1 Daʉ nɨnkʉlʉ lʉhikʉ la ng’wandyo nɨla wiki, kiti aɨkɨkɨlɨ kitumile, Malia kʉpuma kʉ Magidala aɨwendile pakɨbɨɨla, wɨkahanga igwe lɨmʉtile pa kɨbɨɨla. 2 Ʉʉgwa wɨkipatɨɨlya kɨza kʉng’wa Simon Petelo palʉng’wɨ nʉmʉmanyisigwa ʉyo Yesʉ naɨʉmʉloilwe, wakaze ʉmankile nʉkʉlʉnga, "Aʉheja ʉ mʉimba wang’wi Isekʉlʉ mʉkɨbɨɨla, hangɨ shanga kʉlɨngile kʉaɨkile mʉimba wakwe."

3 Petelo nʉmʉmanyisigwa ʉyo nʉmʉngɨza ɨkakaya kʉhega kʉloma kʉkɨbɨɨla. 4 Ɨhi mʉʉbɨlɨ wao aɨakʉmanka, ingɨ mʉmanyisigwa ʉyo nʉmʉngɨza aɨʉmankile nangulu kʉkɨla Petelo, wɨkatongela kʉpika pakibɨɨla. 5 Naiwapika wɨkatuna nʉkʉhʉngɨɨla mʉng’wanso mʉkɨbɨɨla, wɨkamɨona ɨshanda du ɨɨkilwe, ingɨ shanga aɨwingɨe. 6 Ʉʉgwa Simon Petelo wɨkapika, wɨkaze ʉmʉtyatɨe, wɨkatongolomoka mʉkʉbɨɨla wɨkamɨona ɨshanda du pang’wanso pihɨ, 7 Nʉmʉkako Yesʉ naɨ ʉtungilwe mitwe. Mʉkako nʉwanso aɨwipʉnyangie ʉdu kɨtemanʉwe nɨshanda. 8 Sʉnga mʉmanyisigwa ʉyo naɨʉtongee kʉpika pakɨbɨɨla nʉng’wenso wɨkingɨla mʉkɨbɨɨla, wɨkaona nʉkʉhʉɨɨla. 9 Kʉnsoko kʉpikɨɨla itungo nɨlanso aɨakɨlɨ kʉlɨnga ʉandɨkwa natanbʉe kina aɨitakɨwe ʉ Yesʉ wiʉke kʉpuma kʉashi. 10 Sʉnga amanyisigwa nɨanso ɨkatulya kito.

11 Ingɨ Malia nʉwakʉ Magidala aɨwɨmɨkile wɨzelɨla pakupɨ nɨkɨbɨɨla. Naɨ ʉkʉlɨla, wɨkatuna wɨkahʉngɨɨla mʉkɨbɨɨla, 12 nung’wenso wɨkaaona amalaɨka abɨɨlɨ atugae matugalo melʉ, ɨkie apo nʉmʉɨlɨ wang'wa Yesʉ naɨ ʉlalɨshigwe, ʉng’wi kitwe nʉmʉya kʉmɨgʉlʉ. 13 Ɨkamʉkolya, "Mʉsʉngʉ, ʉkʉlɨla ntʉni?"

Wɨkaaɨla, "Kʉlɨla kʉnsoko aʉheja ʉmʉɨlɨ wang’wi Isekʉlʉ wane hangɨ shanga mine nɨamʉɨkile"

14 Naɨ watambʉla nanso, wɨkikeya, wɨkamʉona Yesʉ wimɨkile, ingɨ shanga wɨkamʉlɨnga. 15 Yesʉ wɨkamʉkolya, "Mʉsʉngʉ, nɨkɨ ʉkʉlɨla? Ʉkʉmʉduma nyenyu?"

Malia, aɨʉsɨgile kɨna naza yɨkitambʉlya ingɨ mʉlindɨɨla kɨbuulya, kʉlʉlo wɨkamʉɨla, mʉkʉlʉ, angaɨtule wewe ʉmʉhegilye, itʉnʉ ndagɨɨle nʉʉmʉɨkile, nʉnene kʉmʉhola."

16 Yesʉ wɨkamʉɨla, "Malia!"

Papogwa ʉ Malia wɨkikeya, wɨkamʉɨla kʉntambʉ a Kiebulania, "Laboni" Ng’waao Mumanyisi.

