1 Naɨakɨla makani aya, Paʉlo wɨkahega kʉ Atene wɨkalongola kʉ Kolinto. 2 Kʉng'wanso kʉ Kolinto wɨkatankana nʉ Mʉyahudi ʉng'wɨ witangwa Akila, mʉnya kʉ Ponto, itungo ikupɨ aɨapikile nʉ mʉkimakwe Pilisila kʉpuma ihɨɨ kʉ Italia, kʉnsoko mʉtemi Kilaudio aɨʉlagɨɨye Ayahudi ɨhi ahege kʉ kɨsalɨ ka Lumi. Paʉlo wɨkalongola kʉaona itambʉlye, 3 itɨ gwa Paʉlo wɨkikiɨ palʉng'wɨ nɨenso kitʉmania mʉlɨmo, kʉnsoko ʉ Paʉlo aɨmʉtuma mahema anga ɨenso. 4 Mahikʉ ɨhi aya nakʉsupya Ayahudi yɨhi Paʉlo aɨwitambʉlya nɨ Ayahudi nɨ Ayunani wazegema kʉapepeelya amʉhʉɨɨle ʉ Yesʉ.

5 Sila nʉ Timotheo naɨapika kʉpuma kʉ Makedonia, ɨkamʉhanga ʉ Paʉlo azewipumilye matungo ɨhi kʉtanantya, wazeatambʉɨla ɨtai ɨ Ayahudi kɨna Yesʉ yʉyo Kilisito. 6 Ayahudi naɨ amikʉngʉmya ʉ Paʉlo nʉ kʉmʉsensa, wɨkakununta lʉnkʉndɨ ngʉo akwe kʉahʉgʉlya kɨna watemanʉka nɨenso, wɨkaaɨla, "Anga mʉlimɨle mʉkʉona hapo! Ʉnene nɨmʉgila anga kinkwaatya, naʉkondya ʉmʉlɨmo wane. Kandɨɨlya ino nakaahanga antʉ nɨshanga Ayahudi." 7 Sʉnga wɨkahega mʉnyʉmba akʉtankanɨla Ayahudi, wɨkalongola mʉnyʉmba amʉntʉ ʉng'wɨ witangwa Tito Yusito, aɨwɨmʉkʉlya Itunda. Nyʉmba akwe aɨkɨsalɨ ni nyumba akʉtankanɨla Ayahudi. 8 Mʉtongeeli nʉwa nyʉmba nanso nakʉtankanɨla Ayahudi, aɨwitangwa Kilisipo, mʉtongeeli ʉyʉ wɨkamʉhʉɨɨla Isekʉlʉ palʉng'wɨ niantʉ amitolakwe, Akolinto ɨdʉ naɨamʉtegeeye ʉ Paʉlo ɨkahʉɨɨla nʉkʉbadisigwa.

9 Lʉhikʉ lʉng'wi ʉtikʉ Isekʉlʉ wɨkamʉtambʉlya ʉ Paʉlo mʉ mɨloto kɨna, "Leka kogopa, longoleka kʉtanantya Nkani Nza hangɨ leka kʉkatapa, 10 kʉnsoko ʉnene nkolɨ palʉng'wɨ nʉewe. Kʉtilɨ anga mʉntʉ wɨhi nʉkʉʉkʉa wakʉlemaalye, kʉnsoko mʉkɨsalɨ ɨkɨ akolɨ antʉ ɨdʉ nɨɨkanihʉɨɨla." 11 Itɨ gwa ʉ Paʉlo wɨkikiɨ kʉng'wanso ng'waka ʉng'wɨ nɨ myeli nɨ myeli mʉtandatʉ, wazemanyisa lʉkani lang'wi Itunda kʉ antʉ ang'wɨ.

12 Itɨgwa Galio naɨ mʉtemi kʉ kɨsalɨ ka Akaya, Ayahudi ɨkamihangɨɨla ʉ Paʉlo amʉkʉe, ɨkamʉamba nʉ kʉmʉtala kianza. 13 Ɨkamʉsemela azelʉnga, "Mʉntʉ ʉyʉ ʉkʉapema antʉ amʉkʉlye Itunda nsuta nɨ malagɨɨlyo ang'wa Musa."

