1 Naɨyakɨla nanso, Yesʉ wɨkaigeela hangɨ amanyisigwa akwe kʉmpelo alʉzɨ nʉlʉkʉlʉ nʉla Tibelia. Aɨwigelekilye itɨ. 2 Simon Petelo nʉ Tomaso nʉwitangwa Disimasi, ingɨ itʉtɨ, nʉ Natanaeli mʉnya kʉ Kana akʉ Galilaya nɨ ana ang’wa Zebedayo nɨamanyisigwa aʉya abɨɨlɨ, ɨhi aɨakolɨ palʉng’wɨ. 3 Simon Petelo wɨkaaɨla aʉya, ʉnene naʉka nendebua nsamaki."

Nɨenso ɨkamʉɨla, "Kʉʉlongolania nʉewe." Ɨkapuma ɨkingɨla mibɨnɨ, ingɨ ʉtikʉ nʉwanso shanga ɨkapantɨka kɨntʉ kɨhi. 4 Naɨwakeleela, Yesʉ wɨkimɨka pampelo alʉzɨ, ingɨ amanyisigwa shanga ɨkamʉlɨnga kɨna aɨ Yesʉ. 5 Yesʉ wɨkaaila, "Ahʉmba ane, itɨɨ, mʉketene insamaki?

Ɨkamʉsʉkɨɨlya, "A! a! Shanga kʉligilye anga kɨntʉ"

6 Yesʉ wɨkaaɨla, "Gʉmɨli nyabu ipande nɨla kigoha nɨlibɨnɨ lanyu nʉnyenye mʉkʉpantɨka nsamaki." Nawo ɨkagʉmɨla nyabu ipande nɨlanso, ingi kolwa ɨkapantɨka nsamaki yɨdʉ tai ɨkaleng’wa kʉlutɨɨla ɨnyabu mibɨnɨ kʉnsoko aɨyizʉe nsamaki.

7 Itɨgwa mʉmanyisigwa ʉyo nʉ Yesʉ aɨʉmʉloilwe wɨkamʉɨla Petelo, "Halɨɨ! Ʉyʉ ingɨ Isekʉlʉ!" Simon Petelo naɨwija itɨ, wɨkitunga itugalo lakwe kʉnsoko aɨwɨkɨpwɨ, nʉyo wɨkigʉmila mʉmazɨ. 8 Ingɨ amanyisigwa awo nɨangɨza naɨ akolɨ pakupɨ kitʉmbɨ, anga mita igana lɨng’wɨ, ɨkɨza pibɨnɨ nɨlanso kʉnʉ ɨkaluta inyabu niizʉe nsamaki, shanga aɨkʉlɨ nʉkʉpuma mʉlʉzɨ. 9 Naɨ apuma kitʉmbɨ ɨkaona mʉkala wakɨigwe, nɨmigʉlya akwe nsamaki iasilwe nʉ mʉkate. 10 Yesʉ wɨkaaɨla, "Leti apaitɨ nsamaki nkeehʉ nɨmʉbuile."

11 Kʉlʉlo ʉ Simon Petelo wɨkanankɨla mibɨnɨ, wɨkamɨluta nyabu nanso nizʉe nsamaki ninkʉlʉ, wɨkamɨpumya kitʉmbɨ, aɨipikɨɨe nsamaki igana lɨng’wɨ nimakʉmi ataano naitaatʉ. Palʉngwi nɨ kɨna nsamaki aɨyɨdʉ itɨ, nyabu shanga aɨɨtamʉkile. 12 Yesʉ wɨkaaɨla, "Pembyi mʉtikole." Ingɨ kʉtile anga mʉntʉ wɨhi naɨʉgemile kʉmʉkolya, "Winyenyu ʉewe?" kʉnsoko aɨalɨnga kɨna ingɨ Isekʉlʉ. 13 Yesʉ wɨkalongola wɨkahola mʉkate nʉwanso, wɨkaapa, hangɨ wɨkatendaʉʉ nɨ nsamaki niiasile.

