1 Minyomo ʉwʉ nʉwa kʉ kɨsalɨ ka Epeso naɨwaʉla, Paʉlo wɨkaɨtanga palʉng'wɨ ɨahʉɨɨli ang'wa Yesʉ wɨkaakomya nkolo, wɨkaalaga. Sʉnga wɨkalongola kʉ Makedonia. 2 Wɨkakɨɨla mʉ mahɨɨ nanso waze akomya nkolo antʉ nɨamʉhʉɨɨe ʉ Yesʉ kʉ nkani yɨdʉ. Sʉnga wɨkapika kʉ Ʉyunani, 3 kʉng'wanso wɨkikiɨ myeli ɨtaatʉ. Naɨ ʉkihamba kʉlongola kʉ Silia wɨkalɨnga kɨna Ayahudi aɨakʉnoneelya isuɨ ɨbɨ, itɨ gwa Paʉlo wɨkalamʉla kʉsʉka kʉkɨɨla kʉ Makedonia. 4 Paʉlo aɨakʉɨlanilye nɨ a Sopatilo, ng'wana wang'wa Piliho, kʉpuma kʉ Belea, wɨkakʉɨlania nɨa Alisitaliko nʉ Sekundo, kʉpuma kʉ Tesalonike nʉ Gayo kʉpuma kʉ Delibe nɨ a Timoteo nʉ Tukiko nʉ Tilopimo nʉwa kɨsalɨ ka Asia. 5 Antʉ awa aɨakʉtongee ʉsese nʉ kʉʉlindɨɨla kʉ Tiloa. 6 Naɨlakɨla iloeelya nila mikate nɨshanga Ɨgahɨɨye, ʉsese kɨkanankɨla meli kʉpuma kʉ Pilipi, naɨ akɨla mahikʉ ataatʉ kɨkapikɨɨla kʉ Tiloa, kʉng'wanso aɨkikiɨ mahikʉ mʉpungatɨ.

7 Lʉhikʉ nʉla ng'wandyo mʉ mahikʉ mʉpungati kɨkatankana kʉlya lʉdya lang'wi Isekʉlʉ. Paʉlo aɨwalomeela kʉhega mʉdaʉao, wɨka atanantɨlya ɨantʉ nʉkʉlongoleka kʉdʉa nɨ antʉ kʉpikɨɨla ʉtikʉ wigɨngʉ. 8 Mʉnɨndo naɨ kʉmolɨ kʉgolopwa, aɨyikolɨ koloboi yɨdʉ yakɨe. 9 Midilisha nɨla nɨndo naso aɨwikiɨ mʉhʉmba ʉng'wɨ witangwa Eutiko, ʉ Paʉlo naɨ ʉlongolekile kʉtanantya, mʉhʉmba ʉyʉ wɨkandya kʉtindila sʉnga wɨkakɨɨlwa tʉlo, wɨkagwa pihɨ kʉpuma golopwa a kataatʉ. Naɨendile mʉkenka wɨkatula wakuza. 10 Ingɨ ʉ Paʉlo wɨkasima pihɨ, wɨkatuna, wɨkamʉungatɨla mʉhʉmba nʉwanso wɨkalʉnga, "Leki kʉlɨli mʉpangaʉ." 11 Sʉnga ʉ Paʉlo wɨkanankɨla migʉlya agolopwa, wɨkahola ndya, wɨkalya. Wɨkalongoleka kʉdʉa nɨenso kitungo ɨlɨpu kʉpikɨɨla kilya kʉtamʉka, sʉnga wɨkahega. 12 Antʉ ɨkamʉsʉsha ʉ mʉhʉmba kitolao waze mʉpanga, nawo ɨkalowa ikʉlʉ.

13 Ʉsese kɨkingɨla mʉmeli kɨkalongola mʉhɨnzo kʉkɨɨla mʉlʉzɨ kɨkapika kʉ Aso, kʉko naɨ kʉze mʉkenkeelya ʉ Paʉlo. Aʉkʉɨɨe ʉsese kʉtende itʉ, kʉnsoko nʉanso aɨʉloilwe kʉlongola kʉng'wanso namɨgʉlʉ. 14 Naɨ wakʉhanga kʉ Aso, wɨkanankɨla meli kɨkapikania kʉ Mitilene. 15 Kʉpuma kʉng'wanso kɨkalongoleka kʉkɨɨla mʉlʉzɨ kɨkapika kʉ Kio. Lʉhikʉ nʉla kataatʉ kɨkaputa kitʉmbi kɨkalongola kʉ Samo, lʉhikʉ nʉla kannɨ kɨkapikɨɨla kʉ Mileto. 16 Paʉlo aɨʉlamʉe kʉleke kʉkɨɨla kʉ Epeso, waleke kitintɨka mʉnkɨka niya kʉ Asia. Aɨwipatɨɨye kʉpika kʉ Yelusalemu ɨze lʉkɨlɨ kʉpika lʉhikʉ liloeelya nɨla Pentekosite ang'wɨ ikʉhumɨka.

