1 Yesʉ wɨkalongoleka kʉaɨla kɨna, "Nʉmʉtambʉɨe nanso kʉnsoko nʉmʉkomelye nkolo mʉleke kʉmʉhita Itunda. 2 Antʉ akʉmʉzunsa ʉnyenye mʉnyʉmba niyakipoelya Ayahudi. Hangɨ, matungo apembilye nʉ mʉntʉ wɨhi anga wamʉbʉlaga ʉnyenye ʉkʉsɨga kɨna ʉkʉmitʉmila Itunda. 3 Akʉmʉtendeela makani nanso kʉnsoko shanga amʉlɨngile ʉ Tata, hangɨ shanga anɨngile ʉnene. 4 Itɨgwa, nʉmʉtambʉɨe makani aya ingɨ itungo anga lɨpike mʉkɨmbʉke kɨna aɨnamʉtambʉɨla.

"Shanga aɨnʉmʉtambʉɨe makani aya kandɨɨlya ʉng’wandyo kʉnsoko aɨkine nʉnyenye. 5 Ingɨ itungo ɨlɨ nalongola kʉng’wakwe naɨʉntʉmile, ingɨ kʉtilɨ mʉntʉ nʉkʉnkolya, ‘Ʉhongile pɨ?’ 6 Kʉnsoko namʉtambʉɨla makani naya, mahʉsha mʉnkolo yanyu. 7 Ingɨ, kʉmʉɨla ɨtai. Itakɨwe ʉnene nihege, kʉnsoko anga nihite kʉhega, Miaɨɨlyi ʉyʉ shanga ʉzile kʉng’wanyu. Ingɨ anga nihege, kʉmʉtʉma kʉng’wanyu. 8 Nʉyo anga waze ʉkʉakumʉɨla antʉ aʉnkumbigʉlʉ kʉ mɨlandʉ nʉ kʉgombeka kʉng’wi Itunda nʉ ʉlamʉlwi. 9 Atendile mɨlandʉ, kʉnsoko shanga anihʉɨɨe ʉnene, 10 Ng’wahʉ Ng’welʉ ʉkʉmʉlagɨɨla kɨna ʉnene nagombeka kʉng’wi Itunda, kʉnsoko nongoe kʉng’wa Tata, nʉnyenye shanga mʉkʉmona hangɨ. 11 Kʉ makani aʉlamʉlwa, kʉnsoko shetani, mʉkʉlʉ nʉwa ʉnkumbigʉlʉ ʉwʉ wakondilye kʉlamʉlwa.

12 "Nkɨlɨ nkete nkani yɨdʉ niyakʉmʉtambʉɨla, ingɨ itungo ɨlɨ shanga mʉhumile kʉgimya. 13 Ingɨ nʉʉzɨɨza ʉ Ng’wahʉ nʉwanso nʉwa tai ʉkʉmʉtongeela mʉtai ɨhi, nʉwanso shanga ʉkʉtambʉla kʉʉhumi akwe, ingɨ ʉkʉtambʉla ayo ɨhi nʉʉkija kʉpuma kʉng’waane, nʉyo ʉkʉalagɨɨla makani nakʉpumɨla panyambele. 14 Nʉwanso ʉkʉmpa inkʉlyo, kʉnsoko ʉkʉmʉpikɨlya ayo nɨkʉmʉɨla ʉnene. 15 Ɨhi nʉkete ʉ Tata wane ingɨ ane, yɨyo ndogoelyo nalʉnga kɨna Ng’wahʉ nʉwa tai ʉkʉmʉpikɨlya ayo nɨkʉmʉɨla ʉnene.

16 "Lɨkɨlɨ itungo iniino nʉ nyenye shanga mʉkʉmona, ingɨ anga lɨkɨle itungo iniino mʉkʉmona hangɨ!"

17 Papo amanyisigwa akwe nɨangwɨ ɨkɨkolya, "Ʉkete ndogoelyo kɨ nʉkʉlʉnga, ‘Lɨkɨlɨ itungo iniino nʉ nyenye shanga mʉkʉmona, ingɨ anga lɨkɨle itungo iniino mʉkʉmona hangɨ! Kʉnsoko nongoe kʉng’wa Tata?’ 18 Itɨgwa, ɨkalongoleka kikolya, "Ʉkete ndogoelyo kɨ Nʉkʉlʉnga, "Itungo iniino?’ Kahita kʉlɨnga ʉkʉtambʉla ntʉni."

