1 Matungo nanso, Sauli aɨʉlongolekile kʉatumba kʉ ʉtaki nʉkʉabulaga ahʉɨɨli ang'wa Isekʉlʉ. Wɨkalongola kʉ Mʉpolyi nʉ Mʉkʉlu, 2 wɨkalompa wapegwe balʉa nɨla kʉmʉhumya nʉanso walongole mʉnyʉmba nɨyakʉtankanɨla ayahudi ʉko kʉ Damesiki, ingɨ wahume kʉaamba ɨahʉɨɨli ang'wa Yesʉ itʉnja nɨ asʉngu nɨamʉhʉɨɨe ʉ Yesʉ Kilisito nʉkʉaleta kʉ Yelusalemu.

3 Ingɨ ʉ Sauli naɨʉkolɨ mʉnzɨla pakupɨ nʉkʉpika kʉ Damesiki, pumpulugu nzelya kʉpumɨɨla kilunde ɨkamalɨkɨla mpande yɨhi. 4 Wɨkagwa pɨhi nʉkija lʉli, "Sauli, Sauli. Nɨkɨ ʉkʉnaja?"

5 Sauli nʉyo wɨkakolya, "Wɨnyenyu ʉewe Isekʉlʉ?"

Lʉli nʉlanso lɨkasʉkɨɨlya, "Ʉnene ingɨ Yesʉ ʉyʉ ʉewe nʉʉkʉmaja. 6 Itungo ɨlɨ ʉka, wingɨle mʉ kɨsalɨ ka Damesiki kʉng'wanso ʉkʉɨlwa nʉtakɨwe kʉtenda."

7 Antʉ awo naɨ akʉɨlanilye nʉ Sauli aɨikimɨka papo, ɨkakʉɨlwa azeagila nʉla kʉtambʉla, kʉnsoko aɨigule ʉlʉli nʉlanso, ingɨ shanga ɨkamʉona ʉmʉntʉ naɨʉkʉligitya. 8 Sauli wɨkaʉka, naɨʉgemile kʉpɨtula miho wɨkalengwa kʉnsoko wapokula. Itɨgwa antʉ naɨaona itɨ ɨkamʉtongeela ɨkaze amʉambɨe mʉkono kʉpikɨɨla kʉ kɨsalɨ ka Damesiki. 9 Sauli wɨkikiɨ itungo lamahikʉ ataatʉ wazemʉpoku, itungo nɨlanso shanga aɨwɨlyaa ang'wɨ kʉng'wa kɨntʉ kɨhi.

10 Kʉng'wanso kʉ Damesikɨ aɨʉkolɨ mʉhʉɨɨlɨ ʉng'wɨ wang'wa Yesʉ witangwa Anania. Isekʉlʉ wɨkamʉpɨndʉla mʉ mʉloto, "Anania."

Anania wɨkamʉsʉkɨɨlya, "Isekʉlʉ, Nkolɨ papa."

11 Isekʉlʉ nʉyo wɨkamʉɨla, "Longola mipanda nɨlitangwa Nzɨla nɨ Ngoloku, mito lang'wa Yʉda ʉmʉkoeelye mʉntʉ ʉng'wɨ ʉkitangwa Sauli ʉpembeeye kʉ Taso, itungo ɨlɨ ʉkolɨ ʉkʉmʉlompa Itunda, 12 mʉ mʉloto wɨkamʉona mʉntʉ wɨtangwa Anania ʉkingɨla mʉnyʉmba nʉkʉmʉɨkɨɨlya mɨkono mitwe lakwe wahume kʉona hangɨ."

13 Ingɨ ʉ Anania wɨkasʉkɨɨlya, "Isekʉlʉ, nija nkani yɨdʉʉ kʉpuma kʉ antʉ nɨya mʉntʉ ʉyʉ, nigule naɨ wɨatendeela ʉbɨɨ ɨahʉɨɨli ang'wa Yesʉ ʉko kʉ Yelusalemʉ. 14 Nʉyo ʉzile apa ɨti ʉpewe ʉhumi kʉpumɨla kʉ Apolyi nɨ akʉlu wahume kʉaamba ɨhi nɨakʉlompa kʉ lina lako."

