1 Itɨ gwa mʉnkolo ane aza nsɨgɨɨe ndeke kʉmʉgenipa hangɨ kʉnsoko ndeke kʉmʉsasha mʉtule nʉ ʉkɨa. 2 Aɨnamʉe itɨ kʉnsoko anga nʉmʉsashe mʉtule nʉ ʉkɨa nyenyugwa nʉʉkʉnzaɨɨlya? Ingɨ ʉnyenye nɨɨza mʉndoeeye. 3 Nʉmʉandɨkɨe ikani ɨlɨ ingɨ anga nɨze kʉng'wanyu ndeke kʉpegwa ʉkɨa nʉnyenye naza mʉzetula ʉlowa wane. Nɨhʉɨɨe kɨna ʉnene anga ndowe, nʉnyenye ga mʉkʉlowa. 4 Naɨ nʉmʉandɨkɨe kʉnsoko alwago nʉlʉkʉlʉ nɨkaga nangulu mʉnkolo ane hangɨ kʉhunʉla liholi lɨdʉ, shanga aɨkʉmʉsasha mʉtule nʉ ʉkɨa ingɨ kʉnsoko akʉmʉlagɨɨla kɨna nʉmʉloilwe ikʉlʉ.

5 Anga ɨtule mʉntʉ wasashe ʉmʉya watule nʉ ʉkɨa, shanga ʉsakilye ʉkɨa kʉng'wane, ingɨ ʉsakilye ʉkɨa kʉng'wanyu mɨhi, hangɨ shanga ndoilwe ntule nɨmʉtaki kʉkɨlɨnkɨɨla. 6 Ʉpɨsɨligwa naɨ wamʉpantɨka kʉpuma kʉ antʉ ang'wɨ anyu wankoela. 7 Nɨ kɨsagile igɨ bahu ʉnyenye mʉmʉaisɨɨlye mʉntʉ nʉwanso nʉkʉmʉkomelya nkolo waleke kʉlemigwa nʉ ʉkɨa nangulu nʉ kʉkatapa. 8 Kʉlʉlo nʉmʉlompile, mʉlagɨɨlɨ hangɨ kɨna mʉmʉloilwe. 9 Yɨyɨ nsoko akʉandɨka balʉa ɨyo, ingɨ nɨhume kʉlɨnga kɨna mʉhumile kʉnija mʉ makani ɨhi. 10 Ʉnyenye anga mʉmʉlekele mʉntʉ wɨhi, nʉnene ga kʉmʉlekela. Kʉnsoko nʉnene ga anga nʉmʉlekele mʉntʉ ikani lɨhi, nʉmʉlekela kʉnsoko anyu ntongeela angwa Kilisito. 11 Ingɨ ʉ Shetani waleke kʉʉlemya, kʉnsoko kʉlɨngile ihala lakwe.

12 Naɨ napika kʉ kɨsalɨ ka Tiloa kʉtanantya Nkani Nza niyang'wa Kilisito, Isekʉlʉ wɨkanɨngasa nitʉme mʉlɨmo wakwe. 13 Ingɨ nɨkahʉsha nangulu kʉhita kʉmʉhanga mʉluna witʉ Tito. Kʉlʉlo nikaalaga ɨantʉ pang'wanso nɨkalongola kʉ Makedonia.

14 Ingɨ kʉmʉlʉmbila Itunda nʉwikʉtongeela mahikʉ ɨhi mʉmɨhɨnzo nɨkʉkamɨnkanile nʉ Kilisito. Nʉwanso wɨkʉpeza ʉhumi kʉtanantye mpola yang'wa Kilisito nkɨka yɨhi anga manyunkɨɨlo nɨnyunkɨɨla iza. 15 Kʉnsoko ʉsese kʉng'wi Itunda kɨhanga anga manyunkɨɨlo nɨ maza na ʉbani napumigwe nʉ Kilisito kʉng'wi Itunda, nɨapikɨɨla antʉ ɨhi, antʉ nɨakʉgunwa nɨ antʉ nɨshanga amʉhʉɨɨe ʉ Yesʉ Kilisito. 16 Kʉ antʉ nɨshanga amʉhʉɨɨe ʉ Yesʉ Kilisito, mʉnyunko nʉwanso ingɨ nsha, ingɨ kʉ antʉ nɨakʉgunɨka, mʉnyunko nʉwanso ingɨ ʉpanga. Nyenyu gwa, nʉhumile kitʉma makani nanso? 17 Ʉsese shanga kimpyani nɨ antʉ ang'wɨ nɨɨgʉlya lʉkani lang'wi Itunda, ʉsese kɨtanantya lʉkani lang'wi Itunda kʉ ʉhʉɨɨli, anga antʉ nɨalagɨigwe ni Itunda, ɨze kʉkamɨnkanile nʉ Kilisito.