1 Petelo nʉ Yohana naɨ alongolekile kʉatanantɨlya ɨantʉ, apolyi nʉ mʉkʉlʉ nʉwa amboi a Nyʉmba ang'wɨ Itunda palʉng'wɨ nɨ Asadukayo ɨkaahanga. 2 Aɨatakile kʉnsoko itʉmi awa aɨakʉamanyisa antʉ nʉkʉatanantɨlya kɨna ʉ Yesʉ aɨwiʉkile, ikani nɨlɨkumʉʉe kɨna mʉng'wa Yesʉ ashi akiʉkigwa. 3 Kʉɨtɨ gwa, ɨkaamba a Petelo nʉ Yohana kʉnsoko ʉtikʉ aɨwila ɨkaalugaɨla mʉkadulumu, ɨkaɨka antʉ aasʉnje kʉpikɨɨla mʉdaʉao. 4 Ingɨ antʉ ɨdʉ mʉawo naɨatageeye lʉkani naɨatanatilye a Petelo nʉ Yohana ɨkahʉɨɨla, itʉnja ʉdu naɨ ahʉɨɨe aɨanga elupu itaano.

5 Naɨwela mʉdaʉao, atongeeli a Ayahudi nɨ anyampala nɨ amanyisi a malagɨɨlyo ang'wa Musa ɨkilʉnda palʉng'wɨ ʉko kʉ Yelusalemu. 6 Mianza nɨlanso aɨʉkolɨ mʉpolyi nʉ mʉkʉlʉ ʉ Anasi nʉ Kayapwa nʉ Yohana nʉ Alekisanda nɨ antʉ aʉya nɨa ndʉgʉ a Mʉpolyi nʉ mʉkʉlʉ. 7 Ɨkaimɨsha a Petelo nʉ Yohana pa ntongeela ianza, ɨkaakolya, "Ʉnyenye mʉkitʉma ikani ɨlɨ kʉ ʉhumi kɨɨ ang'wɨ kʉ ʉhumi wang'wa nyenyu?"

8 Papo, Petelo, kʉ ngulu niya Ng'wahʉ Ng'welʉ, wɨkaaɨla, "Atongeeli nɨ anyampala a antʉ! 9 Anga mʉkʉʉkolya lelo ikani ɨlo nʉtendeewe kɨtele ʉyʉ nɨ itɨ nʉahuma kʉkomigwa, 10 itɨ gwa, ʉnyenye nɨ Aisilaeli mɨhi mʉtakɨwe mʉlɨnge kɨna, mʉntʉ ʉyʉ wimɨkile mʉpanga pa ntongeela anyu lelo, kʉ ʉhumi nʉwa lina lang'wa Yesʉ Kilisito ʉnyenye naɨ mʉmʉkomile mʉ mʉsalaba, Itunda ingɨ wɨkamiʉsha. 11 esʉ ʉyʉ yʉyo Ʉandɨkwa nʉ Ʉza nʉʉandɨlile kɨna,

‘Igwe ɨlo nɨmʉlɨhitile ʉnyenye azengi,

Itungo ɨlɨ laina Igwe ikʉlʉ nɨlakandɨɨlya kʉzengela nyʉmba.’

12 Yesʉ du yʉyo ʉhumile kʉaguna ɨantʉ, kʉnsoko mʉnʉ mihɨɨ kʉtilɨ lina nɨkʉpewe nɨlɨhumile kʉʉguna."

13 Anyampala awo nɨianza, naɨ aʉona ʉʉkamatɨkʉ nʉwa a Petelo nʉ Yohana nʉkʉlɨnga kɨna shanga asomile hangɨ agila ʉlɨngi wɨhi ɨkakʉɨlwa nangalʉʉ. Ɨkalɨnga kɨna a Petelo nʉ Yohana ɨpalʉng'wɨ nʉ Yesʉ. 14 Ingɨ naɨ aona kɨna kɨtele nʉkomilye wimɨkile palʉng'wɨ nɨa Petelo nʉ Yohana, ɨkaleng'wa kikʉngʉmya kɨntʉ kɨhi. 15 Itɨgwa, anyampala ɨka azunsa a Petelo nʉ Yohana ahege pianza, nɨanso ɨkasaga itegete. 16 Anyampala ianza ɨkikolya, "Kʉatande ʉlɨ antʉ awa? Mʉntʉ wɨhi nʉishiɨ mʉ Yelusalemu walɨngaa kɨna ipɨlʉ ɨlɨ litʉng'waa, ʉsese kʉʉleng'wa kikʉngʉmya. 17 Ingɨ anga kʉhie kʉgilya ikani ɨlɨ lɨleke kenela mʉ antʉ, kʉakanie aleke kitambʉlya nʉ mʉntʉ wɨhi kʉlina lang'wa Yesʉ."

