NTENDO 6

Antʉ mʉpungatɨ akʉholwa kʉaɨɨlya itʉmi

1 Matungo nanso, amanyisigwa ang’wa Yesʉ ɨkalongoleka kongeeleka, ʉkigela ʉnang’ani kʉpuma kʉ Ayahudi a kʉ Yunani ɨkaanang’anɨla Aebulanɨa kɨna mahikʉ ɨhi asʉngʉ a Kɨyunani nɨashɨɨwe nɨagoha ɨkong’wa pa ʉgalani nʉwandya. 2 Kʉlʉlo itʉmi awo ni ikʉmi na abɨɨlɨ, ɨkaitanga ahʉɨɨli ang’wa Yesʉ ɨhi, ɨkalʉnga, "Shanga iza ʉsese kʉleke kʉtanantya lʉkani lang’wi Itunda kɨmɨɨle ʉgalani nʉwandya. 3 Itɨgwa aluna itʉ, holi antʉ mʉpungatɨ mʉng’waanyu, antʉ nɨakete ngulu a Ng’wahʉ Ng’welʉ nɨ mahala nʉ lʉkumo lʉza, ʉsese kʉʉalekela mʉlɨmo ʉwʉ. 4 Ʉsese kʉ ʉlongoleka kʉlompa nʉ kitʉma mʉlɨmo nʉa kʉtanantya ʉlʉkani lang’wɨ Itunda." 5 Lʉkani nʉlanso lʉkaaloa ianza lɨhi nɨla ahʉɨɨli ang’wa Yesʉ. Ɨkamʉhola Sitepwano mʉntʉ naɨ ʉmʉhʉʉɨe nangulu Itunda hangɨ nʉizʉe ngulu Ng’wahʉ Ng’welʉ. Pilipo nʉ Pʉlokolo nʉ Nikanoli nʉ Timoni nʉ Pelimena nʉ Nikolao nʉa kʉ Antokia naɨ ʉpilukile mʉnzɨla a Kiyahudi. 6 Ɨkaaɨka pa ntongeela a ɨtumi, itʉmi ɨkaalompeela nʉ kʉakembeta kʉnʉ azeaɨkɨɨlya mɨkono mʉ matwe.

7 Lʉkani lang’wi Itunda lɨkongeleka kenela, antʉ ɨdʉ naɨahʉɨɨe ʉ Yesʉ ɨkongeeleka kʉ Yelusalemʉ nɨ apolyi a Kiyahudi ɨdʉ ɨkahʉɨɨla.

Sitepwano ʉkʉambwa

8 Sitepwano aɨmʉntʉ nʉkembetilwe ni Itunda ningʉlʉ, aɨwɨtumile ilɨngasɨɨlyo nɨ miʉkʉɨlwa mʉantʉ. 9 Lʉhikʉ lʉng’wɨ antʉ kʉpuma mʉnyʉmba niya kʉ tankanɨla Ayahudi nɨtangwa "Nyʉmba akidesela antʉ," Nawo Aɨayahudi kʉpumɨɨla kʉ Kilene nʉkʉ Alekisandilia nɨaʉya aɨapumile kʉ Kilikia nihɨɨ a kʉ Asia. Antʉ awa ɨkatula kikʉngʉma nʉ Sitepwano. 10 Ingɨ shanga ɨkamʉlemya ʉ Sitepwano naɨʉkʉtambʉla kʉnsoko Ng’wahʉ Ng’welʉ aɨʉmʉpee mahala. 11 Kʉlʉlo antʉ awa ɨkaapembeseelya kaganda ka antʉ nʉ kʉapa nkumba mʉlomo kʉmʉtunja ʉteele, "Kamija ʉ Sitepwano ʉkʉmʉtukɨla Mʉsa nʉ kʉmʉsensa Itunda." 12 kʉitɨ ɨkaakinyɨla antʉ nɨ anyampala nɨ amanyɨsi a malagɨɨlyo ang’wa Musa. Sʉnga ɨkamʉhanga ʉ Sitepwano, ɨkamʉamba nʉ kʉmʉtala pianza nɨla anyampala. 13 Antʉ awa ɨkaɨka akʉɨɨli a ʉteele naɨ alongopile, "Mʉntʉ ʉyʉ shanga wɨleka kʉtambʉla nkani nɨya kʉtukɨla nyʉmba ang’wa Itunda nɨ Malagɨɨlyo ang’wa Mʉsa. 14 Kʉnsoko aɨkʉmigulye ʉkʉlʉnga ʉ Yesʉ ʉyʉ nʉa kʉ Nazaleti ʉkʉkʉmʉla nkɨka nɨnelʉ nang’wi Itunda nʉ kʉkaɨla lʉkʉlu ntendo naɨkʉpewe nʉ Mʉsa." 15 Antʉ awo ɨhi naɨakolɨ pianza ɨkamʉgozeela ʉ Sitepwano, nawo ɨkaona ʉsʉ wang’wa Sitepwana ʉkʉmɨlɨginta anga Malaɨka wang’wi Itunda.