19 Yesʉ wɨkalɨnga kɨna akʉhiya kʉmʉkolya, ʉʉgwa wɨkaaɨla, "Itɨɨ, mainikolya nkete ndogoelyo kɨ nɨntambʉe kɨna, ‘Lɨkɨlɨ itungo iniino nʉ nyenye shanga mʉkʉmona, ingɨ anga lɨkɨle itungo iniino mʉkʉmona hangɨ?’ 20 Kʉmʉɨla ɨtai, ʉnyenye mʉkʉlɨla nʉkʉhongeelya, ingɨ antʉ aʉnkumbigʉlʉ akʉlowa, mʉkʉhʉsha ingɨ ʉhʉshi wanyu ʉkʉpɨlʉka kʉtula ʉlowa. 21 Itungo mʉsʉngʉ nʉkitungʉɨla wɨhʉsha kʉnsoko itungo nɨla ʉwai lapika. Ingɨ anga wakondye kitungʉɨla ng’wana, wɨwaa lʉkʉlʉ ʉwai nʉwanso kʉnsoko aʉlowa nʉwa mʉntʉ watugwa mihɨɨ. 22 Itungo ɨlɨ ʉnyenye mʉhʉkilye, ingɨ ʉnene kʉmʉzɨɨla hangɨ, nʉnyenye mʉkiloa mʉnkolo yanyu, kʉtile anga mʉntʉ nʉkʉʉheja ʉlowa nʉwanso mʉng’wanyu.

23 Lʉhikʉ nʉlanso shanga mʉkʉnompa ʉnene kintʉ kɨhi. Kʉmʉɨla ɨtai, kɨntʉ kɨhi nɨmʉkʉmʉlompa ʉ Tata anga mʉndoewe, ʉkʉmʉpa. 24 Kʉpikɨɨla itungo ɨlɨ mʉkɨlɨ kʉlompa kɨntʉ kɨhi kʉʉhumi wane. Lompi nʉnyenye mʉkupegwa, ingɨ ʉlowa wanyu ʉkondanɨɨle.

25 "Nʉmʉɨe makani aya kɨʉng’enyeli. Ingi matungo apembilye nɨshanga kitambʉlya nʉ nyenye kɨʉng’enyeli hangɨ, ingɨ kʉtula mʉtambʉɨla nkani yang’wa Tata kɨhenga. 26 Lʉhikʉ nʉlanso mʉkʉlompa anga nɨmʉnihʉɨɨe, hangɨ shanga kʉmʉɨla kɨna kʉmʉlompa Tata kʉmɨmɨkɨɨla ʉnyenye, 27 kʉndogoelyo Tata ʉng’wenso ʉmʉloilwe ʉnyenye, nʉnyenye mʉndoilwe ʉnene hangɨ mʉhʉɨɨe kɨna mpumɨɨe kʉng’wi Itunda. 28 Ʉnene aɨmpumɨɨe kʉng’wa Tata, nɨkɨza mʉʉnkumbigʉlʉ nitungo ɨlɨ nakaʉleka ʉnkumbigʉlʉ nʉkʉtulya kʉng’wa Tata."

29 Sʉnga, amanyisigwa akwe ɨkamʉɨla, "Ʉʉgwa, Itungo ɨlɨ ʉkʉtambʉla kɨhenga lʉkʉlʉ waleka kɨʉng’enyi. 30 Itungo ɨlɨ kalɨnga kɨna ʉwewe ʉlɨngile makani ɨhi, wimʉgila anga nsoko akʉkoligwa makolyo nʉmʉntʉ wɨhi, kʉlʉlo kʉhʉɨɨe kɨna ʉpumɨɨe kʉng’wi Itunda."

31 Yesʉ wɨkaasʉkɨɨlya, "Itɨɨ, itungo ɨlɨ mahʉɨɨla ne? 32 Itungo lɨpembilye, hangɨ lapika, nʉ ʉnyenye mʉkʉbalansana mʉntʉ wɨhi ʉkʉlongola kito lakwe, nʉnene kʉlekwa ning’wene. Ingɨ ʉnene shanga ning’wene kʉnsoko Tata ʉkolɨ palʉng’wi nʉnene. 33 Nʉmʉtambʉɨe makani aya mʉhume kʉtula nɨmatiliga nɨmʉmolɨ mʉng’wane. Mʉʉnkumbigʉlʉ mʉkʉtula nʉ lwago, ingɨ komyi ɨnkolo, ndogoelyo ʉnene naʉlemilye ʉnkumbigʉlʉ."