1 Paʉlo wɨkaagozeela ɨanyianza, wɨkalʉnga, "Anyandʉgʉ ane, ʉnene nituma mʉlɨmo wang'wi Itunda kʉ nkolo nza sambʉnʉyʉ." 2 Kʉnsoko ikani ɨlɨ Mʉpolyi nʉ Mkʉlʉ ʉ Anania wikaalagɨɨlya antʉ naɨakolɨ pakupɨ nʉ Paʉlo amʉkʉɨlye ʉmʉlomo. 3 Papo Paʉlo wɨkamʉɨla, "Itunda ʉkʉʉkʉa nʉewe nʉwɨhangaa ikiligo nɨlɨdobigwe nswakaala! Kʉnsoko ʉewe wɨmʉteele wikiɨ pang'wanso ʉhume kʉlamʉla kʉtyata malagɨɨlyo ang'wa Musa, kʉnʉ ʉewe ʉmahitile ɨmalagɨɨlyo nanso ʉkʉlagɨɨlya ʉnene nkʉwe nsuta nɨmalagɨɨlyo nalʉngile."

4 Antʉ awo naɨimikile pakupɨ ɨkamʉɨla ʉ Paʉlo, "Itɨɨ, nɨkɨ ʉewe ʉkʉmʉtʉkɨla Mʉpolyi nʉ Mʉkʉlʉ nʉang'wi Itunda?"

5 Paʉlo wikaasʉkɨɨlya, "Anyandʉgʉ ane, shanga aza nɨngile kɨna ʉyʉ ingɨ Mʉpolyi Mʉkʉlʉ nʉang'wi Itunda. Kʉnsoko yandɨkilwe, ‘Leka kʉmʉtambʉla ibɨ nʉatongeeli nʉwa antʉ ako.’"

6 Paʉlo naɨwaalɨnga kɨna nɨang'wɨ ingɨ Asadukayo nɨaʉya Apalisayo, wɨkitʉnta wɨkalʉnga, "Anyandʉgʉ ane, ʉnene nɨ Palisayo, ng'waa Palisayo. Ʉnene nsemewe kʉnsoko nihʉɨɨe kɨna ɨashi akiʉka."

7 Paʉlo naɨwatambʉla inkani izi, wilei wɨkandya kʉ Apalisayo nɨ Asadukayo ianza lɨhi lɨkatemanʉka maumbɨ abɨɨlɨ. 8 Naɨkɨsakilye atemanʉke aɨsɨkɨ Asadukayo ahʉɨɨe kɨna kʉtilɨ ʉwiʉki, hangɨ kɨna kʉtilɨ anga a Malaɨka ang'wi ng'wahʉ, ingɨ Apalisayo ahʉɨɨe aya ɨhi nataatʉ. 9 Yɨkatula nʉ minyomo ʉkʉlʉ, amanyisi a malagɨɨlyo ang'wa Musa nɨ iumbɨ nɨla Apalisayo, ɨkimɨka nʉkamdya kikʉngʉma kʉngulu azelʉnga, "Shanga kʉʉona anga igazo lɨhi kʉ mʉntʉ ʉyʉ. Ihuɨkile kʉtula ng'wahʉ ang'wi Malaɨka witambʉʉye nʉmʉntʉ ʉyʉ!"

10 Minyomo wɨkatula ʉkʉlʉ kʉpikɨɨla mankata nʉanso nʉwa anyambita wɨkogopa kɨna ahumile kʉmʉgalanʉla ʉ Paʉlo mapande abɨɨlɨ, wɨkalagɨɨlya iumbɨ nɨla anyambita amʉheja kʉngulu ʉ Paʉlo pa katɨao akʉmʉsʉkɨlye mʉnkambi a anyambita.

11 Ʉtikʉ naɨʉtyatile Isekʉlʉ wɨkimɨka pakupɨ nʉ Paʉlo wɨkamʉɨla, "Komya ɨnkolo! Anga naza ʉatambʉe antʉ inkani yane apa pa Yelʉsalemu, ʉtakɨwe kʉatambʉɨla antʉ a kʉnʉ kʉ Lumi."

12 Naɨwela Ayahudi ɨkipema nʉkʉlapa kɨna, shanga akʉlya ang'wɨ kʉng'wa kʉpikɨɨla amʉbʉlage ʉ Paʉlo. 13 Antʉ naɨipemile ikani nɨlanso aɨakɨlɨnkɨɨe makʉmi annɨ. 14 Sʉnga ɨkaahanga atongeli a apolyi nɨ anyampala nʉ kʉlʉnga, "Ʉsese kɨhi kipemile nʉkʉlapa kɨna shanga kʉʉlya ang'wɨ kʉng'wa kʉpikɨɨla kʉmʉbʉlage ʉ Paʉlo. 15 Kʉlʉlo, ʉnyenye palʉng'wɨ nianza nɨla anyampala, mʉtakɨwe mʉmʉɨle ʉ mankata wamʉlete ʉ Paʉlo, mitendise kɨna mʉkʉhiya mʉkolenkeelye kɨsa inkani yakwe. Ʉsese kihambile kʉmʉbʉlagɨla mʉnzɨla ɨze wakɨlɨ kʉpika apaitɨ."

