1 Itungo lɨlo lɨɨlo Mʉtemi Helode Agilipa aɨwandilye kʉamba Ahʉɨɨli ang'wɨ nɨang'wa Yesʉ nʉkʉaja. 2 Wɨkalagɨɨlya ʉ Yakobo ʉ mʉluna wang'wa Yohana, wabʉlagwe kʉteng'wa panga. 3 Naɨwaona ikani nɨlanso laaloeelya ɨ Ayahudi, wɨkalongoleka, wɨkamʉamba ʉ Petelo. Ɨlɨ aɨlɨtendekile matugo iloeelya nɨla Mɨkate Nɨshanga ɨgahɨɨye. 4 Naɨ wamʉamba ʉ Petelo wɨkamʉtunga mʉkadulumu, wɨkaɨka amboi maumbɨ annɨ, idale lɨng'wɨ lɨkete amboi annɨ annɨ ahume kʉmʉsʉnja. Herode aɨʉlomee anga ɨkɨle ɨ pasaka ʉkʉmʉpumya kʉ antʉ amʉpɨsɨɨlye. 5 Kʉlʉlo ʉ Petelo naɨʉkolɨ mʉkadulumu, ingɨ ahʉɨɨli ang'wa Yesʉ aɨakagupile kʉmʉlompa Itunda.

6 Ʉtikʉ nʉwanso Helode Agilipa aɨwakɨlɨ ʉlomee kʉmʉpumya ʉ Petelo wamʉpɨsɨɨlye pa ntongeela antʉ, Petelo aɨʉlae pakatɨ a amboi abɨɨlɨ, waze ʉtungilwe mɨnyololo ɨbɨɨlɨ. Amboi aɨakʉsʉnja pa mʉlango nʉwa kadulumu. 7 Papo paapo Malaɨka wang'wi Itunda wɨkapumɨla nzelya ikelya mʉnyʉmba. Malaɨka ʉyʉ wɨkamʉgutya ʉ Petelo palʉbalu, wɨkamʉʉsha wazelʉnga, "Kaya hega." Papo mɨnyololo naɨamʉtungile ʉ Petelo ɨkatungʉka nʉkʉgwa kʉpuma mʉ mɨkono. 8 Malaɨka ʉyʉ wɨkamʉɨla, "Tugala ɨngʉo ako nɨ makwasa ako." Petelo wɨkatenda anga naɨ ʉlagɨɨigwe. Sʉnga Malaɨka wɨkamʉɨla, "Itunge mʉgolole wako ʉntyate." 9 Petelo wɨkapuma mʉkadulumu azeakʉɨlanilye nʉ Malaɨka. Itungo nɨlanso shanga aɨʉlɨngile aya ɨhi nakʉpumɨla aɨataine. Aɨʉsɨgile kɨna mʉloto. 10 Ɨkakɨla mʉlango nʉwa kwandya nʉwʉ nʉwa kabɨɨlɨ, papo ɨkapika pa mʉmpita nʉwa shʉma nʉwakingɨɨlɨla mʉ kɨsalɨ. Mʉmpita nʉanso wɨkalugʉka ʉwenso, nawo ɨkakɨla ɨkapuma kʉnzi. Naɨakʉgenda mʉ nzɨla, pumpulugu Malaɨka wɨkamʉleka ʉ Petelo wing'wene.

11 Papo paapo Petelo naɨ wanzʉʉkɨlwa nɨ ndʉɨ, wɨkalʉnga, "Itungo ɨlɨ nalɨnga kʉlʉ kʉʉlʉ Isekʉlʉ ʉmʉlagɨɨye Malaɨka wakwe kʉmpumya kʉpuma mʉ mɨkono ang'wa Helode Agilipa nʉ kʉpuma mʉ masɨgo a Ayahudi."

