekʉlʉ wanihegelye ʉlwago ʉlʉ. 9 Ingɨ Isekʉlʉ wɨkambɨla, "Ʉkende wane ʉkondile, kʉnsoko mʉntʉ anga waʉlye ingulu, papo ʉhumi wang'wi Itunda wɨmʉkondanɨlya nangulu." Itɨ gwa, ingɨ iza nangalʉ kiketela ʉgila ngulu wane ingɨ ʉhumi wang'wa Kilisito wishiɨ mʉng'wane. 10 Kʉlʉlo ndoeeigwe nʉ ʉgila ngulu nʉ kʉtʉkɨlwa nʉ wagigwi nʉ lwago nʉ ʉlya intʉ kʉnsoko ang'wa Kilisito. Kʉnsoko anga ntule nɨmʉgila ngulu, papo nɨtula nɨmʉnya ngulu.

11 Naina nɨmʉpʉngʉ, ingɨ ʉnyenye mʉnsakilye ntule itɨ. Ʉnyenye aza mʉtakɨwe kʉnganʉla niiza. Ndogoelyo, palʉng'wɨ kɨna ʉnene shanga kɨntʉ, nkʉa yɨhi ʉnene shanga nɨmʉniino kʉkɨla "itʉmi nɨakʉlʉ." nɨanso. 12 Naɨkipalʉng'wɨ nʉnyenye aɨnɨmʉgimyi nʉkitʉma mɨʉkʉɨɨlwa niilɨngasɨɨlyo nɨyilagɨɨe kɨna ʉnene nɨ mitʉmi. 13 Kɨntʉ kɨɨ naɨmʉkepewe kʉkɨla milʉndo nʉwa antʉ nɨangɨza nɨamʉhʉɨɨe ʉ Kilisito, kʉhita kʉlompa kɨntʉ kʉng'wanyu? Anga ɨze lɨlo igazo lane, kʉlʉlo kikani nɨlanso ndeki nakanda.

14 Itungo ɨlɨ nɨhamba kɨza kʉng'wanyu nkʉa akataatʉ, shanga kʉhiya mʉmpe kɨntʉ kɨhi. Ndogoelyo nɨkʉduma shanga nsao yanyu, ingɨ kʉmʉduma ʉnyenye. Kʉnsoko ɨza ntendo aleli kʉaɨkɨlya kɨʉto anaao, shanga ana kʉaɨkɨlya kɨʉto aleliao. 15 Kʉlʉlo nkete ʉlowa kʉtʉmɨla kɨntʉ kɨhi nɨnkete kʉnsoko anyu, hangɨ kɨpumya ʉnene kʉnsoko anyu. Itɨɨ, anga itule ʉlowa wane ʉkʉlʉ kʉng'wanyu, ʉlowa wanyu ʉkʉkepane kʉng'wane?

16 Itɨ gwa, mʉkʉgomba kɨna shanga aɨnʉmʉlemeeye. Ingɨ mʉntʉ mʉngɨza ʉhumile kʉlʉnga, "Kʉnsoko ʉ Paʉlo mʉhʉgʉ, ʉmʉpembeseeye nʉkʉmʉkonga." 17 Itɨɨ, ʉnene ndɨɨe mʉ mɨgongo anyu kʉkɨɨla mʉntʉ wɨhi naɨnʉmʉlagɨɨye kʉng'wanyu? 18 Ʉnene aɨnʉminenile ʉ Tito, nɨkamʉlagɨɨlya kʉng'wanyu nʉ mɨitʉ mʉngɨɨza. Itɨɨ, ʉ Tito wɨkalɨla mʉ mɨgongo anyune? Itɨɨ, shanga mʉlɨngile kɨna ʉsese kɨtongwa nʉ ng'wahʉ ʉng'wɨ nʉ kitʉmania?

19 Mʉhumile kʉsɨga kɨna itungo ɨlɨ ʉsese kainikoola pang'wanyu. Ingɨ, kʉtambʉla makani aya pang'wi Itunda, ɨze kʉkamɨnkanile nʉ Kilisito. Makani aya ɨhi anyandʉgʉ ane, kʉnsoko akʉmʉkomelya nkolo ʉnyenye. 20 Nogopile, anga nɨze kʉng'wanyu kʉmʉhanga nɨshanga nɨndoilwe nʉmʉhange, nʉnene ga kʉtula anga nɨshanga mʉloilwe ʉnyenye. Nogopile nihumile kʉhanga mʉkete wilei nɨ nkolo mbɨ ni ikʉo nʉ wikʉngʉmi nʉ kisongeela nʉ wiketi nʉ wikʉlyi nʉ minyomo. 21 Nogopile nɨnzile hangɨ Itunda wane ʉkʉnsasha mbʉlye nɨkakʉtambʉla pang'wanyu, ʉnene nɨkadʉmɨnkɨla kʉona antʉ ɨdʉ nɨitʉmile mɨlandʉ. Ingɨ shanga ilile itʉnʉ, kʉnʉ akɨlɨ akosi alongolekile kigoolya nʉ ʉsambo.