15 Ingɨ Isekʉlʉ wɨkamʉila ʉ Anania, "Ʉewe longola ʉdu kʉnsoko namʉhola ʉ Sauli witʉme mʉlɨmo nʉwa kʉtanantya lina lane, kʉ antʉ nɨshanga Ayahudi nɨ atemi nʉ kʉ antʉ ɨhi nɨa kʉ Isilaeli. 16 Nene kʉmʉlɨngasa nʉwɨkagigwa kʉnsoko a lina lane."

17 Ʉʉgwa, Anania wɨkalongola, wɨkingɨla mʉnyʉmba nanso nʉ kʉmʉhanga ʉ Sauli. Sʉnga wɨkaɨkɨɨlya mɨkono, wɨkalʉnga, "Sauli mʉnyandʉgʉ, Isekʉlʉ Yesʉ ng'wenso naɨ ʉkigee mʉnzɨla, yʉyo ʉndagiiye ʉnene nɨze kʉng'wako ʉhume kʉona hangɨ wizʉligwe ngulu a Ng'wahʉ Ng'welʉ" 18 Papo paapo maɨntʉ nɨhanga makulugamba ɨkagwaa kʉpumɨla mʉ miho ang'wa Sauli, wɨkatulaona hangɨ. Sʉnga wɨkaʉka, wɨkʉbadisigwa. 19 Naɨ walya indya, ngʉlʉ yakwe yɨkamʉsʉkɨla.

Sauli wɨkishiɨ mahikʉ makeehʉ nɨahʉɨɨli ang'wa Yesʉ kʉng'wanso kʉ Damesiki. 20 Papo ʉ Sauli wɨkandya kʉtanantya mʉnyʉmba niyakʉtankanɨla Ayahudi wazelʉnga kɨna, "Yesʉ ingɨ Ng'wana wang'wi Itunda."

21 Antʉ ɨhi naɨigulye inkani yang'wa Sauli aiakʉɨwe nʉkʉkolya, "Ʉyʉ shanga yʉyʉne naɨʉsakilye ʉbʉlagwi ʉkʉlʉ nʉwa antʉ naɨ ilapɨla ɨlina lang'wa Yesʉ ʉko kʉ Yelusalemʉ? Ng'wenso aɨwɨza apa itɨ kʉaamba ahʉɨɨli ang'wa Yesʉ nʉkʉatala kʉatongeeli a apolyi azeatungilwe?"

22 Sauli wɨkalongoleka kʉtula mʉkamatɨku nʉ kʉ akʉɨɨla ɨ Ayahudi naɨishiɨ kʉ Damesiki waze kumʉʉla kɨna ʉ Yesʉ ingɨ Kilisito.

23 Naɨakɨla mahikʉ ɨdʉ, Ayahudi ɨkisɨja kʉmʉbʉlaga ʉ Sauli. 24 Sauli wɨkija masigoao. Ayahudi ɨkadagɨɨlya mʉ ʉkɨɨlo wɨhi nʉwa kɨsalɨ, ʉtikʉ nʉ ng'ʉng'wɨ ahume kʉmʉbʉlaga. 25 Ingɨ amanyisigwa ang'wa Sauli aɨɨmʉkenka mʉkɨsela ʉtikʉ ɨkamʉsimɨɨlya kʉkɨɨla palyoma nɨlɨkolɨ mikiligo.

26 Sauli naɨ wapika kʉ Yelusalemu wɨkagema kihanja nɨamanyisigwa ang'wa Yesʉ. Amanyisigwa nɨanso ɨkitumba, kʉnsoko shanga aɨahʉɨɨe kɨna ʉ Sauli wainaa mʉmanyisigwa wang'wa Yesʉ. 27 Ingɨ Balinaba yʉyo wɨkamʉhola, wɨkamʉtala kʉ itʉmi. Wɨkaaganʉɨla itɨ ʉ Sauli naɨ ʉkolɨ mʉnzɨla aɨʉtankanile kɨnyaʉlɨ ni Isekʉlʉ, Isekʉlʉ aɨʉligitilye ʉlɨ nʉ Sauli nɨ itɨ naɨʉtanantilye kʉ ʉkamatɨku wɨhi kʉ lina lang'wa Yesʉ ʉko kʉ Damesiki. 28 Kʉlʉlo ʉ Sauli wɨkishiɨ palʉng'wɨ nɨenso kʉnʉ waze wihangɨlye kʉtanantya kɨhenga ɨ lina lang'wa Yesʉ nkɨka yɨhi ʉko kʉ Yelusalemu. 29 Aɨʉkenditambʉlya nʉ kikʉngʉma nɨ Ayahudi nɨ antambʉ a Kɨyunani, ingɨ wawo aɨagemile kʉmʉbʉlaga. 30 Anyandʉgʉ awa naɨ ija impola niyanso, ɨkamʉhola ʉ Paʉlo ɨkamʉtala kʉ Kaisalia, ɨkamʉtindikɨɨla walongole kʉ Taliso.

