1 Sʉnga Yesʉ wɨkalʉnga, "Ʉnene nɨmʉzabibʉ nʉwa tai, nʉ Tata wane ingɨ mʉlɨmi. 2 Itambɨ lɨhi nɨlɨkolɨ mʉng’waane nɨshanga lɨpaa nkali, Tata wane wɨlɨtema nʉkʉlɨheja, hangɨ itambɨ lɨhi nɨlɨpaa wɨlɨnoneelya lɨhume kʉpa ikɨlo. 3 Ʉnyenye maina mɨelʉ mʉnkolo kʉnsoko a ʉlʉkani ʉlo naɨnʉmʉmanyisilye. 4 Ishii mʉng’wane, anga ʉnene nɨnishiɨ mʉng’wanyu. Anga itambɨ nɨla mʉzabibʉ nɨshanga lɨkʉpa nkalɨ anga lɨhite kʉkamɨnkana nitina, ʉʉgwa nʉnyenye shanga mʉkitʉma ayo Itunda nʉmaloilwe anga ɨze shanga mishiɨ mʉng’wane. 5 Ʉnene nɨmuzabibʉ, ʉnyenye mɨntambɨ. Awo nɨishiɨ mʉng’wane, nʉnene mʉng’wao, nɨanso akitʉma makani ɨdʉ nʉmaloilwe Itunda, kʉnsoko ʉnene angantule nɨkʉtile mʉkʉlegwa kitʉma kɨntʉ kɨhi. 6 Mʉntʉ wɨhi anga wahite kishiɨ mʉng’wane wɨgʉng’wa kʉnzi anga itambɨ nɨlɨgʉng’wa kʉnzi sʉnga lɨkʉma. Antʉ ɨhola itambɨ nɨlaitɨ ɨkalɨgʉmɨla mʉmoto lɨpye. 7 Ʉnyenye anga mishiɨ mʉng’wane nɨnkani yane yishiɨ mʉng’wanyu, lompi kɨntʉ kɨhi nɨmʉloilwe nʉnyenye mʉkʉpegwa. 8 Kʉlʉlo Tata wane wɨkʉligwa, anga mitʉme makani ɨdʉ nʉmaloilwe Itunda, nʉnyenye mʉkʉtula mɨamanyisigwa ane. 9 Ʉnene nʉmʉloilwe ʉnyenye anga ʉ Tata nʉndoilwe ʉnene. Ʉʉgwa ishii mʉʉlowa wane. 10 Anga mʉkele malagɨɨlyo ane mʉkishiɨ mʉʉlowa wane, anga ʉnene nɨɨza nkee ɨmalagɨɨlyo ang’wa Tata wane nʉkishiɨ mʉʉlowa wakwe. 11 Nʉmʉtambʉɨe ɨnkani izi ingɨ mʉlowe anga ʉnene nɨniloile, nʉʉlowa wanyu ʉtule ʉkondanɨɨe. 12 Ilɨ lɨlɨ ilagɨɨlyo lane kɨna. Ilowi, anga ʉnene nɨnʉmʉloilwe ʉnyenye. 13 Kʉtilɨ mʉntʉ nʉkete ʉlowa nʉʉkʉlʉ kʉkɨlɨnkɨla ʉlowa nʉwa mʉntʉ kʉpumya ʉpanga wakwe kʉnsoko ahʉmbaʉya. 14 Ʉnyenye mɨahʉɨmba ɨane anga mitʉme nɨnʉmʉlagɨɨye. 15 Hangɨ shanga kʉmitanga ʉnyenye mɨitʉmi, ndogoelyo mitʉmi shanga ʉine ɨko mʉgolɨ wakwe nʉkitʉma. Ingɨ ʉnene nɨmitangile ʉnyenye ahʉmba ɨane, kʉnsoko namʉpikɨlya makani ɨhi nɨnigulye kʉpuma kʉng’wa Tata. 16 Ʉnyenye shanga nyenye aɨmʉnsagʉe ʉnene, ingɨ nene aɨnʉmʉsagʉe nʉkʉmʉlagɨɨlya mitʉme mɨlɨmo nʉmɨloilwe Itunda, mɨlɨmo nanso ikishiɨ mahikʉ ɨhi, ingɨ kɨntʉ kɨhi anga mʉmʉlompe ʉ Tata kʉlina lane, wamʉpe. 17 Kʉmʉpa ilagɨɨlyo lane. Milowe.

18 "Antu aʉnkʉmbigʉlʉ anga amʉbɨpɨlwe ʉnyenye, mʉlɨnge kɨna aɨambɨpɨwe hanza ʉnene. 19 Anga aza mʉtule mɨantʉ aʉnkumbigʉlʉ, antʉ aʉnkumbigʉlʉ aɨazemʉlowa ʉnyenye anga mɨantʉ akwe. Ingɨ kʉnsoko ʉnyenye shanga mɨaʉnkumbigʉlʉ, ʉnene nʉmʉhoile kʉpumɨɨla mʉʉnkumbigʉlʉ, yɨyɨ nsoko antʉ aʉnkumbigʉlʉ amʉbɨpɨwe. 20 Kɨmbʉki nkani izo naɨnʉmʉtambʉɨe kɨna, ‘Mitʉmi shanga mʉkʉlʉ kʉkɨla mʉgolɨ wakwe. angaɨze aɨanagilye ʉnene, akʉmaja nʉnyenyega, angaɨze aɨakee lʉkani lane, akʉkela ninkani yanyu ga. 21 Ingɨ akʉmʉtendeela makani nanso ɨhi kʉnsoko ʉnyenye mɨahemba ane, kʉndogoelyo shanga amʉlɨngile ʉyo nʉntʉmile. 22 Anga aɨnihite kʉza nʉkʉaɨla nkani yang’wi Itunda izeagila anga mɨlandʉ, ingɨ itungo ɨlɨ agila winegelo kɨna agila anga mɨlandʉ. 23 Antʉ ɨhi nʉmbɨpɨwe ʉnene ʉmʉbɨpɨwe nʉ Tata wane ga. 24 Anga ɨze shanga nɨtʉmile makani mʉng’wao niiza kikɨlɨ mʉntʉ mʉngɨɨza wɨhi nʉwitʉme, ɨzeagila anga igazo. Ingɨ itungo ɨlɨ amona ʉnene kitʉma makani aya ambɨpɨlwa ʉnene, nʉ Tata wane. 25 Yɨyo ndogoelyo ayo ʉkondanɨɨle ʉandɨkwa nʉandɨkilwe mʉ malagɨɨlyoao kɨna. ‘Ambɨpɨwe nakanda.’ 26 Ingɨ nʉzɨɨza Miaɨɨlyi ʉyʉ nɨnʉmʉlagɨɨye kʉng’wanyu kʉpuma kʉng’wa Tata, Miaɨɨlyi ʉyʉ nʉwa tai, nʉwanso ʉkʉmʉɨla ɨtai ane ɨhi. 27 Nʉnyenye ga mʉkʉaɨla antʉ aʉya inkani yane, kʉnsoko kaile kɨpalʉng’wɨ kʉpuma ʉng’wandyo.