1 Yesʉ naɨwakondya kʉtambʉla nkani niyanso, wɨkalangamɨla kilunde, wɨkalʉnga, "Tata, itungo lapika. Mʉkʉlye ʉ Ng’waako, nʉng’wenso ng’waako wahume kʉʉkʉlya. 2 Kʉnsoko ʉmʉpee ng’waako ʉhumi kʉantʉ ɨhi wahume kʉapeza ʉpanga nʉwa kalɨ na kalɨ ɨhi nɨanso naɨ ʉmʉpee. 3 Nʉʉpanga nʉwakalɨ na kalɨ ingɨ sʉwʉ. Kʉʉmanya ʉwewe Itunda nʉwatai nʉwing’wene, nʉkʉmʉmanya Yesʉ kilisito naɨ ʉmʉlagɨɨye. 4 Ʉnene nakʉkʉlya mʉnʉ mihɨɨ, nakondaɨɨlya kitʉma mʉlɨmo ʉwo naɨ ʉmpee nitʉme. 5 Ʉʉgwa Tata, itungo ɨlɨ ʉnkʉlye pa ntongeela ako, kikʉlyo ɨlo naɨnkete kʉpuma naɨ ɨkɨlɨ kʉtundwa ʉnkumbigʉlʉ.

6 "Naatambʉɨla ɨantʉ awo naɨ ʉmpee kʉpuma mʉʉnkumbigʉlʉ akʉlɨnga. Aɨza ako, wɨkampa ʉnene, nɨenso akee nkani yako. 7 Itungo ɨlɨ alɨnga kɨna intʉ yɨhi naɨʉndagɨɨye yɨpumɨɨe kʉng’wako. 8 Ʉnene naatambʉɨe makani ayo naɨʉndagɨɨye, nɨenso ansɨngɨɨye hangɨ alɨnga kɨna mpumɨɨe kʉng’wako, hangɨ ahʉɨɨe kɨna wewe aɨʉntʉmile. 9 "Kʉalompeela enso, shanga kʉalompeela anga antʉ aʉnkumbigʉlʉ, ingɨ kʉalompeela awo naɨʉmpee, kʉnsoko nɨanso ingɨ ako. 10 Antʉ ane ɨhi ingɨ ako, nɨantʉ ako ingɨ ane, nikʉlyo lane lakʉligwa mʉng’wao nʉmpee. 11 Nɨtungo ɨlɨ kʉhega mihɨɨ mpembilye kʉng’wako, ingɨ nɨanso akɨlɨ amolɨ mihɨɨ. Tata nʉwɨng’wene! Itʉnʉ kʉʉlompa asʉnje antʉ awa atule anga ʉewe nʉɨlɨ, hangɨ atule ɨpalʉng’wɨ anga ʉsese nɨkɨpalʉng’wɨ. 12 Naɨnkolɨ palʉng’wɨ nɨenso, ʉnene aɨnɨasʉnjilye atule anga ʉewe nʉɨlɨ. Kʉtilɨ anga nʉng’wɨ naʉlimɨe, kʉleka ʉyo naɨ ʉtakɨwe kʉlimansɨɨligwa, ingɨ ʉandɨkwa ʉkondanɨɨle. 13 Itɨgwa, itungo ɨlɨ napembya kʉg’wako, ʉnene aɨnɨatambʉɨe makani aya naɨnkɨlɨ nkolɨ mihɨɨ, ingɨ atule nʉʉlowa wane nʉʉkondanɨe mʉng’wao. 14 Ʉnene naapeza lʉkani lako, antʉ amihɨɨ abɨpɨlwa, kʉnsoko nɨanso shanga antʉ aʉnkumbigʉlʉ, anga ʉnene nɨshanga nɨaʉnkumbigʉlʉ. 15 Ʉnene shanga kʉlompa kɨna ʉaheje mihɨɨ, ingɨ kʉʉlompa ʉasʉnje ahege mʉ mʉlʉgʉ ʉyʉ. 16 Nɨanso shanga ihɨɨ ɨyɨ, anga ʉnene nɨshanga nɨamihɨɨ ɨyɨ. 17 Ʉatende atule ako kʉtai ɨyo, lʉkani lako ingɨ tai. 18 Anga naɨ ʉntʉmile ʉnene mihɨɨ, nʉnenega nɨatʉmile enso mihɨɨ. 19 Ʉnene nieilye kʉnsokoao, ingɨ nɨanso ahume kʉlija nsaɨlo kʉkɨɨla tai.

20 "Shanga kʉalompeela ɨenso ʉdu, ingɨ kʉalompeela nawo ɨhi nɨakʉhʉɨɨla kʉkɨɨla lʉkani lao. 21 Ingɨ kʉlompa ɨhi atule kɨntʉ kɨng’wɨ. Tata! Nompile atule kʉng’witʉ anga ʉewe nʉʉmolɨ mʉng’wane nʉnene mʉng’wako. Nɨenso atule mʉng’witʉ, ʉnkumbigʉlʉ ʉhume kʉhʉɨɨla kɨna wewe aɨʉntʉmile ʉnene. 22 Ʉkʉlʉ ʉwo naɨʉmpee ʉnene naapeza enso, ahume kʉtula kɨntʉ kɨng’wɨ anga ʉsese nɨkɨpalʉng’wɨ. 23 Ʉnene kishiɨ mʉng’wao, nʉewe ʉkishiɨ mʉng’wane, ingɨ akondanɨɨligwe kʉtula kɨntʉ kɨng’wɨ, antʉ aʉnkumbigʉlʉ ahume kʉlɨnge kɨna wewe aɨʉntʉmile ʉnene, hangɨ ʉaloilwe nɨanso anga nʉndoilwe ʉnene.

24 "Tata! Antʉ ɨhi nʉmpee ndoilwe atule ɨpalʉng’wɨ nʉnene apo nɨnkolɨ, ahume kʉona ʉkʉlʉ wane naɨʉmpee, kʉnsoko aɨʉndoilwe ʉnkumbigʉlʉ naɨʉkɨlɨ kʉtundwa. 25 Tata! Matungo ɨhi nʉwituma makani atai! Antʉ aʉnkumbigʉlʉ shanga akʉmanyile, ʉnene nʉkʉmanyile. Awa nɨenso alɨngile kɨna wewe aɨʉntʉmile. 26 Ʉnene nakʉkumʉsha mʉng’wao hangɨ kʉlongoleka kʉtendaʉʉ, ʉlowa nʉʉkete mʉng’wane ʉtule ʉkolɨ mʉng’wao, nʉnene ntule mʉng’wao."