16 Ingɨ mipwa wang'wa Paʉlo naɨwija itegete ɨlɨ, wɨkalongola mitando nɨla anyambita nʉkʉnʉɨla ʉ Paʉlo itegete nɨlanso. 17 Papo ʉ Paʉlo wɨkamitanga ʉng'wɨ nʉwa akʉlʉ iumbɨ nɨla anyambita wɨkamʉɨla, "Mʉtale ʉmʉhʉmba ʉyʉ kʉng'wa mankata nʉwa anyambita, ʉkete lʉkani nʉlakʉmʉɨla." 18 Kʉlʉlo mʉtongeeli ʉyʉ nʉwiʉmbɨ nɨla anyambita wɨkamʉtala ʉmʉhʉmba ʉyʉ kʉng'wa mankata nʉwa anyambita wɨkamʉɨla, "Paʉlo, mʉtungwa ʉyo azaʉnintangile wambɨla nʉmʉlete ʉmʉhʉmba ʉyʉ kʉng'wako, kʉnsoko ʉkete lʉkani nʉlakʉʉtambʉɨla."

19 Mankata nʉwa anyambita wɨkamʉamba mʉkono ʉmʉhʉmba ʉyʉ, wɨkamʉtala kɨmpelo nʉ kʉmʉkolya, "Ʉloilwe kʉmbɨla ʉlɨ?"

20 Mʉhʉmba ʉyʉ wɨkalʉnga, "Ayahudi ipemile kɨna, mʉdaʉ akʉlompe ʉmʉtale ʉ Paʉlo kianza nikʉlʉ azedaya kɨna akʉhiya amʉkolenkeelye ikʉlʉ kʉʉlʉ ankani yakwe. 21 Ingɨ ʉewe ʉleke kʉpeng'wa nɨ antʉ awa kʉnsoko akolɨ antʉ akɨlɨnkɨɨe makʉmi annɨ amʉtungɨe mʉnzɨla. Antʉ awa ilapɨe kɨna shanga akʉlya ang'wɨ kʉng'wa kʉpikɨɨla amʉbʉlage ʉ Paʉlo. Itungo ɨlɨ akolɨ ihambile, alindɨɨe ʉagombye ilompi lao."

22 Mankata nʉwanso nʉwa anyambita wɨkamʉhʉgʉlya ʉmʉhʉmba nʉwanso, wazemʉɨla, "Ʉleke kʉmʉɨla mʉntʉ wɨhi kɨna wanganʉɨla inkani izi nʉyo wɨkamʉleka walongole."

23 Sʉnga mankata nʉwanso nʉwa anyambita wɨkaitanga akʉlʉ amaumbɨ abɨɨlɨ nɨa anyambita wɨkaaɨla, "Noneelyi anyambita magana abɨɨlɨ alongolya mpalasi nɨ antʉ sabini nɨ antʉ nɨakete ndɨlɨma magana abɨɨlɨ. Aɨle ihambe mʉkʉhega saa tatʉ ʉtikʉ ʉwʉ mʉlongole kʉ Kaisali. 24 Noneelyi nimpalasi kɨtʉʉnga nɨyʉkʉtʉmɨlwa nʉ Paʉlo, mʉmʉpishe kʉ mʉtemi Pelikisi waze mʉpanga." 25 Sʉnga ʉ mankata nʉwa anyambita wɨkamʉandikila ʉ Pelikisi balʉa nɨ lɨlɨɨye itɨ:

26 Ʉnene nɨ Kilaudio Lisia, kʉʉandɨkɨla ʉewe Mʉtemi Pelikisi, ingɨ kʉʉlamʉsha ʉdu. 27 Ayahudi aɨamʉambile ʉ mʉntʉ ʉyʉ alamʉla kʉmʉbʉlaga, ingɨ ʉnene naɨnigulye kɨna mʉntʉ ʉyʉ mʉnya kʉ Lumi, itɨ gwa ʉnene nahola antʉ ane nenda namʉgunɨɨlya. 28 Nɨkalowa kʉlɨnga nɨkɨ amʉsemee, kʉlʉlo nɨkamʉtala pianza lao nikʉlʉ. 29 Papo nɨkalɨnga kɨna amʉsemee kʉnsoko ankʉngumi mʉ makani amalagɨɨlyoao, ingɨ shanga ʉsemewe ki ikani lɨhi nɨlakʉsasha wabʉlagwe ang'wi kʉtungwa mʉkadulumu. 30 Naɨmpikɨigwe kɨna Ayahudi ipemile kʉmʉbʉlaga ʉ mʉntʉ ʉyʉ, nalamʉla nʉmʉlete kʉng'wako, nɨalagɨɨye nɨasemi akwe ilongoole kʉng'wako ɨkɨ nɨamʉsemelee."

31 Itɨ gwa anyambita nɨanso ɨkamʉhola ʉ Paʉlo anga nɨalagɨigwe, ʉtikʉ wʉwo ikamʉtala kʉ kɨsalɨ ka Antipatili. 32 Mʉdaʉao anyambita naɨalongoe na mɨgʉlʉ ɨkatulya mʉnkambɨ a anyambita, ɨkaaleka anyambita nɨɨnankɨla mpalasi nʉ Paʉlo alongoleke nʉ mʉhɨnzo. 33 Anyambita nɨanso nɨanankɨla mpalasi naɨapika kʉ Kaisali ɨkamʉpa ʉ Mʉtemi balʉa, ɨkamʉleka ʉ Paʉlo mʉwɨmɨɨli nʉwa Mʉtemi. 34 Mʉtemi Pelikisi naɨwakondya kʉlɨsoma balʉa wɨkamʉkolya ʉ Paʉlo ʉewe wɨapɨ. Naɨwalɨngasigwa kɨna ʉpembeeye kʉ Kilikia, 35 mʉtemi wɨkalʉnga, "Anga apike ɨantʉ nɨakʉsemee kʉtegeelya ʉsemelwa nʉwako." Sʉnga wɨkalagɨɨlya ʉ Paʉlo waɨkwe mʉʉkendegeeli mizʉmba nɨla kɨtemi nɨlang'wa Helode.