14 Papo ʉ Paʉlo naɨwalija lyoma nɨla kilongola, Galio wɨkaaɨla Ayahudi, "Anga ɨze ʉnyenye Ayahudi aza mʉkʉmʉsosha kʉ magazo makʉlʉ aza ntakɨwe ʉnene nʉmʉtegeelye. 15 Kʉnsoko wikʉngʉmi nʉwa nkani nɨ mina nɨ malagɨɨlyo anyu, ʉnyenye lamʉli kʉko. Ʉnene shanga kʉtula nɨmʉlamʉli mʉmakani aya." 16 Sʉnga Galio wɨkaazunsa apume mianza. 17 Papo gwa antʉ ɨhi ɨkamʉamba ʉ Sositene mʉtongeeli nʉwa nyʉmba akʉtankanɨla Ayahudi, ɨkamʉkʉa pantongeela ianza, ingɨ Galio shanga wɨkakela ikanɨ nɨlanso.

18 Paʉlo naɨwikiɨ kʉ Kolinto mahikʉ ɨdʉ. Sʉnga wɨkaalaga anyandʉgʉ awa naɨahʉɨɨla wɨkatunga mʉhɨnzo kʉkɨɨla nzɨla alʉzi wɨkalongola kʉ Silia waze wityatile nʉ Pilisila nʉ Akila. Naɨapika kʉ Kenkilea Paʉlo wɨkazula insingɨ yakwe anga naɨwilapie kʉnsoko aɨwakondya mʉlɨmo. 19 Naɨapika kʉ Epeso, Paʉlo wɨkaaleka kʉko a Pilisila nʉ Akila, ingɨ nʉanso wɨkingɨla mʉ nyʉmba akʉtankanɨla Ayahudi wɨkatulitambʉlya nɨenso. 20 Antʉ ɨkamʉlompa wikalanie nɨenso kitungo ɨlɨpu, Paʉlo wɨkahita. 21 Ingɨ naɨ ʉkʉhega, wɨkalaga, "Kʉtulya anga Itunda walowe." Sʉnga wɨkahega kʉ Epeso kʉkɨɨla nzɨla.

22 Wɨkimɨsha ɨmeli kʉ Kaisalia, wikalongola kʉ Yelusalemu kʉalamʉsha ahʉɨɨli ang'wa Yesʉ, sʉnga wɨkalongola kʉ kɨsalɨ ka Antiokia. 23 Wɨkikiɨ kʉng'wanso itungo iniino, sʉnga wɨkalongoleka nʉ mʉhɨnzo kʉkɨɨla nkɨka niya Galatia nɨ Piligia, wazeakomya nkolo amanyisigwa ɨhi.

24 Matungo nanso aɨʉkolɨ Myahudi ʉng'wɨ lina lakwe Apolo, mʉnya kʉ Alekisandilia, wɨkaza kʉ Epeso. Mʉntʉ ʉyʉ aiʉkete ʉhumi ʉkʉlʉ nʉwa kʉtambʉla, hangɨ aɨmʉmanyi nʉwa Ʉandikwa wang'wi Itunda. 25 Aɨʉmanyisigwe makani ang'wi Isekʉlʉ, nʉyo aɨmʉkamatɨku mʉ ng'wahʉ, wɨkamanyisa iza nkani yang'wa Yesʉ, Nɨ itɨga aɨwɨmanyisa ɨkʉlʉ kʉʉlʉ palʉng'wɨ nɨ kɨna aɨʉʉlɨngile ʉbadisi wang'wa Yohana du. 26 Apolo wɨkandya kʉtambʉla kʉ ʉkamatɨku mʉnyʉmba akʉtankanɨla Ayahudi, ingɨ Pilisila nʉ Akila naɨija ɨkamʉhola kimpelo ikamʉmanyisa kɨsa kɨɨsa makani ang'wi Itunda. 27 Sʉnga Apolo naɨwahiya kʉlongola kʉ Akaya, ahʉɨɨli ang'wa Yesʉ akʉ Epeso ɨkamʉkomya ɨnkolo, ɨkamʉandɨkɨlya balʉa kʉatambʉlya ahʉɨɨli ang'wa Yesʉ nɨa kʉ Akaya amʉsɨngɨɨlye. Naɨwapika kʉng'wanso aɨʉagunile kʉ ʉkende wang'wi Itunda antʉ naɨahʉɨɨla. 28 Kʉʉhumi nʉwakwe ʉkʉlʉ nʉwa kʉtambʉla aɨʉlongolekile kʉ ʉkamatɨku kʉahitɨlya kɨhenga Ayahudi wazelagɨɨla makani a Ʉandɨkwa kɨna ʉ Yesʉ yʉyo Kilisito.