1 Naɨlahʉmbeela iloelya nɨla Pasaka. Yesʉ aɨʉlɨngɨle kɨna itungo lakwe nɨlakʉhega mʉʉnkumbigʉlʉ nʉkʉlongola kʉng’wihe lapika. Mtungo ɨhi aɨʉalowa antʉ akwe nɨakolɨ mihɨɨ, hangɨ aɨʉaloilwe ikɨlo.

2 Itɨgwa, Yesʉ niamanyisigwa akwe naɨakʉlya ndya niya mpɨndɨ. Shetani aɨwamʉpembeselya ʉ Yʉda Isikalioti ng’wana wang’wa Simoni, wamʉsuɨpa Yesʉ. 3 Yesʉ wazeʉlɨngile kɨna Ihe ʉmʉpee maintʉ ɨhi, nɨkɨna ʉpembeeye kʉng’wi Itunda hangɨ ʉkʉtulya kʉng’wi Itunda. 4 Ʉʉgwa, wɨkahega paɨakʉlya, wɨkaɨka kʉmpelo itugalo lakwe nɨla migʉlya, wɨkipela ileza. 5 Sʉnga wɨkaɨkɨla mazɨ mʉlukulu, wɨkatula akalalya mɨgʉlʉ amanyisigwa akwe nʉkʉapyagʉla mɨgʉlʉao kileza nɨlanso naɨwɨtungile. 6 Sʉnga, wɨkamʉpikɨɨla ʉ Simon Petelo, Petelo wɨkalʉnga, "Isekʉlʉ, itɨɨ, ʉewe ʉkʉnkalalya nʉnene migʉlʉ?" 7 Yesʉ wɨkamʉsʉkɨɨlya, "Itungo ili shanga ʉlɨngile nʉʉkitʉma ingɨ ʉkʉlɨnga panyambele." 8 Petelo wɨkamʉɨla, "Itʉnʉ ʉewe shanga ʉkʉnkalalya ʉnene ɨmɨgʉlʉ." Yesʉ wɨkamʉsʉkɨɨlya, "Anga nihite kʉʉkalalya ʉewe migʉlʉ shanga ʉkʉtula wɨpalʉng’wɨ nʉnene hangɨ." 9 Papo Simon Petelo wɨkamʉɨla, "Isekʉlʉ, leka kʉnkalalya ɨmɨgʉlʉ du, ingɨ nkalalye nɨmɨkono nitwe ga." 10 Yesʉ wɨkamʉɨla, "Mʉntʉ nʉwogile shanga ʉtakɨwe koga hangɨ, ingɨ ʉtakɨwe kʉkalala ɨmigʉlʉ du, kʉnsoko mʉɨlɨ wakwe wɨhi waile welʉ. Ʉnyeye maile mɨelʉ, ingɨ shanga mɨhi." 11 Yesʉ aɨʉmʉlɨngile ʉyo nʉʉzemʉsuɨpa, yɨyo ndogoelyo wɨkalʉnga, "Ʉnyenye maile mɨelʉ, ingɨ shanga mɨhi." 12 Naɨwakondya kʉakalalya mɨgʉlʉ, wɨkatugala hangɨ itugalo lakwe, wɨkasʉka apo paʉlyi naɨwikiɨ, wɨkaakolya,"Itɨɨ, malɨngane nɨnɨmʉtendee? 13 Ʉnyenye mɨnintanga ʉnene ‘Mʉmanyisi’ hangɨ Isekʉlʉ, mɨtambʉla ɨtai kʉnsoko ʉnene ʉʉnɨlɨ. 14 Kʉlʉlo, angaitule ʉnene nɨni Isekʉlʉ hangɨ Mʉmanyisi wanyu nʉmʉkalaye ʉnyenye migʉlʉ, nʉnyenye ga mʉtakɨwe mikalalye mɨgʉlʉ ʉnyenye. 15 Ʉnene nʉmʉlagɨɨe ɨmpyani kɨna, mʉtakɨwe nʉnyenye ga mitʉme anga nɨnʉmʉtendee ʉnyenye. 16 Kʉmʉɨla ɨtai taai, mʉtugwa shanga mʉkʉlʉ kʉkila mʉgolɨ wakwe, nʉ mʉlagɨligwa watule mʉkʉlʉ kʉkila mʉlagɨɨlyi. 17 Itɨgwa, angaɨtule malɨnga makani aya, Itunda ʉkʉmʉkembeta ʉnyenye anga mitʉme.

