1 Sʉnga Paʉlo wɨkapika kʉ isalɨ niya kʉ Delibe nɨ Lisitila, kʉng'wanso aɨʉkolɨ mʉmanyisigwa lina lakwe Timoteo, nyinya wakwe ingɨ Mʉyahudi nʉhʉɨɨe ʉ Yesʉ Kilisito, tata wakweaɨ Mʉyunani. 2 Timoteo aɨwalʉkumo lʉza kʉahʉɨɨli ang'wa Yesʉ nɨakʉ Lisitila nʉ kʉ Ikonio 3 Paʉlo wɨkahiya Timoteo wakʉɨlanie nʉyo, kʉlʉlo wɨkamʉtala kʉ kɨdamu hanza kʉnsoko Ayahudi naɨishiɨ nkɨka nanso ɨhi aɨalɨngɨle kɨna ihe wang'wa Timoteo ingɨ Mʉyunani. 4 Naɨ akʉgendeela kɨsalɨ nɨ kɨsalɨ, ɨkatula apa ɨantʉ malago ayo naɨ apumigwe nɨ anyampala ʉko kʉ Yelusalemu,kʉnʉ azeaɨla amaambe. 5 Itɨ gwa antʉ naɨamʉhʉɨɨe Yesʉ ɨkatula akamatɨku mʉ ʉhʉɨɨli nʉ kongeeleka kizʉla mahikʉ ɨhi.

6 Paʉlo nɨaʉya ɨkatunga mʉhɨnzo nkɨka niya Piligia nɨ Galatia, kʉnsoko Ng'wahʉ Ng'welʉ aɨʉagiiye aleke kʉtanantya ʉko kʉ Asia. 7 Naɨapika mʉ mɨmbɨ akʉ Misia, ɨkagema kingɨla mʉ Bitinia ingɨ Ng'wahʉ wang'wa Yesʉ wɨkaahitɨlya. 8 Kʉlʉlo ɨkakɨlɨnkania kʉ Misia ɨkapika kʉ Tiloa. 9 Ʉtikʉ nʉwanso Paʉlo wɨkahola mʉloto, wɨkamʉona mʉntʉ nʉwa Makedonia wɨkimɨka wɨkamʉlompa, "Tambʉka ʉze ʉkʉaɨɨlye kʉnʉ kʉ Makedonia." 10 Paʉlo naɨwakondya kʉʉhola mʉloto, papo kɨkihamba kʉlongola kʉ Makedonia, ɨzekʉhʉɨɨe kɨna Itunda ʉkitangile kʉtanantye Nkani Nza kʉng'wanso.

11 Kɨkahega kʉ Tiloa kɨkakɨlɨnkania kʉ Samotilake kʉkɨɨla mʉlʉzɨ kaze kʉnankɨe ibɨnɨ ni kʉlʉ, mʉdaʉao kɨkapika kʉ kɨsalɨ ka Neapoli. 12 Kɨkahega kʉng'wanso kɨkalongola kʉ Pilipi, kɨsalɨ nɨkɨkʉlʉ nɨka Makedonia nɨ kɨtemilwe nɨ a Lumi, kɨkikiɨ mʉ kɨsalɨ nɨkanso mahikʉ makeehʉ. 13 Lʉhikʉ nʉla kʉsupya Ayahudi kɨkalongola kʉnzi a mʉmpita nʉwa kɨsalɨ mpelo amongo, nkɨka naɨkʉsɨgile kɨna kʉʉlija lyoma nɨla malompi. Kɨkikiɨ pihɨ, kitambʉlya nɨasʉngʉ naɨ ilʉndile kʉng'wanso. 14 Ʉng'wɨao mʉ asʉngʉ awa naɨ akʉtegeeye, lina lakwe Lidia, mʉsʉlʉja nʉwa ngʉo azambalaʉ, naʉgʉli ʉkʉlʉ, mʉnya kʉ Tiatila naɨ wɨmʉkʉlya Itunda. Isekʉlʉ wɨkamʉtenda ʉ Lidia wahʉɨɨle lʉkani naɨʉkʉtambʉla ʉ Paʉlo. 15 Itɨ gwa Lidia naɨwakondya kʉbadisigwa palʉng'wɨ nɨantʉ amitolakwe, wɨkakʉsɨngɨɨlya mitolakwe wazelʉnga, "Anga ɨze tai maona kɨna ʉnene namʉhʉɨɨla Isekʉlʉ, kɨlanyi mikiɨ mitolane." Nʉyo wɨkakinena.

