1 Pa ng’wandyo naɨyɨkɨlɨ kʉʉmbwa intʉ yɨhi aɨʉkolɨ Lʉkani nʉ lʉkani nʉwanso aɨwɨpalʉng’wɨ ni Itunda nʉ Lʉkani nʉwanso aɨ Itunda. 2 Lʉkani ʉyʉ aɨwɨpalʉng’wɨ ni Itunda kʉpumɨɨla ʉng’wandyo naɨyɨkɨlɨ kʉʉmbwa intʉ yɨhi 3 Kʉkɨɨla Lʉkani nʉwanso intʉ yɨhi aɨyɨʉmbilwe. Anga ɨze shanga Lʉkani nʉwanso kʉtilɨ anga kɨntʉ kɨhi naɨkizeʉmbwa. 4 Mʉ Lʉkani nʉwanso aɨʉmolɨ ʉpanga, nʉ ʉpanga nʉwanso aɨnzelya aantʉ. 5 Nzelya nanso elyaa mʉkiti, nɨkiti shanga lɨkamɨlemya nzelya nanso.

6 Aɨʉkolɨ mʉntʉ ʉng’wɨ lina lakwe Yohana ʉlagɨigwe ni Itunda, 7 Yohana aɨʉzile waatambʉɨle ɨantʉ nzelya nʉwanso, ingɨ kʉkɨɨla ng’wenso antʉ ahume kʉhʉɨɨla. 8 Yohana shanga aɨnzelya nʉwanso, nʉwanso aɨʉzile kʉatambʉɨla antʉ mpola niya nzelya nʉwanso. 9 Ʉyʉ yʉyʉ nzelya atai, nzelya nʉpembilye mʉʉnkumbigʉlʉ kelya kʉantʉ ɨhi.

10 Itɨgwa, Lʉkani aɨʉmolɨ mihɨɨ, kʉkɨɨla ng’wenso intʉ yɨhi aɨyɨʉmbilwe, ingɨ antʉ amihɨɨ shanga ɨkamʉlɨnga. 11 Aɨʉzile kʉantʉ akwe, ingɨ antʉ akwe shanga ɨkamʉsɨngɨɨlya. 12 Ingɨ antʉ naɨamʉsɨngɨɨye nʉkʉmʉhʉɨɨla, wɨkaapa ʉhumi nʉwakʉtula ana ang’wi Itunda. 13 Awa shanga atugilwe kʉtula ana ang’wi Itunda kʉʉlowa nʉwa aleliao nɨa kɨʉntʉ, ang’wɨ kʉngulu niyamʉɨlɨ, ingɨ kʉʉlowa wang’wi Itunda.

14 Lʉkani nʉwanso wɨkatula mʉɨlɨ, wakishiɨ kʉng’witʉ, nʉsese kɨkaʉona ʉkʉlʉ wakwe, ʉkʉlʉ anga nʉwa Ng’wana nɨkinyene kʉpuma kʉng’wi Itunda Tata, nʉyo wizʉe ʉkende nɨtai.

15 Yohana wɨkaaɨla ɨantʉ ɨmpola yakwe, aɨwenditʉnta wazelʉnga, "Ʉyʉ yʉyʉ naɨnʉmʉtambʉɨe kɨna ‘Nʉpembilye ingɨ ʉnkɨɨye ʉkʉlʉ, kʉnsoko ʉnene naɨ nkɨlɨ nɨkʉtile, nʉwanso aɨʉkolɨ."’

16 Mʉʉkondannɨli wakwe, ʉsese kɨhi kapantɨkile ʉkende wang’wi Itunda nʉwisʉkɨɨe. 17 Kʉnsoko malagɨɨlyo aɨaletilwe kʉkɨɨla kʉng’wa Musa, ingɨ ʉkende nɨtai ang’wi Itunda yiletilwe kʉkɨɨla kʉng’wa Yesʉ Kilisito. 18 Kʉtilɨ mʉntʉ wɨhi nʉwamʉine Itunda. Ingɨ Ng’wana Kinyene, nɨɨpalʉng’wɨ nʉ Tata, yʉyo ʉmʉkumʉshilye Itunda.

19 Ʉlʉ lʉlʉ lʉkani lang’wa Yohana naɨʉwasʉkɨɨye ɨatongeeli a Ayahudi naɨ atʉmile apolyi palʉng’wɨ nɨ Alawi kʉpuma kʉ Yelusalemu amʉkolye ʉ Yohana, "Ʉewe wɨ nyenyu?"