17 Paʉlo naiʉkolɨ kʉ Mileto, wɨkalagɨɨlya mʉntʉ kʉ atongeelɨ a kʉ Epeso atankane nʉyo. 18 Mʉntʉ ʉyʉ naɨwapika ɨkaatambʉɨla, "Ʉnyenye mʉlɨngile naɨ nishiɨ mitolanyu itungo lɨhi kʉpuma lʉhikʉ nʉla ng'wandyo naɨmpikile apa pa Asia. 19 Mʉlɨngile naɨ neenditʉma mʉlɨmo wang'wi Isekʉlʉ kʉʉza wɨhi nʉʉwai nɨzengimilye ʉlwago ninkʉngumi naɨ nɨkendatendeelwa nɨ Ayahudi. 20 Mʉlɨngile kɨna shanga aɨnɨtendisilye kʉtanantya ikani lɨhi nɨlɨkʉmʉaɨɨlya ʉnyenye, ingɨ manyisilye kɨhenga mʉmatolanyu. 21 Nɨahʉgʉe ɨ Ayahudi nɨ Ayunani kɨna amʉgombe Itunda nʉkʉleka ɨmɨlandʉ nʉ kʉmʉhʉɨɨla Isekʉlʉ witʉ Yesʉ Kilisito. 22 Itungo ɨlɨ nahega kʉngulu a Ng'wahʉ Ng'welʉ, nalongola kʉ Yelusalemu shanga ningɨle nakʉmpata kʉng'wanso. 23 Nɨngɨle kɨna Ng'wahʉ Ng'welʉ ʉnihʉgʉʉye kɨna kɨtungo nʉlwago yinindɨɨe. 24 Ingɨ ʉnene shanga mbaɨɨye ʉlikalo lane kɨna kɨntʉ ka nsaɨlo, anga kʉmala wikʉngʉmi nʉ kʉkondeelya mʉlɨmo wang'wi Isekʉlʉ Yesʉ naɨʉmpee, ingɨ, kʉtanantya Nkani Nza niya ʉkende wang'wi Itunda.

25 "Ʉnene itungo ɨlɨ nalɨnga kɨna kʉtilɨ nʉyʉ nʉng'wɨ ga mʉng'waanyu nɨshanga nʉmʉtanantɨye Ʉtemi wang'wi Itunda mʉ ʉgendagendi wane, nɨngile kɨna kʉtilɨ anga mʉntʉ nʉɨkamona hangɨ. 26 Itʉngo ɨlɨ kʉmʉɨli kɨna lelo ɨyɨ mʉntʉ wɨhi anga walimɨle nɨmʉgila anga igazo lɨhi, 27 kʉnsoko mahikʉ ɨhi nʉmʉtambʉɨe nkani yɨhi naɨʉloilwe Itunda. 28 Hʉgʉki mʉnkolo yanyu nʉ kʉasʉnja ahʉɨɨli ɨhi Ng'wahʉ Ng'welʉ nʉmʉɨkile mʉtule mɨasʉnji akwe. Asʉnji ahʉɨɨli ang'wa Yesʉ nʉagʉile kʉkɨɨla sakami a ng'waakwe. 29 Nɨngɨle kɨna anga ʉnene nihege, azile amanyisi aʉteele mʉng'wanyu nɨɨhanga mbugi ntaki niangila kɨaisa kʉ antʉ nɨamʉhʉɨɨe ang'wa Yesʉ. 30 Nʉmʉng'wanyu ga ɨkimɨka antʉ aʉteele kʉlimangɨɨlya ɨtai ahume kʉapema antʉ nɨamʉhʉɨɨe ʉ Yesʉ aatyate. 31 Itɨ gwa hʉgʉki, kɨmbʉki kɨna myaka ɨtaatʉ ʉtikʉ nʉ ng'ʉng'wɨ, aɨnongolekile kʉmʉmanyisilye mɨhi, kʉ lioli.

32 "Itungo ɨlɨ gwa kʉmʉleka mʉʉhumi wang'wi Itunda nʉ kʉ lʉkani nʉla ʉkende, ʉhumi nʉkʉmʉzenga nʉ kʉmʉpa ʉnyenye kɨpegwa nʉaɨkɨɨye antʉ ɨhi nɨagombekile kʉng'wakwe. 33 Ʉnene aɨnɨmʉgila anga nsʉla a mpia ang'wɨ zahabu ang'wɨ ngʉo a mʉntʉ wɨhi. 34 Nyenye mʉlɨngile kɨna kʉ mɨkono ane nitʉmile mɨlɨmo nɨzeduma maitʉ ane naya na antʉ naɨkɨpalʉng'wɨ. 35 Aɨnɨmʉpeza mpyani kɨna kʉkɨɨla akitʉma mɨlɨmo kʉngulu yɨhi kʉtakɨwe kʉaaɨɨlya ɨalema, mʉzekɨmbʉka inkani yang'wi Isekʉlʉ Yesʉ naɨ ʉitambʉe kɨna, ‘Ingɨ bahu kʉpumya kʉkɨla kʉsɨngɨɨlya."’

36 Paʉlo naɨ wakondya kʉtambʉla itɨ, wɨkatugama palʉng'wɨ nɨenso, wɨkamʉlompa Itunda. 37 Antʉ ɨhi ɨkalɨla, ɨkamʉʉngatila ʉ Paʉlo nʉkʉmʉlaga. 38 Naɨlɨalɨiye ingɨ nkani naɨʉtambʉe ʉ Paʉlo kɨna shanga akʉmʉona hangɨ. Ɨkamʉtindɨkɨɨlya wɨkamʉpisha mʉ meli.