18 "Ntambʉe aya kʉnsoko anyu mɨhi. Nɨalɨngile ɨhi awo naɨnɨahoile, Ingɨ ʉandɨkwa ʉhume kʉkondanɨɨla, ‘Ʉyo naɨʉlɨe ndya yane wampɨlʉkɨla wankʉange.’ 19 Ʉnene kʉmʉɨla makani aya nakɨlɨ kʉpumɨɨla, ingɨ anga apumɨle mʉhʉɨɨle kɨna ‘Yʉ Nene.’ 20 Kʉmʉɨla ɨtai taai, mʉntʉ wɨhi, nʉkʉmʉsɨngɨɨlya ʉyo ninʉmʉlagɨɨye, ʉkʉtula wansɨngɨɨlya ʉnene, nʉyo nʉkʉnsɨngɨlya ʉnene, wamʉsɨngɨɨlya ʉyo nʉndagɨɨye"

21 Yesʉ naɨwakondya kʉtambʉla nanso, wɨkahʉsha nangulu mʉnkolo akwe, wɨkalʉnga, Kʉmʉɨla ɨtai taai, "Ʉng’wɨanyu ʉkʉnsuɨpa." 22 Amanyisigwa akwe ɨkatula kigoza kʉnsoko shanga aɨalɨngile ʉkʉmʉtambula nyenyu. 23 Mʉmanyisigwa ʉng’wi, Yesʉ naɨɨza ʉmʉloilwe nangulu, aɨwikiɨ pakupɨ nʉ Yesʉ. 24 Itɨgwa, Simon Petelo wɨkamʉlagɨɨla namʉkono mʉmanyisigwa nʉwanso, "Mʉkolye nʉɨkamʉsuɨpa nyenyu." 25 Mʉmanyisigwa nʉwanso wazewiegamɨɨye mʉkɨkua kang’wa Yesʉ, wɨkʉmʉkolya, "Isekʉlʉ, kʉɨle nyenyu nʉkʉʉsuɨpa?" 26 Yesʉ wɨkasʉkɨɨlya, "Ingɨ ʉyʉ angandɨɨlye mʉnyenyi ntonge amʉkate nʉkʉmʉpa, yʉyogwa" Itɨgwa, wɨkalɨɨlya ɨntonge amʉkate mʉnyenyi, wɨkamʉpa Yʉda Isikoliote, ng’wana wang’wa Simon Isikalioti. 27 Yʉda naɨwaunzɨla ʉdu ɨntonge nanso, Shetani wɨkamingɨɨla. Yesʉ wɨkamʉɨla Yuda, "Pepala kitʉma ɨkɨ nʉkʉhiya kitʉma." 28 Awo ɨhi naɨikiɨ paʉlyi kʉtilɨ naɨʉlɨngile nɨkɨ Yesʉ ʉmʉɨɨe itɨ ʉ Yuda. 29 Kʉnsoko Yʉda aɨwɨambɨɨla kɨʉto ka mpia, niang’wɨ ɨkasɨga kɨna Yesʉ aɨʉmʉɨɨe Yʉda wende wagʉle maintʉ kʉnsoko iloeelya, ang’wɨ kʉnsoko akʉapa aʉla. 30 Papo ʉdu, Yʉda naɨ wakondya kʉunzɨla mʉkate nʉanso, wɨkipatɨɨlya kʉpuma kʉnzi. Itungo nɨlanso aɨyaina ʉtikʉ.

31 Yʉda naɨwahega, Yesʉ wɨkalʉnga, "Itungo ɨlɨ Ng’waa Mʉntʉ wakʉligwa, Itunda nʉng’wenso wakʉligwa mʉng’wakwe. 32 Angaitule ikʉlyo lang’wi Itunda lakunʉkʉlwa mʉ Ng’wana, itɨgwa, Itunda nʉyo ʉkʉmʉkʉlya ʉ Ng’wana wakwe, hangɨ ʉkʉkaya ʉkʉtenda itɨ. 33 Wɨkaaɨla "Ana ane, ʉnene nkɨlɨ nine nʉnyenye itungo ɨninoda. Mʉkʉtula kʉnduma anga naɨnɨatambʉɨe Ayahudi, ʉʉgwa kʉmʉɨla nʉnyenye. kʉnihongile ʉnene ʉnyenye shanga mʉzile. 34 Kʉmʉpa ilagɨɨlyo nipya, Milowe, anga ʉnene naɨ nʉmʉloilwe ʉnyenye, ʉʉgwa nʉnyenye milowe. 35 Anga milowe, antʉ ɨhi akʉlɨnga kɨna ʉnyenye mɨamanyisigwa ane."

36 Simon Petelo wɨkamʉkolya, "Isekʉlʉ, ʉhongile pɨ?" Yesʉ wɨkamʉsʉkɨɨlya, "Kʉnihongile shanga ʉhumile kʉntyata, ingɨ ʉzɨɨzantyata panyambele." 37 Petelo wɨkamʉkolya hangɨ, "Isekʉlʉ, nɨkɨ neng’we kʉʉtyata itungo ɨlɨ? Nihambile kʉsha kʉnsoko ako." 38 Yesʉ wɨkasʉkɨɨlya, "Itɨɨ, ʉewe wihambilene ɨtai taai kʉsha kʉnsoko ane? Kʉɨla ɨtai taai kɨna nsambalume nɨɨkɨlɨ kʉkʉnkʉla ʉkʉnɨhita kataatu."