17 Yesʉ wɨkamʉɨla, "Leka kʉmamba, ndogoelyo nkɨlɨ kʉluma kʉlongola kʉng’wa Tata. Ingɨ longola kʉaluna ane ʉatambʉɨle, ‘nongoe kʉng’wa Tata hangi Tata wanyu, kʉng’wi Itunda wane ni Itunda wanyu."

18 Kʉlʉlo Malia nʉwakʉ Magidala wɨkalongola wɨkaaganʉɨla amanyisigwa ang’wa Yesʉ wazelʉnga "Namʉona Isekʉlʉ!" sʉnga wɨkaaɨla kɨna Yesʉ aɨʉmʉtambʉɨe nanso.

19 Yɨkatula mpindi a lʉhikʉ lang’wandyo nʉlipolyo, Amanyisigwa akwe naɨakolɨ palʉng’wɨ, mɨlango aɨilugaɨwe kʉnsoko aɨaogopile atongeeli Ayahudi. Yesʉ wɨkaigeela, wɨkimɨka pakatɨao, wɨkalʉnga, "Mʉtule nɨ Matiliga" 20 Naiwakondya kʉtambʉla nanso, wɨkaalagɨla mɨkono akwe nʉlʉbalu lakwe. Amanyisigwa akwe ɨkiloa nangalu naɨamʉona Isekʉlʉ. 21 Yesʉ wɨkaaɨla hangɨ, "Mʉtule nɨmatiliga! Angaʉʉ Tata naɨʉntʉmile ʉnene, nʉneneʉʉ kʉmʉtʉma ʉnyenye." 22 Nʉng’wenso naɨwakondya kʉtambʉla itɨ, wɨkaapembela mɨhupo, wɨkaaɨla, "Sɨngɨɨlyi Ng’wahʉ Ng’welʉ. 23 Angamʉalekele antʉ ɨhi mɨlandʉ, antʉ nɨanso akʉlekelwa, hangɨ anga mʉhite kʉalekela mɨlandʉ, akʉsaga nɨmɨlandʉao."

24 Ingɨ ʉ Tomaso naɨwitangwa Disimasi, ingɨ, itʉtɨ, aɨʉmolɨ mʉao ikʉmi naabɨɨlɨ shanga aɨwɨkʉtile itungo Yesʉ nawaza. 25 Ʉʉgwa, amanyisigwaao nɨangɨza ɨkamʉɨla, "Kamʉona Isekʉlʉ." Ingɨ nʉwanso wɨkaaɨla,

"Anga nihite kʉona mʉmɨkono akwe makombo amɨsumali naɨ ʉkonontewe nʉkʉpalapatya mʉmakombo nanso, nʉmʉkono wane mʉlʉbalu lakwe, kwe shanga kʉhʉɨɨla"

26 Naɨyakɨla mahikʉ mʉnana, amanyisigwa akwe aɨakolɨ palʉng’wɨ hangɨ mʉnyʉmba nanso, Tomaso nʉyo aɨʉmolɨ. Yesʉ wɨkaza mɨlango aɨ ilugaɨwe, wɨkimɨka pakati ao, wɨkalʉnga, "Mʉtule nɨ matiliga" 27 Sʉnga wɨkamʉɨla ʉ Tomaso, "Leta shala kako apaitɨ hangɨ ʉmɨgoze mɨkono ane, goola mʉkono wako ʉpapatye mʉlʉbalu lane. Ʉleke kikankania, ingɨ hʉɨɨla ʉdu."

28 Tomaso wɨkamʉɨla, "Isekʉlʉ wane ni Itunda wane!".

29 Yesʉ wɨkamʉɨla, "Wahʉɨɨla kʉnsoko wamonane? Akʉkembetwa awo nɨakɨlɨ kʉmona, ingɨ ahʉɨɨe"

30 Yesʉ aɨwitʉmile ilɨngasɨɨlyo iʉya dʉ kʉamanyisigwa akwe, nɨshanga yandɨkilwe mʉmbugulu ɨyɨ. 31 Ingɨ aya andɨkilwe mʉhume kʉhʉɨɨla kɨna ʉ Yesʉ yʉyʉ Kilisito, Ng’wana wang’wi Itunda hangɨ kʉmʉhʉɨɨla ng’wenso mʉhume kʉlija ʉpanga nʉwa kalɨna kalɨ nʉʉmolɨ mʉng’wakwe.