16 Lʉhikʉ lʉng'wɨ naɨkʉlongoe kʉ mʉkʉlya Itunda pakipoelya, kɨkatankana nʉ mʉnanso ʉng'wɨ mʉtʉʉng'wa ʉkete ahɨng'wɨ aʉlagʉli, aɨwɨatambʉɨla ɨantʉ makaniao napembilye. Kʉtenda itɨ aɨwɨagolɨpya ɨagolɨ akwe. 17 Mʉnanso nʉwanso wɨkamʉtyata Paʉlo nʉsese, wɨkitʉnta nʉkʉlʉnga "Antʉ awa ingɨ anyamɨlɨmo ang'wi Itunda nʉ Mʉkʉlʉ. Azile kʉmʉtanantɨlya ʉnyenye nkani niya ʉgunɨligwa." 18 Wɨkalongoleka kitʉma itɨ mahikʉ ɨhi. Lʉhikʉ lʉng'wɨ Paʉlo wɨkataka, wɨkamʉpɨlʉkɨla nʉkʉmʉkenela hɨng'wɨ nʉwanso, "Kʉʉlagɨɨlya kʉlina lang'wa Yesʉ Kilisito, puma mʉ mʉnanso ʉyʉ." Papo paapo hɨng'wɨ nʉanso wɨkapuma.

19 Agolɨ a mʉnanso ʉyʉ naɨaona isanio lao nɨla kʉpantɨkɨla nsao lahila, ɨkaamba a Paʉlo nʉ Sila ɨkaakweha nʉkʉatala mʉʉgalagalo kʉ atongeeli naɨ akolɨ. 20 Ɨkaaitʉntɨɨla ɨ atongeeli akɨsalɨ azelʉnga. "Antʉ awa ingɨ Ayahudi aɨnaleta dome mʉ kɨsalɨ kitʉ. 21 Akʉmanyisa ntendo nʉsese Alumi shanga kʉtakɨwe kʉigomba ang'wɨ kʉityata." 22 Iumbɨ laantʉ ɨkihangʉɨla ɨka akʉa a Paʉlo nʉ Sila.

Papo alamʉli akɨsalɨ ɨkalagɨɨlya atugʉlwe ngʉo, atang'we nkootya. 23 Naɨ akʉɨkɨgwa, ɨkingɨligwa mʉkadulumu, mɨmɨɨli wɨkalagɨɨligwa waakendegeele aleke kʉtigana. 24 Kʉ ʉlagɨɨligwa nʉwanso mɨmɨɨli wɨkaaɨka kʉnindo akadulumu, wɨkaatungɨɨla mɨgʉlʉao mʉ magogo nɨ malito.

25 Naɨyahumbeela ʉtikʉ wigɨngu, Paʉlo nʉ Sila aɨakʉlompa nʉkɨmba mɨmbo akʉmʉkʉlya Itunda, kʉnʉ atungwa aʉya ɨkaze aategeye. 26 Pumpulugu, wɨkapumɨla mʉtentemo ʉkʉlʉ wihɨɨ naɨ ʉhingɨsilye kɨtako kanyʉmba akadulumu. Itungo ʉdu ndʉjɨ yɨhi niyakadulumu yɨkalugʉka, mɨnyololo naɨ atungɨwe ɨatungwa ɨhi ɨkatɨnɨka. 27 Mɨmɨɨli nʉwa kadulumu naɨwapitya nʉkʉona ndʉjɨ nɨyakadulumu ilʉgʉkile, wɨkasɨga kɨna atungwa ɨhi atigana. Nɨ itɨ wɨkahopola nyalahanda akwe wɨkahiya kibʉlaga. 28 Ingɨ Paʉlo wɨkamitʉntɨɨla, wɨkalʉnga, "Leka kibʉlaga, ʉsese kɨhi kʉkolɨ papa!"