31 Papo gwa ahʉɨɨli ang'wa Yesʉ nɨa kʉ Yʉdea nɨ Galilaya nɨ Samalia ɨkiloeelya ɨmatiliga aya. Ahʉɨɨli ang'wa Yesʉ ɨkakamatɨka nʉ kʉlongoleka kʉmʉkʉlya Isekʉlʉ nʉkʉkomigwa nkolo nʉ Ng'wahʉ Ng'welʉ.

32 Petelo naɨ ʉkʉgendeela nkɨka yɨhi, wɨkalongola kʉiʉmbaʉmbɨla ahʉɨɨli ang'wa Yesʉ naɨishiɨ kʉ kɨsalɨ ka Lida. 33 Kʉng'wanso wɨkamʉhanga mʉntʉ ʉng'wɨ witangwa Ainea, naɨ ʉpoiye wɨza ʉlae mʉ ʉlɨlɨ myaka mʉnana. 34 Petelo wɨkamʉɨla, "Ainea, Yesʉ Kilisito ʉkʉʉkomya, ʉka palinga kɨpalatʉ kako." Papo Ainea wɨkaʉka. 35 Antʉ ɨhi kʉkʉsalɨ ka Lida nɨkʉng'wapo nʉwakʉ Shaloni naɨ amʉona ʉ Ainea ʉkʉgenda ɨkamʉhʉɨɨla Isekʉlʉ.

36 Kʉ kɨsalɨ kakʉ Yapwa aɨʉkolɨ mʉmanyisigwa nʉwa kɨsʉngʉ lina lakwe Tabita, kʉ Kɨyunani ɨza Dolikasi, ndogoelyo akwe Mpala. Mʉmanyisigwa ʉyʉ aɨmʉkende ikʉlʉ, aɨwɨtʉmaa iza nʉ kʉaɨɨlya ɨaʉla. 37 Matungo nanso Tabita wɨkalwala, wɨkasha, antʉ naɨakondya kʉoja ʉmʉimba wakwe ɨkaʉlalya mʉnɨndo nɨkolɨ mʉgolopwa. 38 Kɨsalɨ ka Lida shanga aɨkʉlɨ nɨ Yapwa, Amanyisigwa naɨ ija kɨna ʉ Petelo ʉkolɨ kʉng'wanso ɨkalagɨɨlya antʉ abɨɨlɨ amʉhange nʉ kʉmʉlompa, "Itʉnʉ kayanga nzʉʉ kʉnʉ." 39 Kʉlʉlo ʉ Petelo wɨkihamba wɨkakʉɨlania nɨenso, naɨwapika, ɨkamʉtala kʉnɨndo nɨkolɨ kigʉlya kaɨalailye ʉ mʉimba. Ashɨlwa ang'wɨ aɨimɨkile pakupɨ nʉ mʉimba akʉlɨla ɨkamʉlagɨɨla nkanjʉ nɨ ngʉo maʉya ʉ Dolikasi naɨʉatumɨɨye naɨ wakɨlɨ kʉsha. 40 Petelo wɨkaapumya kʉnzi anɨndo nanso, wɨkatugama wɨkalompa, Sʉnga wɨkaʉpɨlʉkɨla ʉmʉimba wɨkalʉnga, "Tabita, ʉka." Tabita wɨkapɨtya naɨ wamʉona ʉ Petelo, wɨkikiɨ. 41 Petelo wɨkamʉamba mʉkono wɨkamʉʉsha, sʉnga wɨkaitanga ɨahʉɨɨli ang'wa Yesʉ nɨasʉngʉ nɨashɨɨwe wɨkaapa ʉmʉnanso waze mʉpanga. 42 Mpola izi yɨkakumʉka nkɨka yɨhi niya kɨsalɨ ka Yapwa, antʉ ɨdʉ ɨkamʉhʉɨɨla Isekʉlʉ. 43 Petelo wɨkishiɨ kʉ Yapwa mahikʉ ɨdʉ kʉ mʉntʉ mʉtuma ndɨlɨ witangwa Simoni.