1 Ʉadɨ Mʉkʉlʉ Teopilo,

Mʉmbugulu ane naɨntongee kʉʉandɨkɨla aɨnʉkʉandɨkɨe makani ɨhi ʉ Yesʉ naɨ ʉmanyisilye nʉ kʉtenda kʉpumɨɨla ʉ wandɨɨlyo nʉa mʉlɨmo wakwe, 2 kʉpikɨɨla lʉhikʉ ʉlo naɨ ʉhoilwe kilunde. Naɨ wakɨlɨ kʉholwa kilunde ʉ Yesʉ aɨʉalagɨɨye makani akitʉma kʉkɨɨla Ng'wahʉ Ng'welʉ itʉmi akwe awo naɨʉahoile. 3 Mahikʉ makʉmi annɨ kʉpuma naɨ wiʉkile, aɨʉkenda agendeela waze akomya nkolo kɨna waina mʉpanga hangɨ. Aɨakenda mʉona kɨhenga nʉyo wazeatambʉɨla makani a Ʉtemi wang'wi Itunda. 4 Itungo lɨng'wɨ naɨatankanile palʉng'wɨ aɨʉalagɨɨye kɨna, "Mʉleke kʉhega mʉ Yelusalemu, mʉlindɨɨle kɨpengwa ɨko naɨmʉnigulye kʉmʉɨla kɨna ʉ Tata wane ʉkʉmʉpa. 5 Yohana Mʉbadisi aɨwɨbadisɨlya mazɨ, mahikʉ makeehʉ napembilye ʉnyenye mʉkʉbadisigwa kʉ Ng'wahʉ Ng'welʉ."

6 Sʉnga Itʉmi naɨikiɨ palʉng'wɨ nʉ Yesʉ ɨkamʉkolya, "Isekʉlʉ, itungo lɨlone nʉʉkʉasʉkɨɨlya Aisilaeli ʉ ʉtemi?"

7 Ingɨ Yesʉ wɨkaaɨla, "Tata du nʉlɨngile, mahikʉ nɨ matungo akʉtula nalɨ, shanga mʉlɨmo wanyu kʉlɨnga, nanso ʉmaɨkile mʉhumi wakwe. 8 Ingɨ mʉkʉsɨngɨɨlya ʉhumi anga wamʉzɨɨle ʉ Ng'wahʉ Ng'welʉ, nʉ nyenye mʉkʉtula mɨakʉɨɨli ane kʉ Yelusalemu, mihɨɨ ɨhi na Yʉdea nɨ Samalia nʉ ʉnkumbigʉlʉ wɨhi." 9 Naɨ wakondya kʉtambʉla nianso, ɨhi akaze amʉgozee, Yesʉ wɨkaholwa migʉlya ilunde lɨkamʉsɨngɨɨlya nʉkʉmʉpiha shanga ɨkamʉona hangɨ.

10 Naɨ akɨlɨ agozee kilunde, Yesʉ naɨ ʉlongoe, kolwa itʉnja abɨɨlɨ atugae ngʉo melʉ pee ɨkimɨka pakupɨ nɨenso, 11 ɨkalʉnga, "Ʉnyenye antʉ akʉ Galilaya, haɨ ka mimɨkile mʉgozee kigʉlʉ? Yesʉ ʉyʉ nɨmʉmʉine ʉhoilwe kʉpuma kʉng'waanyu, nɨmʉine ʉlongoe kigʉlʉ ʉ ʉzɨɨza tulya."

12 Sʉnga Itʉmi nɨanso ɨkatulya kʉ Yelusalemu kʉpuma mʉlʉgʉlʉ nʉla Mɨzeitʉni, lʉgʉlʉ naɨ lʉkolɨ pakupɨ nɨ Yelusalemu, anga lʉgendo la kilomɨta ɨng'wɨ itɨ kʉpuma mʉ kɨsalɨ nɨkanso. 13 Naɨingɨla mʉ kɨsalɨ, ɨkanankɨla mʉgolopwa mʉnɨndo kishiɨ. Itʉmi nɨanso ingɨ a Petelo nʉ Yohana nʉ Yakobo nʉ Andelea nʉ Pilipo nʉ Tomaso nʉ Batilimayo nʉ Matayo nʉ Yakobo ng'wana wang'wa Alipayo nʉ Simoni Zelote nʉwɨmɨkʉɨɨla ihɨɨ akwe nʉ Yʉda ng'wana wang'wa Yakobo. 14 Awa ɨhi aɨalongolekile mʉmalompi a palʉng'wɨ, mʉasʉngʉ, aɨʉkolɨ Maliamu nyinya wang'wa Yesʉ nɨasʉngʉ ang'wɨ, nɨ aheu ang'wa Yesʉ.