14 Iyɨ aɨnkʉa akataatʉ ʉ Yesʉ kigeeleka kʉamanyisigwa akwe kʉpuma naɨ kʉpuma kʉ wiʉka.

15 Naɨ akondya kʉlya, Yesʉ wɨkamʉkolya ʉ Simon Petelo, "Simon ngw’ana wang’wa Yohana, Itɨɨ, ʉndoilwe ʉnene kʉkɨla awa?" Nʉyo wɨkasʉkɨɨlya,

"Ee, Isekʉlʉ, ʉewe ʉlɨngile kɨna nʉkʉloilwe." Yesʉ wɨkamʉɨla, "Lɨsa ɨanankolo ane." 16 Yesʉ wɨkamʉɨla hangɨ, "Simon ng’wana wang’wa Yohana, ʉndoilwene?"

Petelo wɨkamʉsʉkɨɨlya, "Ee, Isekʉlʉ, ʉewe ʉlɨngile kɨna nʉkʉloilwe."

Yesʉ wɨkamʉɨla, "Isʉnje inkolo yane." 17 Yesʉ wɨkamʉkolya nkʉa a akataatʉ Petelo, "Simon ng’wana wang’wa Yohana, Itɨɨ, ʉndoilwene ʉnene?"

Petelo wɨkahʉsha nangalu kʉnsoko Yesʉ ʉmʉkoiye nkʉa akataatʉ, "Ʉndoilwene?" Wɨkamʉɨla, "Isekʉlʉ, ʉewe ʉlɨngile ɨhi, ʉlɨngile kɨna nʉkʉloilwe."

Yesʉ wɨkamʉɨla, "Lɨsa inkolo yane. 18 Kʉʉtambʉɨla ɨtai, naɨʉkɨlɨ wɨmʉhʉmba aɨwitunga ʉewe nʉkʉlongola pɨhi nʉʉloilwe. Ingɨ anga ʉnyampaale ʉkʉgoola mɨkono ako, nʉ mʉntʉ mʉngɨɨza ʉkʉʉtugalya nʉkʉʉtala kʉshanga ʉloilwe kʉlongola." 19 Yesʉ aɨʉtambʉe aya kʉlagɨɨla nsha nʉʉzɨzashɨla ʉ Petelo ingɨ kʉmʉpa Itunda ʉkʉlʉ. Sʉnga Yesʉ wɨkamʉɨla ʉ Petelo, "Ntyate!"

20 Petelo wɨkapɨlʉka, wɨkamʉona mʉmanyisigwa ʉyo Yesʉ naɨ ʉmʉanzile ʉatyatile. Mʉmanyisigwa ʉyʉ, yʉyʉ naɨwiegekeeye mʉkɨkua kang’wa Yesʉ aɨakʉlya indya izo niya mpɨndɨ niya Pasaka, aɨwikiɨ pakupɨ nʉ Yesʉ nʉkʉmʉkolya, "Isekʉlʉ, nyanyu nʉzɨza kʉsuɨpa?" 21 Petelo naɨ wamʉona mʉmanyisigwa nʉwanso, wɨkamʉkolya ʉ Yesʉ, "Isekʉlʉ ikani kɨɨ nɨlɨkʉmʉhanga ʉyʉ?

22 Yesʉ wɨkasʉkɨɨlya, "Anga ize ndoilwe mʉntʉ ʉyʉ wasige kʉnzɨzɨɨla, ʉtakile ntʉni? Ʉewe ntyate."

23 Itɨgwa mpola izi yɨkenela kʉahɨɨli aʉya kɨna mʉmanyisigwa ʉyʉ shanga ʉkʉsha. Ingɨ Yesʉ shanga aɨʉtambʉe kɨna shanga ʉkʉsha. Nʉwanso aɨʉlʉngile ʉdʉ kɨna, "Anga ize ndoilwe wasige kʉnzɨzɨɨla, ʉtakile ntʉni?" Ʉewe ntyate."

24 Ʉyʉ yʉyʉ mʉmanyisigwa ʉyo naɨwiloee makani aya hangɨ ng’wenso nʉandɨkile nkani izi. Nʉsese kʉlɨngile kɨna nʉtambʉe ingɨ ɨtai.

25 Ingɨ amolɨ makani maʉya ɨdʉ ʉ Yesʉ naɨ witʉmile. Anga aɨaandɨkwe ɨhi, nsɨgɨɨe ʉnkumbigʉlʉ wɨhi shanga aɨʉzeekondela kʉkenka mbugulu yɨhi niyandɨkwe. Tai.