18 Kʉlʉlo akʉlʉ nɨanyampala ɨkaitanga a Petelo nʉ Yohana ingɨle mianza, ɨkaakania aleke kitambʉlya nɨ antʉ mʉ welela, ang'wɨ kʉlongoleke kʉmanyisa kʉlina lang'wa Yesʉ. 19 Ingɨ a Petelo nʉ Yohana ɨkaasʉkɨɨlya, "Lamʉli nyenye ntongeela ang'wi Itunda, anga ɨzetai kʉmʉtegeelya ʉnyenyene ang'wɨ kʉmʉtegeelya Itunda. 20 Ingɨ ʉsese shanga kʉhumile kʉleka kʉtambʉla ɨmakani ayo naɨkigulye nʉ kʉmaona." 21 Itɨgwa, anyampala awa nɨianza ɨkaakania kʉ ʉtaki, sʉnga ɨkaaleka alongole. Ɨkaleng'wa kʉapɨsɨɨlya kʉnsoko antʉ ɨhi aɨaina mʉkʉlya Itunda kʉnsoko ikani nɨlanso. 22 Mʉntʉ ʉyʉ naɨ ʉkomigwe aɨwilika nɨlɨkɨile myaka makʉmi annɨ.

23 Papo paapo naɨalekelwa ʉdu, Petelo nʉ Yohana ɨkaasʉkɨla ɨaʉya, ɨkaaganʉɨla nkani naiatambʉɨwe nɨapolyi nɨakʉlʉ nɨanyampala. 24 Antʉ awa naɨija ʉdu impola niyanso ɨhɨ palʉng'wɨ ɨkitʉnta ɨzemʉlompa Itunda, ɨzelʉnga, "Ʉewe Isekʉlʉ, wɨmʉtundi igʉlʉ ni ihɨɨ nʉ lʉzɨ naya ɨhi namolɨ! 25 Ʉewe aɨʉmʉɨkile mitʉmi nʉwako, gʉkʉ witʉ ʉ Daudi, watambʉle kʉ ʉhʉmi nʉwa Ng'wahʉ Ng'welʉ,

‘Kʉnɨkɨ anyaɨngʉ akiaja?

Antʉ ka akitʉma masɨgo a nakanda?

26 Atemi a mihɨɨ ihambile,

nɨ atemi ɨkatankana palʉng'wɨ,

kigidɨɨla ni Isekʉlʉ nʉ kigidɨɨla nʉ Kilisito wakwe.’

27 "Kʉlʉ kʉʉlʉ Helode nʉ Pontio Pilato palʉng'wɨ nɨ ndʉgʉ Aisilaeli nɨ antʉ nɨshanga Ayahudi atankanɨe pa kɨsalɨ ɨkɨ, kʉ mikʉngʉmya mitʉmi nʉwako Yesʉ naɨ ʉhoilwe watule Kilisito. 28 Itʉmi aɨatankanile ahume kʉtenda makani ayo naɨ ʉsɨgile nʉkʉnoneelya kʉpuma ng'wandyo apumɨle kʉ ʉhumi nʉ ʉlowa nʉ wako. 29 Itungo ɨlɨ ingɨ, ʉewe Isekʉlʉ, kolwa nɨakʉʉtʉmba. Kʉʉkʉlompa ʉkʉmhʉmye ʉsese atʉʉng'wa ako kʉtanantye lʉkani lako kʉ ʉkamatɨku ʉkʉlʉ. 30 Lagɨɨlya ʉʉhumi wako ʉakomye alwae. Itʉme ilɨngasɨɨlyo nɨ mɨʉkʉɨlwa kʉ lina lang'wa Yesʉ Mitʉmi wako nɨ Ng'welʉ."

31 Naɨ akondya kʉlompa, kɨanda ɨko naɨ ilʉndɨɨe kɨkahingɨsigwa, ɨhi pang'wanso akizʉligwa Ng'wahʉ Ng'welʉ. Ɨhi ɨkatula tanantya ʉlʉkani lang'wi Itunda kʉ ʉkamatɨku.

32 Antʉ ɨhi naɨ ahʉʉɨe ɨkatula palʉng'wɨ nʉkitʉma makani ɨhi kʉnkolo ɨng'wɨ. Aɨkʉtɨlɨ mʉntʉ wɨhi naɨ ʉkete kɨntʉ kɨhi wɨkakɨɨka kɨtule nsao akwe wɨng'wene, ingɨ maintʉ ɨhi naɨ akete ɨkatula a mʉhangʉ. 33 Itʉmi aɨatambʉɨe ɨantʉ nkani nɨya wɨʉki wang'wɨ Isekʉlʉ Yesʉ, ngulu nʉ ʉkende wang'wi Itunda wɨkatula mʉng'waao. 34 Kʉtɨlɨ anga mʉntʉ wɨhi naɨ ʉkepewe kɨntʉ, kʉnsoko awo naɨ akete mɨgʉnda ang'wɨ nyʉmba aɨagʉiye nʉ kʉleta 35 ɨkʉtala mpia nianso kʉ itʉmi, itʉmi nawo ɨkaomolania ɨantʉ anga mʉʉhiɨlwa wakwe.

36 Pang'wanso aɨʉkolɨ mʉntʉ ʉng'wɨ nʉwa ndʉgʉ a Alawi, ʉtugɨwe kʉ Kʉpolo, lina lakwe Yusupu, itʉmi aɨɨmitanga Balinaba, ʉng'waao "Mʉntʉ nʉɨkomelania nkolo." 37 Nʉng'wenso ga aɨʉkete mʉgʉnda wɨkagʉlya, mpia nɨanso naɨ ʉpatile wɨkaapa itʉmi.