15 Lʉhikʉ lʉng'wɨ mʉ mahikʉ nanso ahʉɨɨli ang'wa Yesʉ naɨ ilʉndɨɨe azelompa, antʉ nɨanso aɨatuile anga igana lɨng'wɨ nɨ makʉmi abɨɨlɨ, Petelo naɨʉng'wɨ mʉ ahʉɨɨli wɨkimɨka pakatɨ a anyandʉgʉ nɨamʉhʉɨɨe ʉ Yesʉ, wɨkalʉnga, 16 "Anyandʉgʉ ane, Ʉandɨkwa nʉ Ʉza aza ʉtakɨwe ʉpikɨɨle, anga ʉ Ng'wahʉ Ng'welʉ naɨʉtambʉe kʉkɨɨla Daudi, kɨna ʉ Yʉda yʉyo aɨʉatongee antʉ awo naɨ amʉambile ʉ Yesʉ. 17 Yʉda aɨmɨitʉ, kʉnsoko aɨʉhoilwe nʉ Yesʉ watule mɨitʉ mʉ mʉlɨmo ʉwʉ."

18 Yʉda aɨʉgʉile mʉgʉnda kʉ mpia izo nimbɨ, naɨ ʉkolɨ kʉng'wanso kʉ mʉgʉnda wɨkagwa pihɨ, wɨkatumbʉka, nɨmala akwe ɨhi ɨkapumɨla kʉnzi. 19 Ikani ɨlɨ lɨkakumʉka kʉantʉ ɨhi nɨishiɨ mʉ Yelusalemu, mʉgʉnda nʉanso ʉkitangwa kʉ kɨnyitolao, "AkelDama," ndogoelyo ake, "Mʉgʉnda nʉwa sakami."

20 Petelo wɨkalʉnga "Itɨ gwa, yandɨkilwe mʉ mbugulu a Zabuli.

‘Nyʉmba akwe ɨtule makumʉʉlʉ,

mʉntʉ wɨhi nʉaleke kishiɨ mʉng'wanso.’

Nɨ hangɨ yandɨkilwe.

‘Mʉntʉ mʉngɨɨza nʉasopele pa lyoma lakwe.’

21 Kʉlʉlo, waholwe mʉntʉ ʉng'wɨ wihanje nʉsese, kʉpumɨɨla mʉantʉ awo naɨkɨkʉɨlania matungo ɨhi Isekʉlʉ ʉ Yesʉ naɨ kɨpalʉng'wɨ,

22 kʉpuma lʉhikʉ ʉlo Yohana naɨ ʉmʉbadisilye ʉ Yesʉ, kʉpikɨɨla lʉhikʉ ʉlo Yesʉ naɨʉhoilwe kʉlongoligwa kilunde. Mʉntʉ ʉyʉ ʉkutula mʉkʉɨɨli kʉtanantya wiʉki wang'wa Yesʉ."

23 Papo gwa, ɨkaata itunja abɨɨlɨ, nʉa ng'wandyo Yusupu nʉitangwaa Balisaba ang'wɨ Yusito, nʉa kabɨɨlɨ Matia. 24 Sʉnga ɨkamʉlompa Itunda, "Isekʉlʉ, ʉewe ʉalɨngile nkolo niya antʉ awa ɨhi. Itɨ gwa, ʉkʉlagɨɨle nʉʉlɨ mʉantʉ awa nɨ abɨɨlɨ nʉmʉhoile 25 wahume kʉsopela pa mʉlɨmo nʉʉlekilwe nʉ Yʉda nʉendile kʉine ng'wenso." 26 Ɨkakʉa bʉnkʉlʉ bʉnkʉlʉ, wɨkaholwa Matia, yʉyo wɨkongeeligwa mʉ itʉmi awo ni ikʉmi na ʉng'wɨ.