1 Naɨakɨla mahikʉ abɨɨlɨ aɨʉkolɨ wɨnga kʉ Kana, kɨsalɨ ka Galilaya. Nʉnyinya wang’wa Yesʉ aɨʉkolɨ kʉko, 2 Yesʉ palʉng’wɨ nɨamanyisigwa akwe aɨanilwe kʉwɨnga. 3 Dibai naɨahila, Yesʉ wɨkaɨlwa nʉnyinya. "Ahiɨlwa dibai."

4 Sʉnga Yesʉ wɨkamʉsʉkɨɨlya, "Iya, nɨkɨ ʉkʉmbɨla makani nanso, matungo akitʉma mʉlɨmo wane ʉkɨlɨ kʉpika."

5 Papogwa ʉnyinya wang’wa Yesʉ wɨkaaɨla awo naɨ akitʉma, "Kɨhii nʉʉkʉmʉɨla, itʉmi.

6 Pang’wanso aɨyɨmolɨ nyʉngʉ mʉtandatʉ nɨya madebe ataano, aɨyiɨkilwe pang’wanso kʉnsoko antendo niya Ayahudi kielya. 7 Sunga Yesʉ wɨkaaɨla itʉmi nɨanso, "Izʉlyi mazɨ mʉnyʉngʉ nɨyanso." Nɨenso ɨkizʉlya. 8 Sʉnga Yesʉ wɨkaaɨla, "Tepi mʉmʉtaɨle mʉkʉlʉ nʉwawɨnga. Itʉmi nɨanso ɨkitʉma anga naza aɨwe nʉ Yesʉ. 9 Mʉkʉlʉ nʉwawɨnga naɨwalulya mazɨ nanso, mazɨ akaɨlɨka kʉtula dibai. Mʉkʉlʉ nʉwawɨnga shanga aɨʉlɨngile kʉapembeeye, ingɨ itʉmi awo aɨaineʉ. Mʉkʉlʉ nʉwa wɨnga wɨkamitanga mʉtɨzɨɨla nʉwa kigoha, 10 wɨkamʉɨla, "Antu ɨhi ɨtongelya hanza dibai nɨɨyeiza, anya wɨnga anga ang’we ikʉte, ʉʉgwa ɨleta ayo napee igaɨ. Ingɨ ʉewe waɨka ɨyɨ nɨkoee igaɨ kʉpikɨɨla ino!" 11 Aya ingɨ kɨlɨngasɨɨlyo kang’wandyo naɨʉtendile Yesʉ ʉko kʉ Kana, kɨsalɨ ka Galilaya, wɨkakumʉʉla ʉkʉlʉ wakwe, amanyisigwa akwe nɨenso ɨkamʉhʉɨɨla. 12 Naɨyakɨla nanso, Yesʉ palʉng’wɨ nʉ nyinya nɨ aluna akwe nɨ amanyisigwa akwe, ɨkahulumʉka kʉhonga kʉ Kapelinaumu ɨkikiɨ kʉng’wanso mahikʉ makeehʉ.

13 Lʉhikʉ nʉla Pasaka kʉ Ayahudi naɨahumbela, Yesʉ wɨkanankɨla kʉlongola kʉ Yelusalemu. 14 Panyʉmba ang’wi Itunda, wɨkaahanga antʉ akʉgʉlya ng’ombe ni nkolo ni nkʉnda, nɨakaɨla mpia aɨikiɨ mʉmeza yao. 15 Wɨkanonia mʉsheleti nʉwalʉdigi, wɨkaazunsa ɨhi mʉng’wanso panyʉmba ang’wi Itunda palʉng’wɨ nɨnkolo nɨng’ombe yao, wɨkapɨʉlanga nimeza ya akaɨla mpia nʉkʉhunʉlanga mpia yao. 16 Yesʉ wɨkaaɨla antʉ naɨakʉgʉlya nkʉnda pang’wanso, "Hejangi apaitɨ maintʉ aya, leki kʉmitendi nyʉmba ang’wa Tata wane ɨtule akʉsʉlʉjɨlya maintʉ. 17 Amanyisigwa akwe ɨkakɨmbʉka kɨna yandɨkilwe, "Ʉlowa wane nʉwa nyʉmba ako ʉkʉmbʉlaga."

18 Ayahudi ang’wɨ ɨkamʉkolya ʉ Yesʉ, "Ʉhumile kʉtenda kɨlɨngasɨɨlyo kɨ kʉlagɨɨla kɨna ʉewe ʉkete ʉhumi nʉwakʉtenda makani aya?" 19 Yesʉ wɨkaasʉkɨɨlya, "Mɨhambʉli nyʉmba ang’wi Itunda ɨyɨ, nʉnene kʉmɨzenga mʉmahikʉ ataatʉ." 20 Ayahudi ɨkamʉsʉkɨɨlya, "Nyʉmba ɨyɨ nang’wi Itunda ɨzengilwe kʉ myaka alʉbaini na mʉtandatʉ. Itɨɨ, Ʉewe ʉkʉzenga mahikʉ ataatʉ du?"

21 Nyʉmba ang’wi Itunda Yesʉ naɨʉkʉmɨtambʉla ɨngɨ mʉɨlɨ wakwe. 22 Naɨ wiʉkigwa, papo amanyisigwa akwe ɨkakɨmbʉka makani ayo Yesʉ naɨ wɨmatambʉla. Kʉlʉlo ɨkahʉɨɨla nɨɨza yandɨkilwe nɨ nkani izo Yesʉ naɨ wɨtambʉla.

23 Matungo Yesʉ naɨ ʉkolɨ kʉ Yelusalemu kiloeelya nɨla Pasaka, antʉ ɨdʉ ɨkamʉhʉɨɨla naɨaona ilɨngasɨɨlyo naɨ witʉmaa. 24 Ingɨ Yesʉ shanga aɨʉhʉɨɨe ʉhʉɨɨli wao kʉng’wakwe kʉnsoko aɨʉalɨngile nɨɨlɨ mʉnkolo yao. 25 Shanga aɨʉloilwe kʉganʉɨlwa makani amʉntʉ wɨhi, kʉnsoko ʉlɨngile yɨhi nɨya mʉnkolo yao.