12 Petelo naɨ wanzʉʉkɨlwa nɨ ndʉɨ wɨkalongola mʉ nyʉmba ang'wa Malia, nyinya wang'wa Yohana nʉitangwa Maliko. Mʉnyʉmba nanso antʉ ɨdʉ aɨatankanile kʉnsoko a malompi. 13 Petelo wɨkapɨndʉla pa mʉmpita nʉwa kʉnzi, mʉtugwa ʉng'wɨ mʉnanso lina lakwe Loda, wɨkahugeela pa mʉlango kʉtegeelya. 14 Mʉnanso ʉyʉ naɨwalɨnga ʉlʉli lang'wa Petelo, wɨkiloa nangalu ingɨ shanga wɨkalugʉla, wɨkamankɨɨla mʉnyʉmba nʉkʉaɨla ɨantʉ ɨhi kɨna, "Petelo ʉkolɨ panzi a mʉmpita." 15 Amanyisigwa ɨkamʉɨla ʉ mʉnanso, "Ʉewe wahala." Mʉnanso ʉyʉ wɨkalongoleka kʉkomangɨɨla kɨna tai, ɨkalʉnga, "Kwaala ʉkʉtula Malaɨka wakwe."

16 Ingɨ ʉ Petelo wɨkalongoleka kʉpɨndʉla, nɨenso naɨalugʉla ʉ mʉmpita ɨkamʉona ʉ Petelo, ɨkalʉngʉala nangalu. 17 Petelo nʉyo wɨkaagingɨla ʉ mʉkono akilage ihɨtwɨ, wɨkaaganʉɨla Isekʉlʉ aɨʉmʉpumilye ʉlɨ mʉkadulumu. Petelo wɨkalongoleka kʉlʉnga, "Aganʉɨli mpola izi Yakobo nɨ ahʉɨɨli aʉya nɨang'wa Yesʉ." Sʉnga ʉ Petelo wɨkahega wɨkalongola nkɨka ngɨɨza.

18 Naɨwela amboi ɨkogopa nangalʉ kʉ makani naɨapumɨe kʉng'wa Petelo. 19 Helode wɨkalagɨɨlya Petelo wadung'we nkɨka yɨhi, ingɨ shanga ɨkamʉona. Ɨtɨgwa wɨkaakolenkeelya ɨ amboi naɨ akʉsʉnja ɨkadulumu, sʉnga wɨkalagɨɨlya ɨamboi nɨanso abʉlagwe.

Naɨakɨla aya, Helode Agilipa wɨkapuma kʉ Yʉdea wɨkalongola kʉ kɨsalɨ ka Kaisalia, wɨkikiɨ kʉko mahikʉ makeehʉ.

20 Sʉnga Helode Agilipa aɨwatakigwa nɨ antʉ a kʉ Tilo nɨ Sidoni. Itɨ gwa antʉ a isalɨ izi ni ibɨɨlɨ kʉ palʉng'wɨ ɨkihanja ɨkaduma lyoma nɨla kʉtankana nʉyo. Ɨkamʉpembeseelya ʉ Bilasito mitʉmɨ nʉhʉɨɨwe nʉ Mʉtemi Helode Agilipa, ɨkalompa wigombya nɨ matiliga kʉnsoko aɨasanilye kʉaɨɨligwa ndya kʉpuma kihɨɨ a mʉtemi nʉanso.

21 Mʉlʉhikʉ naɨlʉgambilwe mʉtemi Helode Agilipa wɨkatugala ngʉo a kɨtemi, wɨkikiɨ mituntu lakwe nɨla ʉkʉlʉ wɨkatula ligitya nɨantʉ. 22 Antʉ naɨilundiie ɨkalʉnga, "Ʉlʉ shanga lʉli la ng'waa mʉntʉ, ingɨ lʉli lang'wi Itunda witʉ." 23 Papo paapo kʉnsoko Helode Agilipa shanga aiwɨmʉkʉlya Itunda, Malaɨka wang'wi Isekʉlʉ wɨkamʉgwɨsa pihɨ, wɨkaambwa kɨntunga sʉnga wɨkasha.

24 Ingɨ lʉkani lang'wi Itunda lɨkalongoleka kʉtanantigwa, antʉ ɨdʉ ɨkamʉhʉɨɨla ʉ Yesʉ Kilisito.

25 Balinaba nʉ Sauli naɨakondya ʉmʉlɨmo wao naɨendee, ɨkatulya kʉ Yelʉsalemu ɨze ɨpalʉng'wɨ nʉ Yohana nʉitangwa Maliko.