20 Yohana shanga wɨkaapiha ɨtai, wɨkaasʉkɨɨlya, wɨkaaɨla, "Ʉnene shanga nɨ Kilisito."

21 Ɨkamʉkolya hangɨ, "Kʉlʉlo wɨ nyenyu gwa, wɨ mʉmanga Elia ne?"

Yohana wɨkaasʉkɨɨlya, "Shanga nɨ Eliya"

Ɨkamʉkolya, "Itɨ, ʉewe wɨmʉmanga ʉyo nʉkumʉkile kɨna ʉpembelya?"

Yohana wɨkaasʉkɨɨlya, "Shanga nene"

22 Papo ɨkamʉkolya, "Kʉɨle wɨnyenyu gwa? Ʉewe ʉkikoola anga wɨnyenyu? Kʉtambʉɨle kʉhume kʉataɨla lʉkani awa naza akʉtʉmile.

23 Yohana wɨkaasʉkɨɨlya, wazelʉnga, "Ʉnene yʉyo Mʉmanga Isaya naɨʉtambʉe kɨna.

‘Lʉli nʉla mʉntʉ ʉkitʉnta mʉwɨɨ.

Noneelyi nzɨla nʉʉkɨɨla Isekʉlʉ.’"

24 Antʉ nɨanso aɨatʉmilwe nɨ Apalisayo. 25 Ʉʉgwa, ɨkamʉkolya Yohana, anga ize ʉewe ʉkʉlʉnga shanga wɨ Masia ang’wɨ Elia ang’wɨ Mʉmanga "Nɨkɨ ʉkʉbadisa?" 26 Yohana wɨkaasʉkɨɨlya, "Ʉnene kʉbadisa antʉ kʉmazɨ, ingɨ mʉng’wanyu ʉkolɨ mʉntʉ nɨshanga mʉmʉmanyile ʉnyenye. 27 Ʉyo nʉpembilye, ʉnene shanga ngombigwe kʉtolya mɨkoha ailatʉ yakwe ga." 28 Yohana aɨʉtambʉe aya apo naɨʉkʉbadisa antʉ kʉ Betania ipande nɨla kilya amongo nʉa Yolodani.

29 Lʉhikʉ naɨ lʉtyatɨe Yohana wɨkamʉona Yesʉ ʉpembilye kʉng’wakwe, wɨkalʉnga, "Ʉyʉ yʉyʉ Ng’wankolo wang’wi Itunda nʉwɨheja mɨlandʉ aantʉ ɨhi. 30 Ʉyʉ yʉyʉ naɨnʉmʉɨe kɨna, "Ʉnene anga nakɨla, ‘Ʉpembilye nʉ mʉkʉlʉ kʉkɨla ʉnene, kʉnsoko aɨʉkolɨ ʉnene naɨnkɨlɨ kigela.’ 31 Ʉnene shanga aɨnʉmʉmanyile, ɨngɨ aɨnzile badisa antʉ namazɨ, Aisilaeli ahume kʉmʉlɨnga." 32 Papo Yohana wɨkaganʉla kɨna, "Namʉona Ng’wahʉ wang’wi Itunda kʉpuma kigʉlʉ ʉkʉmʉsimɨɨla anga nkʉnda, wɨkikiɨ mʉng’wakwe. 33 Ʉnene shanga aɨnʉmʉɨngile, Itunda ingɨ naɨʉntʉmile mbadise kʉmazɨ aɨwambɨɨe. Mʉntʉ ʉyo, nʉʉkʉona ʉkʉsimɨɨlwa nʉ Ng’wahʉ nʉkʉsiga nʉng’wenso, ingɨ yʉyo ʉkʉbadisa antʉ kʉ Ng’wahʉ Ng’welʉ. 34 Papo Yohana wɨkalʉnga, "Ʉnene nɨlɨine ikani ɨlɨ kʉmʉɨla kɨna. Ʉyʉ yʉyʉ Ng’wana wang’wi Itunda."

35 Lʉhikʉ naɨlʉtyatile, Yohana Mʉbadisi aɨʉkolɨ papo palʉng’wɨ nɨamanyigwa akwe abɨɨlɨ. 36 Naɨwamʉona Yesʉ ʉkɨile, wɨkalʉnga, "Mʉgozi! Ʉyʉ yʉyʉ Ng’waa Nkolo wang’wi Itunda."