29 Mɨmɨɨli nʉmʉkʉlʉ nʉwa kadulumu naɨ wigule itɨ,wɨkamitanga mʉntʉ walete lʉmʉlɨ, wɨkamanka wɨkingɨla mʉnindo akadulumu, wɨkatugama pa mɨgʉlʉ a Paʉlo nʉ Sila kʉnʉ wazekagata kʉwoa. 30 Sʉnga wɨka apumya kʉnzi, wɨka akolya. "Akʉlʉ ane, ntendeʉlɨ nihume kʉgunɨka?"

31 Paʉlo nʉ Sila ɨkamʉsʉkɨɨlya, "Anga ʉmʉhʉɨɨle Isekʉlʉ Yesʉ ʉewe palʉng'wɨ nɨantʉ ɨhi nɨamitolako papo mʉkʉgunɨka." 32 Papo gwa ɨkamʉtanantɨlya lʉkani lang'wi Isekʉlʉ ng'wenso palʉng'wɨ nawa ɨhi nɨamitolakwe. 33 Itungo lɨlo lɨɨlo nɨla utikʉ mɨmɨɨli nʉanso wɨkaatendeela iza wɨkaogelya ngʉma yao, sʉnga papo paapo wɨkabadisigwa ng'wenso palʉng'wɨ nɨantʉ ɨhi nɨamitolakwe. 34 Sʉnga wɨkaatala Paʉlo nʉ Sila kitolakwe. Wɨkaapa indya. Ng'wenso palʉng'wɨ nɨantʉ ɨhi nɨamitolakwe ɨkiloa kʉnsoko aɨamʉhʉɨɨla Itunda.

35 Naɨwela kɨdaʉdaʉ alamʉli ɨkalagɨɨlya aopisaao nɨakʉlʉ kʉ mʉkʉlʉ nʉwa akadulumu azelʉnga, "Alugʉɨli antʉ awa alongole."

36 Mʉkʉlʉ nʉwa kadulumu wɨkamʉɨla ʉ Paʉlo "Alamʉli alagɨɨye kɨna kʉmʉlekele, kʉlʉlo pumi mʉlongole."

37 Ingɨ ʉ Paʉlo wɨkasʉkɨɨlya, "Age ntʉni? Akʉkʉile ntongeela yaantʉ, kʉnʉ shanga akʉpɨsɨɨye, nawo akʉlugaɨla mʉkadulumu nʉsese kɨ anya kʉ Lumi. Itungo ɨlɨ akipihɨɨlya ʉlɨ kʉʉpumya mʉkadulumu. Shangaʉʉ. Nɨaze ɨenso akʉpumye mʉnʉ mʉkadulumu."

38 Akʉlʉ a aopisa awa ɨkatulya kʉ alamʉli nʉ kʉaɨla inkani izi, naɨ alɨnga kɨna a Paʉlo nʉ Sila antʉ akʉ Lumi, ikogopa ikʉlʉ. 39 Kʉlʉlo ɨkapembya ɨka alompa itʉnʉ, ɨka apumya mʉ kadulumu, ɨkaalompa ahege mʉ kɨsalɨ nɨkanso. 40 Paʉlo nʉ Sila naɨapuma mʉkadulumu ɨkalongola kito lang'wa Lidia. Kʉng'wanso ɨkatankana nɨanyandʉgʉ naɨahʉɨɨli ang'wa Yesʉ, ɨkaakomya nkolo, sʉnga ɨkahega.