37 Amanyisigwa awo nɨabɨɨlɨ naɨamija ʉ Yohana ʉkʉtambʉla itɨ, ɨkamʉtyata ʉ Yesʉ. 38 Yesʉ wɨkikeya, naɨwaaona amanyisigwa nianso amʉlondooe, wɨkaakolya "Mʉkʉduma ntʉni?" Nɨanso ɨkamʉsʉkɨɨlya, "Mʉmanyisi, itɨɨ, ʉewe wɨshiɨ pɨɨ?

39 Yesʉ wɨkaasʉkɨɨlya, "Kilanyi, nʉnyenye mʉkʉona." Ʉʉgwa ɨkalongola ɨkaona apo nʉwishiɨ, kʉnsoko naɨʉkʉaɨla itɨ aɨyaina mpɨndɨ matungo a saa ikʉmi. Nɨenso ɨkadʉania koha nʉ Yesʉ lʉhikʉ nʉlanso.

40 Amanyisigwa awo nɨabɨɨlɨ naɨamigulye ʉ Yohana ʉtambʉe itɨ nʉkʉmʉtyata ʉ Yesʉ, ʉng’wɨao witangwa Endelea mʉluna wang’wa Simon Petelo. 41 Kɨkʉlʉ Endelea naɨʉtendile, wɨkamʉhanga mʉluna wakwe ʉ Simon wɨkamʉɨla, "Kamʉona Masia" ndogoelyo akwe nʉhoilwe ni Itunda. 42 Sʉnga ʉ Endelea wɨkamʉtwala ʉ Simon kʉng’wa Yesʉ.

Yesʉ wɨkamʉgoza Simon, wɨkalʉnga, "Ʉewe wɨ Simon mʉhʉmba wang’wa Yohana. Itungo ɨlɨ ʉkʉtulitangwa Kepwa" Ndogoelyo ingɨ Petelo ang’wɨ "Italagwe."

43 Lʉhikʉ naɨlʉtyatile Yesʉ wɨkalamʉla kʉlongola kʉ Galilaya. Kʉng’wanso, wɨkamʉhanga Pilipo wɨkamʉɨla "Ntyate" 44 Pilipo aɨmʉnya kʉ Betisaida kɨsalɨ kʉapumile Endelea nʉ Petelo. 45 Pilipo nʉyo wɨkamʉhanga ʉ Natanaeli wɨkamʉɨla, "Kamʉona Yesʉ nʉwa kʉ Nazaleti mʉhʉmba wang’wa Yusupu. Ʉyo nʉ Musa aɨwandɨkile nkani yakwe mʉmbugulu amalagɨɨlyo, nɨamanga andɨkile ɨnkani yakwe."

46 Natanaeli wɨkamʉkolya Pilipo, "Itɨɨ, kɨntʉ nɨ kɨziza kɨhumile kʉpembelya kʉ kɨsalɨ kɨniino nɨka Nazaleti?" Pilipo wɨkamʉɨla

"Nzʉ wiloeele"

47 Papogwa Yesʉ naɨwamʉona ʉ Natanaeli ʉpembilye kʉng’wakwe wɨkalʉnga, "Kolwi! ʉyʉ ingɨ Mʉisilaeli nʉwa tai, mʉgila ʉteele wɨhi mʉnkolo." 48 Natanaeli wɨkamʉkolya, "Wamanya ʉlɨ?" Yesʉ wɨkamʉsʉkɨɨlya, "Pilipo naza wakɨlɨ kʉitanga ʉewe apo naza wikiɨ pitina nɨla mʉkʉyʉ, aza nʉkʉineʉ." 49 Natanaeli wɨkamʉɨla, "Mʉmanyisi, ʉewe ingɨ wɨ Ng’wana wang’wi Itunda. Ʉewe yʉyo wɨ Mʉtemi nʉwa Aisilaeli!"

50 Yesʉ wɨkamʉɨla, "Itɨɨ, wahʉɨɨla kʉnsoko nakʉɨla kɨna aza nʉkʉine wikiɨ pitina nɨla mʉkʉyʉ? Ʉkiloela nɨ makʉlʉ nangalu kʉkɨla aya itɨ." 51 Yesʉ wɨkalongoleka kʉlʉnga, kʉmʉɨla ɨtai kɨna ʉnyenye mʉkʉona igʉlʉ lɨkʉlugʉka nɨa malaɨka ang’wi Itunda akʉtula nankɨla nʉkʉsima kʉnsoko ane ʉnene Ng’waa Mʉntʉ."